هل لنا الأختيار ( تابع لمسابقة كاتب العرب )

[king lion]

فى البداية أشكر جميع لجنة التحكيم القائمة على المسابقة
وأتمنى التوفيق لجميع الأخوة والأخوات المتسابقين


على بركة الله نبدء

اول شىء الموضوع مش حيتكلم عن اللى بتمر بيه مصر
ولا عن القضايا العربيه

والسبب أن المنتدى مليان من الموضوعات دى

عشان كده انا حابب أتكلم معاكم النهرده عن حاجه تانيه خالص
بتدور فى عقول كل واحد فينا

وبصراحه انا شايف ان الموضوع ده مهم اوى اننا نتكلم فيه ونتبادل الرآى

لأن ممكن اوى ودى بتحصل حد من الحلوين الملحدين اللى معندهمش دين
يجى يسأل سؤال كده طبعا السؤال مش عشان هو عايز يوصل لأجابه أو للحق

لا طبعا هو عايز يزعزع ثقه اللى بيكلمه فى دينه وفى قرآنه وفى أسلامه كمان
لأن يا جماعة الأسلام بيتحارب وبطرق كتيره جدا

حيجى واحد يسألنى دلوقت

يا باشا بيتحارب فين بس ما احنا عايشين اهو فى سلام ولا فى جيش حاربنا ولا شفنا عسكرى اجنبى على ارضنا

حقوله يا محترم ويا محترمه وهو الحرب بالجيوش والدبابات والطيارات بس
الحرب فى منها حرب الأفكار ودى بقى اخطر من الدبابات والطيارات

طب ازاى يعنى يا عم اخطر فهمهالى دى

طيب اصبر بس وانا حفهمك مش مهما طالت الحرب بيجى وقت وتنتهى
وبيحصل أن اللى دخل البلد دى بيجى عليه وقت ويمشى والبلد بترجع لأهلها
زى مصر كده ماهى احتلت كتير بس اتحررت صح كلامى وله ايه

ايوه صح بس الحرب الفكريه اخطر ازاى برضه

أخطر لأن الأشخاص دول بيخلطوا الحق بالباطل والباطل بالحق
وبيلعبوا بعقول الناسوبيحاربوا الأسلام على الأرض العربيه والأسلاميه وبيهاجموا العقيدة هجوم كبير اوى

يا باشا وهو الناس يعنى خلاص مفهاش عقل تفكر وتعرف ان الكلام ده غلط

لا طبعا فيها عقل وبتفكر وكل حاجه لكن السؤال بقى اللى حقوله ممكن يخلى دماغك تروح وتيجى

ياعم بتقول ايه بس تروح فين وتيجى منين

طيب خليك معايا بقى وتابع كلامى ونشوف دماغك حتروح منك لفين
عشان تقدر تعرف الناس اللى بتسأل دى غرضها ايه

يجى واحد يقولك انت مسير وملكش حرية الأختيار
أن كنت عاصى وله صالح حتقوله ايه

طيب خلينى بس أسالك الأول ممكن ؟

بداية الســــــــــؤال

مش فى ايه فى القرآن بتقول

بسم الله الرحمن الرحيم

إِنَّا كُلَّ شَيْءٍ خَلَقْنَاهُ بِقَدَرٍ

تمام التفسير بقى بتاعها بيقول أيه يعنى لو جبنا تفسير بن كثير وتفسير القرطبى واى تفسير يعجبك

حنلاقى المضمون بتاع التفسير ده بيقول

أن ربنا عارف مقادير وأحوال كل حاجه قبل حتى ما يخلق الكون ده كله صح كلامى وله انا غلطان

طبعا صح

يعنى ربنا قدر على اللى حيعصيه انه يعصيه وان اللى حيكون كافر حيموت كافر
واللى حيسرق حيسرق واللى حينهب وكل حاجه بقى حتى قبل ما يعملها

يعنى ربنا مقدر ان بكره مثلا الراجل ده حيقتل واحد وبعدين حيسرق
يقدر بقى الراجل ده ميقتلش بكره اللى ربنا مقدره يحصله أنه يقتل او يسرق

لو قولت اه ممكن ميقتلش يا ليون يبقى كده وقعت نفسك فى غلطه كبيره
لأن المفروض يعنى حسب أيمانك أن من كمال علم ربنا أنه يعلم اللى حيصل قبل ما يحصل

