عاوزه تتجوزى كده

[دودو2000]

عايـــــــــــــــــــــــــــزه تتجـــــــــــــــــــــــوزى كده

مش هارتبط الا رسمي .. بتحبني اطلبني من اهلي


طبعا موضوع الارتباط الغير رسمي زاد جدا في وقتنا الحالي،

رغم ان الموضوع ده ليه اضرار مش بس دينيا لا كمان علي الجانب الشخصي والاسري والاجتماعي

انا مش هاقول ليكم الكلام العادي اللي علي طول بنسمعه ...

هافكر معاكم واثبت انك خسرانه 100% من موضوع الارتباط الغير رسمي



هانتفق مع بعض ان الحب مش حرام ابداااا ..

بالعكس الرسول صلي الله عليه وسلم لما كان بيلاقي اتنين بيحبوا بعض بيقول زوجوهم لان ده الحل الوحيد

وطبعا ايام زمان مش كان الجواز حاجة صعبة زي دلوقتي .. وده اختبار لينا

بس اللي بيحصل بمسمي اني بحبه .. هو اللي غلط



هاتسألي ليه غلط اننا نرتبط قبل الخطوبة ؟!

هاقولك اذا كان الخطوبة ليها قواعد وشروط زي مش يمسك ايديك ابدااا ولا يلمسك ...

وان مش ينفع تخرجوا مع بعض ابداا لوحدكم،

ومش ينفع كلام رومانسي بينك وبين اللي بتحبيه لانه لسه مش جوزك .. وشروط كتير

يبقي ازاي تخرجوا مع بعض وتقعدوا جنب بعض والكلام اللي بيحصل قدامنا علي طول ؟!

اكيد الحرام مبهر وطعمه حلو، بس مهما كان حرام عمرك ما هاتحسي انك مرتاحة طول ما بتكدبي علي اهلك

وبتسمحي لنفسك ان واحد مهما كان كويس يقولك رايحة فين ويقفل في وشك السماعة لما تضايقيه

وهو حتي مش خطيبك قدام ربنا ولا اهللك ولا الناس ...

بعدين اللي اعرفه ان الحياة مش بتكون بمبي في معظم الاوقات وانتي مرتبطة كده



انتي عزيزة عارفة ليه ؟! ... لانك عبده العزيز رب العالمين

انتي بنت ناس محترمين ... وبنات الناس المحترمة اللي عايزهم يجيلهم لحد بيتهم

هاتقولي طيب ازاي اعرف انه اللي عايزاه ... مش ارتبط بيه احسن ما افسخ الخطوبة قدام الناس ؟!

طبعا مفهوم فسخ الخطوبة عيب وازاي ده حاجة سيئة جدا ...

لازم نغير المفهوم ده والتقاليد اللي مش ليها اي اساس من الصحة

والحل بسيط جدا .. حددي اسئلة واساسيات لازم تكون في شريك حياتك

وفي الاسلام قبل الخطوبة ممكن الشاب يجي قدام اهلك، لانك عزيزة ومش اي حد يقدر يوصلك

يجي بيتكم ويقعد معاكي مرتين او 3 مرات تشوفي اخلاقه واهدافه

وطبعا لازم يكون في توافق اجتماعي و اخلاقي و طبعا الدين والمباديء وطريقة التفكير ..



لازم تثقي في ربنا وتتوكلي عليه، وتقولي توكلت عليك يا وكيل

وتقولي للي بتحبيه ان مش ينفع تتكلموا الا لما ترتبطوا رسمي، وانكم هاتسيبوا بعض مؤقتاً عشان ربنا يبارك ليكم في حياتكم

عارفة يعني ايه ربنا يبارك في حبكم بعد الجواز ؟!



هاتقولي ممكن يسيبني !!

يبقي مش يستاهلك .. هايسيبك عشان انتي قولتي هاتقي ربنا !!

