ضحيه جديده عم عبدالسميع صابر 60 سنه

[خارج عن القانون]

ضحيه جديده عم عبدالسميع صابر 60 سنه



ضحيه جديده من ضحايا التعذيب في اقسام الشرطه
الحكايه عرفتها من النت وكانت اخبار وكلام متضارب ومن غير مصدر بس وصلت لرقم بنت الضحيه اسمها رضا كلمتها وفهمت منها اللي حصل لوالدها واتفقنا علي معاد اقابلها ونسجل وهي بتحكي اللي حصل لأبوها

انا كنت متحمسه جدا لمقابلتها خصوصا انها في التليفون كانت مش خايفه و وافقت تسجل وتتكلم وقولتلها تجهز صوره لوالدها ونسجل مع اهله ولو فيه شهود شافوا اللي حصل مع رئيس الحي، وقالتلي مش هنسيب حق ابونا وحكتلي بالتفصيل حكايته في التليفون خاصة بعد ما الكلام بدأ يتنشر انه صاحب عربيه كبده وكانت خناقه مع الحي

الحكايه الحقيقيه من بنته رضا

عم عبدالسميع صابر 60 سنه عنده 6 بنات منهم رضا
عنده كشك قدام الحي واخده من 40 سنه وهو مصدر رزقه له ولعياله
مره رئيس الحي( الليثي) معدي مش عجبه منظر الكشك نزل هو والمهندسين و طلب إزاله الكشك .عم صابر قال له ازاي ده مترخص والورق كله موجود وسليم بس رئيس الحي طبعا أمر بالإزاله وجاب البلدوزر وشال الكشك

عم صابر كل جريمته انه قاله حرام عليك هجيب عشايا منين انا وعيالي هأكلهم منين
وطبعا معالي رئيس الحي اتضايق و خلي المهندسين ياخدوه القسم وعمل له محضر تعدّي علي رئيس الحي والمأمور قعّده شويه في القسم وخرّجه
و روّح وهو مش عارف هيجيب منين عشاه وعشا عياله بعد ما أزالوا الكشك

قرر انه يقعد في الشارع اللي كان فيه الكشك ..بس حتي الشارع حرموه منه ؛ رئيس الحي كان معدّي و لقاه قاعد في الشارع قال له انت تاني؟ قوم من هنا

وخلّي المهندسين يمشوه بالعافيه
الجريمه الشنعاء اللي ارتكبها عم صابر ودفع تمنها حياته انه قال لرئيس الحي إيه الافترا ده انت راجل مفتري
و دي كانت آخر جمله قالها عم صابر وهو بيدافع عن لقمة عيشه مش بيطلب تعديل دستور ولا بيطلب إنهاء حالة الطوارئ ولا بيطلب إسقاط نظام فاسد ومنظومه فاسده مع إنها مطالب مشروعه لكنه راجل ماشي جوه الحيط

كل اللي طلبه هو الكشك اللي بياكل منه وبيأكل منه عياله
رئيس الحي معالي الليثي باشا خده القسم و وصّي عليه ، دخل قسم أول مدينه نصر وخرج منه في اليوم الخامس جثه مشوهه

خلال 4 الايام كان بناته وولاده بيسألوا عليه في القسم وليه حاجزينه يقولهم تشابه اسماء وبيكشفوا علي إسمه وهيخرج

طيب عايزين نشوف والدنا ونتطمن عليه ده راجل كبير دخلوله أكل..بيردّوا عليهم بإهانه وممنوع وبره ولا تتدخلوا معاه

ويخرجوا من القسم ومعاهم امل ان والدهم هيخرج معاهم تاني يوم.. لحد اليوم الخامس..القسم كلموا أهله وقالولهم تعالوا استلموا جثة والدكم والبقاء لله توفي
أصله وقع علي الأرض اتخبطت ومات
استغربوا معاملة الظباط ليهم بعد الإهانه في الأيام الاولي، دلوقتي بيعاملوهم كويس وبيقولولهم اسرعوا في إجراءات الدفن والبقاء لله وإكرام الميت دفنه والكلمتين اللي عارفينهم دول

دخلوا يستلموا جثة والدهم برغم الحزن والوداع من غير سلام لكنهم مؤمنين بالله وقالوا قدره ودخلو شافو والدهم لكن الصدمه كانت اكبر من خبر وفاته

الصدمه ان والدهم 60 سنه.. دماغه مفتوحه وعلامات ضرب علي ضهره وجسمه وطفي سجاير في رجله وضهره

ابنه انهار وبناته انهاروا لما شافوا والدهم وآثار التعذيب علي جسمه والدكتوره قالتلهم انه مات من التعذيب والخبطه علي دماغه بآله حاده أو بالطبنجه مش وقعه علي الارض زي ما بيدعوا

