الشتيمه ... | سلاح من لا سلاح له |

[هاجر الاسمعلاوية]

السلام عليكم ورحمة الله وبركاته

مساء الخير جميعاً

في ظاهرة تخوف حقيقي حاصله في المجتمعات العربيه بشكل يرثى لها


زمان كان اخر البني ادم لما يحب يشتم يعني

يقول الله يلعنك

سوري يعني بس دي شتايم زمان كان كبيرها الكلمه دي

دلوقتي بقى

الواحد يحس ان في ثوره عارمه من الفساد الاخلاقي والانحطاط في صياغه الشتيمه !

يعني الواحد يكون فاته حلقه برنامج في الــ tv ويقوم جايبها ماليوتيوب

الله

طب برنامج عادي يعني ونقاش بين فنانين

ايه لازمه كومينتات الشتايم

وياريت شتايم بسيطه ممكن الواحد يبلعها

لا

شتايم بالاهل

مممممممممممم

الواحد يستغرب حقيقي يعني

يا ترى هل الناس اللي بتشتم دي درسوا الدين ولا يجهلوه

تشك وممكن تبقى على يقين انهم جهله

ولكن للأسف اكيد محدش بيقعد عالنت جاهل

لازم في مدرسه او جامعه

طب يا ناس

انتوا مش عارفين ان اللي يشتم ويسب بالكلام الكبير دا والقبيح حقيقه

انا اسفه عالتعبير

يعتبر سب وقذف!

ارجعوا كدا للاحاديث انتوا بنفسكوا

وشوفوا عقاب اللي يسب ويقذف برئ او بريئه

حسابه ايه عند ربنا

انا مش هجيب العقاب
لا

دوروا انتوا بنفسكوا واعرفوا

يا جماعه الشتايم المبتذله اصبحت متداوله بشكل يخيف

وكأن الواحد بيقول للتاني ازيك عامل ايه تمام وكدا
عادي خالص
بقت مباحه بين كل الاعمار

