شخصيات ميكروباصية

[طمطم]

شخصيات ميكروباصية

اكيــد كلنـا بنقابـلها

مجرد ما تركب الميكروباص تحس انك في فيلم من افلام اللي هي زي الطائرة المفقودة كل واحد جوة بشخصية وحكاية شكل !
................................................

الشخصية الاولي : الست التخينة اللي واخدة مكانين :
ودي بتلاقيها في كل ميكروباص ويبقي حظه اسود اللي يركب جنبها بجد ويا سلام بقي لو السواق ركب اربعات ورا تبقي مجزرة..وافضل مكان ليها جنب القزاز بلاش تقعد في النص عشان النفس وكمية الاكسجين المستهلكة .
................................................

الشخصية التانية:
"وطي صوت الكاسيت يا اسطي " :

وده بيكون اما بسبب ديني او بسبب انه مصدع شوية وتعبان ومرهق من اليوم فمش فايق لأم الاغاني اللي مشغلها السواق وطبعا بتكون اغاني عن الفقر والغلب والقرف بتاع الحياة عشان السواق يتمزج او بتكون اغاني عن المخدرات بانواعها زي وشربت حجرين على الشيشة ...يعني اكيد مش هيفتحلك سيلين ديون .
................................................

الشخصية التالتة: "علي صوت الكاسيت يا اسطي " :

وده طبعا بيكون عايز يعلي عشان يغتت علي ذوق السواق ويقعد يضحك
علي أغانيه الهبلة او انه فعلا بيحب النوع ده من الاغاني او انه
عايز يهيس مع الاغاني بس وغالبا بيكون معاه شلة كبيرة في
الميكروباص بيشتغلوا السواق ويقولوله "ذوقك عالي يا اسطي" ويرد يقول "الله يكرمك "
................................................

الشخصية الرابعة : اسطورة الشاب ذو السماعات في الودان :

بيكون قاعد جنبك وحاطط السماعات في ودانه طول الطريق تقريبا وحتي ميسمعش اللي بينادي علي الاجرة اصلا الا اما حد يخبط عليه وبيشيل السماعات وهو مستاء جدا كأنه بيقول للي جنبه "عايز ايه اخلص ! " واول مايدفع الاجرة يجري علي
السماعات بسرعة "اديني الحقنة بسرعة ارجوك محتاجه الجرعة "
وده بيتسمى "اسطورة الرجل ذو السماعات في الودان "
................................................

الشخصية الخامسة: الراجل العرقان اوى:

وده بيكون عرقان لوحده من غير ما الشمس تلمسه اصلا وكأن جسمه
بيتحجج اصلا وكانه هدية قرف للي جنبه بعتهاله الحر والدنيا مع بعض
بيبقى عامل زى الكتكوت المبلول وتلاقي الفلوس ملزقة مطرح ايده عرق
ومش هاكلمك بقي علي الريحة عشان لو بتاكل وانت بتقرا دلوقتي ولا حاجة
................................................

الشخصية السادسة : براحة شوية على مهلك يا اسطي :

ده بيبقى عنده حق بصراحة وبيكون متوتر طول الطريق من السرعة حتي ولو علي 90 بس ويقعد يهز
في رجله كأن هو اللي سايق وطول الطريق يقول "استر يارب"
وتبقى مصيبة لو انت كنت قاعد جنبه يوترك ويتعب اعصابك وتبقى مصيبة اكبر لو كنت يوميها رايح تمتحن
...............................................

الشخصية السابعة : بسرعة شوية يا اسطي ورانا اشغال :

وطبعا بيرد الاسطي عليه "هي الدنيا هتطير ؟ " او " يعنى انط فى العربيات " وده بيكون متوتر جدا زي
اللي فات بس بيبص في الساعة كل 3 دقايق بيكون ميعاده فات او محاضرته
فاتت من فترة وهو قاعد علي اعصابه ومش طايق شخصية "براحة شوية يا اسطي"
وغالبا ما يحدث الصراع الكوني بي شخصيتين "بالراحة شوية يا اسطي" و "بسرعة شوية يا اسطي "
وتكون النتيجة ان الاسطي بيقفش علي الاتنين { تييت ام دى شغلانه ماتيجوا تسوقوا انتو احسن !! }
................................................

الشخصية التامنة : الدحاحة جدا :

بتتهز طول الطريق وهي بتسمع المنهج كله على صوابعها كأننا في كتاب
وتروح تقفل الامتحان في خمس دقايق
ولا تهتم بالجو المحيط حتي ولو الدنيا اتقلبت ع الطريق هي مش هتنتبه
برضه ولا تستغرب لان الدح واخد مكانه معاها قوي والكتاب "اهم صديق ليها دلوقتي "
................................................

الشخصية التاسعة : راجل بيشتم في الحكومة :

وبيكون ماسك جرنان وتانيه مرتين كده ومركز علي مقالة معينة ويبدأ الحوار
بضحكة سخرية { هاهه اما اولله العظيم تلاته ياجدع ..... } وكلمة "شوفت
او بيقولك"
ويديك صواريخ عن الحكومة ويطلع عنيهم شتايم
والشخصية دى مشهورة اوى اليومين دول
...............................................

الشخصية العاشرة : الراجل اللي في حاله :
وده بيقعد جنب الشباك دايما ويبص برة الميكروباص ومالوش دعوة باللي جوة الا ساعة لم الاجرة يطلبها التباع
................................................

الشخصية الحادية عشر : فيلسوف الميكروباص اللى بيفتى فى كل حاجة واى حاجة :

وده دايما بيقعد جنب السواق يقعد يناقشه في مشاكل الحياة او يفتي في
حاجات عن المرور والرخص والكمين وكده واي قصص واي كلام بيتقال يا
عم الحاج قدام واغلبها بتكون فشر واولها بيكون " انا قريبي لواء سابق وبيحكي ويقول ...."
وينتهى بجملة " ادى اللى خدناه من الثورة "
وكلام من النوع ده
................................................

الشخصيه الثانية عشر:الرجل المهم الي يفضل يتكلم طول السكه في الموبايل:
و يصدع الناس كلها وبأعلى صوت عنده و ياسلام لوكان بيتكلم في مشكله عائليه تلاقي ال 14 راكب ممكن يقولوله حلول ويردوا معاه
................................................

اكيد الكل بيشوف الفيلم الهندى ده وهو رايح او راجع من الشغل او الجامعه كل يوم

[╯ Princess ╭]

ههههههههههههه

طب والله صح

كلهم في الميكروباص فعلا

تسلم ايدك

[aya1994]

اه والله فعلا بتحصل معايه كل يوم وانا مروحه
بس افضل قعده متنحه وعماله اضحك علي منظرهم والا لما يدخلو في السياسه بيبقه يوم كوميدي
ويتخنقه ويكلو في بعض ههههههههه
تسلم ايدك

[طمطم]

شكرا ع ردك يا قمر

[طمطم]

تسلمى ع ردك يا قمر

[Jockey Zahra]

ههههههههههههههه فعلا والله
روووووووووووووعه بجد حضرتك .. تسلم ايدك ..
اتمنى لكى المزيييييييييييييييييييييييد






J0CkEy

[طمطم]

ميرسي لمرورك وردك الكريم

[مصرية وبحب بلدى]

عندك حق والله ياقمر
هههههههههههه
ودة فعلا اللى بيحصل

[loloy]

هههههههههههههههههههههههههههه
يسلمو ياقمر
تقبلى مرورى

[مصر فوق الجميع]

هههههههههههههههههه
مرسى كتييييييير