حلقات برنامج ( شبابيك )

[ملكة الهدوء]

فكره جميله اوى

بنتظار اول حلقه ونعرف الاراء

[Silver Flower]

فكره جهنميه
يادي الافكار الحلوه ايوه يا عم مشيه معاك
بالتوفيق ان شالله

[ماتركس]

السلام عليكم ورحمه الله وبركاته

وعدناكم من فتره انو ننزل برنامج شبابيك

واليوم حبينا نقدم ليكم اول حلقه من برنامجكم شبابيك

اليوم معانا ضيف اثبت وجوده في فتره صغيره بمواضيعه وردوده

اليوم معانا ضيف متميز بنشاطه الدائم ووجوده ومشاركاته الخياليه

معانا ابوحميد

تاريخ التسجيل 18-10-2011

إجمالي المشاركات 268

دي مشاركاتك والا انتا جايبهم منين يا ابني اعترف الانكار مش هيفيدك :biggrin:

تعالو نتعرف علي احمد ونشوف رايوو في منتدانا منتدي

بنات مصر وراي في الاعضاء المنتدي

مش عايزين نحرق الحلقه يلا بينا نشووف الحلقه

ومعانا العضو الجامد المكتسح بمشاركاته ومواضيعه

نقوش على صفحات الورد

عضو جديد

- اهلا بيك فى منتدانا ..وعرفنا على نفسك الاول اسمك وسنك وعنوانك

ووظفتك متخفشي لازم نعملك جواز سفر معانا ؟:biggrin:

احمد / القاهره / 33 سنه / مهندس

ايه سبب اختيار اسمك في المنتدي معانا مش حاسه اسم كده بيشد للجنس الناعم.؟

وطالما مش جنس ناعم بس يبقى طبيعي هشترك ما هو لو كانوا محددين

جنس ناعم لا كنت أنا هكون هنا ولا حضرتك بتسألني دلوقتي بس:biggrin:

قوالنا ازاي اتعرفت علي منتدي بنات مصر ..؟

لقيتوا فى جوجل فى البحث ولقيت ان فيه أقسام كتيره ممكن تفيدني وممكن

اكون فيها زي مثلا الشعر والقسم العام والصور والموضوعات العامه

وأقسام كتيره وعموما حاسس ان المنتدى هنا بيفكرني بأيام الجامعه

بصراحه الجو هنا جميل فكريا ومعنويا وبصراحه اتفاجئت ان فى منتدى

بالحجم العالي والراقي دا ولما اشتركت استفزني موضوعات كتيره وأقسام

مميزه وشخصيات ما شاء الله كلها أحسن من بعضها وحيره لو هختار ناس

كويسين يكون الكل ولو هختار واحد مش كويس يكون فورا انا دون منازع

ههههههههههه

- إحساسك اية اول يوم تسجيل فى المنتدى ؟

كنت قلقان هروح فين انا وسط الكوكبه الهايله والاعداد الكبيره دي بس

بطبيعتي بحب التحدي واثبات الذات وحطيت فى تفكيري هدفين

الاول يكون المنتدى عالى زي ما هو واكون اضافه قويه فيه

والتاني اثبت لون قلمي وبكل ود وتميز وفكر جديد ..

-جو المنتدى اخت علية على طول ولا لاء ؟

تقريبا لان لما تكون نفسيتك مرتاحه لمكان اكيد هتنفعل وياه

بسرعه وبجد روعه جدا جدا جدا حاجه تخلي الواحد يفكر

مليون مره فى كل موضوع او رد مني انا هنا فى المنتدى

ياتري دي اول تجربه ليك في عالم المنتديات والا مشترك

في منتديات تانيه ..؟

لا مش اول تجربه انا مشترك فى اكتر من منتدى بحب التنوع وعلوم الثقافه

والمعرفه والاطلاع وتبادل الثقافات بس اعفيني بحب يكون لي خصوصياتي

وكمان احترام لقواعد المنتدى اللي ليا وفاء فيه ولازم احترموا واراعي

قوانينوا كلها عشان كده هحتفظ باسماء المنتديات .

