عايز افهم ............

[قلم بلا حبر]

بسم الله الرحمن الرحيم

السلام عليكم

من الطبيعى ان البنى ادم فينا يكون محدود العلم مش بالمعنى العددى انما بالمعنى العام ,, يعنى علمه اكيد لازم يكون ليه حدود ,, وشئ طبيعى ان العلم بيعتمد فى النهايه على درجة فهم الانسان لكل الاحداث اللى كانت قبله سواء اكتشافات او نظريات او دراسات او استنتاجات او علاقات وما يستجد منها فى الحاضر ويحاول يصيغ كل ده بمفهومه
وكونه علم او مفهوم خاص بيه ,,, فطبيعى برده ان علمه او مفهومه ده يكون محدود

نقدر نسمى اللى فات ده مقدمه للموضوع ,,,

وازاى اننا لما نحاول نقرب من حاجه وندقق فيها طبيعى ان فهمنا ليها يكون محدود وده برده مش بسياسة الصح والغلط ,, يعنى مش معنى انى قدرت افهم بنى ادم بشكل محدود ان فهمى ليه غلط ,, بالعكس احتمال كبير يكون هو اكبر او اعم من انى افهمه ,, او انا اخدت القشور منه وبنيت عليها فهمى المحدود ده ,, وده اللى بيخلى فى النهايه ناس نحس معاها بالغموض ,. او ناس نرسم ليها شكل معين ويتضح ان رسمنا صح بس فى حاجات تانيه مخطرتش على بالنا ,, وجايز يظهر العكس ان مفهومنا يكون محدود بالشكل السلبى يعنى مفهوم خاطئ مبنى على تصور او احتمال , ومع التجربه نكتشف انه فهم محدود الصواب او فى المجمل فهم خاطئ

نقدر برده نسمى الجزئيه التانيه دى اى اسم تختاروه :biggrin:

يبئى اكيد لما احاول افهم بنى أدم كفرد خلاف انى افهم اسره مكونه من عدة افراد فتخيلوا لما اكون عايز افهم جماعه او لو الموضوع اتطور معايا انى افهم تيار معين او توجه معين

علشان كده لما تيجوا تسمعوا تحيليل لاى خبير سياسى (( مع اعتراضى على حكاية خبير دى )) طبيعى ان عقلكم يتاثر بمفهومه هو , اللى فى النهايه برده مفهوم محدود زى ما اتفقنا ,, لكن مع كام راى لكام (( خبير )) على نظرة لمجموعه من اللى حواليا (( أصحاب او اسره او اقارب او زملاء عمل او حتى اعضاء فى المنتديات او على الفيس )) بتلاقى نفسك فى النهايه غصب عنك بتنقاد فى اتجاه معين من غير ما تحس ,, وده بيسموه (( توجيه الرأى العام ))

ايوه الرأى العام ,, ما هو انت وانا وغيرك وغيرى لما نجتمع كعدد بيبئى اسمنا رأى عام ,,, ومتقوليش اننا 80 مليون فعلشان اى حاجه تكون راى عام لازم تتخطى حاجز ال 50% ,, لانى حقولك ده مش حقيقى ومش واقعى ولو حتاخد رأى ال 80 مليون فى قضيه زى اكياس الدم المسرطنه حتلاقى ان اكتر من 70 % من الشعب مكانشى يعرف عنها اى حاجه ومع ذلك هى قضية رأى عام ,, وهى كده فعلا ,,, لان الرأى العام بيكون فى الغالب منحصر فى شرايح معينه وبما اننا ربنا ابتلانا بنسبه كبيره من الاميه على ايد النظام اللى اتخلع ,, فلازم ندرك اننا دوله بلا اغلبيه ,, وانما دوله استقطابيه