الحكايه وقفت لحد هنا وقالتلي انا عايزه اجيب حق أبويا قولتلها حق ابوكي وحقنا كلنا هناخده ومش هنسكت وحددنا معاد الساعه 6م
ورحت المعاد انا و زميلي
العزا كله لو 30 بيعزوا ف28 واحد مخبرين وظباط من ال30

المنطقه كلها متلغّمه مخبرين وظباط في العزا وفي الشارع
انا دخلت عزا السيدات عزيتهم ورضا قالتلي تعالي وخدتني علي جمب قالتلي محدش يعرف هنا اللي حصل احنا بس بناته اللي نعرف ، قلتلها طيب تعالي نطلع فوق نتكلم و نسجل طبعا عينها مش في راسها عينها علي المكان وعلي المخبرين ومرعوبه
قولتلها يالا يا رضا قالتلي طيب مش تتطلعي صورتي صوت بس قلتلها طيب وجت واحده متعصبه فالبدايه وانتي مين وعايزه ايه ومش عايزين صحفين هنا قولتلها انا مش صحفيه انا من شباب 6 ابريل وهنزل موضوع والدكم واللي حصل له في موقع علي النت وفضلت ساعه احلفلها اني مش صحفيه ولا بعمل ده بأجر خصوصا انها كل ما امسك الموبايل تترعب وتقولي لو صورتي هرفع عليكي قضيه واتكلمت معاها بهدوء وفهمتها انه لازم تتكلم ولازم نبطل خوف وده في مصلحتها ومصلحه ابوها قالتلي كل اللي حواليكي و بيبصولنا دول مخبرين وظباط امشي من هنا احنا مش ناقصين مشاكل ، وعرفت من رضا انهم متتهددين وراعبينهم وخايفين يتكلموا او ينطقوا وكل شويه تيجي بنت من بناته تقول لاخواتها اللي واقفين معايا احنا قولنا ايه قولنا ده قضاء ربنا والحمد لله راضيين

..اتفضلي امشي من هنا احنا مش ناقصين مشاكل لو مش خايفه علي نفسك احنا خايفين وخسرنا ابونا ومش عايزين نخسر ولادنا او رجالتنا والوحيده المتفهمه هي رضا قولتلها احنا متفقين نصور وتتكلمي ونفضحهم لازم تفضحوهم ، انتوا اصحاب حق انتوا الأقوي خايفين من ايه
و رضا متحاصره منهم زيي بالظبط وممنوعه تتكلم معايا حتي بكمية الحجج اللي عملتها عشان آخد رضا لوحدها وهما حواليها ويقولولي امشي من هنا..اتكلم معاهم تقولي حقنا هناخده ولو مش بالقانون احنا صعايده وهناخده بطريقتنا

بدأ المخبرين ينتشروا والظباط المدني قررت اني مش استسلم لخوفهم ودخلت لعزا الرجاله لقيت زميلي ومعاه ابن الضحيه بيحكيله اللي حصل لما شاف جثه ابوه
قعدت معاهم و قولت له تسجل وتحكي اللي حصل ولا خايف زيهم؟قالي وطّي صوتك عشان اللي في وشنا دول مخبرين وظباط وهسجل معاكم وانا مش خايف وفعلا خدناه وقمنا من العزا وخدنا كرسين وهو بيكلمني بصوت واطي بيحكيلي التهديدات والرعب اللي شايفينه من ظباط القسم ولو اتكلمو هيلبسوا قضايا بس برضه الولد مش خايف واول ما الكاميرا طلعت المخبرين والظباط قاموا ، واخته جت زعقت جامد جدا وقالتلي برضه انتي تاني امشي من هنا ولو صورتي صوره واحده انا هرفع عليكي قضيه وانا برضه بقنعها انها لازم تتكلم قالتلي باعلي صوت بره امشوا بره وربنا لانده الظباط والمخبرين واسيبهم عليكي امشي من هنا ..الولد أخوها زعقلها قالها محدش يقدر ييجي جمبهم واهلها اتلموا واعتذرولي و قالولي اني لازم اقدّر حالتها ، انا مقدره بس مخنوقه انها خايفه تتكلم قالتلي بره امشوا من هنااا والمخبرين والظباط بيتفرجو والاول مش كانو موافقين اتكلم مع ابنه او يمشي معانا بس لما هي عملت كده وكشفتنا الولد خاف علينا وقاللهم هطلعهم علي اول الشارع