- اول موضوع ليك كان في اي قسم في المنتدي وكانا بيتكلم عن ايه ..؟
-
اول موضوع ليا كان ردود وبعدين خواطر شعريه وبعدين

ردود الموضوع اللي يشد اهتمامي برد عليه فى صلب احداثوا

وساعات من قوة الموضوع برد رد يكاد يكون تقليدي ومكرر

اصل هقول ايه موضوع قوي خلاص بشكر صاحبوا او صاحبتوا

وبس منوا تكريم لمجهودوا ومنوا اثبات اني برد وكمان زي ما

ببعت دعوات لغيري بتوصلني دعوات من الافاضل اللي هنا

واهو بناخد خبرات من بعض وبكل ود وتميز

ايه عيوب المنتدي من وجهه نظرك وياتري انتا شايف

انو في حاجه ناقصه المنتدي لو في ممكن تقوالنا عليها ..؟

العيوب ان لما عملت اكتر من موضوع اتحزفوا وعرفت بعد

كده ان لازم يكون ليا فى المنتدى كلوا موضوع واحد ومستغرب

بجد من كده ليه كده يعنى افرض ان فى عضو او عضوه

عندهم ملكة التواجد فى اكتر من قسم يبقى ليه التعامل

يكون كده وكمان لفت نظري ان فى موضوعات فى العام

منقوله من منتديات اخرى وخواطر منقوله كتيره وفى

كمان خواطر بحس ان مكانها مش هنا يعني عفوا

مجرد رص طوب او اثبات موهبه مع احترامي اصلا مش

متوفره لكاتبها هو اصلا رص الطوب لمجرد لفت الناس

وشد الانتباه وكمان لاحظت ان فى ولاد داخلين باسماء

بنات وعفوا دي امور خاصه ليا مش لانها مخجله

او عيب انما مش بحب فى اسلوب حياتي لون الغباء

واكيد انت فاهمني اكيد ..

انتا نشاطك ملحوظ في المنتدي لدرجه انك

عملت 268 مشاركه في 6 ايام ده حب منك للمنتدي ..؟

بصراحه هو مش حب وخلاص إنما زي ما سبق وقلت لك

فى موضوعات حلوه وبتجذب وكمان فى موضوعات لازم

اجامل فيها لان اصحابها بيردوا على موضوعاتي وهنا باب

المجامله مطلوب طالما لاثراء جو المنتدى ولانتشار الموضوع

ولتشجيع صاحبوا او صاحبتوا على التنافس حتى لو الموضوع

كان مش قوى انما زي ما قلت فى امور مطلوب فيها المجامله

وبعدين ياسيدي انت تكره نشاطي اه اه انت مش عايزنى

اتفوق عليك واعديك واخد الاداره منك وغيران قول كده بقى

اعترف اعرف مش هسيبك ويا انا يا انت هنا بقى ( على فكره دعابه )

اكتر قسم عجبك في المنتدي وشاركت فيه اكنر مشاركات من مشاركاتك ال268..؟

انا مش بحب التخصص انا عاشق التنوع

يعني مثلا ممكن تلاقيني فى قسم الشعر والخواطر والعام

والمسابقات والسياسه وغيروا وبطبع موهبتي القسم الاول

عندى هو الخواطر بس قررت مش اكتب تاني خصوصا لما عملت

اكتر من خاطره ولقيتهم راحوا وخصوصا واني مش بكتب لمجرد

الكتابه وشكرا لا انا بحب اكون فى اكتر من قسم وبحاول اشوف

الموضوعات اللي مالهاش ردود ارد عليها تقدير لاصحابها وكمان مع

احترامي عيب نكون بقوة الاعداد دي ويكون عندنا موضوع بلا رد شكلنا

وحش قادم الزوار ودي دعوه بالاهتمام بالموضوع دا

في موضوع ليك قبل كده بيتكلم عن انو الاعضاء مش بترد

غيرعلي مواضيع البنات بس في المنتديممكن نعرف ايه

السبب اللي من خلاله كتبت الموضوع ده ..؟

أقولك .. بشوف مثلا موضوع لواحد ياعيني طلع عنيه فيه وتلاقي

عندوا 2 او 3 ردود وع الجانب الاخر بشوف موضوع مش

هقول سوري يعني تافه انما مش قوي بس عشان معمول من

بنت تلاقى تمانين رد وطبعا مفيش اختلاف ان البنات فى

موضوعات الرومانسيه اعلا واقوى انما لازم كل حد ياخد حقوا

بالعدل مش موضوع يكون ضعيف وفيه مليون رد عشان لبنت

مع شامل احترامي لاي بنت هنا ونلاقي موضوع لواحد عشان

راجل ابيض ياورد طيب بزمتك ينفع !