ولو قولت لا يا ليون يبقى كده الراجل ده مجبر يقتل ومجبر يسرق

يبقى كده ملناش أرادة خالص لأننا مش بنختار احنا مسيرون مش مخيرون

بص يا ليون سؤال كده على الماشى

ربنا مش يعرف كل حاجه قبل ما تحصل ومقدر كل شىء صح وله غلط

طبعا صح

طب لما هو صح بقى يبقى ليه ربنا يعذبنا فى الأخرة مش ربنا مقدرلنا اننا نعمل كده
وايه لزمه اننا نعيش فى الدنيا اصلا ماهو كده كده حنعمل اللى ربنا مقدره لينا
مش كان لما نتخلق يدخلنا الجنه او النار على طول وملهاش لزمه الدنيا دى
ماهو كده كده حنعمل اللى ربنا كاتبه

عشان احنا ملناش اختيار ولا لينا أرادة
ده حتى كمان فى الدنيا مش سلمين منكم تقولوا بنقتل ونسرق وننهب ونظلم
ماهو مش بايدنا يا عم ليون ربنا كاتب لينا نبقى كده
هو احنا نقدر نخالف ارادة ربنا

صح وله ايه يا عم الحج

طب أستنى بقى وخلينى ارد عليك بس الأول
حقول كلمتين للناس اللى فى المنتدى هنا

الأول انتم ايه رآيكم فى الكلام ده ولو حد سألكم كده حتقنعوه ازاى ؟؟؟؟؟؟

عرفتم ليه أخترت الموضوع ده عشان اتكلم فيه لأنه ممكن يدور فى عقولنا كلنا
وممكن برضه حد يسألنا فيه زى ما شفتم كده بالظبط

نركز بقى شويه مع بعض وربنا يقدرنى واعرف ارد على الجدع ده
لأن شكله مش ساهل خالص


الأول عشان نقدر نرد على الكلام اللى اتقال ده صح وله غلط
لازم نفهم كل شىء اتقال عشان نقدر نحكم كويس على الموضوع ده

تعالوا نشوف مع بعض كده ونركز الله يكرمكم

الأنسان مسير وله مخير

نعرف الأول يعنى ايه مسير ويعنى ايه مخير

مسير يعنى ملهوش ارادة ولا ليه القدرة انه يخالف اللى مرسوم ليه

طيب ومخير

لا هنا بقى الوضع يختلف يا شباب يعنى ليه ارادة ليه حريه الأختيار


طب الأنسان بقى مسير زى ما الراجل ده بيقول يعنى مسلوب الأرادة
ملهوش راى مجبر يعنى وله مخير ليه حق الأختيار أن كان خير أو شر

فى الحقيقة الأتنين الأنسان مسير ومخير

استنوا بس مش بتفلسف عليكم والله انا بتكلم بجد وحقولكم ازاى

مش ربنا سبحانه وتعالى بيقول فى كتابه الحكيم

وَرَبُّكَ يَخْلُقُ مَا يَشَاء وَيَخْتَارُ مَا كَانَ لَهُمُ الْخِيَرَةُ سُبْحَانَ اللَّهِ وَتَعَالَى عَمَّا يُشْرِكُونَ

تعالوا بقى عشان تعرفوا بتفلسف عليكم وله لا

انا حسأل وأنتم جاوبوا بنفسكم

حد فيكم بيختار أمه او أبوه ؟؟؟

حد فيكم بيختار حيطلع ذكى وله غبى ؟؟

حد فيكم بيختار حيطلع ابيض وله اسمر ؟؟؟

حد فيكم بيختار حيطلع معاق وله سليم وهو مولود ؟؟؟

حد فيكم بيختار حيتطلع مصرى وله سعودى
وله اردنى وله موزمبيقى حتى ؟؟؟

حد فيكم يقدر يخلى قلبه مينبضش ؟؟؟

حد فيكم يقدر يقول حيعيش كام سنه ؟؟؟

حد فيكم يقدر يقول حيتولد غنى وله فقير ؟؟؟؟

حد فيكم يقدر يتحكم دمه يمشى فى العرق ده والشريان ده لا ؟؟؟

مش عايز اطول عليكم بقى لان فى حجات كتيره حنقعد نقولها

وحتكون اجابتكم لا

يبقى كل الأمور دى بقى يا شباب احنا مسيرين فيها يعنى ملناش فيها دخل
ولا أرادة خالص لأنها من أختصاص الله تعالى وتقديره لمخلوقاته

