ازاى ؟؟؟؟؟؟؟؟؟

[سمسمة2008]

انا كنت قاعدة بافكر كده فى الدنيا اللى احنا عايشين فيها وباشوف حالنا كنا ازاى وبقينا ازاى
خطر على بالى كام سؤال وحبيت الاقى لهم اجوبة وتعبت واحترت ودوخت وبرضه مش لاقية حل قلت لما اكتب اللى جه فى بالى يمكن يمكن ده يريحنى ولا يحل لى ولو جزء من الالغاز اللى فى دماغى
لقيتنى نفسى مش لاقية كلام اكتبه يعنى مش لاقية موضوع معين كل اللى عارفة اكتبه كلمة واحدة ازاى ؟؟؟؟؟؟؟؟؟
ازاى بقينا كده ؟؟؟؟؟؟ازاى وصلنا للى احنا فيه ؟؟؟؟؟؟
حياتنا بقت خداع وكدب وحروب وصراعات وغابة القوى فيها بيدوس على الضعيف والضعيف مستسلم ولما تواجهه وتقوله ثور طالب بحقك يقولك بايدى ايه ويمكن الضعيف اقوى بعقله اقوى بفكره بس اكيد فى حاجة بتميزه وممكن يتغلب بيها على سطوة القوى بس الراجل مش عايز يتعب نفسك ويتحرك ماشاء الله ليه ؟؟متعرفش
ازاى فقدنا معنى الانسان ؟؟؟؟
اللى كان زمان معنى كلمة انسان كبير اوى وجميل اوى ولما كانوا يحبوا يمدحوا حد يقولوا ده انسان اه انسان مستغرب ليه ؟؟
ااااااااه فهمت انت معتبر انسان النهاردة انسان لا انسان النهاردة شبه الانسان من بره لكن جوة مفيش انسان
الانسان مش هو الكائن اللى بيعيش ويتعايش ويقوم بكل وظايفه الحيوية زى مابيقولولنا فى الكتب لا الانسان اكبر من كده الانسان قلب بيحس ايد بتطبط على المجروح بتمسح دمعة فى عيون حزينة بترسم ابتسامة على شفايف طفل برئ بس بتوجه له بندقية ورصاص
الانسانية دى معنى جميل اوى بس للاسف بقينا منعرفش نفسرها ولو فسرناها نبقى خياليين ورومانسيين وعايشين فى كوكب تانى
ازاى نسينا الحاجات اللى كانت من 50 سنة او اكتر شويةبتميزنا احنا المصريين ؟؟؟؟؟؟
فاكر جدك ولا حتى والدك وهو بيحكى لك زمان حياتهم كانت ازاى ؟؟؟ فاكر لما قالك كنا بنعيش احنا وجيراننا كننا فى بيت واحد فرحه فرحى وهمه همى وياسلام لما يحكى لك ازاى كانت جارتهم وجدتك ازاى كانوا اصحاب اوى ولازم لما واحدة فيهم تعمل اكلة جديدة جارتها تدوقها هى وولادها وكانوا زمان عندهم مثل اوى للاسف طبعا احنا نسيناه الجار القريب احسن من الاخ البعيد هما مش قصدهم ان الاخ وحش لاسمح الله لا قصدهم انه بعيد لغاية مايوصل الجار اقرب يقوم بالواجب
انما النهاردة ماشاء الله مبقناش نعرف اسم جيراننا فى الشقة اللى قصدنا
يلا هاقول ايه عايزنا نرجع زى زمان قول للزمان ارجع يازمان
ازاى كانوا الشباب والبنات ملتزمين اوى اخلاقيا ومش معنى ان شباب دلوقتى وحشين لا بس يعنى الغالبية العظمى تايهة مش عارفة لها طريق
لبسهم محترم شباب وبنات مش ماشاء الله بقينا الشباب بيلبسوا البنطلون مش عارفة ازاى والبنات يلا مفيش داعى اتكلم هههههههههههههه
ازاى كانت المطربين زمان الناس وهى رايحة تحضر لهم حفلة بتبقى لابسة ومتشيكة النهاردة حفلاتنا الناس بتروحها بلبس البحر ماهو الجو صيف معذورين بجد ههههههههه
ازاى كانت اغنية زمان بتحكى حدوتة تسمعها وتحس بكل كلمة ونغمة والمطرب بيؤديها بكل احساسه
ازاى النهاردة بقى بقينا مطرب لكل مواطن وطبعا كل 5 ثوانى فى مطرب بيطلع لنا بكليب واراهنك ولا تعرف حد فيهم
هاقول ايه ملناش دعوة بحد دع الخالق للخالق
وازاى وازاى وازاى يااااااااااااااااااااااااااااااااااااه مليون ازاى ازاى ومليون علامة استفهام ومفيش جواب يمكن العيب فيا؟ معرفش جايز
بس لو عندك انت اجابة لاى ازاى من دول اوحتى ترد على سؤال واحد هو الجواب عليه جواب على كل الاسئلة
ازاى وصلنا للمرحلة دى ؟؟؟ ازاى منحنى الاخلاق وثقافة العادات والتقاليد والالتزام بالاخلاقيات بتاعت مجتمعنا نازل مش بيطلع؟؟؟؟؟؟؟؟
انا عارفة انى طولت اوى عليكم ورغيت كتيييييييييييييييير اوى
بس انا حبيت تشاركونى يمكن تساعدونى ونلاقى اجابة
اسفة للاطالة
ومش عارفة الموضوع مكانه هنا مظبوط ولا اخده وامشى اروح اشوف له حتة تانى ههههههههههه
خالص تقديرى واحترامى لكل من تابع كلماتى
وتحياتى للجميع

