( جميع حلقات ) ( بنقولك شكرا ) معنا (ضيوف كتير )

[morshooo]

بسم الله الرحمن الرحيم

اهلا ومرحبا بكم

كل واحد فينا هنا فى المنتدى بيبقى لية شخصية معينة وبيقدر يكون صداقات

كتير جدا وبيبقى مميز فى المنتدى مش شرط يكون مشرف او مراقب او ادارى

ممكن يكون عضو عادى ولكن مميز جدا ولية مواضيعه الى الاعضاء بيستنوها

ولكن اصعب حاجا ان فجأة العضو صاحب هذا التميز يختفى تماما سواء لظروف شخصية

او لظروف غصبتة على ترك المنتدى .

ولكن الجميل اننا نفتكرة ونقولة ( شكرا ) على الى قدمتة فى المنتدى فى الفترة الى كنت فيها معانا

فى برنامجنا هنستضيف اعضاء هنشوفهم هيقولو شكرا لمين وهيحكولنا حكايات محدش يعرف عنها

حاجا واتمنى ان فى يوم من الايام الاعضاء دى تدخل المنتدى تانى وتشوف التوبيك دا

وساعتها انا متاكد انهم هيبقو مبسوطين جدا جدا بية

معايا النهاردة

ضيفة متميزة هنشوفها هتقول

( شكرا )

لمين

معايا المتميزة

misho

شوفو قالت اية

شكرا في ناس تستحقها كتير في المنتدي

من اول ما ابتدي لحد دلوقتي

لكن انا اخترت اكتر اشخاص تستحق فعلا بالنسبة ليا

ونفسي اقولهم مليون شكرا

اولهم طبعا الاداري السابق

ابو أدهم

يمكن في ناس كتير من الاعضاء دلوقتي متعرفوش

لكن القدام هيبقوا عارفينه كويس

ابو ادهم قعد تقريبا في المنتدي سنة وشوية

في الفترة دي كان اكبر مثال للاخلاق والادب والاحترام

انسان ذوق لابعد الحدود فعلا

انا بداية تواجدي في المنتدي كان ابريل 2008

واتقطعت فترة كدة لظروف امتحاناتي ورجعت

ولاقيت نفسي موقوفة !! ودة كان بداية تعاملي من ابو ادهم

عملت عضوية تانية ودخلت راسلته ولقينا ان في سوء فهم كان حصل في غيابي

و بالفعل رجع العضوية ونزلي موضوع ترحيب من تاني وكمان اعتذار عن الفترة اللي اتوقفت فيها