وطلعنا ببركه دعاء الوالدين وابنه قال لنا علي التهديدات ويلبسوا قضية مخدرات او سلاح وكمية الرعب اللي هما شافينه بس مش هسكت ولازم اخد حق ابويا وهخسر ايه انتي عارفه يعني ايه اشوف ابويا في سنه ده ابويا اشوفه كده علامات الضرب والسجاير في جسمه ودماغه محفوره نص ايدي تدخل جوه الحفره اللي في دماغه
ده ابويا عمل ايه عشان يعملوا فيه كده كانو بيتسلوا عليه ال 4 ايام بس وربنا ماهسيب حقه مهما عملوا يلبسوني قضيه يموتوني برضه مش هسيب حقه ..كان بيتكلم بانهيار وطبعا المخبرين واقفين واتكلمنا معاه و خدنا رقمه وقال لنا هنتقابل تاني بس مش هنا ووعد مش هسيب حق ابويا ولازم تقفوا معايا وخلوا
بالكم علي نفسكم أوي وأهله بدأوا ييجولنا والمخبرين طبعا راشقين في كل مكان

وخرجنا من المنطقه وركبنا العربيه واحنا العين كلها علينا
لكن طول الطريق انا و زميلي بيدور في دماغنا نفس السؤال
الخوف ممكن يعمل كده في الناس؟؟
طب الخوف والرعب اللي هما عايشيينه ده من مين؟؟
من اللي المفروض بيحمونا
اللي المفروض هما اللي يحسسونا بالأمان
لكن راح الأمان مع نظام مبارك الفاسد
طول الطريق واحنا بنفكر الناس دي ممكن فعلا تاخد حقها؟؟
الناس دي اهلي واهلك لا هما من كبار واعيان البلد ولا هما من حراميه البلد
اهلي واهلك اللي ماشيين جنب الحيط وبيدور علي اكل عيشهم
عم صابر برضه بيدوّر علي أكل عيشه ومات مشوه
مات غدر
مات متعذب
مات وذنبه في رقبتنا
هنعرف نجيب حقه وحق خالد وحق الآلاف اللي في الأقسام و والسجون وكلاب الشرطه بيتسلّوا عليهم وبيمارسوا أبشع انواع الشذوذ وهما عارفين انهم أقوي و إنهم في حماية الكلب الكبير العادلي وممكن كمان ياخدوا مكافأه لو حكاية عم صابر فضلت مدفونه معاه

لكل ظباط الشرطه والداخليه
بتحس بإيه وانت بتضرب وبتعذب وبتقتل راجل ممكن يكون مكان ابوك او شاب ممكن يكون اخوك او بنت ممكن تكون اختك
بلاش مكان اخوك وابوك واختك بما انكم من مخلوقات عصر مبارك يعني مخلوقات من عجينه غير البني ادمين
احساسك ايه وانت بتعذب بني ادم كل جريمته انه طالب بلقمة عيشه له ولأولاده؟؟
احساسك ايه وانت بتقتل الأمان جوا بناته لما حرمتهم من ابوهم؟؟
احساسك ايه وانت بتعذب شاب وبتتفنن في قتله وتشويهه ، و هو كل جريمته انه قالك انا متربي مش ابن كذا وكذا وانت بتقتل امه وابوه كل يوم الاف المرات

لو النهارده قدرتوا تخوفوا أهل صابر أو غيرهم فوعد بكره الخوف هيتحول لثوره والدور جااااي عليكم


منقــــــــــــــــــــــــــــول

[ڪــــبرياء الروح]

لا اله ا لا الله
اللهم اكفيكم شرهم واهديهمّّّّ

[The heart]

لا حول ولا قوة الا بالله
الله يصبرهم ويحميهم منهم

[فرولة]

لا حول ولا قوة الا بالله
انا لله وانا اليه راجعون
حسبى الله ونعم الوكيل والله بجد ملقتش وانا بقرا الموضوع غير الدموع اللى ملت عينى ونزلت على خدى
انا اتخيلت ان الراجل اللى مات ده جدى او ابويا وبتخيل كل شاب بيموت انه اخويا
حسبى الله ونعم الوكيل
اللهم لا تؤاخذنا بما فعل السفهاء منا يارب العالمين
اللهم اجل حسابهم الى الاخره لان حساب الدنيا لن يكفيهم
اللهم سلط عليهم بذنوبهم من لا يخافك ولا يرحمهم اللهم امين
لا حول ولا قوة الا بالله
سلمت يداك

[فيروزه]

	انا مش عارفه اقول ايه بس (لاحول ولا قوة الا بالله ) حسبـــــــــــــي الله ونعم الوكيـــــــــــــــــل

[Rony cool]

السلام عليكم ورحمة الله وبركاته

امبارح خالد والنهارده عم صابر وبكره وبعده وبعده وبعده يا ترى هيكون مين ابويا وأخويا ولا ابوك

واخوك ولا انا ولا انت كل شئ بقى جايز فى الظلم اللى بقينا عايشين فيه وبنشوفه كل يوم

راجل عنده 60 سنه يتعمل فيه كده وكمان ولاده مش عايزين يتكلمه

احنا هيفضل يتعمل فينا كده ليه لإننا زى ما كل العالم بقى بيقول علينا شعب جبان واسفه لو بقول

اللفظ ده بس دا رأى العالم كله فينا

لما خالد اتقتل عاملنا ايه طلعنا الشارع وزعقنا شويه إيه إللى حصل ولا اى حاجه لإن المسؤلين

مش شايفينا أصلآ والموضوع بكره يتنسى ويرجعه يمارسه هوايتهم تانى اللى هو عذابنا وقتلنا

مش عارفه المناصب والفلوس بتقتل قلوب الناس كده هما هياخدوا معاهم إيه والله ولا حاجه .

