عيد ميلادي الثالث في المنتدى,,

[SiLver Spectra]

يصادف اليوم 27 سبتمبر عيد ميلادي الثالث في المنتدى
27 سبتمبر 2008 هو تاريخ تسجيلي في المنتدى
قبل عيد الفطر بيوم أو يومين تقريبا

نتكلم عامي أحسن صح؟
يمكن كتير منكم مفكر اني اتولدت هنا في المنتدى إداري
غير مدرك إني بدأت هنا زائر ثم عضو ثم مشرف ثم مشرف عام ثم مراقب
التدرج دا فرق معايا كتير و يمكن خلاني أحس بأشياء كثيرة على عكس اعتقاد البعض

نبدأ الرحلة كزائر
المنتدى جيته بالصدفة في وقت فراغ كنت حاسس بيه بالملل
كان ليه خبرة في المنتديات لأني كنت مراقب عام في منتدى مهجور ,,بتاع زميل ليه هو الي عرفني على المنتديات بصفة عامة
و كأي واحد جديد داخل لسه في عالم المنتديات بيهبل شوية في الأول عبال ما ياخد خبرة سواء في الأسلوب أو في طريقة المشاركة و طرح مواضيع و تنسيق و غيره
و بعدين بدأت أسجل في منتديات تانية لكن كنت قليل المشاركات
ماكنتش بكتب بنقل بس , و لا عمري كتبت قبل كدا غير مواضيع التعبير أو الإنشاء بتاعت العربي الي بتكون مجبر فيها انك تكتب شوية كلام مالوش أي معنى , المهم مايكونش في أخطاء املائية عشان تاخد درجة كويسة

فشاء القدر بعد شهور من معرفتي بالمنتديات اني أسجل هنا في منتديات بنات مصر برغم تسجيلي في عشرات المنتديات الأخرى
ماكنتش أتخيل و لا أتوقع إني هستمر في المنتدى دا
كعضو جديد قاعدت أتفحص و ألف في المنتدى و أعد كام مراقب و كام اداري
لاقيتهم 5 اداريين
رانومة و هيثم و محمود و عاشق الأحزان و ابو أدهم
و لفت نظري ان صاحب المنتدى الي هو العضوية رقم واحد مش هو الي ماسك شؤون المنتدى داخليا
يمكن دا اداني انطباع ايجابي عن صاحب المنتدى في كونه مش محتكر الإدارة بل بالعكس بيديها للشخص الي هيشتغل فيها لصالح المنتدى و لصالحه كمان لما يكون في نشاط عالي للمنتدى

و كأي عضو جديد برضو عملت موضوع ترحيب و دخلت قسم الألعاب ألعب شوية و اهدي الوردة و علبة الشيكولاته ,,الخ
لاقيت رسالتين في الخاص و سرعان ما اصابني الاحباط بعد مشاهدة التنبيه لما حاولت افتح صندوق الرسائل (عفوا لا يمكنك مشاهدة صندوق الرسائل الا بعد 100 مشاركة)
و كمان كل مشاركات الألعاب الي عملتها ما اتحسبتش!! (يا غلبك يا سعد)

قاعدت بقى أكافح و الفضول هيموتني مين بعتلي الرسائل دي
فين لما كملت ال100 رسالة و لاقيتهم من عضو و عضوة
كانوا رسالتين تعارف
طبعا كأي ولد هيفرح بيهم جدا ,,خصوصا رسالة الولد

بدأت اشارك في اقسام مختلفة , عدد المشرفين كان قليل جدا بالمقارنة بالأعضاء
كان نادر لما اشوف عضو أزرق في المتواجدون
كان انطباعي السائد هو ان المنتدى فيه تشدد نوعا ما
في تواقيع الاداريين تنبيهات ممنوع منعا باتا عمل كذا و كذا
سيطرد اي عضو يعمل كذا
كان الواحد بيحس بخوف و كل شوية ناس محظورة
و ينزل موضوع تشهيري في حق مراقب و ليه أخدت حظر و بتاع و أعد أتابع الردود و بيحس بانطباع سلبي اتجاه الإدارة بدون ما أدرك أساس المشكلة في الأصل