الموضوع استفزني جدا وحسيت ان مجهود الرجاله بيروح فى

زمن مجاملة البنت ودا مش تحيز للرجاله بني جنسي بقدر ما

هو بحث عن تعديل ميزان لا اكتر ولا اقل وعشان كده كان

موضوعي قلت اهي محاوله ربما توصل وجهة نظري وكل

واحد ياخد حقوا .

- اكتر اعضاء لفتو نظرك فى المنتدى هما مين ؟
-
والله فى اعضاء كتير وعشان اقول اسماء دلوقتي

وانا لسه ألف باء اكون ممكن بظلم ناس تانيين بس اللي احب

اعرفوا لك ان كل رد على موضوع دا ايمان مني بفكر صاحبوا

وان عدم ردي على موضوعات تانيه ممكن يكون قلة وقت منى

او نسيان بس فى الاخر الغالبيه ما شاء الله اصحاب اقلام قويه

ومميزه بس يحاولوا ينموا مواهبهم ويهتموا بيها اكتر

ياتري هتستمر معانا وتتواجد معانا ..؟

انا عمرى فى طبيعة حياتي ما بحب شيئ واهملوا خصوصا

لما يكون منتدى بالحجم اللي انا شايفوا دا وطبيعي يسعدني

جدا تواجدى واهو لما الوقت بيسمح بكتب وبرد على موضوعات

واتابع ومش ممكن طبعا امشي الا لو كان تواجدي غير نافع

او هيزعل اى حد ولو انت بقى خايف على كرسي الاداره

فورا ممكن اخد قلمي واوراقي والمكتب الخاص بيا وامشي

فورا انت قول وانا انفذ فورا ( اضحك بهزر ) .

- انتا ليك طموح عايز توصله في المنتدي يعني عايز تبقي ايه في المنتدي ..؟
-
انا انسان عفوي فى اغلب الامور وبحب اعيش بركاوي