وعشان ديما بحب أقفل جميع الأبواب على اى حد يشكك فى الدين

حقولكم أحنا مخيرين فى ايه وبالدليل برضه من كتاب ربنا ومن مناقشه صغيرة معاكم عشان الكل يرتاح وعقله وقلبه يطمئن أن ربنا مش بيظلم اى مخلوق
من مخلوقاته لأن من صفات ربنا العدل

الأنسان مخير

الأول نتكلم بالعقل كده ونشوف وبعدين نحط الدلائل من القرآن الكريم

دلوقتى يا شباب مش ربنا مدينا عقل والعقل ده بنختار بيه كل حاجه
بعد ما بنفكر كويس

دلوقتى بما أن الأغلبيه هنا لسه شباب وليهم طموح
وكتير منهم لسه متجوزوش

هل كلنا يعنى الشباب كلهم بيكون اختيارهم فى اللى حتشاركهم حياتهم واحد
وبرضه للبنات هل كل بنت اختيارها للى حيشاركها حياتها واحد

الأجابه حتكون لا

طب ده ليه لأن بيكون لكل أنسان ميول وعقل وحجات بيحبها وحجات بيكرهها

** يعنى مثلا فى شاب عايز اللى يرتبط بيها تكون عامله شعرها فى الخلاط
وبتحط نص كيلو الوان فى وشها وبتلبس ضيق

** وفى واحد تانى حابب اللى يرتبط بيها تكون معتدله فى لبسها

** وفى واحد تانى بيحبها تكون ملتزمه عشان تراعى ربنا فيه


** البنت برضه فى بنت بتحب تختار اللى يشاركها حياتها كول ومش معقول

** وفى بتحب تختاره عشان فلوسه او جماله عنيه خضرا وشعره اصفر

** وفى واحده بتختاره ملتزم عشان يراعى ربنا فيها


نفس الشىء لو نزلنا نشترى حاجه برضه حتى لو كلنا نزلنا نشترى منتج واحد
حيكون اختيارنا مختلف فى الألوان

الغرض من الأمثله دى شىء واحد مش اكتر
عشان أثبتلكم أننا مخيرين بين البدائل

يعنى لو واحد بيصلى التراويح حيقول انا حصلى فى القائد ابراهيم
مع انه ساكن جنب جامع عبد الحليم محمود
وبعده بكام شارع كده مسجد الخالق البارىء
وبعده بشويه مسجد ابى بكر الصديق

فدلوقت هو قدامه كذا بديل اهو فهو بيختار منهم حسب ايه
حسب عقله وميل قلبه مش كده


حصدمكم بقى اسمحولى قبل ما احط الدلائل من القرآن

أكبر دليل أن الأنسان مخير فى فكره واختيار عقله

هو أن ربنا سبحانه وتعالى لا يحاسب المجنون على اى شىء بيعمله
احنا ربنا فرض علينا فروض منها الصلاة والصوم والحج والزكاة والجهاد وحجات كتيره اوى

طب ليه فى الأحكام التشريعية بيسقط كل التكليف ده عن المجنون ؟؟؟؟؟؟؟؟

الجواب عليكم بقى

لأن معندهوش عقل وميقدرش يميز الصح من الغلط مش كده برضه
لو كان بقى كلام الجدع اللى فوق ده صح

كان ربنا حاسب المجنون ماهو مسير ومش مخير حيحتاج عقله فى ايه
ماهو عقله زى قلته وله ايه يا شباب

نيجى بقى للأدلة أننا مخيرين فى الأمور اللى بتحتاج العقل والتمميز

قول الله تبارك وتعالى

إِنَّا هَدَيْنَاهُ السَّبِيلَ إِمَّا شَاكِرًا وَإِمَّا كَفُورًا

اهو ايه رأيكم بقى ربنا بنفسه اهو بيقولوكم أنه هدانا للطريق يعنى بين لينا طريق الخير وطريق الشر ولو شوفنا بنفسنا كل التفاسير ولو حتى من غير ما نشوفها بالعقل كده وفكرنا ربنا بين لينا الطريق وساب لينا الأختيار بعقلنا وعملنا يعنى احنا مخيرين اهو مش مسيرين زى ما الناس بتقول

وححط ليكم تفسير القرطبى

إنا هديناه السبيل اي بينا له وعرفناه طريق الهدى والضلال والخير والشر ببعث الرسل فآمن أو كفر