[قلم بلا حبر]

اقتباس ومش عارفة الموضوع مكانه هنا مظبوط ولا اخده وامشى اروح اشوف له حتة تانى

مكانه صحيح يا سمسمه الشهيره بسمر

ولو محتاجه اجابات لده كله ,,,, يبئى خلينى مجزءشى الاجابه

لان الفيروس واحد والاعراض مختلفه

اختى الكريمه نحن فى زمن الاستنساخ ,,, تلك هى الدائره الكامن بها الفيروس

كل شئ من حولك ليس حقيقيا ,,, ليس مبدعا ,,, لا يمت للجمال بصله

سوى انه

(( مستنسخ ))

لطالما كان ارتباط الابداع بالانسان مرهونا بالقدر الذى يكون فيه متفاعلا مع محيط بيئته

اذا كانت تلك البيئه كما كان فى السابق ,,, امان ,, تقدير ,,, احترام ,,, هدوء ,,,

فمن المؤكد ان تكون النتيجه

فن فى العماره ولا اجد اكثر من الاهرامات والاثار ابدع مثال على هذا ,,, كما هنالك تلك المبانى فى عصر اسرة محمد على ,, قمة الجمال والتنسيق واللابداع .. انظرى لحال المعمار الآن

فن فى الفكر ولا احد يذايد على نجيب محفوظ او طه حسين او العقاد مع احترامى لمفكرينا الجدد

فن فى السماع ..,,, كان هنالك شعب بالرغم من عدم وجود وسائل اتصال تساعد على انتشار ما يقدمه مطربيه

الا ان اغانى سيد درويش مثلا كانت تجوب القطر المصرى اسرع من انزلاق الماء من الشلال

فن فى التخاطب ,,, انظرى الى الصالونات الثقافيه وكم الاحترام الذى كان يوليه الناس لهؤلاء المفكرين والمبدعين ,, الان اكاد اجزم ان 80% لا يقرؤون اصلا الصحف اليوميه

فن فى الانتاج ,,, لا تجدى من ينكر ان الصناعات القديمه كانت تعتمد نعم على اليدويه اكثر منها الى التكنولوجيا الا انها كانت تفوق تلك الاخيره جودة ومتانه ,, والكل يعرف بهذا

كل ما سبق ذكره واكثر تم استنساخه

فصار صورة مشوهه لتلك الثوابت والحقائق ,,, لن يكون يوما الاستنساخ ذات معنى

قد يعطى الكثير ,,,لكنه فى النهايه محدود الفائده

جاء على بالى هذا النوع الجديد من الطماطم الذى تم عمل دراسات وراثيه عليه ليكون به مميزات بعض من البقول الغير قابله للآكسده ,, بنية الشكل هى

او يوجد ما يدل على اننا نحيا فى هذا الطريق الصحيح

نحن قد تم سلخنا من اصولنا ,, ولن نعود الى تلك الاصول الا فى حاله واحده

اذا تدبرنا تلك الآيه

{ وَلا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ أُوْلَئِكَ هُمُ الفَاسِقُونَ }

