وفي مطبخ حواء ومعاناه المتالقه عذب المشاعر

[♥Donya♥]

الحلقه السابقه كانت منورانا في المطبخ المتالقه همس الجوارح واستفدنا منها كتيرر ومعاناه النهارده عضوه جديده ومنورانا تعالو نتعرف عليها اهلا بيكي نورتي الحلقه والقسم كله(: ربنا يخليكى ميرسى ها مستعده ؟ اه اتفضلى اسمك: علا سنك: 24 سنه الحاله الاجتماعيه: عاذبه مؤهلك: تعليمى متوسط دبلوم تجارة المطبخ بالنسبالكـ ايهـ؟ كل حياتى اوقات كتير بحب المطبخ كم عمرك أول ما دخلتي المطبخ ؟ وبداتي بالطبخ؟ اول مره دخلت فيها المطبخ كان عندى 19 سنه كنت لسه يدوب بتعلم هل دخولك للمطبخ بأمر من أحد ولا من نفسك...؟ لالا من نفسى حبيت اطبخ واعمل كل حاجه بنفسى وميكونش الاعتماد الكلى فى اكلى وشغل البيت على ماما قولت ترتاح شويه من شغل البيت ايه أطرف موقف حصلك في البدايات..؟ بصى ياستى اول مره دخلت المطبخ وخلاص حسيت نفسى طباخه شاطره اوى محدش عارف حاجه كنت بطبخ فراخ تبلتها وظبطها كدا وجهزتها وحسيت ان عملت انجاز علمى بعد كدا وانا بحمر الفراخ وقفت جنب البوتوجاز وانا خايفه هههههه ومرعوبه من الزيت وخايفه على هدومى بقى تتزيت بعد كدا رميت الفرخه فى الزيت وجريت ههههه لقيت الزيت ورايااااااا فى اخر المطبخ تخيلى وجه على هدومى وعلى وشى ده غير ان الزيت نزل على النار بقى فيه حريقه على البوتوجاز طبعا الزيت مصر انه يبهدلنى مع ان بعدت عنه بس مفيش فايده منه وقتها خوفت اوى لحسن اعمل حريقه فى المطبخ ناديت ماما تجى تلحق الفرخه قبل ماتولع قصدى تلحقنى انا بعدها لقيت النار هديت والفرخه نشفت هههههه بس الحمد لله ملحقتش تتحرق لما جهزت الاكل واعدنا اكلنا قعدت اسالهم الاكل عجبكم بابا وماما قالولى اه تسلم ايديكى وطبعا ده كان السؤال المعتاد الا اخويا قالى مش هجاملك خالص الاكل مش طعم خالص قولتله ياسلام بقى انا اكلى مش عجبك هو فى زى اكلى ولاطعامة اكلى دى انا خبره يابنى فى الطبيخ بس تعرفو اخويا بيقولى كودا بيزاولنى وبيضحك معايا دايما على الاكل دايما بيحب ينكشنى وانا ولاانا هونا واثقه من اكلى طبعا بس ده كان الاول دلوقتى مش بسال ماما على اكلى لانى اكلى حلوووو كتير ايه اول أكله عملتيها وهل كانت ناجحة ولا فاشلة..؟ الفراخ لا ء هى زى ماقولت كانت هتفشل بس الحمد لله نجحت ولحقت نفسها من الانهيار هل تجيلك مره حالة تقولين توبه ادخل المطبخ وآخر مره...؟ اوقات لما بيحصلى كدمات وحروق سطحيه من زيت التحمير بس مبيبقاش مانع على طول بخد فترة نقاهه من اللى بيحصلى من كدمات ودى امر لامحاله منه اهرب واروح منك فين يامطبخى اللي عندها بنات هل تعلمينها الطبخ ولا تخلينها على هواها...؟ وضحيلى السؤال ده يادنيا مين اللى عندها بنات هههه انا هعلم بنات الناس مش اعلم نفسى الاول وضحى اكتر مستلزمات البيت بتشتريها جاهزه ولا في بعضها بتعمليها في البيت زي ست البيت زمان؟ مش دايما بجهز كل حاجه فى البيت فى حاجات ماما بتشتريها جاهزه وفى حاجات انا وماما بنعملها فى البيت على حسب طلبات البيت ومحتوياته اللي تزوجت وما تعرف تطبخ هل تندمتي ما تعلمتي الطبخ قبل الزواج ايه كان المانع من نفسك ولا من اهلك..؟ قبل الزواج يابنتى انا لسه متزوجتش هههه انسه وافتخر غيرى اسلوب السؤال ده وانا معاكى فى اجابته لوتحبى ياجميل اكتر اكلهـ بتحبيها؟وياتري بتعرفي تطبخيها؟ امممممم بحب الرقاق باللحمه المفرومه اكيد مادام بحب اكله لازم اعرف اعملها ده الاساسى بتاعى اكتر مشروب مفضل لديكـ؟وبتعرفي برده تعمليهـ؟ بصى فى مشروبات كتير بحبها وبعرف اعملها بس بحب الخروب و بحب اعمله كتير اكلهـ ومشروب مفضل عندكـ يوميا بتستخدميهم ؟ بصى دايما بيكون فى تنويع وتغيير الاكل يعنى فى اكلات بحبها بس مش بعملها كل يوم بغير روتين الاكل علشان النفس متملش وده الطبيعى وكمان المشروبات نفس الحكايه انواع الاكل اللي مش بتحبيهـ بالترتيب؟والسبب ايهـ؟ اوبااااااااا جيتى على الجرح اول حاجه البط علشان دسم وانا ماليش ابدا فى الاكل الدسم علشان كودا تلاقينى رشيقه وكمان اللوبيا والفاصوليا الله عليها بتموت فيا بدليل انها مش عايزانى اكلها هههه وده لانى من صغرى ماليش ميول لاكلهم كل الاكلات حلوه بس على حسب النفس ماتطلب بق ى ايه أنواع الشاى الى جربتوها وعجبتكم؟ الشاى الاخضر ليبتون بحبه كتير هو الليبتون مفيش غيره جربت الشاى العادى بالقرنفل ولا احلى وكمان بالمرمرينا طعمه رائع والشاى بفتله يجنن لو معزومهـ عند حد تفضلي تاكلي ايهـ بينكـ وبين نفسكـ كدهـ؟تقري وتعترفي؟ مكرونه بالباشميل وايهـ اكتر شئ بتكريهـ لو معزومهـ عند حد؟ البط اكتر اكله بتفتخري بيها قدامك قرايبك ودايما تفضلي تعمليها لما يكون حد عندك؟ مكرونه بالباشميل عملتي بقي ايه اكله ايه التهارده وطبعا مش عزمتيني؟قعدتي تضربي لوحدك اكيد؟ ههههه بس الحقيقه انا النهارده مطبختش دى ماما اللى طبخت بس هقولك اكلت ايه النهارده اكلت سمك من ايد ماما حبيبتى اتفضلى اتغدى معانا انا اتغديت بس مفيش مانع اتغدى تانى ههههههه معاكى اكل ماما هيعجبك اوى واكلى انا كمان انا بطبخ كل يوم بس النهارده اجازه علشان اجدد نشاطى فى المطبخ بكره كلمه تهديها لكل البنات البنوتات وانا معاكم طبعا اهم حاجه فى شطارتك فى المطبخ النظافه وحاولو تكتسبو خبرات اكتر من ماما او اخواتكم لان دى خبرات هتفيدك فى المستقبل وتشرفك وسط اهل زوجك وعلشان تفيدى نفسك متحتاجيش تسالى فى التليفونات والاحراج ده وكمان علشان زوجك ميبصش لاكل بره اكسبيه باكلك مش بيقولو اقصر طريق لقلب الرجل معدته علشان كدا اهتمى بالمطبخ وربنا يوفقنا كلنا فى حياتنا المطبخيه وصلنا لنهايه الحلقه وكنتي ضيفه خفيفه علينا ونورتي الحلقه ربنا يخليكى ده من ذوقك يادنيا ميرسى كتير ياجميل الحلقه منوره بيكى وشكرا على الاستضافه الجميله دى

