سنيه والمحروس في الملعب!!

[اسكندريلا]

من يوم ما اتجوزت مقصوفة الرقبة سنيه وانا شايف الويل.. كنت فاكر إنها أهلاويه زيي لكن اتضح العكس!!..ضحكت عليا وكانت كل يوم تلبس أحمر في احمر خاصه الأيام اللي يفوز فيها الأهلي.. طبعا بطيبتي المعهوده شربت المقلب وكان أكبر مقلب في حياتي..

جاسوسة بخطين

اتضح إن سنيه جاسوسه زملكاويه دخلت بيتي!!..لا وطبعا ما عرفتش كده إلا بعد ما وقعت الفاس في الراس.. أول ماتش جه في التلفزيون كان بين الزمالك والاسماعيلي.. طبعا مش محتاج احكي لأن الجواب كان باين من عنوانه.. الصوت العالي والصويت كل ما يروح جون من الزمالك، وياريتها جت على قد كده مصيبة المصايب لما ييجي لقاء القمه ، لازم المشهد ده يتكرر بحذافيره كل مره، سنيه جايبه قراطيس اللب والترمس والفول السوداني وقاعده مربعه، وطبعا أنا تحتها عشان تشل حركتي، لكن المصيبه الألعن إنها مكمماني عشان ما فتحش بقي لو الأهلي جاب جون!!..
لكن كله كوم والمباراة الشهيره اللي اتهزم فيها الزمالك من الأهلي سته واحد.. كان يوم اسود عليا وع اللي جابوني.. الهانم قعدت لابسه اسود 6 أيام..لأ والألعن تنزل فيا ضرب كل يوم فيهم صبح وليل زي ما أكون انا للي جبت الـ 6 اجوان في الزمالك.. أقولها "يا سنيه حرام عليكي..أنا إيه ذنبي"، ترد: " أسكت خالص انت لسه شفت حاجه؟"
وبعدين ترجع تصرخ فيا بصوت جايب لآخر الشارع"..احنا ولاد ناس غصب عنكو.. انتوا فاكرين نفسكو إيه؟ الزمالك نادي ولاد البلد برضه.. مش نادي ولاد البطه السوده ياروح خالتك!!"
جيت من كام يوم لقيتها بتقولي.." تروح تجيب لي تذاكر مباراة الزمالك والأفريقي التونسي..الماتش ده مهم أوي".. قلت لها: "حاضر يا سنيه.. بكره هجيب لك تذكره".. راحت قايله: "نعم نعم يا منيل؟ تذكرتين مش تذكره واحده، ماهو انت لازم تيجي عشان تتفرج على مدرسة الفن والهندسه، اتعلموا بقى يابتوع الأهلي حديد ياللي كان محتكركم أحمد عز!!".. طبعاً خدتها من آصيرها وطيران على كشك التذاكر عشان أخلص من زمارة القطر اللي اسمها سنية!! وجينا لليوم الموعود.. طبعا سنيه لابسه أبيض وماسكه صفارة عماله تصفر بيها في الشارع لما فضحتنا وهى بتصرخ "الأهلي حديد.. زمالك سيحه".

مش ها سيبك

وصلنا الاستاد ودخلنا مدرجات الدرجه التالته والهانم طلعت قراطيس اللب والفول السوداني.. خلص الشوط الأول بعد ما الزمالك جاب هدفين.. وبعد ما سنيه خرمت طبلة ودني من الصويت وهي بتقول " اتعلموا يا بتوع الاهلي.. جاتكم الغم ينزل عليكو ما يتلم".. طبعا أرد في نفسي واقول "وانا مالي يا ام لسان زفر.. هو انا كنت خلفت الأهلي ونسيته؟"..
المصيبة جت في الشوط التاني اللي كان المفروض الزمالك يجيب فيه الجون التالت عشان يتأهل للدور الـ 16 في بطولة دوري رابطة الأبطال الافريقي.. جه مساعد الحكم راح حاسب تسلل على لاعبي الزمالك ولغى الجون التالت اللي جابه احمد جعفر، مفيش ثوانى ولقيت الجمهور كله نازل أرض الملعب وسنيه بتصرخ وبتجري ورا مساعد الحكم وهي بتقوله: "وديني ماانا سايباك".
مش عارف إيه اللي حصل ساعتها.. جريت مع اللي جريو بره الاستاد ورحت ناطط في أول ميكروباص مروح ع البيت، تاني يوم جبت الجرايد الصبح ولقيتهم محولين المشاغبين للمحاكمه، طبعا فرحت وقلت:" أخيرا خلصت من سنية.. ألف حمد وألف شكر ليك يا رب".. مفيش ثواني وسمعت سرينة عربية نجده.. بصيت لقيت سنية نازلة وجنبها 4 عساكر وظابط.. لسه بفتح الباب لقيتها بتقول: " أيوه يا حضرة الظابط.. هو ده المشاغب اللي ضرب فريق تونس"!!

بقلم: عمرو عكاشة

[ماتركس]

ههههههههههههههههههههههه

ايه يا نووسي ده بس بس بجد تسلم ايدك

علي القصه بتاعت سنيه دي ضحكتيني من قلبي

وبجد هما بتوع الزمالك كده بتحسيهم من كوكب تاني

ههههههههههههههه

تسلم ايدك يا نووسي

[اسكندريلا]

ايه كابتن

انت شايفنى جايه من كوكب تانى

اممممممممممممممممممممم

ده بس علشان تعرف ان روحنا رياضيه ودمنا خفيف

هههههههه

[محمد خطاب]

ههههههههههههههههههههه

يعنى سنيه طلعت زملكاوية وايه كمان من مشاغبى مباراة الافريقى التونسى هههههه يا بنت الايه يا سنيه ههههه

دايما مميزة يا نوسى ,,,’’’

[حافظة القرآن]

هههههههههههههههههههههههههههه

ضحكت من قلبى ههههههه

شكرا على الموضوع

[Pǿm Ŧặặk Ŧőợk]

هههههههههههههههههههههههههههههههههههههههههههههههههه ههههههههههههههههههه
جامده جدا يا نوووووووسى
ثانكيووووووووووووووووووووو

[قلب فلسطين النآبض]

ههههههههههههههههههههههه

يسلموو كتيييييير ع القصة الرروعة