بالفعل لقد نسينا انفسنا ,, اصبح الابن ينسى نفسه وكونه ابنا ويتطاول على ابيه

اصبح الموظف ينسى نفسه وقيمه ودينه لتجديه يقبل بالرشوه على انها حق من حقوقه

اصبح الطالب ينسى نفسه وينسى قول شوقى

قم للمعلم وفيه التبجيلا ***** كاد المعلم ان يكون رسولا

وتجدى هذا الطالب او ذاك يعتدى على مدرسه

المعلم ذاته نسى نفسه فاصبح يتلقى الهبات من طلبته املا فى حياه افضل ففقد احترامه ومكانته

كثير من النماذج نست انفسها واصبحوا عاملا فى ما نحن عليه الان من استنساخ لقيمنا وتراثنا

ارجو الا اكون قد اطلت

ولا انكركى القول ,,, انى لم اشعر والله وانا اتحول من العاميه الى الفصحى

يعنى مش تزعلى يا سمسمه الشهيره بسمر

خالص تقديرى لما سطرتيه فى القسم ,, وها هو ما نامل به هنا

تحيااااااااااااااااااااااااااااااااااااااااااتى""" """"""""""

[~ zahorah~]

حببتي سمسمة اسجل حضوري

و لي العودة ان شاء الله




أختك/ دموع الندم

[miraa]

ازاى ازاى ازاى مليون ازاى ومليون ايه السبب؟
العيب مش فينا احنا يا سمسمه اننا مش قدرين نلاقى اجوبه لتساؤلاتنا دى
لان ببساطه الناس اتغيرت بسرعه فظيعه
احنا نمنا وقمنا الصبح لقينا كل حاجه متغيره الناس بقوا حاجه تانيه كله عبد للمصلحه
الغوا من حسابتهم معنى ان تكون انسان يتمتع بالانسانيه والطيبه وحب الخير ومساعده المحتاجين
مش عارفه ليه انا فجاه وبدون اى مقدمات لقيت كل اللى حواليا بيتغيروا كله بيفكر فى نفسه
نسيوا الناس اللى بتقف جنبهم واللى فى وقت الحزن بجانبهم وفى الفرح اول حد هيفرحلهم
بس الظاهر هنفضل نقول ليه كتييييييييييييير
لغايه ما تفوق الناس دى وترجع لانسانيتها ويرجعوا للخير والتعاطف والاخلاق
بس ياترى فعلا ده هيحصل يارب لان دلوقتى الوضع ده غريب ومش مقبول اطلاقا
ان كل حد يفكر فى نفسه وينسى الاخرين
موضوع جميل كتير يا سمسمه ....بجد مفيش حاجه هنقولها غير يارب يفتكروا انهم انسان

[~ zahorah~]

بسم الله الرحمن الرحيم


سمسمة انتي بدأتي موضوعك


و انتي بتدمري من الزمن دا او بتشتكي من حال مجتمعاتنا النهاردا ازاي بقت


و انا معاكي انوا الزمن دا بقى سيء (دا من وجهة نظري)


بس الزمن اللي جاي حيبقى اسوء بكتير


لان الزمن من سيء الى اسوء (و هو دا اللي بيحصل)


يعني بصي من خمس سنين فاتوا ( مش حقول لك من خمسين سنة) بس ما كانش حال المجتمع بشكل دا .


لا في الأغاني و لا في الكلبات و لا حتى في اللبس و لاحتى في المبادىء و الاخلاقيات ،، ناس فعلا تغيرت بجد .
/
/


اما عن حكاية الجيران زمان ازاي كانوا كأنهم عائلة وحدة و بيت واحد .


يعني انا استغربت جدا لما ماما مرة قالت لي انهم زمان ازاي


كانوا عايشين مع جيرانهم


يعني يا امي عندهم ولا بيت الجيرانهم عند أمي .


فستغربت جدا


يعني زي ما انتي قلتي انوا دلوقتي بجد ما اعرفش اسماء جيرانا ابدا .


(يعني الاعتراف بالحق فضيلة) ههههههههههههههه


و هو دا فعلا حاجة المفروض ما يحصلش بينا وبين الجيران ،،، بس يعني انو ما فيش حاجة في ايدينا ،لان الزمن تغير


و اللي غير الزمن دا الناس .


