بيت للبيع و قريه كامله للبيع لظروف السفر والابتعاث وبسعر مغري

[حسن513]

بيت للبيع و قريه كامله للبيع لظروف السفر والابتعاث وبسعر مغري!!؟؟؟

يرويها احد كبار السن...
يقول: طلعت من هايبرماركت قبل شوي وانا بركب موتري الا اشوف هاك الاعلان
على قزاز الهايبر ماركت بيت للبيع وقريه كامله للبيع
لظروف السفر والابتعاث ؟!!!
وبسعر مغري بترافيان
وحاط رقم جواله ..........

المهم وانا ادق عليه قلت غدية بيبيع ومحتاج ونستفيد كم قرش بعد ترميم البيت
وجلست افكر وين هالحي فيه الي اسمه ترافيان ؟؟؟
مايهم يمكن من الاحياء الجديده وطقتها
وانا الي ادق
حاط صدى اغنية طلال مداح كنغمة رن (مقادير ياقلب العناء )
قلت شكله عنده ظروف قاهره والرجال غرقان لشوشته ويبي يبيع باسرع وقت
وارجع ريوس واشق الاعلان قلت لاحد يشوفه ويخرب علينا البيعه ويسبقنا
المهم
رد مرحبا
قلت السلام عليكم
وعليكم السلام
كيف حالك اخوي ان شاء الله تمام
قال الحمدلله
قلت شفت اعلانك لبيع البيت
البيت جديد ولا قديم ؟
قال جديد من بدايات 2009
قلت كم سيم وحدك يالغالي
قال منيب طماع
وتراي سمح
وانا الي اقول بقلبي غدي الدرج مفصول ارغب له وفيه مسبح وبايكه وبيت شعر
ومكيفات اسبيلت والبويه فيلفت
المهم قلت وش المواصفات
وهو الي يقول
اخوي من جد فرصه لاتفوتك قال اسم الولد الله يسلمك قلت محمد
قال هذي الموصفات يابومحمد
قريتي في ترافيان
وانا الي اهوجس واقول شكله مطنوخ راعي قرى وشاليهات ومنتزهات
قلت الله يزيدك من نعيمه
شويويقول
عدد السكان 4077
لها 6 قرى فرعية
قلت مشاء الله تبارك الله
اشتراك قوي 20 على السيرفر
ترتيب القرية 1250
فيها320 ذهب (قلت شكل البير الارتوازي يسمونه ذهب من زود غلاه )
والمطلوب 1500 ريال يالشيخ
قلت وش الي ب1500
قلت بقلبي شكله مكثر اللبن او ان البيت فيه إنَ -- وش هالسعر
اكيدانه مهوب صاحي لا بالله 1500 اكيد مهبول ولا يحسبني باستاجر يومي
وانا الي اسئله
بكم
قال 1500ريال
وانا الي اصرخ واقول انت صادق ولا تمزح
قال جاد يابو محمد ولولا الظروف قسم بالله ما ابيعها ؟؟؟
وانا الي اسئله الصك بسمك ؟؟البيت عليه مشاكل ارث او غيره ؟
الحي معتمد من الامانه ؟؟؟؟؟
الخدمات واصله؟؟
قال ياخوي انت وش فيك اي ارث واي مشاكل واي خدمات وهو الي يحطه على السبيكر
قلت شكلي احرجته والرجال حساس
قلت له
والبيت وينه فيه ؟؟؟؟؟؟
قال بترافيان
قلت وترافيان باي مكان ؟
قال ايش ؟
من قال ايش قلت شكلي غلطت قلت يالشيخ
الله يطول بعمرك حي ترافيان وين مكانه فيه ؟
قال تستهبل انت؟
قلت لا والله منيب استهبل اول مره اسمع بالحي
قال اي حي قلت الي انت باني فيه حي الترافيان
وهو يضحك واسمع ضحكات من حوله اثره حاطه ع السبيكر
قال انت ماعندك كمبيوتر قلت الا
قال ولا عمرك دخلت ترافيان قلت ابد
حدي منتديات الاسهم ؟
قال ترافيان لعبه
واشتراك السيرفر33
قلت وشوا ؟
وانا الي اقطع الخط
ويجلس يدقدق وانا الي مارديت عليه وارقام غريبه تدق ولا رديت
حسبي الله ونعم الوكيل.........

ثم ارسل لي رساله يقول فيها

((حياك الله يابو محمد على النزاله حاطين عشاء في بيتنا الجديد بترافيان ))

هههههههههههههههههههههههههههه

بجد اولاد عفاريت ..........


تحياتي لكم.......

[أم ورود]

هههههههههههههههههههه

صراحه حلوه
مسكين مصخروه

[حسن513]

نورتينا اختي ام ورود بطلتك العطرة وشرفتينا بكلماتك الحلوة الله يحفظك.