حطتلكم تحت دوله استقطابيه دى خط علشان هى محور الموضوع ده

من كل اللى فات اقدر اقلكم انك لما بتحاول تفهم بفهمك المحدود زى ما اتفقنا بتقع فريسه لعملية (( توجيه الرأى العام )) الىل اتفقنا برده عليها ,, وفى النهايه تلاقى نفسك بتمشى فى اتجاه معين علشان تشارك جماعه من الناس نفس المفهوم اللى انت اتوجهت ليه

اهو مشيك فى اتجاه معين ده بئى اللى اسمه استقطاب ,,,

ايه العلاقه بين استقطابى كفرد ,, وبين توصيفك يا قلم بلا حبر لمصر حاليا بدوله استقطابيه ؟

العلاقه ببساطه زى علاقة المفتش كرومبو بسحس المساعد بتاعه ,,,:biggrin:

مبهزرشى دى حقيقه ,,, دايما المفتش كرومبو هو الصح وسحس بيحاول يتعلم منه ,, مفكرشى كرومبو فى مره ان سحس جايز يكون عنده مهارات محدثه بحكم عصره تسمح ليه انه يتجاوز المفتش كرومبو ,,, انما يا عينى دايما مضغوط عليه بحكم انه كرومبو ده الراجل الكبير الخبره اللى مفيش زيه ,,, انت مين يا ابن النهارده علشان تفهم الحاجات دى كلها ,, انت بس دورك تتوجه وتستقطب وتبئى زى الفل

طيب علشان منكترشى فى الكلام ونحاول نختصر المغذى من الموضوع

1- لو فى حد يقدر يثبت انه وصل لادراكه الفظيع وفهمه اللى مفيش منه اتنين من غير ما يجرب ويغلط وبعد كده يفهم ,,, يبئى يحرمنى من انى اجرب واغلط علشان افهم

2- انى اكون تحت نظر المستقطبين والموجهين ,, فده شغلهم واكل عيشهم ,, لكن برده انى اكون فى نظر نفسى كيان ليه احترامه فده حق مينفعشى المساومه عليه

3- المثل بيقول (( ربنا خلق لينا ودنين نسمع بواحده ونخرج بالتانيه )) وانا بقولك اسمع بالاتنين وفلتر كل ده بعقلك وترجمه لافعال واقوال تنفع بيها نفسك واللى حواليك

4- مش كل الافكار صح ,, ومش كل الافكار غلط ,, لكن كل الاطلاع صح ,,, وكل التعميم غلط

5- كلنا (( تعميم اهو )) عايزين مصلحة مصر !!!!!!!!!!!!!!! كفايه كده تعجب


تحياااااااااااااااااااااااااتى"""""""""

[روح صامتة]

اقتباس





4- مش كل الافكار صح ,, ومش كل الافكار غلط ,, لكن كل الاطلاع صح ,,, وكل التعميم غلط

كلام صحيح وعجبني طريقة الشرح انا ماشية
على الكلام حبة حبة عشان افهم وجهة نظرك
بس يا ريت لو تكبر الخط شوية عشان يوضح شوية
الفكرة ان البعض فعلا بيتاثر بفكرة معينة
وكان فيه فرض منها علينا
يعني اتوجه للي بنقوله وبس ما تسمعش من اللي غيرنا
اعتقادا منهم انهم الاصح
ولو فيه الاصح يبقى فيه الاصح منه
يعني الفكرة دايما مش بتبقى ثابتة
والمفروض الانسان يدور على الراي اللي يناسب تفكيره
ويدور على الحقائق عشان يقدر
يستبين الطريق الي هيمشي فيه
بعيدا عن الراي العام
لانه كل انسان ليه توجهاته وتفكيره ما ينفعش
يتضغط من مجموعة معينة
ويحصل الاستقطاب الي حضرتك بتتكلم عليه
يمكن بشوف المشهد دا في الميدان الايام دي كتير اوي
تسلم ايدك قلم بلا حبر موضوع رائع
ارق تحياتي

[yasmine refat]

والله موضوع كويس ياسيد

وهدف توعوي كويس من وراء الموضوع

لكن كلام معروف ولو طرحته على اي شخص من (المستقطبين) بدون تعميم هتلاقي يقولك انا صح وانا تمام وبفكر وهيأيدك في الفكره المطروحه

الجميع بدون استثناء بيستخدم دماغه..

