::: فعاليات المنتدى :::

أهلا وسهلا بك إلى منتديات بنات مصر.
أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.

آخر 12 مواضيع
شــــوية شـــوق
الكاتـب : عاشق ولهان - آخر مشاركة : SaMa. - مشاركات : 6 -
سوف أعلن تمردي
الكاتـب : شاعر الحب الحزين - آخر مشاركة : SaMa. - مشاركات : 8 -
ما بين !
الكاتـب : ahmed 22 - آخر مشاركة : فصيح - مشاركات : 4 -
مفيش حد والا اصدقاء
الكاتـب : اميره الاميره - آخر مشاركة : SaMa. - مشاركات : 4 -
[درس] خطوات بسيطه لتحويل صورتك لبورترية مرسوم بالرصاص باحترافية
الكاتـب : JUST AHMED - مشاركات : 7 -
منوعات حلوه
الكاتـب : اميره الاميره - آخر مشاركة : ايتلوي - مشاركات : 8 -
اتعلم من الدنيا ...
الكاتـب : SaMa. - آخر مشاركة : القبطان جوو - مشاركات : 6 -
عند الرحيل .. بقلم مهيب
الكاتـب : مهيب الركن . - مشاركات : 17 -
سجلو اسمي
الكاتـب : واد حبيب - آخر مشاركة : اميره الاميره - مشاركات : 6 -
إنسان
الكاتـب : فصيح - مشاركات : 20 -
حبيبتي وبس
الكاتـب : واد حبيب - آخر مشاركة : اميره الاميره - مشاركات : 13 -
اللي ف مرايتي
الكاتـب : د/ عبد الله - آخر مشاركة : Lamees - مشاركات : 16 -

إضافة رد
 
LinkBack أدوات الموضوع انواع عرض الموضوع
قديم منذ /02-24-2012, 08:20 PM   #1

موقوف
 

 رقم العضوية : 49837
 تاريخ التسجيل : Jun 2010
 المشاركات : 241
 النقاط : Sofey will become famous soon enough
 درجة التقييم : 62
 قوة التقييم : 0

Sofey غير متواجد حالياً

أوسمة العضو
افتراضي قعدتي يا حبيبتي ع الفيس الكلام للجنسين

يااااااارب بقى ارزق كل البنات بالزوج الصالح ..
مش علشانهم.. بس عشان نرتاح شوية من كمية الاستاتيوس اللى مليانة ادعية بام الزوج الصالح
بصراحة حاجة عجيبة جدا .. افتح الفيس الاقى 95% من البنات عمالين يدعو بالزوج الصالح ..

ياستى يعنى مينفعش تدعى فى سرك .. واية كمية الادعية دى .. بجد من كتر الادعية زهقتونى بصراحة..
الدعاء حاجة حلوة واكثروا من الدعاء .. بس انا خايفة للراجل يزهق فى الاخر وميجيش بعد كل ده !


حاجة عجيبة لما تلاقى كل البنات كدة .. لا مش كدة وبس ده غير كمية الكلام المنقول ..
كلـــــه منقول ..
وما بين ال280 بنت اللى عندى .. تلاقى 8 ,9 بيقولوا نفس الكلام بنفس النص.. كلها بصراحة ياما عبارات حب وكلام فارغ .. ياما عبارات دينية وادعية دينيه تخنق من كتر التكرار
وكله بينقل من بعضه


والعجيب بقى انك تبقى عارف وانت بتقرا الكلام ده .. ان الكلمات دى عملت حالة مزاجية عالية اوى لصحابها .. وجت على هواه .. او جت على الجرح ..
حاجة تخليك تحس بلخبطة فى احشاءك الداخلية وانت بتقرا الكلام ده .. عجيب عجيب كلام حلمنتيشى حلزونى لولبى يلف يلف على سلسلة المراهقين والعيال الرومانسية الفاضية
وكل ده كان بسبب واحد ابن حلال كتب كلمتين حلوين .. وعينك متشوف الا الضوء .. يطير كلامه كله بسرعة الصواريخ الروسية على كل الجروبات والبيدجات .. وكله بينقل من بعضه .. وكله الكلام جاى على هواه ..


