الست شوشو وشغالاتها على مر السنين مسلسل

[emyemz]

زمان كان ما فيش حاجة إسمها
أزمة في الشغالات
بس كانت الشغالات
أنواع

وكانت الشغالة من دول تفرح لما تسيب القرية علشان تشتغل في البندر
دي حاجة
وكمان علشان تساعد أهلها
دي حاجة تانية
وكمان علشان تجيب دهب وتجهز نفسها
ودي حاجة تالتة
بس ياترى
أزاي كانت بتتعامل مع البيت اللي هي فيه
وازاي أهل البيت بيعاملوها
هنا بتختلف القصص
بس حكايتنا هي
أن فيه واحدة ست كمل
عدى عليها على مر السنين
شغالات
واللي يهمنا
نعرف أيه اللي كان بيحصل معاها

الست شوشو كانت بتشتغل في بلد خليجية
كانت حكيمة أمراض نساء وولادة
وكانت مديرة محجر بتحضر عمليات
وتقوم بولادات
ولما كان في الفترة دي
الستات بتفضل تولد في البيوت فكانت
بتواصل عملها من المستشفى للولادات خارج المستشفى
وماكانش وقتها بيسمح لها بالتواجد كتير في البيت
مما تطلب وجود الشغالات
وكانت في بعض الأحيان أكثر من شغالة
داخل المنزل

ومر الوقت وعادت الست شوشو لأرض
الوطن
وبالرغم أنها بطلت تشتغل إلا أنها
لم يكن عندها استعداد للعمل المنزلي

أشترت الست شوشو شقة
في مدينة نصر عام 66 وأستقرت بها
ولما كانت لازالت تقوم بأعمال الديكورات وتوضيب الشقة فلم يكن
عندها شغالات لسة فكانت تستعين
بزوجات البوابين
وأقول زوجات
لأن العمارة التي كانت تسكنها
تتكون من مائة وعشرة من الشقق
فكان يعمل بها أربعة من البوابين
ولكل منهم زوجة وأولاد

ولما كانت مدينة نصر في ذلك الوقت
كما يطلقون عليها
هووو
أو يقولون عنها صحراء
فكانت الخدمات والدكاكين قليلة
الست شوشو كانت تشتري الدجاج وتتركه لدى البوابين
ليبيض وايضا ليفقس



ويأتي يوم ذبح الدجاج
فتطلع زوجات البوابين لذبح الدجاج
وكانت لاتنتبه لهن فكن يسرقن الدجاج المذبوح لكثرة عدده
وتكتشف هي ذلك بعد فوات الآوان
وتعمل الست شوشو نفسها ناصحة
وتعد الدجاجات

ويذبحن البوابات الدجاج في الحمام الصغير

ثم يدخلن المطبخ لينتفن ريش الدجاج وينظفنه
والست شوشو قاعدة في الأنتريه مع جاراتها يضحكن ويتسامرن
وتتطلب من أحدى زوجات البوابين
التي لاتعمل في ذبح الدجاج وأنما يكون عليها الدور لتعمل في المنزل
بعمل الشاي وتقديم البسكوتات
وأنواع المخبوزات والحلويات للضيوف
إلى أن تنتهي النسوة من تنظيف الدجاج وتنظيف الحمام والمطبخ قبل خروجهن الي بيوتهن
تقف الست شوشو لتمم عليهن وتحرص على ألا تأ خذ أي أمرأة منهن
على غفلة منهاالدجاجات



وحرصا على إنهن لن تستهبلن عليها وتتركن مخالفات الدجاج في المنزل فكانت تشدد على إخراج تلك المخلفات
فكن يحملن المخلفات في بستلات الغلية
ليرموها في صنادق القمامة الكبيرة عند باب العمارة
ليأتي الزبال لينقلها بعد ذلك
وتنتهي الصديقات من جلسة كل يوم بعد شرب الشاي والقهوة وأكل الحلويات



