( الدرس الثاني )ازاى ترخم وانت فى محل كشرى....!!

[M.G]

اهلاً :198:
موضوعنا النهارده.. ازاى ترزل ع اللى حواليك فى حوالى تلت ساعه..
وهنبدأها من محل الكشرى..

تحذير هام :
(الموضوع هزار بس لو عجبك نفذو وربنا يسترها معاك)

.تم مراعاة الرخامه وتخفيفها بناء علي طلب احد الاعضاء

خش محل كشرى محترم.. وبعد ما تقعد على تربيزه.. وقبل مايجيلك الراجل بتاع الكشرى اعمل انك مش مرتاح فى القعده او ان فيه مسمار فى الكرسى .. فقوم مغير التربيزه..

الما تقعد ارجع بكرسيك ورا وازنق على اللى وراك متخليهوش يعرف يقوم من ع التربيزه الا لما يطلب منك انك تتحرك بكرسيك وبرضه تعمل انك مسمعتوش..
خلاص.. قعدت.. افضل بسبس وقول يا يا زى الاهبل لحد ما تصدع دماغهم ويجيلك واحد منهم ..هيجيلك الجرسون(سميه جرسون وعديها) هيقولك وهو قرفان من شكلك ايوه؟..
اقوله انا عايز.. وافضل دور على قايمة الاطباق لحد ما يشاورلك عليها..اختار طبق واسئله بكام.. هيجاوبك ويقولك ماهو مكتوب قدامه..
رزل عليه وقوله ما ساعات بتكون الاسعار ازيد من اللى مكتوب..
هيبص اليامه التانيه وهتسمع كلمت صبرنى وكلمة رب..!!
قوله عايز طاجن؟
هيقولك حاجه تانيه؟
قوله اه رز بلبن بعديه.. ولا بلاش عاملينه فى البيت بيكون انضف من هنا..
هيمشى من قدامك قبل ما ينفعل عليك..
ناديله وقوله بلاش طاجن انا عايز طبق لوكس..!
هيعمل نفسه مسمعكش..
عادى..
هايجيبلك اللوكس عشانه عارف انك هترجعه لو جابلك طاجن.. وهو مش فاضيلك.. رايح جاى..
جابلك اللوكس..
وحطه ع التربيزه..
بحركه مقصوده منك ولكنها تبدو غير مقصوده وقع المعلقه ع الارض..
وبصله بمنتهى البراءه:sml4: واطلب معلقه تانيه..
لو اتخنق منك وقالك امسحها الارض نضيفه..
قوله معلش اصلى عندى باكتريا هيليكوباكتر فى معدتى..!!
هو مش هيفهم طبعاً.. بس ممكن يتعاطف معاك او يخاف تعديه.. فهايجبلك معلقه تانيه ويتأكد انك مسكتها فى ايدك..
وقع المعلقه من ايدك بس ع التربيزه..
ولما يبصلك.. قوله الحمد لله موقعتش ع الارض.. اصلى مفطرتش لسه واعصابى سايبه..
الاكل اتحط قدامك خلاص..
لو لقيت ازازة الخل قربت تخلص ادلقها كلها فى الطبق وناديله يجيبلك ازازه تانيه انت هتدفع فلوس فى الاكل ده يامعلم..
وعقبال ما يجيبلك الازازه..مد ايدك ع التربيزه اللى جامبك وخد الازازه اللى عليها من غير ما تستأذن..
ولو اللى قاعد كالمك .. قوله اصلى عندى باكتريا هيليكوباكتر فى معدتى... صدقنى مش ههيطلبها تانى..
ومهم انك متتطافسش وتخلص كل الطبق ... سيب ع الاقل عود مكرونه و3 حبيات رز وعدستين بجبه..
خلصت اكل يا معلم..؟؟ تمام.. بأيديك الحلوه دى ارمى عود المكرونه وال3 حبات رز والعدسيتين فى شفشق الميه..
ونادى عليه قوله عايز مايه.. واعمل نفسك زوران وبتطلع فى الروح...
هيشاورلك ع الميه اللى قدامك.. قوله وعلى صوتك.. خلى اللى حواليك يسمعوا ويجيلهم قرفه... الميه واحد مرجع فيها فتافيت اكل..
هيجيلك ويتأكد من كلامك .. ويشتم فى سره.. مش مهم برضه..
هياخد الشفشق ويروح يبدله قوله بصوت عالى.. عايز شفشق تانى بلاش ده والمايه ساقعه وحياة ابوك..
شربت يا معلم...
ولما تيجى تقوم.. اخبط الكرسى فى اللى وراك واعمل نفسك مش عارف تقوم.. وخليه يقوم ويوسعلك..
ولما يقوم من ع الاكل وتيجى تعدى..
وقع جنيه حديد ع الارض.. وافضل دور عليه ييجى 5 دقايق وسيبه ملطوع..
وفى الاخر تقول بصوت مسموع وكله سعاده...
هيه لقيته كنت دايس عليه ومش واخد بالى..
رحت ع الكاشير..
قولو حسابى كام..
هيقولك 3 جنيه..
قوله بأستغراب شديد ليه..
ولما يشاورلك ع التسعيره.. قوله آه.. انا نسيت وافتكرت انى كلت طاجن فقولت ليكو فلوس..
طلع من جيبك اتنين جنيه.. وافضل دعبس على جنيه كمان.. وفى الاخر بصله بأسف وقوله مفيش فكه واديله 20 جنيه..
وهو بيعد لخبطه وقوله مش عايز فلوس قديمه والنبى..بلاش الجنيه ده..
هيديك الباقى من غير مايبص فى وشك..
اقف وعد فلوسك ياض.. وبعد ما تعدهم استهبل وقوله.. انت قولت حسابى كام؟
هيقولك 3 جنيه
قوله اصل الفلوس كده ناقصه..
هيعدهم تانى ويلاقيهم مظبوطين.. قله معلش اتلخبطت اصلى فاشل فى الحساب..
حط فلوسك فى جيبك واخرج..
ومتنساش تقول سلامو عليكم بصوت عالى..
وابقى تف عليا لو حد عبرك ورد السلام..