آاااااااااه من النار اللى جوانا

ربنا يرحمنا برحمته ويعدينا من الدنيا دى على خير

اللهم لا تؤاخذنا بما فعل السفهاء منا يارب العالمين

مشكور أخى على الموضوع إللى حرق دمى اكتر

تقبل مرورى

[ZoZa 2010]

ربنا يخلصنا من الكلاب دي

دول مش بشر والرحمة معدومه في قلوبهم

حسبنا الله ونعم الوكيل

[عازف الاحساس]

لا اله الا الله محمد رسول الله

يا محمد مانت نزلت موضوع خالد واتحذف وممكن الموضوع دا كمان يتحذف
محنا خلاص بقينا نخاف من الحق بقينا واحد جبان
بيسيب حقه وحق اخوه يروح ظلم
حتى الرسؤل عليه افضل الصلاة والسلام قال ( الساكت عن الحق شيطان اخرس)
احنا هنفضل كده بنسكت على حقنا امتى هنفوق وامتى هنصح ونكون روح واحده نخاف على بعضنا
بس واحد جبان وخايف ممكن يودي واحد عوز يقول الحق في دهية عشان نفسة
عشان كده الحكومة لسه هتعمل فينا ياما
امبارح كان خالد الشاب الي ملوش ذنب
والنهاردة عم صابر
ومن شهرين ونص فاتو بس ديه انا حضرتها وشوفت جثة الشاب دا بعيني
محمد الله يرحمة شاب محترم جداا شغال في شركة سيد للادوية وحيد امه موته في قسم العمرانيه
وبعد مامات انه رفعت شكوى عشان يخلوها تسكت قالولها هنطلعك الحج على حسبنا
يانهار اسود
بيرشو امه بحاجة دينيه دايه الهبل دا
ويقولك فرعون كان طاغيه امال الي الحكومى بتاعمله دا ايه
ياجماعه فوقو بقاواصحو احنا بقينا بني ادمين مش بني ادمين
في امريكا عندهم عالم الرفق بالحيوان احسن كثير من عندنا في عالم الرفق بالانسان
اييييييييييييييييييييه تاني
خلونا من غير كرامه خلونا بنموت من الجوع عملين يسرقو فينا وكل دا واحنا ساكتين
كمان هيقتلو فينا بالظلم ونسكت امتى هنفوق بقى امتى
ناص نخليهم يغتصبو نساائنا وبناتنا وكمان لو عملو كده برضوا مش هنفوق
لاننا خلاص بقينا واحد جبان الجبن في دمه
انا بقول كلامي دا ومش خايف من حاجة وعارف ان الادارة هتحذفه عارف كده كويس
وممكن يحظروني كمان بس دا كله مش مهم لاني مش خايف من حد انا خايف من ربنا
الي هينتقم من الي بيسكت عن الحق وبيظلم وبيجي على الي بيقول الحق
بس الادارة لو حذفته يبقى هي اول ناس بتكست عن الحق

وربنا ينتقم من اي واحد جبان واي حد ساكت عن الحق

استغفر الله العظيم

ايه حرقة الدم الي الواحد بيشوفها ديه


تحياااااااااااااااااااااااتي

هشـــF@reSــــام

[خارج عن القانون]

لى باذن الله باك علشان اعقب ع كل الردود

بس انا دخلت قبل ما انام علشان ارد ع شخص واحد بس

F@reS ElA7zAn

مستر اتش

سبق وقولتلك يعجبنى فيك صرحتك اللا متناهيه

وفقك الله ونصرك ع كل ظالم وساكت عن الحق

ولكن كما قلت اعتقد انه سيتم حذف الموضوع وردك وردى

ومن الممكن ايضا ان يتم ايقاف عضويتنان نحن الاثنان

واذا تم الايقاف فهذه ستكون اخر جمله اكتبها

حسبى الله ونعم الوكيل ع كل ظالم وع كل مفترى

وع كل شيطان اخرس

هذا خطى فتذكرونى لو كنت حى فكلمونى

ولو كنت ميت فارحمونى

[الأميرة منة]

لاحول ولاقوة الا بالله مش كفاية خالد

ميرسى محمد عالطرح