و مستحيل انوا يتغير حال الدنيا دي ،، و اذا تغير فهو حيتغير الى الاسوء <<متشأمة جدا

/
/
/
/
اما لو حتكلم عن الانسانية


فمش حخلص


هو صحيح انوا في ناس كتير فاقدة حاجة اسمها الانسانية


بس في مقابل دا ناس كتير بيحسوا بغيرهم و و ما فقدوش معنى الانسانية


و انا دايما بقول : ( لو خليت لخربت )


يعني زي ما في و حش في كويس و زي ما في ناس فقدت او نسيت او تتجاهل العادات و التقاليد الجميلة اللي


كانت بتحصل زمان في ناس لسى محافظة عليها


و دي وجهت نظري .


و معلش طولت عليكي








ثانكيوووووووو حببتي سمسمة الموضوع جميل جدا جدا جدا جدا

قلمك دايما مبدع و متميز

أختك/ دموع الندم

[الفراشه]

موضوع جميل جداااااااااااااا يا سمورتي
ودايما بتبهرينا بقلمك المميز
ندخل في الموضوع بئا ونبداء نرغي شويه

انتي بتسألي احنا بقينا كدا ازااي
ااقولك انا بقينا كدا ازااي بقينا كدا من اللي احنا فيه دلوقتي
احولنا اتبدلت بقينا بدل السلام والحب حروب ورصاص
بقينا بدل القناعه جشع وطمع
بقينا بدل الفرح احزان وهموم
الدنيا اتغيرت بقينا في وقت قصير 50 سنه ميتعقلش ان كل التغيرات دي كلها تحصل فيه
حصلت واتبدل الحال من ايجابيه لسلبيه
بقا كل واحد فينا دلوقتي انا وانتي وغيرينا وغيرنا نقول يالا نفسي
المهم اني ابقا كذا وكذا
تيجي نرجع لورا شويه ايام جدي وجدك تلاقي كل واحد فيهم خابف على التاني اكتر من نفسه
دلوقتي الله المستعان
كان زمان احترام تقدير وتوقير
دلوقتي عدم احترام اتمحت التقديرات
بقينا موضه ودش وتقليع فارغه
وكل واحد مقتنع باللي بيعمله
ولما شويه شباب ربنا هديهم يروحوا وينصحوا حد
خدي بئا من هنا لبكره الصبح تريئه عليهم كانهم اجرموا
ودول طبعا كانوا خر المحترمين قبل انقرضهم
دلوقتي كل واحد عامل حجته الزمن والدنيا
زمن ودنيا ايه احنا اللي عملنا الزمن واحنا اللي عملنا الدنيا ليه نهدها
فوق دماغنا ليه ندمر الانسانيه في نفسونا
ليه نشيل الخير من قلوبنا ونحط بدلهم الحقد والغل والانانيه والجشع والطمع و و و و مش هخلص و و و
لانهم بئوا كتير اوووي
ياااااااااااااااااااااااااااااه احنا بقينا وحشين اووووي كدا
محدش طايق حد كله بيقول اوووووووووووووف
تيجي للطفل الصغي تكلميه مش عارف حاجه في حيااته يقولك اوووووووووووووف هو انا ناقصك سبيني في حالي
حال ايه يابني دانت لسه ابن امبارح
جدتتي الله يرحمها كانت دايما تقولي
انها عمرها ما اشتكت من حاجه في زمنهم
لاكان فيه جار بيشتكي من جاره ولا حد يشتكي من حد
كانت تقولي كلنا كنا بيت واحد
كله خايف على كله
كانت تقولي لاكنا نعرف يعني ايه مرض ولا تعب عشان كدا الواحد فيهم ما شاء الله كان يعدي 90 سنه
وكانه لسه عنده 40 سنه
قولتلها عارفه ليه عشان كانت قلوبهم مش مريضه
لكن دلوقتي مرض القلوب مفيش اكتر منه
ياااااااااااااه انا هقول يا سمر وهحكي وانتي كمان هتقولي وتتكلمي وغيري وغيري لكن
يبقى الوضع على ما هو عليه حتى زوال لبشريه

وربنا يهدينا جميعا


طولت اووووووووووووووي انا عارفه بس بقالي زمان مش رغيت كدا
يالا بئا معلش استحملوني



تحيااتي

[abo adhem]

الاخت الغاليه سمسمه



موضوع رائع يستحق التقدير
شكرا جزيلا والى الامام دائما
مشاركتى تهنئيه ولى عوده ان شاء الله







ابو ادهم

[سمسمة2008]