وانا بؤمن ان الدماغ تستخدم بطريقتين::

1_ في انها تفكر بنفسها وتوجد

2_ انها تثبت شيء مفروض عليها أساسا

في خوف بسبب قداسة الدين مثلا لتحطيم سد اثبات الفكره للإيجاد

وفي ناس كتير بتكلم معاهم بحسهم بيتعبوا وبيثبتوا فكره فرضتها عليهم البيئه او التوجه المفروض عليهم

عموما :::: الأغلبيه بتنتصر ومنعهم من طرح أرائهم لعدم نضوجهم شلل للنضوج نسيبهم يجربوا ويشوفوا وأكيد من المستحيل الفكر يفضل متماسك حتى آخره لازم تحصل فيه انشقاقات وفروع تعارض المصدر الأساسي فالمستقطب النهرضه ممكن يفوق بكره

وحلو اسم الموضوع :::عايز أفهم:Ts_011:

بالتوفيق

[Words Whisper]

ليس كل استماع لعدة آراء

مع الاحتفاظ بمبدأ أساسي

يؤدي الى استقطاب

بل هو يزيد الادراكـ بالأمور ..

دمت بحفظ الرحمن ..

[حـ,ـكـ,ـآيـ,ـهـ,ـ ۅطـ,ـنـ,ـ]

ما تراه جميلا ..
قد يراه غيرك قبيحا .
وما تراه جيدا حسب البيئة والثقافة التي أتيت منها
ربما يراه غيرك سيئا.
عوّد نفسك على الاختلاف ، وتعلّم كيف تتقبله .
بالتوفيق يا سي السيد

[قلم بلا حبر]

اقتباس
المشاركة الأصلية كتبت بواسطة روح صامتة




اقتباس





4- مش كل الافكار صح ,, ومش كل الافكار غلط ,, لكن كل الاطلاع صح ,,, وكل التعميم غلط

كلام صحيح وعجبني طريقة الشرح انا ماشية
على الكلام حبة حبة عشان افهم وجهة نظرك
بس يا ريت لو تكبر الخط شوية عشان يوضح شوية
الفكرة ان البعض فعلا بيتاثر بفكرة معينة
وكان فيه فرض منها علينا
يعني اتوجه للي بنقوله وبس ما تسمعش من اللي غيرنا
اعتقادا منهم انهم الاصح
ولو فيه الاصح يبقى فيه الاصح منه
يعني الفكرة دايما مش بتبقى ثابتة
والمفروض الانسان يدور على الراي اللي يناسب تفكيره
ويدور على الحقائق عشان يقدر
يستبين الطريق الي هيمشي فيه
بعيدا عن الراي العام
لانه كل انسان ليه توجهاته وتفكيره ما ينفعش
يتضغط من مجموعة معينة
ويحصل الاستقطاب الي حضرتك بتتكلم عليه
يمكن بشوف المشهد دا في الميدان الايام دي كتير اوي
تسلم ايدك قلم بلا حبر موضوع رائع
ارق تحياتي

ده صحيح ,,,,,


والسبب فى ده كله هو قلة الخبره ان مكنشى انعدامها فى اوساط المتواجدين فى ميادين مصر

حتى اندفاع الشباب الثورى وراه قلة الخبره

نورتى الموضوع

تحيااااااااااااااااااااتى""""""""

[قلم بلا حبر]

اقتباس
المشاركة الأصلية كتبت بواسطة yasmine refat

والله موضوع كويس ياسيد

وهدف توعوي كويس من وراء الموضوع

لكن كلام معروف ولو طرحته على اي شخص من (المستقطبين) بدون تعميم هتلاقي يقولك انا صح وانا تمام وبفكر وهيأيدك في الفكره المطروحه

الجميع بدون استثناء بيستخدم دماغه..

