انا وعم دعدور والكمبيوتر

[عادل طه]

عم دعدور رجل طيب اوى وعلى نياته
قابلنى مره بالصدفه وقالى انا جايلك
المهم جالى البيت وشافنى قاعد على الكمبيوتر
وقالى

هو انت ياولا ماوراكش غير المحروق ده اللي اسمه الكمبلوتر وكل ماجي الاقيك داخل على مستويات بتاع البنات بتوع مصر دول (يقصد منتديات بنات مصر) عمال تضحك وتكتب نكت وعمرى ماشفتك بتعمل حاجة مفيدة بالكمبلوتر ده ، عايزين نشوف طريقة نستفاد بيها من الكمبلوتر في البلد

انا: انت تؤمر يا عم دعدور

دعدور : انا امبارح كنت عند الواد صميدة بن ابو الغيط ، مانت عارف انه من يوم ماسقط في الثانوية راح فتح ورشة تصليح كمبلوتر ، وعرفني شوية حاجات كده قلت اجي استفاد من الكمبلوتر بتاعك بدال ماهو مالوش لزمة

أنا : حاضر ياعم دعدور

دعدور : أول حاجة ، فين لوحة الأم ؟

انا : آه تقصد الماذربورد ؟ جوة الجهاز

دعدور : بتعمل ايه جوة الجهاز ؟ انت ماتعرفش ياولا ان فيه ناس رسامين بيبيعوا لوح بالالافات وبعدين دى لوحة عن الأم وعيد الأم فاضل له كام يوم ، ماتيجى نوديها مصر يمكن تجيب لنا قرشين

أنا : بس ياعم دعدور…….

دعدور : مافيش بس ، وبعدين قل لي فين المروحة بتاعة الكمبلوتر ياولا ؟

أنا :ال برضه جوة الجهاز

دعدور: وبتعمل ايه جوة الجهاز يامقصوف الرقبة ؟ الصيف داخل والدنيا حر ماتطلعها نتهوى بيها شوية

أنا : بس المروحة دى صغيرة قوى ياعم دعدور

دعدور : صغيرة صغيرة ، نحطها في اوضة صغيرة على قدها ، وبعدين قل لي ياولا ، مش الهارج جيسك بتاع الجهاز فيه ماطور ؟

أنا : أيوه ياعم مغاوري ، ماله ده راخر ؟

دعدور : جاك ملة على جنابك ، انت مش عارف ان الماطور بتاع ماكنة الري بتاعتنا عطلان وباعتين نجيب واحد من البندر من شهرين ؟ ماتدينا الماطور بتاع المدعوق ده ، وانا كلى نظر لما نجيب الماطور من البندر هارجعهولك على طول .

أنا : الحكاية مش كده خالص ياعم دعدور ، الموتور بتاع الهارد لو طلعته الهارد يبوظ ، وبعدين الموتور ده ……..

دعدور : ايوه ياخويا كل ماقولك حاجة تتهرب ، ماهو انا لازم استفاد مالكمبلوتر يعني لازم استفاد ، قولى ياولا ، الواد صميدة (الله يخرب بيتك ياصميدة) قال لي ان الكمبلوتر فيه حاجة لمكافحة الديدان .

أنا : تقصد worm ، دي برامج مكافحة فيروسات .

دعدور : ماتتفلسفش علي يالا وتتكلم بالانجليزي ، اني عاوز البرامج بتاعة الفيروز والدود دي عشان نجمع بيها الدودة من القطن ، وبدل مانجيب انفار يكلفونا دم قلبنا يبقى الكمبلوتر هو اللي ينقي الدودة .

أنا : ياعم دعدور ماينفعش لأن …………

دعدور : أمال فين العلبة الحديد بتاعة الكمبلوتر ؟

أنا : آه تقصد الكيسة ؟دعدور : ايوه ياخويا، البتاعة اللي عاملة زي الصندوق دي ، آانا عاوزها للانفار اللي بيجمعوا البرتقال يجمعوه فيها بدل القفة اللي بتعوز نفرين يشيلوها ، أقله دى نفر واحد بس بيشيلها .

أنا : ياعم دعدور……………..

دعدور : وبعدين ايه التلفزيون ده ؟

أنا : ده مش تليفزيون ده مونيتور ياعم دعدور .

دعدور : انت هتستسهبل على ياولا ؟ داني شايفك بعنيا بتتفرج فيه على الأفلام و المرسحيات والكارتون بتاع العيال ، انا هاخده .

أنا : ماهو ياعم دعدور ، ده ماينفعش يشتغل من غير الكمبيوتر وبعدين ……

دعدور : عنه ماشتغل ، انا هخده وافكه واعمله بنايه للحمام يبيض فيها ، الحمامة من دول تطلع في الشهر جوز زغاليل بالشئ الفلاني أفيد من اللعب اللي انت طول النهار بتلعبه .

أنا : ياعم دعدور أنا بتعلم برامج جديدة وبعدين انت مش فاهمنى …….

دعدور : بتتعلم برامج جديدة ، كنت اتعلم من زمان ياخويا ، وآخرتها تقول عليه انا مابافهمش قليل الحيا ، انا الظاهر هادوقك العصا زي زمان ، وكمان لما ييجي ابوك هقوله اخليه يبيع ا لمخروب ده ويشتري بتمنه حاجة مفيدة .

انا:طب بس اديني فرصة اشرح لك ياعم دعدور …..

وهكذا انتهت أو لم تنتهى قصتى مع عم دعدور

[ملكة القلوووب]

اقتباس دعدور : ايوه ياخويا كل ماقولك حاجة تتهرب ، ماهو انا لازم استفاد مالكمبلوتر يعني لازم استفاد ، قولى ياولا ، الواد صميدة (الله يخرب بيتك ياصميدة) قال لي ان الكمبلوتر فيه حاجة لمكافحة الديدان . أنا : تقصد worm ، دي برامج مكافحة فيروسات .

هذه حلوة

تسلم ايدك

بإنتظـــــــــــــــــــــــار جديدكـ

[nano.syria]

ياسلااااااام شو مهضوم عمو دعدور هيدا ههههههههه نيالك