اقتباس ولا انكركى القول ,,, انى لم اشعر والله وانا اتحول من العاميه الى الفصحى

اقتباس يعنى مش تزعلى يا سمسمه الشهيره بسمر

مفيش زعل ولا حاجة ياقلم بلاحبر الشهير بسيد

اسمحلى احييك على ردك اللى وصف بالظبط اللى احنا فيه فعلا بقينا عايشين فى زمن مفيش حاجة فيه حقيقية كله تقليد
ناس شبه الناس من غير روح
مبانى فاقدة جمالها مجرد عمالقة تشوفها من بعيد تتبهر بيها ولما تقرب لها تحس ازاى هى وهم حاجات مرعبة مش مبهرة
ازاى بقى سهل اننا نرسم ضحكة نخدع بيها الناس ونسينا يعنى ايه ضحكة من القلب هو اصلا بقى فين القلب الظاهر اننا بعناه مع الازمة الاقتصادية العالمية
ازاى كانوا زمان حياتهم حقيقية واحنا بقينا ازاى تقليد كل بيتقلد
وجوه بشر تتقلد
مبانى تتقلد
اغانى تتقلد كتب تتقلد
احساسيس تتقلد كله بيتقلد
ومهما كانت جودة التقليد اكيد عمره ماهيكون حقيقى فى يوم

اقتباس قد يعطى الكثير ,,,لكنه فى النهايه محدود الفائده

انا مختلفة معاك جدا فى النقطة دى انا مش شايفة انه ممكن يكون فى التقليد ولا الاستنساخ دى فوائد
بمعنى انه ايه الفايدة اللى باحصل بيها لما باكل طماطم مثلا( مثالك اهو) فيها خواص بعض البقول طيب انا دلوقتى لما اجى اصنفها او اوصفها تبقى ايه حاجة مختلطة مالهاش معنى مالهاش طعم شبه وبس انما مالهاش علاقة لا بده ولا ده
يعنى برضه عمر التقليد ماهيكون حقيقى ولا ليه فايدة يمكن ننبهر بيه انبهار وقتى وفى ثانية بيرجع لحالته الاساسية تقليد
ميرسى اوى قلم بلاحبر الشهير بسيد على مرورك وردك الاكثر من رائع وده مش غريب عليك
تحياتى

[سمسمة2008]

اقتباس المشاركة الأصلية كتبت بواسطة دموع الندم حببتي سمسمة اسجل حضوري و لي العودة ان شاء الله أختك/ دموع الندم

فى انتظار عودتك حبيبتى على احر من الجمر
بس تعالى بسرعة المنتدى لاحسن سيد يقفل علينا هههههههه
تحياتى

[سمسمة2008]

حبيبتى ميرا
اسمحى لى اقولك ياغالية انى مفيش حاجة اسمها نمنا وصحينا لقينا نفسنا كده
يعنى ايه؟؟ يعنى ايه نمنا وصحينا لقيناهم كده ؟؟؟
اكيد ده مش مظبوط لانه مفيش حد بيتغير من النقيض للنقيض فى يوم وليلة
اكيد مرينا بمراحل كتير لغاية ماوصلنا للى احنا فيه ده
اكيد كان فيه اسباب هى اللى خلتنا بقينا كده اسباب اقتصادية بقى اجتماعية ثقافية ايا كانت الاسباب دى بس اسباب هى اللى وصلتنا للى احنا فيه ده

اقتباس مش عارفه ليه انا فجاه وبدون اى مقدمات لقيت كل اللى حواليا بيتغيروا كله بيفكر فى نفسه

لا المقدمات كانت موجودة بس انتى اللى مكنتيش واخدة بالك منها كانوا بيتغيروا شوية شوية بس انتى بتقكدبى نفسك وانتى شايفة التغيير وبتقولى انه اكيد غلط احساسك
ماهو صعب بعد مايكونوا هما اهم ناس فى حياتك متكونيش انتى كده بالنسبة لهم وكنتى انسان بجد معاهم لسة قلبك عايش ولسة بتملكى صفات الانسان بقلبه واحساسه علشان كده مكنتيش قادرة تشوفى التغيير اللى كان بيحصل قدام عنيكى

اقتباس ....بجد مفيش حاجه هنقولها غير يارب يفتكروا انهم انسان

انا كمان هادعى معاكى يارب نفتكر اننا لسة بشر ونفتكر معنى الانسانية
ميرسى ياحبيبتى للمرور والرد الجميل
تحياتى