[هاروكا]

حلقه روووووووووعه يادنيا وضيفه أروع بجد
كان الحوار ممتع وجميل

[الحان الورد]

حلقة حلوة وضيفة لذيذة
واجاباتها جميلة
تسلمي دُنيا على المجهود
بالتوفيق يآرب..~

[سَـلمَى]

ههههههه عسل علآ أوووى
بآين عليكي قشطهـ دلوقتي في الطبخ
منووووورهـ يآقمر أخر حآجهـ
وإجآبآت سولة زيك

مرررسي يآ دونيآآ على الاستضآفة الجميلهـ ^^

[مشتاقه للجنه]

والله عسل يا علا

ال تجرى يعنى علشان الزيت مش يجى جنبك هههههههه

لا يا بنتى برااافو عليكى

بالنسبه للبط بكره تكليه بالاكراه وخاصه بقى لو جوزك طلع بيحبه

اوبا يبقى تطبخيه وتكليه غصب عنك

[مهندسه بغداد]

تسلم الايادي رووعه

وحلقة جميلة جداا

وضيفة رائعة

تقبلي مروري البسيط

[♥..ᗩпo]

كآنت حلوة بدآيآتك :d
هههههههههههههههههههه
ويآجمآل اسلوووبك باين انك عسسسل آخر حآجه : ]
وشكرآ دنيآ عَ برآمجك الجميله مثلك ^^

______________

[fankosha]

باين عليكى شاطرة ياعلا
حلقة جميلة وعضوة مميزة
نورتى ياعلا الحلقة
تسلمى يادونيا

[شاعرة الرومانسيه]

حلقه ممتازه يا علا

وضيفه عسوله ولذيذه

واجابتها جميله

فى انتظارك مع ضيفه جديده

[عذب المشاعر]

اقتباس المشاركة الأصلية كتبت بواسطة هاروكا حلقه روووووووووعه يادنيا وضيفه أروع بجد كان الحوار ممتع وجميل

انتى الاروع ياهاروكا
نورتى البروجرام