مدونة هبة فاروق دوخينى يا لمونة فركش ((جامدة جداا))

[هبة فاروق]

:cv40:مدونة هبة فاروق دوخينى يا لمونة فركش ((جامدة جداا))

انا حقولكم كلمتين ورزقى على الله انا شايفة ان الرجالة اليومين دول شايفين نفسهم على
الاخر كل واحد منهم يحط رجل على رجل ويتشرط لما يتجوز لازم تكون العروسة مية مية
وعلى الفرازة ويقول عايزها جميلة رشيقة ,متعلمة ولو من عيلة غنية يبقى عز الطلب اية يا عم ولو مفيهاش كل دة تعمل اية تركن جنب الحيط وتبقى زى ازازة الخل لا بتهش ولا بتنش
هى العوانس كترت من شوية ما علينا نبدا قصتنا اربطو الاحزمة وامسكو نفسكم حنبدا



كان ياما كان كان فى شاب عادى وعادى جدا زى كل الشباب اتخرج واشتغل وبدا يدور على عروسة وكان بسلامتة وحيد امة حبيب ماما الحيلة اللى كانت فى الرايحة والجاية تقولة يا ابنى
اصبر لكن هو كان يعمل مش سامع وفى بوم فأجئها انة خلاص لقى اللى بيدور علية زميلتة
صافى عروسة نقاوة فيها كل المواصفات العالمية يعنى واخدة شهادة الايزو طيب ياعم مبروووك
لقيت اللى بتحلم بية وتمت الجوازة


وكان حيطير من الفرح قد اية هى جميلة وذكية ومثقفة وست بيت مية مية لكن يا فرحة ماتمت فاتت سنة ومهلتش البشاير


والبية مستعجل وطبعا الست الوالدة مش صابرة وطبعا الزن على الودان امر من السحر فضلت تقول الافندى لالا يا بنى دة كتير قوى انا عايزة افرح بولادك حوليا قبل ما اموت وبعدين هو مش
العيب طلع منها خلاص سيبها يا بنى يعنى اللى خلقها مخلقش غيرها ((البنات على قفا مين يشيل ))
وسمع المحروس كلامها طيب مش كنت تصبر شوية ياعم لكن حقول اية اصل صاحبنا مش فارقة معاة اصل البنات كترت اووووى وقرر الغندور يطير صافى ((وطارت صافى مع العصافير )) وبدا الغندور يدور من جديد على عروسة تجيب ولى العهد المنتظر


الزوجة التانية *
*سوسن تنقية الست الوالدة ام المحروس اللى فى يوم قالتلة خلاص يا حبيبى لقيتها قالها مين قالتلة سنسونة بنت الجيران
قالها ومالة سوسن حلوة اوى دة حتى يبقى الانتاج حلو وبسرعة تمت الجوازة ومر شهر العسل بسلام طبعا سوسن ملاك مكسوفة على
طول عروسة جديدة بقى ومبتتكلمش خالص وبدا صاحبنا يغنى ((يادى النعيم اللى انتى فية يا قلبى )) اية الحلاوة دى لكن سوسن مش
قادرة تمسك نفسها بقى بدأت سوسن تفتح فى الكلام تقولش ماسورة وانفجرت فى الكلام اول ما يدخل صاحبنا من باب البيت تستلم الزبون وهات
يا كلام ورغى فى الفاضى والمليان لغاية ما يخرج هربان منها وبدا صاحبنا يزهق من عيشتة مع سوسنة وراح للست الوالدة هربان
الحقينى ياحجة انا تعبت خلاص مش حقدر اكمل معاها تقولة طيب والعيال يقولها ((دى اخلف منها )) دى لو قعدت معاها اكتر من كدة
حتاكل ودانى يرضيكى امشى من غير ودان وبعدين دى لو جبت منها عيل حينزل العيل بيتكلم لوحدة قالتلة لا ياحبيبى ميرضنيش قالها
انا عايز المرة الجاية عروسة تكون متعلمة ومثقفة عايز ((دماغ ))اعرف اتكلم معاها وقرر صاحبنا ان سوسن تطير ((وطارت سوسن مع العصافير ))