لا وكله كــــــــوم .. والبنات التانية دى كوم تاانى
تلاقى البنت نازلة انزحة فى نفسها .. وعلى نفسها برضة .. قال اية :" ياجماعة انا مش مرتبطة بقى كفاية اشتغلات .. سنجل وافتخر .. انا انثى ليست ككل النساء .. انا فتاة لا انحنى لمعرفش مين .. انا .. وانا .. وانا ..

وتلاقى اصلا البنت دى ولا مرتبطة ولا حد بيعبرها .. يعنى بتشتغلنا وبتشتغل نفسها

بنات عايشة الدور .. كل اهتمامتها الحب والكلام الرومانسى ..

ولو افترضنا ان كل ده دليل على رومانسية البنت وانها فعلا معجبة بالكلام ده ومقتنعة بيه .. تيجى تبص كدة وتلقى نظرة على ارض الواقع تلاقى عكس الكلام ده كله

لا البنت رومانسية على ارض الواقع
ولا الزوج الصالح ده موجود اصلا
ولا الاتنين رومانسين ولا حاجة
ولو متجوزة حياتها زى الزفت وبكرة تطلق
ولو مخطوبة قارفة خطيبها ومطلعة عنيه
ولو مرتبطة قارفة الواد برضة وهو كمان بيشتغلها
يعنى كله بيشتغل كله .. وكله بيضحك على كله


واصحاب العبارات الدينية والادعية الجميلة .. دول بقى عايشين حالة من صفاء النفس فى لحظة مش لاقين كلمة توصفها .. لكن ليه تتعب نفسها .. ما الكلام كله مكتوب على الجاهز والراجل ابن الحلال كاتبه عشان يتوزع
فتلاقى الواحدة من دول نازلة ادعيــــــة .. بأى حاجة بقى
تدخل الجنة .. ولا تتجوز .. ولا تروح تعمل عمرة
المهم انها تلاقى اللى يعبر عنها وخلاص ..
اهى حاجة تشغل بيها وقت فراغها وتملا بيها الفيس بوك وترضى بيها العاطفة الايمانية الجميلة اللى نطت عليها

والاخوات المتحبات فى الله على طول رد الفعل الطبيعى جدا : أميـــــــــــــــــــن

طيب يا ستى اللهم ما امين ..


بس كل ده .. كان على الهادى اوى .. لان فى بنات تانية نازلة ادعية بشكل رهييييب .. عمالة تدعى بحرقة .. يارب انا بحبك اوى اوى اوى .. يارب سامحنى .. يارب اكرمنى بقى .. ياااااااارب يااااارب ..
ونازلة دحححححح وكانها بتسمع نشيد ..
وبصراحة المشكلة انك ممكن تكون عارف الشخصية دى على الحقيقة
وشتان بين الواقع والفيس بوك
وتلاقيها على الفيس بتشتغلك اوى وعايشة الدور المثالى ..
والناس وراها يدعولها .. ربنا يكرمك .. ربنا يكملك بعقلك
كل ده وانت قاعد على جهازك تتفرج .. وتبقى عارف اوى ان الشخص ده ذكى جدا وبيعرف يشتغل الناس
مش عارفة اية لزمة الاشتغلات دى و الرياء ده !


ده كله كان فى الركن البعيد الهادى
تعالى بقى على الركن التانى حبايب قلبى دول
البنات اللى نازلة اغانى رومانسية
عمالة تكتب فى الاغانى وكأنها بتقولك .. ها .. حفظاها مش كدة ؟!
ياااااا ربى
المشكلة مش فى كده .. المشكلة ان كلمات الاغانى اصلا تعبااااااانة جداااااا .. متبقاش عارف بصراحة اية مناسبة الكلام ده

شوية تلاقيها تكتبلك اغنية رومانسية كلها كلام رقيق وعاطفى
وشوية تكتبلك اغنية عن الغدر والخيانة
وشوية تقولك حاجة بين الاتنين
كل ده وانت عارف برضة ان البنت دى مش مرتبطة ولا حاجة .. دى بتسلى نفسها

وما عليك غير انك تقرا الكلام على السريع كدة لدرجة انك تحس انه مش مظبوط وانك مش فاهم حاجة .. تقوم تقراه مرة كمان و تفتكر فجأة انه كلمات اغنية لعمرو دياب !