و موقف تاني اكدلي قد ايه الانسان دة قمة في اخلاقه

اول ما اختارني مشرفة علي عالم حواء

كلم هدي الله مشرفة القسم العام وقتها وكلمتني في التليفون عشان تتاكد اني بنت

لاني كنت هبقي مشرفة علي قسم للبنات يعني

معظم تعاملي هيكون معاهم وهكلمهم فكان لازم يتاكد خوف عليهم من اي استهتار

و من الحاجات الجميلة في ابوادهم واللي محدش بيعملها خالص

انه اول ما يكلم بنت علي الميل لاول مرة

لازم يسالها سؤال < اهلك عارفين انك بتكلميني دلوقتي ؟؟ وعارفين انك مشتركة في

منتدي ؟؟>

لمجرد خوفه انه يكون سبب ان بنت تعمل حاجة من ورا اهلها

انسان كل اللي اتعامل معاه شهد ليه بكل حاجة حلوة فعلا

و ليه يرجع الفضل اني اتعلمت كل حاجة في المنتدي

ازاي استخدم ادوات الاشراف و ازاي اتعامل مع اي مشكلة في القسم كل حاجة فعلا

و للأسف حصل ظروف وساب المنتدي

لكن هتفضل سيرته جميلة علي لسان اي عضو

بقوله الف شكر يا ابو ادهم

تاني حد هتكلم عنه هي

هدي الله

مشرفة القسم العام السابقة

البنت دي بقي لو فضلت اتكلم عن ادبها واخلاقها واحترامها

عمري ما هقدر اوفيها حقها

اكتر حاجة عجبتني فيها خوفها دايما من ربها انها تبعد عنه

او تخالفه او تعمل حاجة تغضبه

ودايما تلاقيها بتنصح اي حد بالخير

و هدي تاني واحدة اتعرفت عليها في المنتدي

و ساعدتني كتير في بداية اشرافي و مكنتش بتسيبني ابدا

و من المواقف اللي عمري ما هنساها ليها ابدا

انها اختارت كام بنت من المنتدي وقتها

وكانوا تقريبا

انا و هي

و سمسمة 2008 مشرفة الازياء السابقة

و رزان مشرفة الاسلاميات السابقة

و ميرا مشرفة السجل السابقة

و روني مشرفة القسم العام السابقة

و قررنا نضيف بعض علي الميل ونتكلم مايك

و نقرأ قرءان مع بعض ونفسر ايات الله

ونتبادل المعلومات بيننا وبين بعض

كانت ايام جميلة جدا

ربنا يجازيها خير يارب

و بقولها الف شكر يا هدي

و عايزة اقول شكرا لــ

nooody مشرفة اليوميات السابقة

هند دي بقي حبيبة قلبي من جوا

بنوتة كل الصفات فيها حلوة اوي

رقيقة وحساسة لابعد درجة و حنينة جدا بجد

احلي حاجة فيها انها صاحبة صاحبتها اوي

يمكن مواقفي معاها كلها خارج المنتدي

هند من الناس اللي صعب تلاقيني محتاجلها وتتخلي عني

لدرجة ان في وقت تعبي ووقت ما كنت محتاجة حد جمبي

والدنيا متقفلة كانت اول واحدة بتنزل من الزقازيق مخصوص عشان تقعد معايا وتبقي

جمبي و اول واحدة برفع التليفون واتصل بيها لما اكوت تعبانة او عندي مشكلة

دايما معايا وجمبي ومن الناس القليلة اوي اللي ممكن ابكي قدامهم لاني عارفة انها مش

هتسيبني وقت ضعفي

ربنا ما يحرمني منها ابدا

و الف شكر ليها بجد

و اخر شكرا عايزة اقولها

هي لمشرفة معانا لحد دلوقتي

بس مقدرش انساها

هي AYA

دي بقي بنتي واختي الصغيرة وحبيبة قلبي من جوا بجد

البت اوشة دي بقي اجدع بنت ممكن تشوفها في حياتك

اسكندرانية زي العسل

اوشة اول واحدة اعرفها في المنتدي و عجبني فيها

عقلها الكبير رغم سنها الصغير و كلامها وطريقة تعبيرها عن اللي جواها لدرجة ان

لا يمكن تحس ان اللي بتتكلم دي صغيرة في السن

أوشة اقرب حد ليا معايا في كل وقت بجد سواء ميل او مايك او موبايل

عارفة تفاصيل التفاصيل عني

دي اللي اقدر اقول انها و هند اللي يعرفوا شيماء بجد

أية مواقفها معايا كتير اوي

وقت تعبي و زعلي اوشة كانت معايا بتخفف عني

وممكن الاقيها بتبكي بسبب بكائي و حزني

و كان يوم صعب عليا اوي لما عملت الحادثة و دخلت العمليات

كنت هموت من القلق عليها بس فرحني اوي انها تتصل بيا اول ما تفوق من البنج

وتخرج من العمليات

و تطمني عليها لانها عارفة اني هكون قلقانة عليها

عرفني دة قد ايه انا غالية هندها وهي عارفة غلاوتها قد ايه عندي

ربنا يخليها ليا يارب

و كدة بقي انا خلصت انا عارفة اني طولت اوي

بس مقدرش مقولش لكل دول شكرا

كلمة بقي لكل واحد فيهم

أبو ادهم>> ربنا يكرمك في حياتك و يكتبلك الخير دايما

هدي الله >>ربنا يجازيكي خير يا هدي ويحقق كل اللي تتنمنيه

نودي>>ربنا يسعدك يا قلبي انتي وخطيبك و تكوني فرحانة دايما

اوشة >> بحبك يا قردتي والله يارباشوفك في ياسة واقتصاد كدة زي ما انتي عايزة

و الف شكر ليهم كلهم تاني

و تسلم يا احمد علي الفرصة اللي ادتهالي اني اقولهم

ان محدش هينسي اي عضو محترم وساب بصمة كلها خير

تحياتي

وبكدا بتنتهى حلقتنا النهاردة

واعتقد ان احنا كمان لازم نقولهم

( شكرا )

لان الناس دى فعلا كان ليهم دور كبير فى المنتدى

انتظرونى وحلقة جديدة

وضيف جديد

هيفكرنا بأعضاء مميزين وهيقولهم

( شكرا )

تحياتى

MORSHOOO

[M@HMOUD]

