ايه رايكم في القمة 105

[لؤلؤة المصرية]

ازيكم
ايه رايكم في القمة 105
الاهلي والزمالك انتهت بالتعادل الايجابي 3 / 3

بجد كل واحد / ة يدخل يقولي راية ايه ولو كان زملكاوي او اهلاوي يقول



انا اهلاوية وطبعا الاهلي دايما عمرة ما يخلي الزمالك يتهنا ببطولة لان الفوز عرف طريق الاهلي

جود لاك يا زمالك

تحياتي
لؤلؤة

[حياتي ذكريات]

لا طبعا الزمالك هو اللي كان يستحق
لو كنا جبنا الجون الرابع بس كنتو اتهزئتو
بس زي ما اتعودنا الاهلي فريق محظوظ جدا
وكان فيه ضربة جزاء في الدقايق الأخيرة للزمالك
لو كانت اتحسبت كان الماتش هيتغير خالص

[شوشو 22]

بما انى زمالكويه
فالزمالك هو الاحق بالفوز لعب مبارة جميله جداااااااا
وكانت فى ضربه جزاء ومتحسبتش الاهلى فعلا محظوظ

[game010]

معلش هو فعلا الذمالك يستحق الفوز بس الاهلى مش محظوظ وبعدين محمد فتح الله مطلع كورتين من على الخط مين الى محظوظ بقا وكمان ضربه الجزاء دى اساسا الكوره تسلل
اهلاوى حتى النخاع

[hasna2010]

اولا انا اهلاويه ومتعصبه للاهلى اوى
لكن الزمالك كان الافضل فى الماتش
ولكن ده علشان الاهلى مش فى مستواه والكل عارف كده
والماتش كان سريع وممتع جدا والحمد لله والفرقتين ضيعوا فرص لا تضيع ولكن الزمالك ضيع اكتر
واللى بيقول ان فى ضربه جزاء يتفرج على اعاده الماتش بكره وهيعرف ان اللعبه تسلل
وفى النهايه استمتعنا بماتش جمبل والتعادل مرضى للجميع
شكرا ع الموضوع

[ARAGON]

بالعكس كل شخص بيشوف المباراة من منظوره

الافضل في المباراة هو الأهلي.. ولكن الزمالك لا يقل افضلية عن الاهلي في هذا المباراة

عذرا للجميع . . أنا لا أحب المجاملة ..

تعليقي في قمة الحيادية .. لكن ..؟

المباراة ادائها كان مميز من الفريقين .. والأهلي .. كان له الكلمة في المباراة رغم التآخر في احراز الاهداف

ورغم كونه هو صاحب التعادل في المرات الثلاثة .. لكن ..

لو كان الاهلي صاحب الهدف الأول في المباراة لاختلفت المباراة بكل المقاييس..

فكان الاهلي سيملك المباراة في كل دقائقها.. ولكنها اختلفت بتقدم الزمالك الامر الذي جعل كل الامور تسير بقمة الاشتياق لمتابعة المباراة للنهاية ..

هذا الأمر ليس ابخاسا لحق الزمالك في المباراة .. ولكنه ما لوحظ.. المباراة كانت شديدة الحماسية ..

وكلا الفريقين كان لهما الاثر الايجابي في كل الاوقات

ولكن .. ما حدث .. كان ايجابيا جعلنا جميعا نخرج بمباراة لا تقل مقارنة بين مباريات الديربي الشهيرة

في هذا العام .. واعتقد بأنه سيتم تصنيفها لتكون ضمن أقوى الدربيات في العالم هذه السنة ..

واعتقد .. أنها ستكون صاحبة المراكز من الثانية إلى الخامسة في تصنيف الدربيات

شكرا على الموضوع

خالص تقديري وامتناني

[mohamed love]

شكرا ليكي ع الموضوع الجميل ده
تسلم ايديك


بس الاهلي كان يستحق الفوز اكتر
والاهلي هيفضل طول عمرة الاهلي مهما حصل

[اهلاويه جامده]

ياجماعه انتو ناسيين ان الاهلي كبير وكمان ضيعنا كورتين جول ع طول

والاهلي فريق لايقهر بطل الدوري ع طووووووول

وكمان ضربه الجزاء دي تسلل

تيجي ازاي بقى

وياريت تشوفوا كوره عماد واحمد غانم لما وقعوا بعد الخط

وشكرا ع الخبر ياقمرايه

ومبروك علينا الدوري مش التعادل لان الاهلي معودنا ع الفوز

والزمالك لعب مباراه رائعه والاهلي كمان مش بييأس

[لؤلؤة المصرية]

شكرا يا اجمد اعضاء بس لحد دلوقتي الاستفتاء نص نص مش شايفة لسه حد متقدم ربنا يستر
ههههههههههههههههههههههه

[اتيتو]

تعليق بدون تعصب زي احمد

ازاي الاهلي له الكلمة العليا وهو كان بيبحث عن التعادل طوال الـ 90 دقيقة بداية من الدقيقة التانية بهدف جعفر وحتي الدقيقة 92 بهدف بركات التعادل !

والفرص الضائعة من الزمالك . احمد جعفر شيكابالا حسين محمد وضربة جزاء هتقولي اوفصايد هقولك راجعة من المدافع الاهلاوي . يعني زي جول اتحاد الشرطة في الزمالك ولكن التحكيم كان ممتاز وهذا ليس ابخاسا من حق التحكيم .

اجمالا الزمالك بحاجة لمهاجم سوبر لان جعفر بيشلني . وان شاء الله الموسم القادم للزمالك

شكرا ليكم