المره الجايه محل عصير القصب..
سلالالالالالام..

[aya1994]

ههههههههههههههههههههههههه

وابقى تف عليا لو حد عبرك ورد السلام..


دا لو مضربهوش قبل ميخرج يبقه كويس

لا بجد رخامه فعلا
تسلم الايادى

[بنت الاكابر]

هههههههههههه
لا رخامه رخامه يعنى
بس ابقى قابلنى لو خرجت سليم من المطعم
انا اه بحب ارخم بس مش للدرجه دى
كل دا وبتقول انك مخفف الرخامه
امال لو مش مخففها هتعمل ايه

يسلمووووووو

[M.G]

اقتباس المشاركة الأصلية كتبت بواسطة بنت الاكابر هههههههههههه لا رخامه رخامه يعنى بس ابقى قابلنى لو خرجت سليم من المطعم انا اه بحب ارخم بس مش للدرجه دى كل دا وبتقول انك مخفف الرخامه امال لو مش مخففها هتعمل ايه يسلمووووووو

هههههههههههههه هتعرفي في موضوع رخامة القصب

[M.G]

اقتباس المشاركة الأصلية كتبت بواسطة aya1994 ههههههههههههههههههههههههه وابقى تف عليا لو حد عبرك ورد السلام.. دا لو مضربهوش قبل ميخرج يبقه كويس لا بجد رخامه فعلا تسلم الايادى

فعلن هوا دا الي هيحصل بس لو انت سريع كفايه مش هيوصلك هههههههههه

[برنسس ساره]

ههههههه
لا والله فعلا هوا مش هيضربك لا دا هايموتك
هههههههههه
تسلم ايدك

[Řǻet βanota]

هههههههههههههههههههههه

يا نهار اسود بتجيب الحاجات ديه منين

هو فى حد رخم كدا؟؟

بس جميل تسلم ايدك

[M.G]

اقتباس المشاركة الأصلية كتبت بواسطة عاشقة الليل الحزين هههههههههههههههههههههه يا نهار اسود بتجيب الحاجات ديه منين هو فى حد رخم كدا؟؟ بس جميل تسلم ايدك

خبره بقي

[doiss]

ههههههههههه
لا حلوة هههههههههههههه
تسلم الافكار ..
:biggrin:

[roneey]

لا بجد رخامة جامدة جدا جدا

دة على كدة الواحد يطرد قبل ما يبدا الرخامة اصلا

تسلم ايديك

مشكوووووووووووووووووور