انت عملت ايه في الثورة

[حميدو]

بسم الله الرحمن الرحيم


حبايبي الغاليين

كل واحد مننا ليه ذكرى في ثورة 25 يناير

ياريت تكتب مذكراتك في الثورة ايا كانت

انا عن ذات ذاتي هحكيلكم قصتي مع الثورة


انا جالي اكتر من رسالة واشعار على الفيس بوك عن يوم الغضب 25 يناير

وانا بيني وبينكم كنت بقول دي اخرها اعتصام ومظاهرة يوم اتنين تلاتة بكتيره تتفض وتعدي

وبعدين عدى كل حاجة زي الفل لحد يوم الجمعة في التلفزيون ناس بتتضرب في الشرطة والشرطة مطلعة عين اللي جايبنهم

وكان المنظر اللي بيخليني اضحك لما كانوا الشباب يشاوروا للامن المركزي بطلوا ضرب
واول ما يخلصوا صلاة هبااا كل واحد يطلع الطوب من جيبه واديله ادي



وفضلت على الحال ده لحد الساعة 6 مساءا وانا بتفرج على قناة الجزيرة لقيت مكالمة جاية لقناة الجزيرة من دمياط اللي انا منها

واحد بيستنجد بيهم بيقلهم انا من الشرباصي وهيموتونا وبيضربونا

ساعتها معرفش اللي خلاني غيرت هدومي بسرعة ومن غير ما ادري لقيت نفسي في الشارع

لحد ما وصلت للمكان اللي بيقول عليه وفعلا كان اشبه بساحة حرب

عربيات شرطة محروقة ودمار غريب وفجأة لقيت حاجة لسعتني على وشي مكنتش اعرف ايه ده

اتكررت مرتين تلاتة سألت واحد ايه اللي بيلسع ده قاللي ده الرصاص المطاطي

لكن الحمد لله ما اتصابتش يومها ومن يومها وانا في ميدان الحرية اللي هو البوسطة سابقا


يوم موقعة الجمل خالي شغال في القاهرة اتصل بيا ليلتها وقاللي متنزلش لان في مجزرة هتحصل

وفعلا تاني يوم لقيت ان في ضرب بوحشية وبلطجة

ورغم كدة نزلت مقعدتش في البيت اتصلت بواحد صاحبي حد رد عليا وقاللي ده في المستشفى ومتروق

روحتله لقيته متكيف من الضرب

تاني يوم بقاا نزلت الميدان وكنت بكلم واحد عادي

وبنتناقش الموضوع سخن

بقينا تقريبا عشرة وانا المتحدث الرسمي

فجأة لقيت يوكس فس كتفي على كام زقة على شوية زعيق وناس مش عارف دي بشر ولا كائنات منين

انتوا خربتوا البلد انتوا عاوزين تخربوها

واحد شدني بعيد انقذني من العلقة

ما علينا

انا طولت عليكم

لكن انا حبيت اقلكم اني شاركت في الثورة يوم 28 يناير ومن يومها وانا في الميدان ورغم كدة

انا شايف شغلي مش ممكن ابطل عشان اعتصم لاني مؤمن اني شغلي واجب وطني زي تظاهري وزي اعتصامي

لان عجلة الانتاج لو وقفت يبقى احنا موتنا ثورتنا بايدنا

[رقة BaNOTa]

مذاكرات جميله هههههه
كان نفسي احضرها في التحرير
بس للاسف فضلت في اسكندريه
في اعتصامات القائد ابراهيم
بس كان عندنا الامن المركزي سيطرنا عليه شويه هههه
دمت بخير للوطن

[Aya 7ekaya]

ذكريات جميله بس انا للاسف مش قدرت انزل خالص
لان اهلى رفضوا بس كنا فاتحين طول الوقت ع قناة الجزيرة ومش كنا بننام والله

[۩۩ سيد الشرقاوي ۩۩]

انا للاسف انا بره مصر مكنشي ليااا الشرف

اني اكون في ميدان التحرير تحياتي علي

موضوعك الراقي اخي الفاضل

[حميدو]

رقة BaNOTa

حتى ولو منزلتيش الميدان كفاية انك بتدعي ربنا ينصرنا

وردة خجوله

لكي كل التقدير كفاية انك كنتي مهتمة بشؤون الثورة

سيد الشرقاوي

ربنا يجعلك لينا بالسلامة وبالتوفيق يا غالي