ده غير الفيديوهات العجيبة اللى بنشوفها .. ياما فيديوهات لاغانى .. لاما لمواقف مضحكة ومواقف عجيبة .. ياما ندوة او حلقة من برنامج اوجزء من فيلم

كل ده شغال مقلناش حاجة .. بس الفكرة انك تلاقى 13 واحد عندك عامل شير!

وبالصدفة كدة وانت بتتجول فى الهوم تشوف اى بيدج منزلة استاتيوس ولا صورة .. وتيجى تشوف كومنتات الشعب عليها .. وتكتشف الحقيقة المرة ان الشعب لم تمر عليه ابدا كلمة التربية ..
بصراحة مستوى منحط جدا .. ناس نازلة شتيمة فى بعض .. طالما انت مختلف معايا فى الرأى يبقى تتشتم ..وتلاقى اللى بيأيدك ويقولك شجاع يابنى برافو عليك !

وما على الاصوات التانية الا انها تخرس .. حفاظا على ماء الوجه اذا كانت ناس محترمة.. او ممكن يبقى واحد برضة من نفس العينة .. يقوم رادد عليك وفى الاخر تلاقى البيدج اتقلبت فجأة موقف عبود!
وللاسف دلوقتى بتلاقى ان السمة العامة جدا فى اى بيدج ان الاغلبية لسانهم طويل

وكله بيشتم بعضه .. وتلاقى اللى بيشتم ده اصلا بيرد على موضوع او نقاش بيدور حول الديمقراطية واحترام اراء الاخرين !
وطبعا مش هنسى الوقت الجميل اللى احنا فيه ده !
تلاقى سلسلة متواصلة وهجوم عنيف من الكل .. على الكل
كله بيهاجم كله

العلمانين نازلين شتيمة فى الاخوان والسلفين ومش عايزنها دينية
والسلفين مُصريين برضه على موقفهم .. فعادى جدا انك تلاقى واحدة اسمها على الفيس ..
سلفية وافتخر
مصرية سلفية
مسلمة سلفية

ومش غريب انك تلاقى من المسلمين المتشددين ما يكفر الاخر ..
ودول عايزينها اسلامية .. ودول عايزنها مدنية وعلمانية ..


ومازالت الاغلبية الصامتة تشاهد هذا الصراع فى صمت ولسان حالها يقول : ربنا يشفى

ومش غريب برضة انك تلاقى صراع على المرشحين للرئاسة
وسبحان الله .. غالبا بشوفهم متشددين .. ميفرقوش كتير عن اى بلطجى واخد كل حاجة عافية
فعادى جدا انك تلاقى واحد بيؤيد البرادعى .. حلم حياته ان البرادعى يبقى الرئيس
ويفضل يشكر فيه لدرجة انك تحس ان البرادعى لو مبقاش رئيس الراجل ده هينتحر او يولع فى نفسه!

وكذلك الحال لواحد مش شايف رئيس لمصر غير حازم صلاح ابو اسماعيل !


كل دول محسوبين علينا مثقفين ونازلين تأييد فى المرشحين .. ياخوفى من الناس دى لتتحول لبلطجية اثناء الانتخابات .. وفجأة تلاقى ان ايمن نور كسب الانتخابات يقوموا انصار البرادعى وحازم صلاح يولعوا فى البلد!

مش بعيد برضة تستفزك واحدة او واحد عندك فى الفريندس .. اذا كانت علمانية و شايفة ان الاخوان والسلفين متشددين .. فتنزلك هجوم عليهم .. وعادى لو انت عارف انها مسلمة .. بس متحررة متفرقش كتير عن اى حد غير مسلم ..
وتقعد تقولك متشددين .. والاسلام مش كدة .. ودول بيسيئوا للدين ..
المهم وانت بتقرا كلامها اللذيذ ده .. تبقى نفسك تقولها مايمكن انتى اللى متسيبة !
وخصوصا لو عارف انها مش محجبة !!!


وبنفس الكره اللى بتحمله الاخت الفاضلة دى للاسلامين "والمتشددين " على حد وصفها
هو نفسه الكره اللى بيكنه اى واحد للشيخ حازم صلاح !
تلاقى الناس نازلة فيه شتيمه .. بمنتهى السفالة .. سواء كانوا اعلامين او ناس من عامة الشعب!
ونازلين شتيمه بطريقة تثير التسأؤل فى نفسى " ياترى الناس دى ليه مواخده لسانها اوى كده على الشتيمة؟!"

