أنا والمحروس والاستفتاء!!

[اسكندريلا]

الواحد خلاص عقله هيشت...أقول "نعم" ولا "لا"...قعدت كام يوم على أعصابي وتقريبا مابقومش من قدام التليفزيون...اسمع أفندي بتاع قانون بيشرح التعديلات...أقول لنفسي والله الراجل ده كلامه يدخل النافوخ..يبقى نعم بالتلاتة...مفيش ساعة يكون فيه أفندي تاني بتاع قانون برضه بيشرح التعديلات...أقول لنفسي والله الراجل ده كلامه خشخش في دماغي...يبقى لأ بالتلاتة...إيه المصيبة اللي أنا فيها دي...بقالي كام يوم مش عارفة آخد موقف...والأنيل في الشغل...بقى عندنا فريقين..فريق بتوع "نعم" وفريق بتوع "لا" وأول ما يدخلوا في نقاش يا لطيف...والاتنين بيقولوا إن موقفهم ده عشان مصلحة البلد!!...ومن كتر التوتر والتفكير طار النوم من عيني وبقيت آخد أدوية ضغط وأرق وصداع.
أما المحروس جوزي فعيني عليه باردة...لوح تلج...وآخر انبساط وفرفشة...الاقيه بيتفرج على برامج الحوار اياها وهو شغال قزقزة...أقول في عقل بالي يمكن بيعالج نفسه من التوتر..أبصله تاني ألاقيه ولا الهوا..شغال قزقزة وساعات بيكركر من الضحك لما الضيوف يدخلوا يمسكوا في خناق بعض...وكأنه بيتفرج على فيلم كوميدي.
اتواضعت شوية وسألته رأيه ايه في اللي بيحصل...واذا كان هيقول في الاستفتاء "نعم" ولا "لا"...بص لي من فوق لتحت وابتسم ابتسامة كلها خبث وقاللي: "لأ..قولي انت الأول!"..رحت زي الهبلة قريت بكل اللي في قلبي من طأطأ لسلامو عليكم وقلتله انا مياله لغاية دلوقتي لايه. راح واقف على حيله وهو بيمسح النضاره بديل القميص قاللي: "اللي بتمري بيه ده شيء طبيعي..دايماً بييجي للناس اللي معندهمش نضج سياسي..بيبقى صعب عليهم يحددوا موقفهم"...حسيت بالدم بيغلي في عروقي وبقيت عامله زي الحله البرستو وأنا بقوله: "طب اللي ناضجين زي سعادتك ما يعطفوا علينا ويقولولنا رأيهم"..راح فاقعني وهو بيقول: "هو انت مش عايزه تتعبي ابدا يا وليه..عايزه الإجابة ع الجاهز..طبعا مش هاقولك"...متهيألي كده ان عيني خرجت لبره وأنا بقوله: "ومين قالك اساسا اني مستنيه حد يقوللي اقول آه ولا لأ..ده انت بالذات لو قلت آه هاعرف ان الصح لأ"...راح ضحك ضحكة مستفزة وهو بيقول: "اهو انت وقعتي بلسانك..شوفتي..عايزة تعرفي هاقول ايه عشان تعملي عكسه...يا معندكيش شخصية"...وراح سايبني وأنا بولع.
جه اليوم الموعود وعدينا على أمه في طريقنا للجنة...حاولت استفرد بأمه من وراه يمكن أقدر استدرجها بالكلام وأعرف المحروس ناوي يصوت على ايه...بس جه أملي على فاشوش...قالتلي: "ريحي نفسك يا عنيا..هو مش عبيط عشان يقول لك..دي أسرار دولة..موتي من الغيظ"...مش عارفة ليه حسيت اني هيجيلي نقطة بجد!! وفي اللجنة كان فيه طابورين...واحد للستات والتاني للرجالة...راح المحروس وأمه واقفين في طابور الرجالة بحجة انها كبيرة في السن ومحتاجة للي يسندها!! وسابوني لوحدي في طابور الستات...وكل ما تيجي عيني في عين المحروس ألاقيه بيلعبلي حواجبه قال يعني بيغيظني وانا طبعا بعمل نفسي ولا الهوا لكن من جوايا هموت وقعدت اتخيل نفسي وانا باضرب راسهم الاتنين في بعض. في اللحظة دي واحدة ورايا حبكت تسألني: "يا ترى انت هتقولي "نعم" ولا "لا"". لقيت نفسي رديت بعفوية ومن غير تفكير: "وانت مال أهلك...دي أسرار دولة"!!

بقلم: رانيا صالح

[قلب فلسطين النآبض]

ههههههههههههههههههههههه
مآآآ تسأليني عن رأيي لانو هدي أســرااار دولة ...!!

[moonnor]

ومن غير تفكير: "وانت مال أهلك...دي أسرار دولة"!!هههههههههههههههههههههههه
ههههههههههههههههههههه


ثانكس للموضوع

[Pǿm Ŧặặk Ŧőợk]

hhhhhhhhhhhhhhhhhhhhhhhhhhhhhhhhhhhhhhhhhhhhhhhhh
nice ya 2mr
thnqu

[محمد خطاب]

ههههههههههههههههههههههههههههههههه

وانتى مال اهلك دى اسرار دوله

جااااااااامده جدا جدا

فى انتظار المزيد الرااااائع

[M@HMOUD]

هههههههههههههههههههههههههههه
تسلمى

[~♥ Queen sozan♥~]

ههههههههههههههههه
تسلمى يا نوسي