يعني الواحد ذنبه ايه يتفرج على كلام زي دا

طب انت او انتي

مالك بتشتم الناس او الفنان او او او او او

مش عاجبك خلاص اقفل النت او التلفزيون

انما متشتمش الناس بشتايم انت اجهل واقل عقلانيه من انك تستوعب حسابها عند ربنا

يا جماعه الكلمه محسوبه علينا والله

انا قربت احس ان في ناس متخصصه عالنت


اختصاص سب وقذف والله

مش ممكن

اي نيله او اي حدث اي خبر ينزل

اي حد معجبوش

يقوم سابب فلانه وفلان ووووو

طب ليه

هو انت معندكش الجرأة انك تقول رأيك بشكل سليم وعقلاني وحضاري

والله الناس هتسمعك ويقبلوك وسطهم مناقش ومحاور

انما هتقل ادبك دا لو كان فيك ادب اصلا

اكيد محدش هيعيرك اهتمام وانت من جواك لازم في يوم هتحس بإنحطاط أخلاقي

طب اللي بيشتم دا انا نفسي اسأله سؤال

هو انت لما بتشتم الناس كدا

يبقى مليون في الميه اهلك مشتومين واخواتك وكل افراد الاسره

لان مش هتجيك الجرأة انك تشتم حد
إلا لو اصبح الامر سيان عندك ومش فارقه

عيب والله يا جماعه

حقيقي عيب

يعني اد ايه بزعل

لما بتنزل كلمه مبتذله فى السايت او في اى موقع اخر

بفكر مع نفسي
يا ترى اللي قالها

مش مكسوف من نفسه

طب معندوش اخوات ولا والده كريمه يحترمها على الاقل

على فكرة اللي بيشتم دا
بيسئ في المقام الاول لاهل بيته

لانه بيعرضهم لان اي حد يشتمهم بالساهل

الناس هتقولك طالما بتشتمنا هنشتمك احنا كمان

الناس الغبيه يعني اللي ترد السيئة بالسيئة ومعندهاش تفكير

طب انتوا اتنيلوا اتخانقوا وخلصوا خناقه

تدخل سمعة اهلك في النص لييييييييييييه

حد يفهمني

حقيقي انا متنرفز قوي قوي من الحكايه دي

لان الواحد مكنش بيشوف كميه الكلام المبتذل دا

دلوقتي لو هتجيب حلقه برنامج طبخ حتى

تلاقي فيها شتيمه

الواحد عايز يجيب كليب ولا حاجه

يلاقي شتيمه
اتقوا الله يا ناس في السنتكم

وشوفوا عقاب اللي يسب ويقذف الناس ايه

وفكروا ان اللي في يوم هيشتم حد

فــا دا استهان بأهل بيته وسمح لناس ولا تسوى انها تتكلم في عرضه بكل وجه حق

فكروا

واتمنى من قلبي
ان اي حد بيستخدم النت

وكان في طبعه يشتم بألفاظ غير لائقه

يبطل

حقيقي

دي مشكله جيل بأكمله

والحل في ايد كل شخص مدمن على الكلمات دي

[فرولة]

اولا تسلم ايدك لان الموضوع كويس وفعلا يستحق النقاش
بجد الشتيمه بابشع الالفاظ بقت منتشرة كانها موضه جديده وكل الساعين وراء الموضه اقتنوها
ودى حاجه بتجرح اسماع ناس كتير مش عاوزه تقول كده ولا تسمعه حتى
اما بالنسبه للى بيشتم الناس
فى مثل بيقول قليل الادب بيجيب لاهله اللعنه
وتسلم ايدك

[فيروزه]

	معاكي حق والله ياهاجر الشتايم بقت اكتر من الكلام نفسه وبقينا نسمعها عمال علي بطال مش عارفه ااقول ايه بس ؟؟ غير ربنا يهدي الجميـــــــــــــع وتسلم ايديكي علي الموضوع داااا

[حياتي ذكريات]

السلام عليكم

عندك حق في كلامك يا هاجر

انتي عارفة كمان دولوقتي اللي بستغربه اما مثلا

اكون في مكان عام والاقي مثلا شاب جاي بيقابل زميله

يقوله ازيك يا ويقول شتيمة .. حاجه غريبة بصراحة

الناس دولوقتي بقت تعاملها كلها بالشتايم

حتى مثلا لما بكون قاعده مع بنات زمايل ليا

بستغرب ان نص كلامهم شتايم والمشكلة الادهى

انهم بيقولو كلمة اللعن كتير .. وبجد اللعن مش قليلة

يعني الكلمة عند ربنا عظيمة جدا ..

الغريب في الأمر بقى ان زمان ما كانش فيه تعليم كتير

بس الكل بيحفظ لسانه .. دولوقتي مع انتشار التعليم

في كل مكان والغالب مننا معاه شهادات وللي لسه بيدرس

وتلاقيه بيشتم كتير وألفاظه مش حلوة

تسلمي على طرحك الجميل .. خالص تقديري وودي

[SiLver Spectra]

ثقافة الشتايم
بنتربى على الشتايم

الشتايم موجوده في اي مجتمع
بس المصريين بالأخص
الشتايم عامله زي السلام بتكون في بدايه الكلام
و في وسطه و اخره و في كل حته

باقيت جزء من الثقافة للاسف

موضوع قيم يا هاجر..

[جميلة مصر]

ميرسى عالموضوع المهم وربنا يهدى المسلمين

[rehoba]

صح لسانك يا هاجر

فعلا الشتيمة اصبحت آفة فى مجتمعنا

وبسبب وبدون سبب خاصة بين السائقين

تسلم ايدك على الموضوع

[ŘǾnỳ ĊŰtỷ-Xx]

تسلمى على الموضوع الرائع
وأحب أقول( لسانك حصانك ان صنته صانك وان هنته هانك)

[ڪــــبرياء الروح]

يعطيك الف عااااافيه

[حلم كل فتاه]

كلمات جميله