مفيش مقارنة بين انك تختاري ربنا وانك تختاري اللي بتحبيه

[ وَمَنْ يَّتَّقِ اللهَ يَجْعَلْ لَّهُ مَخْرَجاً ]، ده وعد من ربنا

ومن تعجّل شيئاً قبل أوانه عوقب بحرمــــــانه



بعدين القلوب ربنا بيقلبها يعني ممكن مش تسبيه وتلاقيه مش بقي بيحبك او حتي انتي مش بقيتي بتحبيه

ااو ممكن تتجوزوا بس مش هاتعيشوا سعداء ....عارفة ليه ؟! .. لان ربنا هاينزع البركة

بعدين ايه يساوي الرعب ان اهله اواهلك مش عارفين .. وياتري هايوافقوا ولا لأ ؟! وياتري ايه اللي هايحصل ؟!

" ولا يحملنكم استبطاء الرزق أن تأخذوه بمعصية الله، فإن الله لا ينال ما عنده إلا بطاعته" . رواه البزار، وصححه الألباني.

يعني الاحسن انكم في اي حال من الاحوال مش تتكلموا،

لانكم لو مش في نصيب بينكم مش هاتكوني اتعلقتي بيه لدرجة ان مش ينفع يوم يعدي الا ما تكلميه ..

ولو حصل نصيب بينكم يا سلاااام علي رضا ربنا



خـلي شعـارك

" مش هاغضب ربي عشان حد, وهارضي ربي علي حساب اي حد "

عايزني ... بيتنا مفتوح

مش عايزني ... يبقي كل شيء قسمه ونصيب


هااااا.. عندك الشجاعة انك تضحي بحاجة غالية عليكي عشان ربك ؟!

هاتقولي انا مستسلمة ليك يارب العالمين ؟!

هاتحملي مسؤلية تربية جيل مسلم مؤمن بالله لما تكوني ام باذن الله ؟!

هاتقولي يارب انا عايزة اكون من الشباب اللي نشأ في عبادة الله وربنا هايظلهم تحت ظله في يوم لا ظل له ؟!

يبقي خلاص قوووولي انا مستسلمة ليك يارب العالمين وتوكلت عليك، لانه مهما حصل اكيد هايكون خير ليا

لاني عجلت اليك ربي لترضي






مين هتشجع نفسها او اختها او بنتها او صاحبتها ؟

[مشتاقه للجنه]

عندما لا تخافى من ان أحد يشوفك أو يسمعك وأنتى تتكلمى

يبقى ده الارتباط الصحيح لانه بالنور أمام الجميع وعلى مرئى ومسمع من الجميع

دودوو شكراا للنصائح الغاليه ويارب البنات كلهم يستفادوا ..

تحيااتى

[sandy22]

اكيد طبعا
كل كلامك صح
وبعدين مفيش شئ يستاهل انك تغضبى ربنا علشانة
وبعدين الجواز رزق ولة ميعاد معلوم
لازم نصبر علشان كمان ربنا يبارك لنا فية
مشكورة على الطرح الجميل

[مـَلآڪ ₪]

يلهوى على الكلام الجميل
وحياه ربنا كلام صح 100%
بس فين بقا البنات تسمع الكلام ده
[ وَمَنْ يَّتَّقِ اللهَ يَجْعَلْ لَّهُ مَخْرَجاً ]، ده وعد من ربنا

ومن تعجّل شيئاً قبل أوانه عوقب بحرمــــــانه

والله انا مش عارفة اقول ايه بعد الكلام ده بجد
والله بجد تسلم ايدك قووووووى
واحلى 5 نجوم للموضوع وليكى

[دودو2000]

شكرا للمرور

[aya1994]

" مش هاغضب ربي عشان حد, وهارضي ربي علي حساب اي حد "

بجد فعلا كل كلامك صح
جزاكى الله كل خير

[دودو2000]

نورتى ياقمرى