جالي تنبيه من مراقب عام بسبب الرسايل الخاصة
كلمته عالايميل ان الرسايل عادية و ناس بتعتلي فبرد عليه ,,لاقيته مضايق مني و اداني اجنور
توقعت اني خلاص هاخد حظر و فضلت مستني اللحظة الي لوني هيبقى فيها رمادي و فضلت عالحال دا لمدة اسبوعين مستني الحظر


ظهرت مواضيع و حروب بين السحالي و التماسيح , فشاركت بموضوع ليه و استخدمت خيالي و الفوتوشوب بشكل لفت انتباه أغلب الأعضاء وقتها
و اتشهرت من غير ما أحس ,,

جتلي رسالة من ابو أدهم للتعيين كمشرف جديد و اخترت قسم البرامج
اختيار غريب شوية لكن زي ماذكرت وقتها ماكنتش بكتب مواضيع بنقل بس و برد و كنت بدور على قسم فاضي مافيش عليه مشرف (زي اي عضو بخيره بالأقسام)

يمكن بداية اثبات الذات بدأت مع افتتاح قسم الأقلام
بدأت أنزل مواضيع ليه بمعدل كل أسبوع موضوع
بحاول أجيب أفكار جديده و أسلوب عرض مختلف في كل موضوع
حسيت فعلا بمتعة الكتابة و متعة الابداع
أحيانا كنت بفكر 4 أيام هكتب ايه الأسبوع الي جاي
و الحمد لله باقيت معروف بأسلوبي و بقلمي بين الأعضاء و نقدر نقول كنت محبوب بعيدا عن المشاكل في قسم هادي (البرامج)
و بكتب في قسم الأقلام ,,يعني كان مزاجي اشطه

حصلت بعد كدا خلافات قبل عيد الاضحى مباشرة بين الإدارة بالأخص ابو أدهم و بين المراقبين و بعض أعضاء الإدارة التانيين ,,فعزل كتير منهم و اختارني أنا و سيد (قلم بلا حبر) في منصب مشرف عام ,,أو مراقب عام تفرق في التسمية فقط
و الاختيار تم بناء على ثقة أبو أدهم فينا
كنت سعيد جدا بمنصبي الجديد , و كشخص مر بتجربة العضو كنت كاره فكرة التشدد و كان طموحي اني افتح مجال حرية أكبر في المنتدى
كان أول موضوع ليه في قسم المشرفين عن الروابط المطلوب حذفها
كان بيضايقني ان المشرف أو المراقب اي رابط بيقابله بيحذفه سواء مواقع تعليم أو موقع تحميل زي الميديا فاير أو حتى اليوتيوب
و حتى اتشاورت مع ابو أدهم وقتها و كان بيقولي اليوتيوب لأ طب ليه دا بيفيد و كذا يقولي اصل ممكن تعليقات خارجة تكون في صفحة المقطع ,,بس كان متردد و وافق في الآخر

حصلت خلافات و ابو أدهم إلي بعتبره الأب الروحي للمنتدى ترك المنتدى بسببها
الواحد زعل عليه جامد وقتها وكلمني آخر مره و قالي انت مش بتسأل ليه عليه ,,قولتله خير ,,قالي أنا مش داخل تاني ,,و ذكرلي انه اتعرض لتشهير و غيره من التفاصيل الي مش هقدر احكيها
و بعد اسبوع محمود خلاني اداري و رفع ناس مراقبين ,,و دخلنا بعدها في دوامة صراعات على الصلاحيات في المنتدى
كنا بنتعور بجد
كان قسم المشاكل الاجتماعية اتحول لقسم التقطيع بين المراقب و الاداري و الاداري و المراقب و المراقب و المراقب و الاداري و الاداري ,,كل يوم تدخل و تشوف المعركة بين مين و مين و انت طرف فيها و لا لأ و بيتقال عنك ايه
كانت فترة صعبة جدا بصراحة في ظل التعنت و عدم التفاهم الي كان موجود ,,كل حركة تعملها مع ان ربنا يشهد اني كنت كل حاجه بعملها بحسن نية تتحسب عليك و يتقال انك قاصد او كذا و كذا
ماكنش في أي نوع من التفاهم و فضلنا عالحال دا في الشد و الجذب لمدة شهرين
نتفق على ان القرارات تتاخد باجماع ,,مين كويس نميزه مثلا ,,مراقب يقول فلان ,,مراقب تاني يقول علان ,,طيب بس علان دا مش بيشارك من زمان المراقب يرد عليك آه بقى انت هتقولي,,انت عايز تاخد العضو الي رشحه المراقب التاني و عايز تتجاهلني!!
كان التعامل كدا بالظبط مابينا
خناقات و انفعالات على أقل حاجة ,,و ماحدش عايز يتفاهم
و بيوازي عدم التفاهم قرارات غريبة بتنزل ,,زي مثلا حظر العضو الي ينزل لعبة في قسم الالعاب بدون أخذ رأي الادراة!! (فكرة الاقسام المتراقبة ماكانتش موجوده لسه)
المهم ,,مع الوقت قلت حدة الخلافات بسبب تغيب اصحابها
مافضلش غيري أنا و واحد و مع الوقت الواحد دا كمان تغيب بشكل نهائي

