قالوا عيش

[أحمد عبدالله]

قالوا عيش
قلت مفيش
لقمة عيش
لا خبز لاقي
وأنا مش فدائي
أروح طابونة
ولا أنا قادر ادفع بقشيش
قالوا لي شكلك مفتري
حقود وعامل عنتري
خبز ايه اللي انت جاي تقول عليه
دي موضة راحت وانتهت
قول اتنست واتبدلت يا بن الايه
دلوقتي شعب المحروسة
عايش بياكل بسبوسة
------------------
قالوا لي عيش
الميه حلوة وموجودة
قلت مفيش
قالوا مش مصدق
اسأل عمك أبو جودة
رحت من الفجر
وسألته وعيوني بتبكي
من كتر القهر
فين الميه ... فين الميه
قال يا حبيبي
روح اشرب م البحر
شكلك أعمى
وما تنفعش تبقى في مصر
------
قالو عيش
قلت مفيش .... مفيش ..... مفيش
قالوا شكلك حاضر درس
فبلاش تهويش
ودا ما يصحش ...ودا ما يجيش
اهدا وروق
خلي كلامك حلو مزوق
يا إما ... تعالى يا شاويش
وبورش وخيش وكمان براطيش
وغصبن عنك هتعيش
--------------------

قالوا عيش
شوف ، اسمع ، اقرا
بس عيش
بسياسة التطنيش
اشرب بانجو ، شد حشيش
هلب ، قلب ، اسرق
املا جيوبك بقشيش
يالله يا ابني
الحق عيش
--------------
قالوا عيش
خدام أسيادك
أهل الذمة
أهل الطرابيش
هما الأدرى
هما الأحسن
هما النعمة
من سبحانه
وانت تموت
انت تعيش
تلبس هدمة
تلبس ريش
خلي الدنيا في حالها يا سيدي
وارضى بحالك .... غني وعيش

[AnGeL SenSe]

ايه يا عم الكلام الجامد دة كلمات نابعة من قلب مقهور بجد كلمات جميلة اوي تقبل كل شكري اختك angel

[sokara]

هههههههه كلمات رائعه بسهولتها وبساطتها
تحمل عناء وقهر الشعب المصرى
بكل مافى قهر وظلم ولكن نرى ان مصر ام الدنيا
رغم مانلاقى فيها
فهى الام مهما تقسى لن تجد احن منها فى الوجود
وحتى تعرف قيمتها اسال اللى عايش ومتغرب
هيقولك ام الدنيا الغنى فيها بياكل والفقير كمان
والعزة والكرامه على ارضك يامصر
هنقول عايزين ناكل بسكوت
هقولك نموت واحنا فى سكوت
لكن نحيا بعزتنا جوا بلدنا
تقبل خربشتى على صفحتك الرائعه بروعه بساطتها
تقبل تحياتى ومرورى