وكمان نشوف قال ايه بن كثير برضه زيادة الخير خيرين

إنا هديناه السبيل أي بيناه له ووضحناه وبصرناه به


وكمان نشوف الطبرى برضه قال ايه

حدثنا بشر قال ثنا يزيد قال ثنا سعيد عن قتادة قوله ( إنا هديناه السبيل إما شاكرا ) للنعم ( وإما كفورا ) لها حدثني يونس قال أخبرنا ابن وهب قال قال ابن زيد في قوله ( من نطفة أمشاج نبتليه ) إلى ( إنا هديناه السبيل )
قال ننظر أي شيء يصنع أي الطريقين يسلك وأي الأمرين يأخذ قال وهذا الاختبار

ايه رآيكم بقى لسه برضه حتقولوا احنا مسيرين ومش مخيرين

طب استنوا شويه خلينا نشوف ربنا قال أيه كمان عشان تطمنوا أكتر

مَنْ كَانَ يُرِيدُ الْحَيَاةَ الدُّنْيَا وَزِينَتَهَا نُوَفِّ إِلَيْهِمْ أَعْمَالَهُمْ فِيهَا وَهُمْ فِيهَا لَا يُبْخَسُونَ

نشوف بقى تفسير القرطبى كده ونحط منه جزء

أي من أراد بعمله ثواب الدنيا عجل له الثواب ولم ينقص شيئا في الدنيا وله في الآخرة العذاب لأنه جرد قصده إلى الدنيا

********************************

وكمان نشوف تفسير الطبرى قال ايه فيها برضه

من كان يريد بعمله الحياة الدنيا وإياها وزينتها يطلب به نوف إليهم أجور أعمالهم فيها وثوابه

********************************

ونزيدكم برضه من تفسير بن كثير من قول قتادة

من كانت الدنيا همه وسدمه وطلبته ونيته جازاه الله بحسناته في الدنيا ثم يفضي إلى الآخرة وليس له حسنة يعطى بها جزاء وأما المؤمن فيجازى بحسناته في الدنيا ويثاب عليها في الآخرة


نشوف ايه تانيه مع بعض كده

مِنْكُمْ مَنْ يُرِيدُ الدُّنْيَا وَمِنْكُمْ مَنْ يُرِيدُ الْآخِرَةَ

انا بقى هنا مش ححط تفسيرات خالص حسيبكم انتم بقى تجاوبوا بنفسكم كده

يعنى ايه منكم من يريد دى ؟؟؟؟؟

ها حد يجاوبنى يا شباب يعنى ايه منكم من يريد الكلمه واضحه وصريحه
ومش محتاجه تفكير وله نجرى نجيب تفسير ولا نسأل شيخ
لأن الكلام مفسر نفسه بنفسه

لو احنا بقى يا عينى علينا مجبرين ومسيرين وملناش اختيار فى حاجه
طب ليه بقى ربنا حيقولنا منكم من يريد ايه لزوم ذكرها يعنى

ايه رآيكم بقى ادينا شايفين أهو بعض من آيات القرآن بتتكلم عن إرادتنا وحرية تفكيرنا وأختيارنا

يبقى الأنسان انتم شايفين أنه مسير وله مخير

خلينى اديكم مثال صغير كده خفيف

دلوقتى يا جماعة كلنا طبعا بناكل وبنام مش كده برضه
وله فى حد فينا مش بينام كلنا بننام طبعا

طيب الواحد مثلا ينام على جنبه اليمين
يصحى الصبح يلاقى نفسه نايم على ضهره
وله واقع جنب السرير عادى يعنى بتحصل مش كده

طيب ياترى بقى الواحد وهو نايم اختار انه لما يصحى الصبح
يلاقى نفسه نايم على ضهره وله واقع جنب السرير
طبعا لا الأنسان مخترش كده لكن ربنا مقدر ليه كده

نفس الشىء لما بنحلم واحنا نايمين ياترى حد فينا بيختار الحلم اللى حيحلمه
مش قصدى على احلام اليقظه
لا أنا اقصد لما نروح فى النوم يعنى بنختار نحلم بايه

طبعا لا برضه ده شىء مقدر من الله اننا حنحلم بشىء معين او حنشوف شىء معين واحنا نايمين