يمكن العقدة دي خلتني اختار ناس متفهمة و هادية و عقلانية للمناصب الحساسة زي الرقابة و الإدارة
بحيث التفاهم يكون سهل و مايبقاش في قرارات تعسفية زي الي كنا بنشوفها
مره قرار مافيش صور بنات تنزل
مره قرار ممنوع طرح مسابقات
مره قرار منع المجموعات الاجتماعية
مره قرار بغلق قسم الالعاب بالكامل
و غيره من القرارات ,, و ان كانت القرارات بتنزل بسبب مخالفة معينة بيرتكبها العضو , لكن من وجهة نظري انها كانت قرارات فيها نوع من التشدد و المنع في حين أنا كنت بميل لسياسة التحرر أكتر
مش تحرر بمعنى ان كل حاجه سايبه ,لكن انك مش تقيد العضو بافكارك و بتوجهاتك دايما الا للضرورة
على سيل المثال لما انزل قرار بمنع المواضيع الي بيكون فيها عضو مجهول , دا كنوع من التنظيم مش اكتر , عايز تنتقد انتقد براحتك في الادارة ماحدش هيجي يقولك انتقدت ليه , آخري هرد عليك لو حبيت , لكن المهم تكون مسؤول عن نقدك , لأن بدون مسؤولية هيكون في تسيب
فدا بعتبره نظام مش تشدد نهائي لأن المنع متعلقة بجزئية التخفي فقط
و أنا شخصيا بعين ناس كتير مميزين و مراقبين بكون مختلف معاه سواء في نقاش او في اجراء ,,مش بشيل نهائي من حد في حين هو ممكن يفكر اني شايل منه

زمان ,,ماكنش في مواضيع تنتقد الإدارة نهائي,بيتم حذفها فورا
على عكس دلوقتي تفتح قسم اليوميات تلاقيها كلها مواضيع نقد
طبعا ما أنكرش إن الانتقادات زادت عن حدها و البعض استخدم النقد للشهرة أو عشان يبين انه مش بيجامل و صريح
انت اسهل حاجه تعملها هو انك تنتقد لكن اصعب حاجة هو انك تقدر
تقدر انك مش عبارة عن لون أحمر في المنتدى و قاعد و مش راضي ترد على مواضيع العضو بالعند فيه!!
أو تقدر انك ممكن تعد اليوم كله تحاول تركب في حاجه بسيطة في المنتدى و تلاقيها مش ظابطه و تحاول تعدلها زي مؤخرا انك تدور على حاجه تخليك تحجب نتيجة الاستفتاء و تدور و فين لما تجيبها من موقع اجنبي من ضمن 1300 هاك!!
أو انك تقدر شخص مسؤول عن كل شيء في المنتدى
أو انك تقدر شخص بيحاول يعمل مسابقات بطرق غير تقليدية وصلت لأكثر من 40 مسابقة
تقدر انك تشوف كمية المسابقات الي بتنزل و بيتوافق عليها و ان كانت كثيرة بشكل مفرط و لكنها بتترك المجال للعضو الجديد انه يتفاعل و يشترك في صناعة المنافسة بين الأعضاء
في حين زمان ماكنش في اي غير مسابقتين واحده معلومات عامة و التانية ابني بيتك و اثثه على مزاجك!! و نادر لما كانت مسابقة جديدة تنزل


عموما أنا مش ضد النقد و لا ببحث عن الثراء و المدح
بالعكس النقد بيفيد احيانا و عمري ما همنع النقد طول ما أنا اداري