وعلى الجانب الاخر .. ترى من يسب ايضا البرادعى ويصفه بالعميل والخائن ..وكذا وكذا ...الخ الخ

ولو يعرف الناس مدى عظمة الاثم اللى بيرتكبوه بسبب هذا السب واللعن مافعلوا!!


والسؤال الان : اما علماء الدين والشيوخ الافاضل وطبقة العلماء واهل العلم .. والصفوة من الناس يتشتموا .. ليكم خير فى مين نفسى افهم؟!!

ولعلى افتكرت حاجة دلوقتى وانا بكتب النقطة دى بخصوص الصفوة من الناس
افتكرت حاجة ايضا عجيبة فى زمن العجب ..
تلاقى ناس لذيذة اوى بتنقط سكر جاية تطل عليك وترسم على وجهك ابتسامة وضحكة تبين كل سنانك

اما تشوف واحد غير مؤهل والناس رفضاه بنسبة 99% وتبقى عارف اوى حجمه ومكانته فى وسط الناس والمجتمع .. كل ده وتلاقيه برضه جاى وبكل بجاحة يقولك انا هرشح نفسى للرئاسة !
احم احم .. على فكرة انا مقصدش عمنا مرتضى ولا الاخ الميكانيكى عشان بس محدش يفهمنى صح !!

بس بصراحة منتهى الاستخفاف بالشعب .. ولو احنا كنا شعب عدل مكنش حد من الناس دى جه يستفزنا . واللى يقولك ديمقراطية ومن حق اى مواطن يرشح نفسه والكلام الفاضى ده ..
هقوله برضه منتهى الاستخفاف
اما واحد اثبت فشله فى رئاسة مؤسسه صغيره .. واتعامل بالحذاء (فاكرين مبارة الحذاء اما قلع الجزمة لمعرفش مين)
وكل الشعب عارف انه عصبى ومخه تعبان .. ويجى يقولك ارشح نفسى .. ده على اساس انك جدير بالمنصب .. وانك فعلا شخصية ناجحة وانسان عاقل !!

ولا اما تلاقى ميكانيكى عايز يرشح نفسه للرئاسة !
مع احترامى لهذا الشخص وهذه المهنة الشريفة .. ولكن برضة منتهى الاستخفاف بالشعب ..

ولا عزاء لاصحاب الشهادات العليا .. ولا عزاء لمفكرى وعلماء الامة!



***
ومازلت جالسه على الفيس بوك اترقب فى صمت ما يجرى عليه .. وما وصل اليه الحال ..
ومن ضمن ماوصل اليه الحال بقى

انك تلاقى صفحة مشهورة جدا جدا واتحدى ان الاغلبية مشتركين فيها
وهى صفحة اجعل النبى صلى الله عليه وسلم رقم واحد على الفيس بوك .. انشرها بقدر حبك للنبى !!

صفحة مشهورة جدا.. والقائمين عليها اذكية جدا بصراحة .. عرفوا يجمعوا اكبر عدد من الناس باسلوب ذكى جدا .. ودخلوا من النقطة الصحيحة ..وهى نقطة الدين .. وطبعا مع حالة الضعف اللى احنا عايشين فيها .. انتشرت الصفحة بسهولة وتوغلت اللى الاعماق !
وتعليقى على الصفحة دى هو رائى فيها من البداية .. من اول ما قريت الاسم .. حسيت ان الاسم مستفز وفعلا استفزنى .. عشان كدة بسأل.. يعنى اية الرسول يكون ليه صفحة على الفيس؟!
وازاى اعمل صفحة للرسول واقارن اعضائها باعضاء صفحة ليدى جاجا؟!!!!
وازاى اروج لصفحة عن الرسول ..و هل الرسول اصلا بحاجة اللى الصفحة او الى هذا الترويج؟!!
وازاى اخلى حبى للرسول وسيلة لنشر صفحة على الفيس؟!!

كلها تساؤلات دارت جوايا والاجابة عليها استفزتنى .. لان مالهاش اجابة اصلا!