مثال تانى خفيف برضه

واحد مثلا واقف فى البلكونه عدى عليه صاحبه ماشى فى الشارع
قاله يا فلان انزل عايزك

طبعا هنا لما جه ينزله نزل على السلم او فى الأسانسير
هو اختار اهو طريقه النزول

طيب نفترض بقى برضه وهو واقف كده فى البلكونه صاحبه قاله انزل
هوب اتكعبل واتقلب من البلكونه
نزل لصحبه بس على دماغه محطش منطق زى ما بيقولوا

هنا بقى هو اختار ينزل بالطريقه دى وله ده كان قدر ربنا وقدره ؟؟؟؟؟؟

الخلاصة هنا ان الأنسان مش بيختار حيموت ازاى
وله حيكون سليم وله مريض فقير وله غنى مجنون وله عاقل

لكن هو مخير فى التفكير وفعل الصح والغلط

عشان لو احنا قولنا الأنسان ملهوش اى اختيار
يبقى مش لازم لما نعمل حاجه كويسه نقول الحمد لله
ولما حد يعمل حاجه غلط منلومش عليه بقى ماهو ملهوش ذنب الراجل مسلوب الأرادة يعنى

ده حيخلينا نقول أن ربنا ظالم والعياذ بالله عشان ربنا يعاقبه على حاجه ملهوش ذنب فيها

وربنا بقى نفى عن نفسه صفه الظلم دى

وتعالوا نشوف ربنا بيقول ايه

قَالَ قَرِينُهُ رَبَّنَا مَا أَطْغَيْتُهُ وَلَكِنْ كَانَ فِي ضَلَالٍ بَعِيدٍ قَالَ لَا تَخْتَصِمُوا لَدَيَّ وَقَدْ قَدَّمْتُ إِلَيْكُمْ بِالْوَعِيدِ مَا يُبَدَّلُ الْقَوْلُ لَدَيَّ وَمَا أَنَا بِظَلَّامٍ لِلْعَبِيدِ

اهو ربنا بنفسه بيقول ما انا بظلام للعبيد بينفى الظلم عن نفسه
ماهو ربنا انذر فى آيات كتير ووعد بالعذاب للى حيكفر وحيعصى
وحيمشى بقى فى الطريق الغلط

مش ربنا بين لينا الطرق الصح والغلط وبين لينا الحق والباطل

كله موجود فى القرآن وكله فاهم وفيه عقل وبيفكر وله فى حد عنده اعتراض على ان ربنا مش مبين لينا الحق والباطل
وعشان برضه نقفل باب تانى حنقول حاجه كمان وفيها بقى الشفى كله

رُسُلًا مُبَشِّرِينَ وَمُنْذِرِينَ لِئَلَّا يَكُونَ لِلنَّاسِ عَلَى اللَّهِ حُجَّةٌ بَعْدَ الرُّسُلِ

اه تعالوا بقى نشوف كده لو احنا بقى بالعقل كده مسيرين وملناش اختيار
ما احنا بقى يوم القيامه حنيجى نقول يارب احنا ملناش ذنب
مش انت يارب عايزنا كده وكتبت علينا كده احنا ملناش أرادة ولا اختيار
ما هو قدرك يارب

طب فكروا بقى ايه لزوم ان ربنا سبحانه وتعالى يقول انه ارسل الرسل عشان ينذروا ويبشروا والناس بقى متبقاش ليها حجه يقولوا مكناش نعرف
لا يا حبيبى انت تعرف كويس اوى كمان
مش ربنا أرسل الرسل عشان تنذر وتبشر يبقى ملكش حجه مش كده

ولو كان احنا مش مخيرين فى اختيار الصح والغلط والأيمان والكفر
يبقى ايه لزوم بقى ارسال الرسل والكتب السماويه وكده
ماهو قدر ربنا مكتوب قبل خلق الكون أساساً
وله حد عنده أعتراض على النقطه دى

يبقى الطبيعى وبالعقل كده لو الأنسان مش مخير فى أختيار طريق الصح
وطريق الغلط كان دى حتبقى حجه للناس يوم القيامه
ودى بقى أكبر من أرسال الرسل للأنذار والتبشير

يبقى هنا نقول ايه بقى لاى حد يقول انا مسير وربنا عايزنى عاصى
وكتب كده عليا

نقوله لا يا حبيبى انت فيك عقل ومخير
مسير فى الحجات اللى ملكش دخل فيها
زى مثلا تكون ماشى طوبه تنزل على دماغك من بيت بيتبنى مثلا
تلبس فى عمود نور وانت سايق عشان بتتكلم فى الموبايل
تتزحلق تروح واقع على دماغك ممكن