من ضمن الانتقادات الي بتوجه الينا هي ان التعيين بيتم بالمحاملات
بالرغم من اني عمري ما جاملت اي شخص بالعكس بحاول اسأل مين كويس دايما و بعمل بحث مطول لاختيار دفعة التميز الجديدة
طبعا في ناس تستحق و مش بتاخد ,,لأن أنا في النهاية بشر و السهو وارد و استحالة هقدر اقيم الكل بنفس الدرجة الا لو كان الاداري اله و العياذ بالله

من الاشياء الي بضحكني فعلا هو ان في ناس بتخاف مني
بتوصلني رسايل كتير من عضو بلاقي فيها نوع من التوسل و كأني هديله حظر عشان بعتلي رسالة ,,و بحاول ارد عليه بهزار عشان يحس اني زي زيه
هو قاعد على كمبيوتر و أنا قاعد على كمبيوتر هو بشاشة و أنا بشاشة
هو عضو و أنا عضو الفرق ان هو أخضر و أنا أحمر
هو مسؤوليته نفسه و أنا مسؤوليتي المنتدى
هو دا الفرق الوحيد ,, و أنا بعذرهم , لأني في يوم من الايام كنت عضو و كنت بخاف من الإداريين , بس على الاقل كنت بشوف منهم ردود رسمية و رعب في التوقيع بتهديدات للأعضاء ,,مش عارف أنا هي عربية الشرطة بتخوف أوي كدا هههه
فصدقني يا عضو مش هيحصلك حاجه لو كلمتني أو عارضتني
و عمرنا ما بندي حظر غير للعضو الي بيخالف بشكل قاطع المنتدى بالاساءة لاعضاء فيه او بعد الالتزام بتنبيهات معينه و الكل بيتم تنبيهه قبل الاجراء الا في حالات التعدي على الغير
لكن برضو بيظل انطباع الخوف موجود

أما بخصوص المواضيع السياسية فأنا ماكنتش محتاج ثورة عشان أسمح بيها
بالعكس بكتب سياسة من زمان و عمري ماحذفت مواضيع سياسية
و ان كان بيتم الحذف من قبل المشرفين فكان لاسباب هما أدرا بيها
و طبعا بعد الثورة ماعتش في اي حجة للحذف نهائي

الحظر على تشابهات الآي بي كان بيتم بشكل غير طبيعي قبل ما أكون اداري
مع ان التشابهات وارده و لو بحثت عن اسم اي عضو قديم هلاقي في تشابهات كتيره جدا لأن رقم الآي بي متغير مش ثابت
أنا بكره سوء الظن و التشكيك ,,في ناس ممكن تخليك تشك في صوابع رجليك
و ممكن في ناس بتشوف ان التكبير بتاعي غلط
لكن أنا بفضل اني أكبر على اني اشكك و أظلم حد بدون يقين تام

آخر حاجه بخصوص المنتدى
احنا عارفين ان الأعضاء هما روح المنتدى ,,و الروح دي بتتجدد لو حصل خلل في تجددها بتموت
طيب الروح دي بتتجدد ازاي؟
عن طريق الزوار
كثرة الزوار بيديك كثرة أعضاء جدد بيديك فرصة افضل لأعضاء متفاعلين ممكن يعدوا شهور و سنين متواجدين بشكل يومي في المنتدى
في البعض قالك في ناس قديمه بتطفش ,,مش فكرة انه يطفش لكن في مليون سبب و علة بتخلي العضو بعد فترة يسيب المنتدى سواء مشاغل حياتيه أو ملل أو غيرها من الأسباب
و طبيعي جدا ان القديم بيروح و بيجي غيره
طيب أنا مش هقول كلام نظري
هقول كلام عملي
شوف الصورة دي
دي اتصورت من سنتين بالظبط

و دي من 17 شهر


و قارنها بالوضع دلوقتي
هتلاحظ ان الأعضاء الملونين زمان كانت أعدادها أقل بالمقارنة بالأعضاء الملونين دلوقتي
دا سببين سبب رئيسي و سبب ناتج له
السبب الرئيسي هو في انخفاض معدل التسجيل اليومي للنصف
و دا راجع للأرشفة في جوجل
و دي هيتعملها حلمة قريب ان شاء الله بحيث الكل يشارك فيها مش نستنى هيثم
و السبب الناتج له هو حملات التميز الي كانت بتطلع بال25 عضو دفعة واحدة