ولو ركنت احساسى ومشاعرى الشخصية دى على جنب .. وجيت اسأل .. ماهو رايك فى هذه الصفحة؟.. وهل هى فعلا جديرة بأن تكون بأسم الرسول عليه الصلاة والسلام ؟!


للاسف وانا بجاوب على السؤال .. اشتركت فى الصفحة .. وعملت لايك .. وتفحصت فيها .. وكانت النتيجة كالاتى :
اولا الصفحة غير جديرة على الاطلاق بأن تنال هذا الشرف.. لان: القائمين عليها فى رأى انهم مثال سىء وصورة سيئة للمسلم .. وليس لديهم اى علم شرعى او ثقافة عالية ومجرد حماس بلا فائدة
ولن انسى الادمن اللى كان كل هوايته هو السب فى الشيعة ونشر كل فيديوهاتم وفضائحهم ومطاردتهم بالشتيمة والسب واللعن!
ولن انسى الادمن اللى كان بيشعل الفتن الطائفية ويولع الدنيا بين السنة والشيعة فى الخليج ..

ولن انسى الادمن اللى كتب: " بعد وصولنا 4.444.444 عضو فى حب رسول الله .صلي الله عليه وسلم. يا ترى حبك لرسول الله خلاك تجيب كام صديق للصفحة؟ ..يا ترى حبك لرسول الله هيخليك دلوقتى تعمل شير للصفحه وكمان الاهم هيخليك تبعت لينك الصفحه لكل الاون لاين عندك !! وان شاء الله كل عضو يشترك في الصفحه لك مثل اجرة بأذن الله"


سبحان الله !
الادمن خلاص كل اهتمامه انه ينشر الصفحة .. لا ومش بس كده .. ده خلاص اداك الاجر والثواب ولو جبت ياسيدى واحد هنديك 10حسنات هدية !


والادمن اللى كان بيقول: " نريد من كل الصحف والقنوات الاخبارية العربية والعالمية ان يكتبوا عن صفحتنا كـ أنشط صفحة في موقع الفيس بوك علي الاطلاق ..اردنا ان نكون رقم 1 من حيث عدد الاعضاء .. فأبدلنا الله رقم 1 من حيث أنشط الصفحات .. اللهم لك الحمد .. اللهم لك الحمد "

هههههههههههههههه بصراحة انا علقت ساعتها على الكلام ده .. وقولتله سبحان الله دى معجزة !!


والا اللى كاتب : OMG! تسمع عن صفحة
Lady Gaga!
أكبر صفحة على الفيسبوك؟!
صفحة النبي أنشط منها!
صلّى اللّه عليه وسلّم!
44,053,969
like this
430,809
are talking about this

أنتهى Game Over Facebook!
اللّهم أحفظ صفحتنا يا رب!
اللّهم لا يغلقها أعداء الإسلام!”



منتهى السذاجة بصراحة .. مش على الادمنز .. لا علي كل المشتركين فى الصفحة .. انا بعد كل ده طلعت منها اكيد ..
لكن فى الحقيقة مازال الشعب يصير كالغنم وراء هؤلاء
ومازال الشعب مالوش رائ .. وتقوده الشعارات .. حتى بدون فهم وبدون ابداء رائيه فيها!!

ولان المعيز منتشرين اوى على الفيس بوك .. فمفيش مشكلة انك تلاقيهم متجمعين فى جروب تافهة .. او بيدج عبيطة .. وكل واحد على حسب اهتمامته ..

يعنى البنات مثلا تلاقيهم مهتمين اوى بالصفحات الرومانسية واللى بتتكلم عن الحب والجواز وفارس الاحلام
وياسلام بقى لو قريت كلام من اللى قلبك يحبه .. تعملك احلى لايك واحلى شير .. وطول ماهى قاعدة مورهاش حاجة غير الصور الرومانسية والكلام الرومانسى ..

ولو قولنا الكلام الرومانسى ده عادى ..
طيب الصور الرومانسية اوى اللى فيها مناظر ممكن تحرك الشهوة مثلا .. هى البنات ليه مش عارفة انها غلط تتفرج عليها ؟!

مش اقصد اكيد الصور الاباحية .. انا اقصد الصور الرومانسية اللى البنات دايما بتتفرج عليها وبتعملها صورة للبروفايل !