يعنى خلونا بالعقل كده نحسبها

مش الرزق ده ربنا مقدره ؟؟؟؟؟؟

طب بنشتغل ليه وينتعب ونعرق ويطلع عنينا عشان الرزق ده
ما نقعد فى بيتنا بقى ورزقنا حيجلنا بلاش نشتغل ماهو مكتوب يا جدعان حتتعبوا نفسكم ليه

طب سيبكم من الشغل

لما واحد فينا بيتعب بيجرى يلف على الدكاتره وعيان بقى وخلاص مش قادر
بيروح للدكتور ليه ماهو لو ربنا كاتب حيموت حيموت مفيش كلام
بتروحوا ليه للدكاتره عشان تتعالجوا
ما تقعدوا فى البيت وبلاش تروحوا ولا تيجوا

بصراحه انا حطيت المثالين دول فى قرب نهايه الموضوع
عشان شىء واحد بس

أثبت ليكم كلكم اننا بطبعنا وفكرنا وعقلنا
بنعمل كل شىء واى شىء عشان نوصل لهدف احنا شايفينه صح بتفكيرنا

بنشتغل عشان ناخد فلوس ونعيش كويس
بنروح للدكتور لما نتعب عشان نتخلص من الألم بدواء وله بحقنه
وبنقول يمكن ربنا يكون كاتب لينا الشفاء على ايده

يبقى من باب اولى نمشى فى طريق الصح ونجتهد عشان نفوز فى الأخرة
وربنا يرضى علينا ومنعملش الغلط ونقول قدر ربنا كده

لأننا مفيش حد فينا يعرف ربنا كاتبله ايه ولا كاتب ليه خاتمته حتبقى ازاى

قدامنا طريقين دلوقت واحد فيه السعادة والكرامه والهنا والسرور والفوز

وواحد فيه الندامه و الحسرة والخزى والعار والخسارة

يبقى حنتختار نمشى فى انهى طريق منهم مع ان مفيش حاجه بتمنعنا
من اننا نمشى فى اى طريق فيهم

زى مثلا واحد رايح القاهره من اسكندريه وقالوله خلى بالك
الصحراوى اقل فى المسافه من الزراعى
ومتسفلت كويس وفيه اضاءه حلوه وحطين كمان عين القطه وزى الفل
بس الزراعى اطول وضلمه ومتنيل بنيله

ياترى وهو مسافر حيختار انهى طريق الزراعى وله الصحراوى

العقل بيقول الصحراوى لأنه ممهد وكويس واقصر فى المسافه

يبقى هو اللى أختار طريقه بنفسه

نفس الشىء احنا المفروض يعنى بالعقل نختار طريق الأخرة
اللى ربنا وعدنا بيها

الجنه ونعيمها وكلنا عارفين وعد الله بالفوز بالأخرة

يبقى نمشى فى طريق الطاعة لله عشان نوصل لكده

وبالأخص أننا حقيقى منعلمش الغيب ولا نعرفه
يبقى مش لما نعمل الغلط نقول قدر ربنا
ولما نعمل الصح نزكى نفسنا

اسف جدا انى طولت عليكم وكفايا لحد كده

اتمنى الموضوع ينول أعجابكم

[king lion]

شكرا لكم جميعاً

[تيتشر نفشه ツ]

كلامك صح ياغالي ومجهود عالي منك بجد

تسلم منتحرمش ابدا

وبالتوفيق ليك والله مجهود جميل قوي

[ساحر الأحزان]

بالنسبة لموضوع الاحتلال ونقطتة تلك هى الثقافة الفكرية التى تركها

ورائة المحتل مثل ما رئينا عندنا او فى لبيبا بتواصلها الفكرى

مع ايطاليا او الجزائر وتعمق اللغة الفرنسية فيها مثل لبنان

والمغرب ايضا مع اسبانيا وهو يريد ترك بذرة لة تنمو مع الاجيال

من خلال ثقافتة التى يريد ان يبقيها ويغير من واجهة تلك الدول

التى احتلها حسب هواة

وموضوع الاختيار

يقول الله عز وجل فى قرائنة فى سورة الانسان

بسم الله الرحمن الرحيم

(أنا هدينة السبيل ام شاكرا وأم كفورا)

