حلقات برنامج ( مورشو في الشارع )

[morshooo]

بسم الله الرحمن الرحيم

اهلا ومرحبا بكم

وأولى حلقات برنامجكم

morshooo فى الشارع

البرنامج باختصار شديد هيكون حصرى لمنتدى

بنات مصر

ولاول مرة فى عالم المنتديات هعمل لقاءات حصريا

مع المواطنين وفى قلب الشارع المصرى

هنزل بنفسى واعمل لقاءات

مع المواطنين :biggrin:

محدش يستغرب البرنامج فكرتة كدا مش بقولكم برنامج حصرى :079:

تعالو بقى نشوف اول حلقة هتكون عاملة ازاى

عشان تعرفو نظام البرنامج

الحلقة الاولى هتكون بعنوان

( مصر قطعة من أوربا )

فى الفترة الاخيرة كان فى شائعات كتيرة جدا عن مصر

وانا باكد انها شائعات وفى حلقتنا النهاردة هثبتلكم كلامى دا

ومش من عندى والا عن طريق اشخاص مأجورين زى البرامج الاخرى

تعالو نشوف مع بعض اللقاءات من قلب مصر ومن الشوارع المصرية وياترى اتقال فيها اية ؟

ودلوقتى اعزائى المشاهدين معانا شاب مصرى هيحكلنا عن تجربتة الى مر بيها

اتفضل عرف المشاهدين عليك وكلمنا عن تجربتك

انا شاب مصرى كان حلمى اسافر برا وفعلا قررت انى اسافر الموضوع مخدش منى اى وقت

طلعت كل اوراقى بمنتهى السهولة طبعا لانى عايش فى مصر محدش قالى اقف طوابير

والا فى تعقيد فى خروج الاوراق زى ما الناس بتسمع تقريبا خلصت بمنتهى السهولة

حتى لما طلعت على المطار لقيتهم بيرحبو بيا جدا وخلصو كل الاجراءات فى ثوانى

وكانت لفتة جميلة منهم لما طلعت على الطيارة واخدونى قعدونى جنب الطيار

هى دى مصر الحقيقية وياريت بقى نبطل كدب شوية ونكلم عن مصر بمنتهى الصراحة

شكرا ليك

طبعا بعد الحوار الجميل مع الشاب الجميل دا

الـــ اعلنها صريحة وقال ياريت بقى نبطل كدب ونكلم عن مصر بمنتهى

الامانة واضح انة شاب أمين جدا

تعالو نشوف الحوار دا كمان مع الراجل المحترم الـــ هيقول كلام مهم جدا

عن المرور والى بيحصل وبنسمعه من الناس ودائما بتشتكى من المرور

اهلا بيك عرف المشاهدين بيك وقولهم اية حكايتك مع المرور

اهلا بيك واهلا بالمشاهدين انا سمعت كتير جدا من المواطنين ان يوم المرور

بيكون بسنة وبيطلع عنيهم انا احب اقولهم حرام عليكم بقى انتو اية عايزين تطلعو مصر

بشكل وحش لية انا لسة جاى حالا من المرور مقابلة مفيش احسن من كدا الناس متعاونة

جدا مع المواطنين والى بيعمل الورق بتاعى مستحيل مستحيل مستحيل يقبل هدية منى

دا انا حتى ببص بالصدفة على درج المكتب بتاعه لقيتة قافلة وبقفل كمان حاولت افتحة

عشان احطلة حاجا زى ما الناس بتقول معرفتش بجد والله حرام حرام حرام

اخر حاجا حابب اقولها انا المخالفات كلها طلعت مظبوطة وسليمة وكان ناقص

يدونى مع الرخصة هدية

ياريت بلاش كدب بقى وارحمونا ارحمونا مصر مصر حرام عليكم

خلاص ياعم الحاج شكرا لوجودك معانا

اهو يا جماعه مصر فعلا قطعه من اوربا ياريت نبطل نهول شوية ونقول الحق بقى

ودلوقتى هنشوف لقاء مهم جدا مع ينت جميلة

هتكلم معانا عن حاجا مهمة جدا وهى معاكسات الشباب للبنات والتحرش بيهم
زى ما بنسمع ان دا فى مصر

اهلا بيكى فى برنامجنا

اهلا بيك انا احب اوجة كلمة للناس الكدابة واحب اقول

ان انا و صحباتى دائما بننزل نتفرج على الملابس والاكسسوارات عمرنا ما شوفنا زحمة

والا تحرش والا حد بيعاكسنا احنا يا جماعه فى مصر انا لو فى شاب شافنا واحنا ما شيين