انا كده تقريبا رصدت اهم الحجات اللى جبت اخرى منها .. لدرجة خلتنى اكتب كل الكلام ده
ومش الغرض انى اكتب كده عشان اتريق على الناس او اعيب على تصرفاتهم
اطلاقا .. كل واحد حر فى تصرفاته حتى لو مش عجبة الناس
بس السؤال اللى بسأله لنفسى هو احنا ليه تفكيرنا واصل للمستوى ده؟
وليه اغلب اهتمامتنا حجات ملهاش اى قيمة ؟
وليه البنات بتضيع وقتها فى الحجات دى ؟

ساعات بحس ان التصرفات دى اكبر دليل على الفراغ العاطفى اللى بيعيشه الشباب والبنات
مع حالة من التعطش الدينى الرهيب
مع عدم استغلال الطاقات فى حاجات مفيدة!
مش عارفة ليه بحس ان الموضوع ده محتاج دراسات كتيرة من علماء النفس والاجتماع والمتخصصين !
وهل فعلا ممكن تفيدنا دراسة تقولنا ازاى نستفيد من الفيس بوك .. ويضيف لينا .. بدل ما هو مجرد مضيعة للوقت ؟!


ولننتظر الاجابة ان شاء الله بعد هذه الدراسات .. طبعا فى موسم المشمش



اشكركم على قرائتكم لهذا الرغى
واعتذر اذا مست كلماتى احد .. وكان من المشار اليهم !
تحت شعار اللى على راسه بضحة !




اضافة للموضوع :
الناس اللى معجبهاش الكلام وزعلت اوى كدة ياستى انا مش قصدى ازعلك ولا اتريق عليكى
اعتقد ان الموضوع كان فى قسم الفضفضة .. يعنى اعتبرينى بفضفض مع نفسى ..
اعتقد انى وضحت ده فى كلامى وعارفة اكيد ان الناس مش زى بعضها
اعتبرينى مش عجبنى الحال وبنقده ..







  رد مع اقتباس
قديم منذ /02-25-2012, 01:24 AM   #2

عضو جديد

 

 رقم العضوية : 80506
 تاريخ التسجيل : Feb 2012
 الجنس : ~ بنوتة
 المشاركات : 150
 النقاط : ~&ابتسم لحياتك*$ will become famous soon enough
 درجة التقييم : 50
 قوة التقييم : 0

~&ابتسم لحياتك*$ غير متواجد حالياً

أوسمة العضو
افتراضي

على فكرة الموضوع جميل انا مش قريتوا كلوا بس اصلوا طويل والا برج القاهرة بشحمة ولحمة بس انا قرايت نصوا و هو موضوع حلو وجميل







  رد مع اقتباس
قديم منذ /02-25-2012, 01:29 AM   #3

عضو ذهبي

 

 رقم العضوية : 54948
 تاريخ التسجيل : Oct 2010
 الجنس : ~ بنوتة
 المكان : وطن عربى يضمنا جميعا
 المشاركات : 1,694
 الحكمة المفضلة : يموت الجبناء مرات عديدة قبل أن يأتي أجلهم، أما الشجعان فيذوقون الموت مرة واحدة.
 النقاط : وفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond reputeوفيت حتى انتهيت has a reputation beyond repute
 درجة التقييم : 28140
 قوة التقييم : 0

وفيت حتى انتهيت غير متواجد حالياً

أوسمة العضو
افتراضي

هههههههههههههههههههههه
ناقده متميزه يابنتى اتناول جزئيه كفايه
اول حاجه الادعيه ماهم بيدعو علنى علشان الباقى يدعيلهم برده هههههههههه
شتان مابين الواقع والفيس يمكن لان على الفيس بتكتسبى جرئه اكتر
التناقد فى اغانى او اى حاجه ماهو اى كلام فاضى معقول
الكلام المنقول حاجه تحير اما كلنا بننقل من بعض مين اللى بيألف بقى ويبقى السؤال ليطرح نفسه
اكتفى بكده







  رد مع اقتباس
قديم منذ /02-25-2012, 06:59 AM   #4

موقوف
 

 رقم العضوية : 49837
 تاريخ التسجيل : Jun 2010
 المشاركات : 241
 النقاط : Sofey will become famous soon enough
 درجة التقييم : 62
 قوة التقييم : 0