وهو طريق النصح وطريق الرشاد ام ان يشكر نعم ربة علية

واما ان يكفر فمن حمد كان لة ومن كفر كان جزؤة عذابا عظيما

ويقول الحق سبحانة فى سورة القيامة

بسم الله الرحمن الرحيم

( بل الانسان على نفسة بصيرة)

كل واحد سوف يحاسب على اختيارة فهل لا يخاف الانسان على نفسة

ولكنها الوسوسة الشيطانية التى تتغلب علية وتسوقة واراء نسيان

ماعلية واتباع طريق الشهوات وهو باختيار ايضا

لانة يعلم ان ذلك الطريق هو الخطاء بعينة

ويترك طريق الصواب وهو يعلم ان بة الفوز العظيم

موضوع قيم منك تقبل تحيتى واحترامى علية

واتمنى لك التوفيق

[الروح أرق من الندى]

اولا احييك جدا علي مجهودك الاكثر من رائع

وموضوعاتك دائما تستشهد فيها بالادله

ثانيا بالفعل نحن مسيرون ومخيرون معا في نفس الوقت

فالاحكام الكونيه كالموت والرزق والخلق فليس لنا تصرف فيها

ولكن ايضا للعبد مشيئه داخليه ضمن المشيئه الالهيه

قال تعالي(( وما تشاؤون الا ان يشاء الله ان الله كان عليما حكيما))

فالعبد له اختيار ومشيئه لكنها لا تستقل عن تقدير الله عز وجل والعبد يباشر ما يصدر

منه باختياره ولا يعلم ما كتب له

لذلك لا نستطيع ان نقول ان العبد مسير فننفي مشيئه العبد

ولا نستطيع ان نقول انه مخير وننسب كل ما يفعله الانسان له دون دخل الله عز وجل فيه

موضوعك مهم جدا

تقبل تقييمي المتواضع


تقبل مروري

[.نبض القلوب.]

اول شئ
مجهود كبير منك
تحياتى عليه
تانى شئ
كلامك مظبوط جدا
ربنا يكرمك
تحياتى لك

[نـــــ غ ـــــــم]

والله ربنا خلقنا وعارف غائبة الاعين

ودى قدرة الله سبحانه وتعالى


بس كل انسان فينا ليه قوة تحمل الشيطان

وربنا بيختبر فينا قوة ايماننا وربنا يعافينا من اهوال الدنيا ومصائبها واهوال الشيطان

حقيقى موضوع جميل جداااا وهايل جدا جداااا

موفق باذن الرحمن

جزاك الله كل الخير

[Ćяч ƒ0Я ℓ0√З]

تسلم أخى على مجهود حضرتك الجميل ده وبجد مقدرين تعبك

وكلآم حضرتك فى كل مآ ذكرت كآن هآدف جداً ومقنع لأى حد مش مقتنع

لما فيه من الدلآئل إللى حضرتك ذودت بيها معلومآت حضرتك وقوتهآ بها

تسلم أخى على مجهودك الرآئع وربى يوفئك فيمآ أنت مقدم عليه

[MĺŔǾ]

موضوع جميل وطرح موفق لموضوع شائك تكلم فيه كثيرا من العلماء والفقهاء منذ زمن وكان مسار جدل كبير في وقت من الاوقات .. وتمت الاجاابه عليه في أكثر من محفل علمي ...
طبعا لا انكر مجهودك الكريم في التوضيح والشرح الوافي يمكن يكون فيه حد موش مر عليه السؤال دا فيستفيد حتي لا يقع في الخطأ ...
نعم الانسان مســـــــــير بإختياره ....
مسير في شئون لا دخل له بها ولا يعلمها الا الله عز وجل مثل الموت والمرض
ومخير بعد أن أوضح له الله عز وجل الصواب والخطأ والحرام والحلال واعطاه عقل ليستطيع التمييز

مشكور أخي للطرح الجميل

تحيتي
ميـــــــــرو

[king lion]

اقتباس المشاركة الأصلية كتبت بواسطة بنوته بريئه كلامك صح ياغالي ومجهود عالي منك بجد تسلم منتحرمش ابدا وبالتوفيق ليك والله مجهود جميل قوي

بنوته بريئه

نورتى الموضوع بحضورك ومشاركتك الجميلة

دمتى بحفظ الرحمن

تقديرى واحترامى