عايزة اقولك ان عينة ما بتتحركش من على الارض لحد اما يتاكد اننا

خلاص مشينا من قدامة الجو كمان جميل جدا الهواء جميل مفيش اى حاجا

تضايقنا المواصلات فاضية وسهلة وجميلة

اخيرا احب اوجة رسالة للناس الكدابة واقولهم اتقوا الله وقولو الحق احنا

يا جماعه فى مصر فى مصر بلد الأمن والامان ال تحرش ال

شكرا ليكى اختى الغالية

اية يا جماعه معقول الكلام الى كنا بنسمعه دا عن مصر بجد حرام عموما

تعالو نشوف اخر لقاء هيكون عن اية سؤالى للشباب

هل فعلا عند تخرج الشباب مش بيلاقو شغل زى ما بيتقال ؟

اهلا بيك فى البرنامج وياريت تقولنا حابب تقول اية عن مصر

اهلا بيك وبالمشاهدين

انا هقول كلمتين وربنا يشهد على كلامى ياريت الناس الى حابة تشوة صورتنا

يبطلو الكلام دا لان احنا خلاص فوقنا انا هكلم عن مشكلة كان الناس دائما تكلم عنها

وهى البطالة ازاى مصر فيها بطالة واحنا الشغل قدامنا فى مصر يا سادة الطالب بيخلص

كلية من هنا تانى يوم بيختار يشتغل اية وفين وليك حرية الاختيار حتى لو عايز تشتغل

فى امريكا مصر بتسهلك كل الامور والاجراءات صدقونى يا جماعه مصر بخير

مصر بخير ارحمو مصر ارحمو مصر .

شكرا على حماسك وكلامك الى بيدل على حبك لبلدك

وبكدا بتنتهى حلقتنا النهاردة

من برنامجكم

morshooo فى الشارع

وكان عنوان حلقتنا

مصر قطعه من اوربا

اخيرا لو اى حد سمع الكلام دا من اى مواطن مصرى اتاكد

ان انتا اكيد اكيد مش فى مصر :079:

تحياتى للجميع

انتظرونى والحلقة الثانية

ولقاءات خاصة من قلب الشارع المصرى

^_^

ملحوظة : جميع اللقاءات من وحى خيالى واكيد الحكايات دى ممكن اكون أتأثرت بحكاية او اغنية او حتى بموقف حصلى انا شخصيا .

[سارة بنت مصر]

مشكوووووور والله يعطيك الف عافيه

[عاشقة الهدوء]

حلقه جميله جدا ياموروشو وأتقنتها بشكل جيد وخلينا نحلم

يا أحمد فيها ايه لما نحلم أن مصر فى يوم من الأيااام ينصلح

حااالها للأحسن أن شاء الله وتبقى أحسن من أوربا ميت مره

بس أهم حاجه نمشى صح وبما يرضى الله

والناااس كلها ينصلح حالها وتفوق بقى وكل شىء فى خلال

سنين يبقى زى الفل وربنا موجود وقادر على كل شىء

بحييك على الحلقه يا أحمد موووفق دااائما أخى ربنا يحفظك

وأجمل تقييم

[MĺŔǾ]

ههههههههههه جامده خالص خاصه بتاعه المرور دي حقيقي احنا قطعه من اوروبا ههههههه

ثانكس للحلقه الجميله دي ومستنيين الحلقه اللي جايه

[حنـــــون]

بصراحه برنامج جامد
الفكره جديده وانت عاملها
بشكل جميل جدا
ولقاءت كتيره وكلها موجوده
فى حياتنا فعلا
تسلم يامورشو مميز دايما

[countess]

ههههه

حلقه جامده جداااا

ميغسي يامستر

[SiLver Spectra]

حلوة الحلقة يا مورشو
و اول موقف حلو ,,ممكن تصدقه لغايه ما قعد جنب كابتن الطيارة )

في انتظار حلقات جديدة

[بقــايا أنثى]

ههههههههههههههه يا راجل قول كلام غير دا
يمكن مصر بس فى كوكب المريخ ...؟ يمكن بقا
عمتا يا مورشو الحلقه بجد هايله
وعجبتنى اوى فكره الراجل ال راح وقعد جمب الطيار دى
هههههههههههههه بجد مافيش واجب احلى من كدا
بعيدا عن خفه دم الحلقه بجد هايله
فعلا بنتمنى كلنا نشوف حاجات كتير اوى بتتغير
يمكن تكون الدعابه سلاح للمصريين فعلا لتغيير واقع
وصدقنى احنا جوانا احسن كتيييييير جدا من اى حد فى الدنيا
ودا بكلام نبينا وكلام ربنا سبحانه وتعالى مش كلامى انا
وعلى كل حال الحمد لله اننا مصرين فعلا
بس المره الجايه ابقى قول للشاب ال بيحكى قصه الطياره يبطل يلعب فى الكلاكس
عشان التلوث الضوضائى ^_^
ميرسى مورشو ومستنيه الحلقه القادمه ان شاء الله

[تناهيد الهوي]

اشكرك على الجهود المبذولة

[ღ Gի๐sτ ღ]

ههههههههههههههه
الفكرة حلوة وياربي يجى اليوم اللى نبقى احسن بلد في العالم فيه
احان المفروض اوروبا كانت تبقى قطعة من مصر مش العكس
بس النصيب بقى ^_^

تسلم ع الحلقة يا احمد