قصة حب عندنا فى المنتدى الجزء الأول

Just G!rl · منذ /01-22-2009, 11:46 PM

دى قصة حب على المنتدى بتاعنا

تعالوا نشوف التفاصيل ونعيش مع اصحاب القصة

القصة ان محمد و أسماء عضوين معانا هنا فى المنتدى

بينهم قصة حب كبيرة واتفقوا على الجواز

والمفروض ان محمد هيفاتح اهلة علشان يروح يتقدم

محمد بيكلم والدتة

محمد/ مساء الفل ياست الكل

الأم / ست الكل ؟ هو انهاردة عيد الأم؟

لا دا لسة بدرى تبقى عاوز فلوس

محمد / فلوس اية بس احنا بينا الحاجات دى برضه ؟

دا أنا جايبلك مفاجأة

اليوم اللى كنتى مستنياة من زمان

الام / خير

محمد / انا ناويت اتجوز

الام / لووووووووووووووووووووووووووووووووووول

ياألف نهار ابيض يادى السعد يادى الهنا

اخيرا سمعت كلام امك وهتتجوز فاطمة بنت اختى

البت بطة دى بنت حلال و.......

محمد / بس بس بس بس بطة اية وفرخة اية

حد جاب سيرة فاطمة ؟

الام / نعم نعم ومالها بطة ان شاء الله

اوعى ياواد تكون حاطط عينك على واحدة من بتوع اليومين دول ؟

محمد / متخافيش دى محترمة جدا واهلها ناس طيبين

الام / ودى تبقى مين المزغودة ؟ وعرفتها ازاى ؟

محمد / اسمها اسماء وزميلة ليا فى المنتدى

الام / فين ؟

وانت اية اللى وداك الحتت دى ؟

اتاريك بتتأخر برة كل يوم

محمد / بس بس بس بس

اتأخر اية المنتدى دة على النت

الام / نت ؟

هى دى البت اللى بتيجى تاخد الفلوس منك كل شهر ياموكوس ولما أسئلك تقولى فلوس النت ؟

اتاريك عمال تحول منى فلوس أول بأول

محمد / يا حجة افهمينى المنتدى دة مكان على النت بنتجمع فية وبنتكلم مع بعض كلنا

وبنكتب مواضيع كتير انتى مش بتشوفينى بقعد بالساعات على الكمبيوتر ؟

الام / واية يابنى اللى دخل الكمبيوتر فى الموضوع دلوقت ؟

محمد / وبعدين بقى

منا بكون قاعد الوقت دة كلة فى المنتدى معاها

الام / معاها ودى فين ابوها اللى سايبها تخرج وتقعد معاك الوقت دة كلة ؟

محمد / انا بكون هنا فى بيتنا وهى فى بيتها وبنتكلم على النت

الام / وانت شايفها كويسة البت دى ؟

محمد / بقولك محترمة جدا و بتحبنى جدا

دى بتشارك فى كل مواضيعى اللى بكتبها

وكاتبة بحبك فى التوقيع بتاعها

وخرجتنى من لعبة السجن 5 مرات قبل كدة

الام / سجن ؟ يالاهوى

وانت اية اللى كان دخلك السجن يا واد

ومخبى علينا ؟ وكمان 5 مرات

اكيد اتخانقت فى الشارع بسبب الست هانم

محمد / دى لعبة والله على المنتدى وكل مرة كانت بتيجى وتخرجنى

الام / بتخرجك من السجن

هى محامية ؟ ومالها بطة بنت خالتك ماهى معاها دبلوم تجارة قد الدنيا

وست بيت شاطرة ومش بتاعة اقسام ولا سجن

محمد / يادى النيلة انا مش هعرف افهمك حاجة خالص

الام / ان شالله عنك مافهمتنى ياموكوس

انا فاهمة كل حاجة

يلا ياد هاتلى قناة الحكايات علشان اسمع المسلسل

ولما يبقى يجى ابوك يبقى يتصرف معاك

قال مش عاجباة فاطمة قال

.................................................. .................................................. ............................

دة كان الحوار بين محمد ووالدته

باقى رد فعل الأب ... وأهل اسماء

تحبوا اكمل ؟

مستنيه اشوف ردود الأول

لو الموضوع عجبكم أكمل

A7meD · منذ /01-23-2009, 12:00 AM

قصة جميلة يا فراشة ...

كملي القصة ..

جميلة بجد ..

تسلم ايديكي يا غالية ..

تحيااااااااااااااتي ..

احلام زياد · منذ /01-23-2009, 01:55 AM

هههههههههههههههههههههههههه

حلوع يا فراشه

بس الاول محمد ده مشترك معانااااااااااا

SiLver Spectra · منذ /01-23-2009, 02:15 AM

هههههههههه

كملي السلسله يا فراشتنا

نانسى · منذ /01-23-2009, 02:22 AM

كملى ياقمر انا مستنية اشوف القصة هاتنتهى على ايه

Just G!rl · منذ /01-23-2009, 07:05 PM

ميرسي على مروركم

الجزء التاني هيوصل قريب

فولدمورت · منذ /01-23-2009, 07:07 PM

لا مش حلوة مش عاوزين الباقى

ههههههههههههههههههههههه

روعة يا بت يا فراشة
كملى بقى

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الجزء التالت من قصة حب عندنا في المنتدى	Just G!rl	نكت - طرائف - وناسة - فرفشة	20	07-07-2009 05:53 PM
الجزء الرابع والأخير من قصة حب عندنا في المنتدى	Just G!rl	نكت - طرائف - وناسة - فرفشة	0	02-11-2009 04:50 PM
شكر للماء ( الجزء الأول )	Angel Tatteey	مواضيع عامة - ثقافة عامة	3	01-30-2009 07:13 AM
الجزء التاني من قصة حب عندنا في المنتدى	Just G!rl	نكت - طرائف - وناسة - فرفشة	7	01-24-2009 05:06 PM

الذين يشاهدون محتوى الموضوع الآن : 1 ( الأعضاء 0 والزوار 1)

..{ فع‘ــآآليـآآت المنتــدى }..

الإهداءات

قصة حب عندنا فى المنتدى الجزء الأول

نكت - طرائف - وناسة - فرفشة