وانا بؤمن ان الدماغ تستخدم بطريقتين::

1_ في انها تفكر بنفسها وتوجد

2_ انها تثبت شيء مفروض عليها أساسا

في خوف بسبب قداسة الدين مثلا لتحطيم سد اثبات الفكره للإيجاد

وفي ناس كتير بتكلم معاهم بحسهم بيتعبوا وبيثبتوا فكره فرضتها عليهم البيئه او التوجه المفروض عليهم

عموما :::: الأغلبيه بتنتصر ومنعهم من طرح أرائهم لعدم نضوجهم شلل للنضوج نسيبهم يجربوا ويشوفوا وأكيد من المستحيل الفكر يفضل متماسك حتى آخره لازم تحصل فيه انشقاقات وفروع تعارض المصدر الأساسي فالمستقطب النهرضه ممكن يفوق بكره

وحلو اسم الموضوع :::عايز أفهم:Ts_011:

بالتوفيق

لسه حاله تالته بتستخدم بيها الدماغ ,, انها تنفى واقع او موجود ثابت

شوفى عموما اى حد عندى رؤيه بيكون عنده الستار الواقى للرؤيه دى

مع اول احتكاك ليه برؤى لناس تانيه بتحصل عمليه شد وجذب ,,,

بينتج عنها ابراز احدى الرؤى دون الاخرى ,, نتيجة لقوة من يؤمن بها ويدافع عنها

ومش شرط انها تكون الرؤيه الصحيحه بالعكس ,,,

التجربه اثبتت ان مش كل ما هو سائد ,, صحيح

ومش كل ما هو منطوى فى تواجده وانتشاره ,, خاطئ

علشان كده حدث زى الثوره المصريه بيحقق الاولى ,,

واعتصام زى اعتصام ميدان التحرير بيحقق التانيه ""

وفى كل الحالات الاديان نفسها بتقوم على مبدأ الاستقطاب ,, وده مش حاجه الواحد ينكرها

انما الانكار بيكون فى طريقة الاستقطاب

نورتى الموضوع

تحياااااااااااااااااااتى"""""""

[قلم بلا حبر]

اقتباس
المشاركة الأصلية كتبت بواسطة أنغـ قلم ــام




ليس كل استماع لعدة آراء

مع الاحتفاظ بمبدأ أساسي

يؤدي الى استقطاب

بل هو يزيد الادراكـ بالأمور ..

دمت بحفظ الرحمن ..


فى فرق بين الانصات ,,,, والاستماع

مش معنى انى اقعد وادى ودنى لناس بتتكلم يبئى ده حاجه كويسه

لان الانصات مبنى على السمع والتحليل والتدبر

وعلشان كده الايه الكريمه بتقول ((واذا قرئ القرأن فاستمعوا له وانصتوا ))

فالاستماع قضيه والانصات قضيه تانيه خالص

ومعظم اللى بيحصل وبشوفه بيقع فى دايرة الاستماع

تستمعى للعاشره مساءا فتكونى فكره وتصدقيها ,, تستمعى للقاهره اليوم تؤمنى بفكره تانيه خالص

نورتى الموضوع

تحياااااااااااااااااااااااتى"""""""""

[قلم بلا حبر]

اقتباس
المشاركة الأصلية كتبت بواسطة انسام الورد




ما تراه جميلا ..
قد يراه غيرك قبيحا .
وما تراه جيدا حسب البيئة والثقافة التي أتيت منها
ربما يراه غيرك سيئا.
عوّد نفسك على الاختلاف ، وتعلّم كيف تتقبله .
بالتوفيق يا سي السيد






الواحد كده كده مختلف من ولادته لحد موته وده شئ طبيعى

والطبيعى برده انى الاقى حد يتقبل اختلافى معاه ايا كان نوع الاختلاف ده

وطبيعى برده ملاقيش

بس مش معنى ده انه لو مختلف معايا تماما انى احاول استقطبه تحت اى مسمى

نورتى الموضوع

تحياااااااااااااااااااااتى"""""""""