و في كمان سبب تالت و هو تاثير مواقع التواصل الاجتماعي
دلوقتي الناس بتختصر و شوية صور على كومنتات و خلاص ,,المنتدى عايز خبرة شوية لأنه أكثر احترافية ,,في حين مواقع التواصل مش محتاجة منكم اي حاجه غير انك تعرف تكتب على الكيبورد

أنا يوميا بفتح احصائيات المنتدى و بشوف معدلات التسجيل
حاليا معدلات التسجيل من 30-50 عضو في اليوم
قبل كدا كان من 60-90
و في حالات استثنائية زي صيف 2009 كانت بتوصل ل180 في يوم واحد:shiny01:


ملاحظة تانية بتاعت ماتركس
كان بيطالب بعودة الاحصائيات
انت عارف ان أكبر خطأ هو اننا سيبنا الاحصائيات طول الفترة الي فاتت
لو بحثت و كتبت هاكات تبطئ أو تثقل المنتدى هتلاقي أول حاجه هي الاحصائيات ,,بتستهلك الموارد جامد جدا
و لذلك أي منتدى هتلاقي عليه اكتر من 500 زائر خلال ساعة استحالة تلاقيه حاطت احصائيات
بامكانك معرفة اخر المشاركات من فوق جنب مكتبي


في النهاية
أنا الموضوع دا مجرد خربشة في اليوميات أو ممكن فضفضة مني بمناسبة الذكرى الثالثة ليه
أتمنى ماحدش يفهمه على انه مدح في الذات
أنا لو مشيت هيجي غيري , الدنيا مش هتقف على شخص
ممكن أكون شخص سيء , كل شيء وارد لكن على الأقل أنا ضميري مرتاح
و كمان مش كاتبه عشان أكسب عطف
الحمد لله الواحد نوعا ما سمعته طيبة و ان وجد خلافات نقاشية مع البعض فهي خلافات تتعلق بنقطة النقاش في الموضوع و ليست خلافات شخصية
و أتمنى دايما اني أكون عند حسن ظنكم
و أي شخص مضياق مني فمستعد أعتذرله , مش خسران أي حاجة

أنا ممكن من النوعية الي افكارها مش بتنضب ,,لكن عندي احساس انها هتنضب خلال العام الرابع ليه

,,احترامي للجميع,,

[тoкα..♥]

كنت همـوت وآعرف آسمي هنـآ ولآ لآ ههههههههه
بس لقيتو بردو ^_*
آيوة قديمه آنـآ :P
عجبني آوي ي طـآرق موضوع آلفضفضه دآ
تحس كـدآ آنك معبي جوآك حآجآت كتير ودي فرصه تطلعهـآ بئآ
دآنت ثروة قوميه وإحنـآ مش وآخدين بـآلنـآ )
بس بصرآحه عنيـآ وجعتني من كتر آلقرآءه (( آبقى لون خـطك بعد كـدآ عشـآن آلآسود بس بيزغلل ))

وحكـآيه آلرسـآيل مبتفتحش غير بعد آلـ100 دي كنت مضـآيقه جدآ زيك بردو لمآ جـآلي رسـآله ومشوفتهـآش
وف آلآخـر طلعت حذف مشـآركه بـآين هههههههههه
,,

آلمهم عقبـآل آلسنه آلجـآيه وكـل سنه وإنت منورنـآ ي طروق
فعـلآ معنديش آستعدآد آتخيل آلمنتدى من غير طـآرق ,, يمكن ف آلآول كآن آكتر حد بكرهو هو طآرق
وبضـآيق جدآ منو وآقـول دآ ديكتـآتوري ومش شـآيف غير نفسو ,, بس فعلآ مينفعش تحكم على حد من غير مـآتتعـآمل معآه ,,
وآكـيد كل وآحد فيه عيب بس آلميزآت آكتـر بكتـير
وطـآرق مش هقـدر آقـول شخص مثـآلي بس كتصنيف فعلآ شخص كويس ,, ومتعـودتش آكـره حد بسبب إني سمعت عنو كلآم وحش لآزم آتـأكد بنفسي وآللي خلآني آحترمه آكتر آلحيـآديه .. آللي يعرفو زي آللي ميعرفوش ودآ ف حد ذآته كويس..