على طريقة محمد بركات وخد عندك حاجه حصريه ليك عشان

بحبك بجد وانت اول انسان ساعدني هنا انا اهلاوي جدا بس

مش متعصب وكمان لا بحب الحسابات ولا بقبل ترتيب

بحب اتعامل بعفويتي وبطبيعتي وانا طموحي الوحيد هو

يكون قلمي دائما فى المقدمه انما زي ما قلت لك انا لغيت فكرة

انى اكتب شعر او خواطر هنا واكتفيت بأفكار أخري زى

الموضوعات العامه والردود وغيرهم

ايه رايك في اداره المنتدي والمشرفين والاعضاء ..؟

الحكم فى فتره بسيطه بيكون ظلم سواء بالقوه او بالضعف

انما مجرد تواجدى هنا دا اعلان تام مني بقناعتي بكل ما في المنتدى وطبعا

هما لو مش اكفاء ومميزين ومجتهدين كانت مستحيل ادارة المنتدى تآمنهم

على الاشراف وبالنسبه للأعضاء انا لسه فى رحلات اكتشاف بس مبدأيا نقول

7 من 10 لغاية بس ما اخد ع الجو واعرف الناس اكتر

ياتري حاسس بعنصريه لما انتا جديد معانا والا الاعضاء بيعملوك عادي ..؟

شوف .. بقلمك وتميزك وتفكير وطريقة ردودك وقوة موضوعاتك

وايمانك بانك صاحب فكر وموهبه تقدر تحارب الصخر وطالما

عندك ثقه في نفسك وموهبتك مش هتدور على امور جانبيه

وطبيعة الحياه نفسها مختلفه وبعدين لا كل الناس هتحبك ولا كلهم

هيكرهوك انما الجميل نحاول احنا نكسب الناس باحترامنا ليهم

وتقديرنا ليهم وقتها هما اكيد هيعاملونا نفس المعامله

وبكده تكون خلصت اسئلتناعلشان نعرفك اكتر ياريس
منورانا يا ابوحميد

لا بس انت كده ضحكت عليا ولا واحد شاي ولا واحد كنز الدنيا ناشفه كده ولا

ايه لا زعلان ومخصوم منك 10 درجات كده وزعلان جدا جدا جدا وليا حق

عندك وعند ادارة المنتدى وخصوصا انى عضو نيو

يارب اكون اتوفقت فى جواباتي واكون ضيف خفيف ومش رخم او ممل

كل احترامي وودي وتقديري للمنتدى بكل ما فيه ولحضرتك

برغم زعلى على الشاي

بكده تكوون خلصه حلقتنا النهارده

بس قبل ما نقفل الحلقه لازم نشكر ابوحميد علي وجوده معانا

وعل نشاطه الملحوظ واقل حاجه نقدمها ليه

شهاده تقدير من الاداره

دي اقل تكريم لوجوده معانا ومجهوده الدائم

دي كانت هديه الاداره لااحمد

انما هديه ماتركس لااحمد

اكبر كوباايه شااي ليك يا ابوحميد فضحتني يا راجل وشردني في كل رساله

احاوال اهرب منك وازوغ في الكلام علشان تنسي كوبايه الشاي برضوه مش نااسي

خدها وريحيني ده انتي فضحتين :762:

منور ياريس وكنا منضحك معاك بس ابوس ايدك خليلي شويه شاي في قعر الكوبايه كده :762:

وانتظرونا في حلقه جديده من برنامجكم

شبابيك

[♥..pure]

مبروكـ عـ البروجرام الجديد الاول
رائع يا ماتركس بجد ::
منور يا باشمهندس احمد التوبيكـ والمنتدى كله
اجابات جميله جدا منكـ .. تدل ع الرزانه والعقل كدا
ان شاء الله تستمع بوجودكـ معانا ويتم التفاعل معنا ..
اختيار مميز يا ماتركس ومن تقدم لـ تقدم في البرنامج
دوام التألق يا شباب .,,

[دمعه حائره]

الف مبروك اول حلقه ياماتركس
منور يا بشمهندس احمد المنتدى كله
وان شاء الله تقضى اسعد الاوقات معانا
وفعلا انا ملاحظه نشاطه وتميزة وكمان بيمتلك موهبه وقلم رائع
قدر يلفت انظار الجميع من اول يوم
سواء بردود مميزة او مواضيع جميله
وانا اتوقع ليك نجاح اكبر من كده ان شاء الله
اجاباتك جميله ونورت الحلقه بحضورك الراقى
ومبروك الشهاده وعقبال التميز ان شاء الله
تحياتى وتقديرى للجميع

[هاروكا]

برنامج خطيييييييير وتحفه ياماتركس تسلم يدك عليه
نقوش على صفحات الورد انت فعلا شخصية راائعه وقلم مبدع اثبت وجودك في المنتدى
بشكل ملحوظ اجاباتك كانت تدل على العقلانيه
سلمت أخي وسعيدين انك بيننا

[~♥ Queen sozan♥~]

الف مبروك على البرنامج

وبجد حلقة جميلة واجبات ممزة من عضو ان شاء الله
يستمرمعانا ودايما مميز فى تواجدو

تحياتى ليكمـ

[نقوش على صفحات الورد]

اولا
انا بكرر الشكر لانسان حقيقي اعتبرتوا مش صديق انما اخ وهو ماتريكس
واكيد كلنا عارفينوا
اه هو بخيل وزوغ م الفطار النهارده الصبح
بس انا اكيد بقدر ظروفوا وبحترمها
كمان بشكروا ع الوسام وبهدي الوسام لكل اللي هنا
وكمان متشكر لكل اللي مروا بالموضوع وكل اللي ردوا
متشكر جدا ماتريكس وفى انتظار ضيف / ضيفه جدد بس اوعى وانت بتعزم حد تنسى الشاي
هههههههههههههه
احلا ورد ليك وللجميع

[فنانه باسلوبي]

هايل هايل يا احمد
برنامج شبابيك انا كت مستنياه فكرته شبه اجدد عضو
بس طريقه طرح الاسئله عجبتني اوي وفيها مجهود
واجابات كويسه من الضيف الي بقه من المنتدى
واضافه لمنتدانا : بنات مصر
بالتوفيق يا احمد الشريف وتنورنا بالبرامج الجامده
الي بتشجع الاعضاء وتنشط المنتدى
بالتوفيق للجميع

[واد حبيب]

جميل جداااااااا البرنامج ده يا احمد

والضيف والله اجمل واجمل

نشيط جدااا وله موضيع مميزه جداا

يارب يفضل معانا علطول

تسلموعلي الحلقه الجميله دي

الحبيب