Sofey غير متواجد حالياً

أوسمة العضو
افتراضي

اقتباس:
المشاركة الأصلية كتبت بواسطة ~&ابتسم لحياتك*$ مشاهدة المشاركة
على فكرة الموضوع جميل انا مش قريتوا كلوا بس اصلوا طويل والا برج القاهرة بشحمة ولحمة بس انا قرايت نصوا و هو موضوع حلو وجميل
:biggrin::biggrin:
طيب هستناكي لما تخلصيه قرايه ع الاسبوع الجاي واسمع رئيك
منوره يا قمر







  رد مع اقتباس
قديم منذ /02-25-2012, 07:01 AM   #5

موقوف
 

 رقم العضوية : 49837
 تاريخ التسجيل : Jun 2010
 المشاركات : 241
 النقاط : Sofey will become famous soon enough
 درجة التقييم : 62
 قوة التقييم : 0

Sofey غير متواجد حالياً

أوسمة العضو
افتراضي

اقتباس:
المشاركة الأصلية كتبت بواسطة وفيت حتى انتهيت مشاهدة المشاركة
هههههههههههههههههههههه
ناقده متميزه يابنتى اتناول جزئيه كفايه
اول حاجه الادعيه ماهم بيدعو علنى علشان الباقى يدعيلهم برده هههههههههه
شتان مابين الواقع والفيس يمكن لان على الفيس بتكتسبى جرئه اكتر
التناقد فى اغانى او اى حاجه ماهو اى كلام فاضى معقول
الكلام المنقول حاجه تحير اما كلنا بننقل من بعض مين اللى بيألف بقى ويبقى السؤال ليطرح نفسه
اكتفى بكده
ما هو واحد بيالف و99 و9 من عشره ف الميه بينقل:biggrin:
حلوه علشان الباقي كلهم يدعلهم:biggrin:
شاكره مرورك الطيب يا قمر
\نورتي







  رد مع اقتباس
قديم منذ /02-25-2012, 07:13 AM   #6

● اسْتثنَآئيَـۂ «

من مبدعى المنتدى

 

 رقم العضوية : 33694
 تاريخ التسجيل : Oct 2009
 العمر : 27
 الجنس : ~ بنوتة
 المكان : آرض الكنـآنه [ مصر ] ..
 المشاركات : 26,018
 الحكمة المفضلة : No More LOVE No More CRYING
 النقاط : ♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute♥..pure has a reputation beyond repute
 درجة التقييم : 1512219
 قوة التقييم : 757

♥..pure غير متواجد حالياً

أوسمة العضو
افتراضي


ههههههههه
ايه يـ بنتي انتي محروقه اوي منهم كدا ليه :d
أهم حـآجه تكوني فضفضتي وخرجتي اللي جواكي بس
عـآمه اللي بيشغل باله باللي بيحصل حواليه بالطريقه دي اكيد هيتعب
كبري دماغكـ اللي يعمل يعمل واللي يكتب يكتب
خدي من واسع ..







  رد مع اقتباس
قديم منذ /02-25-2012, 01:52 PM   #7

عضو فعال

 

 رقم العضوية : 80935
 تاريخ التسجيل : Feb 2012
 الجنس : ~ بنوتة
 المكان : In my dreams
 المشاركات : 356
 الحكمة المفضلة : That's me wlle m4 3agbo 6OOZ feh XD XD
 النقاط : ♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute♥ Roby Cool ♥ has a reputation beyond repute
 درجة التقييم : 3577
 قوة التقييم : 0

♥ Roby Cool ♥ غير متواجد حالياً

أوسمة العضو
افتراضي

ههههههههههههههههههههههه
بجد مش قادره افصل ضحك
شكلك متعقده جامد من الفيس بوك
بس مش عارفه
انا شايفه انه عادى لما اسمع اغنيه تعجبنى او دعاء عجبنى واحطو على الفيس
مش مشكله يعنى

الحاجه الوحيده اللى انا شايفاها مستفزه هى
اقسم بالله انشره خد بالك انت قسمت ولو معملتش شير اتاكد ان الشيطان منعك
ههههههههههههههههههههههههههههههههه
حاجه شلل
ولا الزفته اللى اسمها المزرعه السعيده
لعبه بتعلم التخلف هههههههههههههههههههههه
انامتفقه معاكى فى كل اللى قلتيه الا الجزئيه اللى فوق بس
ويبقى الفيس بوك زى اى موقع
فيه الصالح وفيه الطالح