"مستنيه بئـآ زي كل مرة تعليق يقولي آنتي قولتي كـدآ عشـآن عـآيزة ترقيه من طـآرق >> إتعـودنـآ خلآص "
منـور ي دوك وي رب على طـول ,,
ودي ,,

[۩۩ سيد الشرقاوي ۩۩]

السلام عليكم ورحمه الله وبركااته
احصائياات ومجهود بجد عالي منك
ياطارق
كل سنه وانت بخير ياطارق
وربناا يوفقك اخي الكريم في
الاداره والارتقااء بالمنتدي الي
الاحسن وديماا منورناا يادطارق
باادارتك للمنتدي اداره حكيمه جداا
ولو كان في سلبياااات ياريت انك
تصححهاا ولو في اجااابياات ربناا
يوفقك في الحفااظ عليهاا وديماا
منور ياطارق المنتدي باادارتك الحكيمه
وانا معتقدش بجد بدوون مجااامله
معتقدش ان في حد يقدر يدير المنتدي
زي ادااارتك موفق اخي الكريم
وكل سنه وانت بخير

[ساحر الأحزان]

واية الاحساس الى جالك انها حتنضب فى السنة الرابعة ممكن تكون الى حتعملة بنضج افضل

وافكار جديدة زى ما تعودنا منك وحكايتك منذ انتسابك بمثابة قصة جميلة فى الاحتذاء بيها

وحقيقى قرئتها وتمعنت بها والوضع اتغير عن زمان بنسبة كبيرة وممكن يكون للافضل

بفضل التعاون المشترك بين الجميع والخلافات خفت بنسبة كبيرة

ان شاء الله نراك دوما معنا

واتمنى لك كل توفيق

ملاحظة

هو دى اخر سنة فى الجامعة

وبعد كدة بقى حتتفرغ للعمل فى الحياة ولا اية؟

اتمنى لك كل سعادة وكل توفيق من الله

[۩۩ elMagic ۩۩]

رحلة كفاح صعبه جدااا
دا المنتدى يا عم دلوقت أحسن بكتير من زمان
ودا بفضل مجهودكـ انت واللى كان معاك
ومجهودكـ انت بس بعد غيابه
طبعا دا بعد ربنا ^_^
بس يا عم انت هتسيبنا وتمشى ولا ايه
بجد مش متخيل شكل المنتدى من بعدكـ
لان اى مشكله بتحصل انت بتقدر بفضل ربنا تمحيها
بجد يا طارق انت فعلا أهل وجدير بمنصبكـ
واى حاجه بتعملها بتعملها بأتقان
يعنى انت قولت بتدور على هاكـ ما بين1300 هاكـ علشان تصويت المنصب الادارى
دا دليل انكـ قعدت تبحث وتدور هنا وهنا على حاجه علشان تنفذ اللى انت عايزه
فعلا مش بتعمل الحاجه كده وخلاص
وبالنسبه للخلافات طبعا الخلاف بيكون فى محور النقاش فقط
انما فى اى مكان تانى ولا كأن حاجه حصلت
احنا كلنا هنا اخوات واكيد كلنا بنسعى لمصلحة المنتدى ورقيه
بتمنالكـ التوفيق دايما يا طارق وبالتوفيق للجميع
لك منى كل الاحترام والتقدير
اخوك الصغنن

[ĶǎnDO̳̿uChǎ ツ]

ياااااااااه

استمتعت اوووي اوووي وانا بقرأ التوبيك يـ طارق

بجد ربنا يخليك لينا

عشان اكيد المنتدى معاك بقى احلى

و انت بصراحه الي شايل كل حاجه

بوجودك بتكون روح المنتدى

بس كل حاجه بتمر بقى و الايام بتجري دايما

و اكيد كلنا فـ يوم هنمشي و نفترق

و بكرا يقولي طارق الي هو كان اداري سابق و عمل انتخابات

ولا البت دعاء الي كانت مشرفه زمان

كلنا فـ يوم هنكون خبر ((كان))