الزوجة الثالثة *
مديحة مجايب الست الوالدة برضو فى يوم قالتلة لقيتها يا حبيبى قالها مين قالتلة الدكتورة مديحة بنت خالتك قالها ومالة اهو عيالى تبقى
امهم دكتورة شىء يشرف برضو واللى نعرفة احسن من اللى منعرفوش وتمت الجوازة ومر شهر العسل بسلام وصاحبنا مبسوط
على الاخر لكن بدأت مديحة تنشغل دكتورة بقى وعندها عيادة وابحاث طول الليل سهرانة عليها ولما صاحبنا يقولها يا دوحة تعالى
عايز اكلمك فى موضوع مهم تقولة ثوانى انت مش شايف انى مشغولة يقولها دة موضوع مهم قوى تقولة بعدين يا اخى ويفضل
صاحبنا مستنى الفرج ويتعب من الانتظار ويروح فى سابع نومة واستمر الحال دة كتير وبدا صاحبنا يزهق ويمل وراح للست الوالدة
يقولها خلاص زهقت تقولة يابى اصبر علشان العيال يقولها ((دى اجيب منها عيال )) طب ازاى وامتى حجيب عيال يعنى حجبهم بالمراسلة
تقولة خلاص يابنى اللى يريحك يقولها المرة اللى جاية عايز عروسة تكون دلوعة كدة ودلعنى عايز(( ادلع ))يا جدعان اددددلع وقرر صاحبنا انة يطير مديحة ((وطارت مديحة مع العصافير ))
الزوجة الرابعة *
نانا بنت مقاول كبير تنقية الست الوالدة فى يوم قالتلة لقيت طلبك بنت اخر جمال ودلع هى دى اللى حتهنيك يابنى قالها اوعى تكون
رغاية ولا مثقفة وبتمسك كتاب فى ايديها قالتلة لا يابنى نانا دى حاجة تانية خالص وبعدين دى بنت اكبر مقاول فى البلد قال ومالة
حتى العيال يغرقوا فى فلوس جدهم وابقى ضمنت مستقبل العيال وقعد يغنى(( معانا ريال معانا ريال)) وتمت الجوازة وكان صاحبنا مبسوط على الاخرمدلع مع نانا اخر دلع ومر شهر العسل بسلام كالعادة ولكن لما صاحبنا بيرجع من الشغل يدور على نانا ويقول
يانانى انتى فين ياحياتى انا جيت حضرلى الاكل بسرعة واقع من الجوع تقولة اكل اية يا روحى انا مطبختش النهاردة يقولها لية
تقولة كنت عند الكوافير ياحياتى وبعدها روحت على الجيم وبعدين انت عايز ايدى الناعمة دى تبوظ لالالا يقولها طيب طلعى اى حاجة اكلها تقولة مفيش
وكل يوم على الحال مرة نانا فى الجيم ومرة الكوافير ويدخل صاحبنا يدور فى التلاجة على اى حاجة انة يلاقى حاجة تتأكل مفيش
وزهق وهرب على بيت الست الوالدة يقولها الحقينى انا خلاص تعبت انا معدتى نشفت من اكل السوق انا مش قادر اكمل معاها
دى عايزة شغالة والاكل كل يوم نشترية من برة تقولة يا بنى اصبر طيب والعيال يقولها ((دى اجيب منها عيال ))دة انا لوخلفت عيال
منها حجيب عيال زى بتوع مجاعة افريقيا انا عايز عروسة تكون طباخة وست بيت عايز(( اكل )) اااااكل يا جدعان وقرر الغندور
يطير نانا ((وطارت نانا مع العصافير ))
الزوجة الخامسة*
سنية ست بيت شاطرة دى اللى تعرف شغل البيت وتربى عيال تنقية الست والدتة وسالها كالعادة اوعى تكون رغاية ولا مثقفة ولابتروح الجيم
تقولة لالالا دى طباخة مية مية نقاوة عينى قال ومالة حتى العيال تطلع متغذية وتمت الجوازة ومر شهر العسل وصاحبنا
مبسوط ولكن سنية معندهاش وظيفة فى الدنيا غير انها تأكل وبس وزاد وزنها على الاخر وكل لما يدخل عليها يلقيها بتأكل ويقولها
اية يا سنية طبختى اية النهاردة تقولة عملتلك اكل تأكل صوابعك وراة يا عنية يقولها كل دة اكل تقولة دة يدوب يا حياتى يكفينى انا وانت
يقولها دى وليمة تاكل شارع بحالة وبعدين انتى بقيتى زى برميل الطرشى لازم تخسى شوية يا سنية تقولة ما هو فى
((ناس مطرح ما يسرى يمرى وناس زى العرسة تأكل وتنسى ))
يقولها انا عرسة طيب يا سنية والله انا خايف تأكلينى انا كمان وبدا يزهق
ويهرب للست والدتة ويقولها تعبت مع سنية دى بقت زى الفيل ملهاش ملامح لالالا انا مش قادر اكمل تقولو وبعدين يابنى والعيال
يقولها اخلف من سنية دى لو خلفت منها عيال تاكلهم انا مش عايز عيال خالص انا حرجع لصافى حبيبتى وابوس ايديها واقولها
سامحينى قالتلة صافى مينفعش خلاص يا بنى انا مكنتش عايزة اقولك صافى اتجوزت والمفأجاة انها ((حامل)) طبعا صاحبنا
عينة زغللت وبص فى السقف وقال يعنى اية قرعتى طلعت مع سنية طب ((غطينى يا امة وصوتى علية ))ودى نهاية واحد كان عايز واحدة فيها كل المواصفات بس اكيد حيلاقيها ((فى الاحلام طبعا )) وفى النهاية لا يوجد انسان خالى من العيوب((بقلم هبة فاروق))


يمكن النقل ولكن بعد ذكر المؤلف والمصدر وشكرا