  رد مع اقتباس
قديم منذ /02-25-2012, 02:19 PM   #8

موقوف
 

 رقم العضوية : 49837
 تاريخ التسجيل : Jun 2010
 المشاركات : 241
 النقاط : Sofey will become famous soon enough
 درجة التقييم : 62
 قوة التقييم : 0

Sofey غير متواجد حالياً

أوسمة العضو
افتراضي

اقتباس:
المشاركة الأصلية كتبت بواسطة dr.pharma مشاهدة المشاركة
ههههههههه
ايه يـ بنتي انتي محروقه اوي منهم كدا ليه :d
أهم حـآجه تكوني فضفضتي وخرجتي اللي جواكي بس
عـآمه اللي بيشغل باله باللي بيحصل حواليه بالطريقه دي اكيد هيتعب
كبري دماغكـ اللي يعمل يعمل واللي يكتب يكتب
خدي من واسع ..
مين قال اني محروقه:biggrin:
انا متغاظه بس من اللي بيحصل اهو قولت الاقي اي حاجه افضفض بها ف القسم:198:
واللي ميشغلش باله من اللي بيحصل حوااليه يبقا ايه ؟اناني صح:biggrin:
والله كبرت دماغي لحد ما بقتش قادره تدخل وانا داخله الباص:biggrin:
شاكره مرورك الطيب يا قمر
نورتي







  رد مع اقتباس
قديم منذ /02-25-2012, 02:21 PM   #9

موقوف
 

 رقم العضوية : 49837
 تاريخ التسجيل : Jun 2010
 المشاركات : 241
 النقاط : Sofey will become famous soon enough
 درجة التقييم : 62
 قوة التقييم : 0

Sofey غير متواجد حالياً

أوسمة العضو
افتراضي

اقتباس:
المشاركة الأصلية كتبت بواسطة ♥ Roby Cool ♥ مشاهدة المشاركة
ههههههههههههههههههههههه
بجد مش قادره افصل ضحك
شكلك متعقده جامد من الفيس بوك
بس مش عارفه
انا شايفه انه عادى لما اسمع اغنيه تعجبنى او دعاء عجبنى واحطو على الفيس
مش مشكله يعنى
الحاجه الوحيده اللى انا شايفاها مستفزه هى
اقسم بالله انشره خد بالك انت قسمت ولو معملتش شير اتاكد ان الشيطان منعك
ههههههههههههههههههههههههههههههههه
حاجه شلل
ولا الزفته اللى اسمها المزرعه السعيده
لعبه بتعلم التخلف هههههههههههههههههههههه
انامتفقه معاكى فى كل اللى قلتيه الا الجزئيه اللى فوق بس
ويبقى الفيس بوك زى اى موقع
فيه الصالح وفيه الطالح
طب احط اغنيه ليه اخلي كل اللي راح واللي جاي ياخد ذنوب :198:
اخيرا لقيت حد اتفق معايا ف حاجه:biggrin:
دوم الضحك يا رب
شاكره مرورك الطيب يا قمر\
منوره







  رد مع اقتباس
إضافة رد

الكلمات الدلالية (Tags)
للجنسين, الفيس, الكلام, حبيبتى, قعدتي


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
اسئــــلة للجنسين ياريت تاجبوا بصراحه وفيت حتى انتهيت قسم مناقشة المواضيع المتداوله والمنقوله 16 02-17-2012 03:54 PM
طرق التخلص من حبوب الوجه للجنسين ليونيلمار مواضيع عامة - ثقافة عامة 0 08-11-2010 06:09 PM
ماسنجر الفيس بوك للشات مع اصحابك ع الفيس بوك وحل مشكلة الشات رائع وبسيط Mir0o برامج كمبيوتر - برامج نت - تحميل برامج 2019 0 03-10-2010 05:55 AM
تحذير عن الفيس بوك تقرير كامل عن الفيس بوك والجاسوسيه خالد ابو النجا مواضيع عامة - ثقافة عامة 2 02-25-2010 02:44 AM


الساعة الآن 11:38 AM


Powered by vBulletin® Version 3.8.7
Copyright ©2000 - 2019, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w