اكيد هنتفارق و هنغيب و هيتغير كتير و يجو اعضاء و مشرفين كتير

بس اهم حاجه ... اننا نفضل دايما سايبين ليهم ذكرى جميله

لان الحاجه الوحيده الي بقيه هي الذكرى

نسيب ليهم ذكرتنا بـ حبـنـا و بـ مجهودنا و بـ اخلاقنا و حسن تعاملنا

فعلا قابلت هنا احسن ناس

لقيت روح بجد .. ناس بتخاف عليك و بتحبك و بتتمنالك الخير

من قلبها .. من غير اي مصالح او كدب

و اكيد انت يـ طارق هتفضل علامه فـ المنتدى

و بصمه كبيره اووووي هيفضل الكل يتكلم عليها و على افضالها حتى لو بعد 50 سنه

سهل جدا ان اي واحد فينا يكون اداري و كل المنتديات فيها اداريين

بس صعب اوي انك تلاقي اداري متميز بيعرف ازاي يتعامل مع الاعضاء و ازاي يتفاعل مع الناس الجديده

بيعرف ازاي يحل المشاكل بـ عقلانيه و بروح جميله

بيعرف ازاي يتناقش

بيعرف ازاي يجذب الناس لـ المنتدى

كلنا هنا اسره واحده ... و غياب اي فرد مننا مهما كان صغير .. بيأثر اكيد

ربنا ما يحرمنا ابداااااااااااااا من وجودك معانا يـ طااااااااارق

يدوم يـ رب وجودك الجميل دا

و عقبال مليون (3) سنين كمان و انت معانا

[مِسكُ الشَهادة]

ياااااااااه رحلة كبيرة جدا ً والله
وأي شيء في الدنيا بده تعب ومجهود
يعني مفيش إنسان وصل للي بتمناه
من فراغ ...
بجد إستمتعنا بمسيرتك الرائعة اخي طارق
ونسأل الله تعالى ..أن تغدو أكثر من ذلك
ع أرض ِ الواقع ...
بجد تشرفت ُ بناس كثير هنا
وإنتا منهم طبعا ً يا ريس
دمت َ بألف خير

[Mo7aMaD 3aLa2]

كل سنة وانت معانا يا طارق

والكل أكيد يشهد على مجهودكـ فـ المنتدى

وانك ازاى بتفرق مع المنتدى لما بتكون مش متواجد

وموضوع المنتدى زمان طبعا المنتدى اتطور للاحسن وانا من 2009 وشايف دة فعلا

وبقى فى حرية اكبر بكتير .. حتى تخطت الحدود :bigsmile:

وأكيد الاختلاف فى الاراء لا يعنى العداء

ويا ريت الكل يفتكر دايما المقولة دى

..

[Mind language]

ياسلام كل دى مراحل مر بيها المنتدى
وحضرتك يا دكتور دا عمر بقى فى
المنتدى نتمنالك عيد سعيد فى المنتدى
بس حضرتك مقولتناش اية شعورك دلوقتى
ومرور الذكرى التالته ليك فى المنتدى؟؟؟؟؟؟؟؟

[morshooo]

فى البداية كل سنة وانتا طيب

^_^

انا م هعلق على رحلتك فى المنتدى

لسبب بسيط انى مقتنع برحلتك فى المنتدى

واكيد وصولك لادارة المنتدى مش هيبقى من فراغ

بس ليا تعليق صغير

اقتباس زمان ,,ماكنش في مواضيع تنتقد الإدارة نهائي,بيتم حذفها فورا على عكس دلوقتي تفتح قسم اليوميات تلاقيها كلها مواضيع نقد طبعا ما أنكرش إن الانتقادات زادت عن حدها و البعض استخدم النقد للشهرة أو عشان يبين انه مش بيجامل و صريح انت اسهل حاجه تعملها هو انك تنتقد لكن اصعب حاجة هو انك تقدر

ودا موجود كتير جدا من الاعضاء انهم يهاجمو

عشان يبينو لاعضاء المنتدى انهم مبيهمهمش حد

والغريب ان الهجوم من غير اى دليل ودا الى يزعل

عموما معروف عنك انك شخصيه محترمة جدا

وحقانى جدا ودا دليل تميزك

بقولك اية ياعم طارق انا بعلق على كلام انتا كاتبة

عشان ملقيش حد شاكينى والا حاجا .