حلقه حلوهـ وجميله
وميشو من الشخصيات المحترمه اللى موجودهـ فى المنتدى
بالتوفيق للجميع

[ملكة القلوووب]

حلقة جميله جدا
وشخصيات مبين عليها محترمه جدا بالرغم اني ما اعرف ولا واحد منهم

يسلموا على الحلقة

[A . y . a]

يا شوش انا قايلالك من زمان انك بتعشقيني وانتي ماكنتيش مصدقة xD صدقتي دلوقتي ؟

حبيبة قلبي يا شوش والله

بجد يا جماعة اللي يعرف شيماء هيعرف قد ايه هيا تستاهل كل حاجة حلوة

بجد انسانة جميلة ومافيش زيها كتير دلوقتي مش بقول كده عشان اجاملها والله بجد اللي يعرفها كويس هيعرف ان كلامي صح =)

ربنا يسعدك يا حبيبتي يارب .. برنامج جميلة وحلقة اجمل يا مورشو بجد .. مانتحرمش من برامجك

[ĶǎnDO̳̿uChǎ ツ]

ميــــــ ش ـــــــو ,,,,

بجد شكرا ليكي عـ الحلقه دي

فعلا كلام جميـــــــــــل اوي

قولنالهمــ و بنقولهمـــ و هنفضل نقولهمـــ (( شكرا ))


ميغسي يـ احمد عـ البروجرام الجميل و الحلقه التوحفايهـ تي

و اختيار متألق منك لـ شووشوو

[۩۩ elMagic ۩۩]

حلقه جامده جدا
واستضافه أجمل
بجد ميشو مبادره طيبه منك
انا بصراحه معرفش حد خالص منهم
غير تقريبا نودى اسمها هند بس عرفته مصادفه
وآيه بشوفها هنا بس مش كتيير
وأكيد هما يستحقوا الكلام الجميل دا
وبالتوفيق ليكى ميشو وليهم جميعاً
لكى منى ارق تحيه
اخوكى الصوغنن

[S n i p e R]

حلقة كويسة كبداية

برنامج جميل

اسئلة حلوة

اجوبة احلى

تحياتى

[morshooo]

اقتباسالمشاركة الأصلية كتبت بواسطة SilveR SnipeRحلقة كويسة كبداية

برنامج جميل

اسئلة حلوة

اجوبة احلى

تحياتى

^_^

هى فين الاسئلة دى الحلوة

مفيش والا سؤال على فكرة فى التوبيك

[روح صامتة]

يااااه ابو ادهم من زمان كانت ايامه انا يمكن مكنتش قعدت في فترة
ادارته للمنتدى غير شهرين او اقل لكن انا فاكرة انه رد على رد ليا
في موضوع يوميها انا كنت سعيدة
ا دا رفع من معنوياتي جدااا
بجد ميشو عرفتي تجيبي الكلمات عنه بمنتهى الدقة
فعلا كلامك كله صحيح عنه مش نقدر نقوله غير شكرا

هدى الله اكيد كانت شخصية محترمة من كلامك عليها تحسي
ان احنا اخدنا عنها الفكرة الي انتي عايزة توصليها
انا ممكن اقولك اني مش قادرة افتكرها اوي لكن بردو نقولها شكرا جدااا كمان

اما نودي بقه دي كانت بنوتة عسوولة اوي والله
كنت بحس انها بنت رقيقة جداا
و كانت كل ردودها موضوعية ولطيفة
بجد كانت انسانة تحترم
لكن ربنا يوفقها لكل خير ان شاء الله ونقول شكرا

اية بقه دي بنوتة زي العسل ودمها خفيف جداا ما شاء الله عليها
انا فاكرة زمان كان اسمها بالعربي وكانت حاطة صورة ياسمين عبد العزيز
كنت متابعة ردودها ساعتها كانت دايما بتهزر
وشايفة الدنيا حلوة ونقولها شكرا يا يوشة


ميشو حلقة حلوة اوي احستني اختيار الاعضاء الي شكرتيهم
و بشكر مورش ع الموضوع الرائع والتنسيق اللطيف
ارق تحياتي

[Remaas]

فكرة البرنامج نبيلة قوى كلها وفاء
وطريقة تقديمه جميله جداولا اجدع اعلامى
اما ميشو كلامك حلو قوى ميشو بيبين قد ايه انتى مخلصه
تسلم يا احمد على موضوعك تستحق تقييم
وانتظر كل جديدك