وأحيانا تحمل أحداهن أو أخرى طعام الغذاء معها
من عند الست شوشو
لأنها تأخرت عندها
ولن تستطيع عمل الغذاء قبل أن يأتي زوجهاوأنها تأخرت بسبب محايلة
الست شوشو عليها بالجلوس مع باقي النسوة
علشان القعدة حلوة طبعا الست شوشو معندهاش مشكلة
والدتها كانت بتشرف على النسوة في المطبخ وكن يقمن بالطبيخ بأشراف
والدة الست شوشو

يداهم الوقت الجميع ويذهبن لبيوتهن
ليحضرن الطعام لأسرهن
وتدخل الست شوشو المطبخ لتبدأ
في وضع الدجاج في الاكياس
لتخزينها في الفريزر
وهنا تصرخ الست شوشو
الفراح ناقصة ست أجواز

الست اللي كانت فاكرة نفسها ناصحة وبتفتشهم قبل ما يخرجوا
ما كانتش عارفة
إنهن كان يضعن الدجاج داخل البستلات ويضعن فوقها مخلفات الدجاج التي كانت تملأ أكثر من أربعة باستلات
وبذلك لاتستطيع أن تحدد من منهن سارقة الدجاج




وبذلك إنتهت الحلقة الأولى
على أمل أن نتلتقي في حلقة
أخرى إن شاء الله
مع حكاية أخرى للست شوشو وشغالاتها



بقلمي ومن مؤلفاتي الخاصة

رجاء التثبيت

[۩۩ سيد الشرقاوي ۩۩]

تسلم الاياادي علي
الجماال حلوه اوي
القصه ومنتظرين جديدك
لك احترامي وتقديري

[emyemz]

الست شوشوأخيرا خلصت البيت
والديكورات بتاعة الشقة وفرشت الموبيليا
والحياة بقت تمام التمام
ناقص حاجة واحدة منغصة عليها راحتها
شغالة أمينة بدل العصابة
اللي بتطلع تنظف لها
وتقشطها

وفي زيارة لعمتها....قصدي أخت جوزها
شافت عندها شغالة زي الفل
البيت تمام نظيف وبيلمع
ومطبخ وحمام أيه بيبرقوا

سألت الست شوشو أخت جوزها(سهير)

شوشو:البنت دي شاطرة قوي يا سهير هي بتبات
عندك؟

سهير:طبعا يا شوشو أمال أيه
شوشو: منين دي يا سهير أنا عايزة واحدة
مرتات البوابين هاريني سرقة وأيدهم ما بتعلمش
والبيت يضرب يقلب

سهير: ما هو كمان يا شوشو المفروض إنك وراهم وواقفة عليهم


طبعا الست شوشو مش عارفة أن الست الشاطرة
اللي واخدها بالها من بيتها لازم تشرف على كل كبيرة وصغيرة في بيتها

مش ترمي كل حاجة وراء ظهرها وتفتح بيتها
صالون أجتماعات لجيرانها يقضوا فيه
وقتهم يقعدوا يرغوا معاها وأخر اليوم يلفعوا حلل الأكل معاهم من عندها
طبعا الكلام ده ما كنش عاجب سهير فلقيتها فرصة تطرقع لها شوية(أخت جوز بقى)
بس بيني وبينكم عندها حق
وكمان يا شوشو بناتك لازم يتعلموا الترتيب والتنظيف من صغرهم مش لعب على طول وتلفزيون حتى المذاكرة مافيش
خلي بالك منهم بدل قعدتك مع الستات جيرانك ليل نهار وحتى الواد ديك البرابر مش واخدة بالك منه لازم يذاكر علشان يطلع زي أبوه

شوشو: ما أنا جيبالهم مدرسين في كل حاجة وعاملة صحوبية مع المدرسين وبجيب لهم هدايا من بتاعة بره
ووقت الإمتحانات بروح معاهم وأرش على اللجان وبينجحوا وما عنديش حد بيسقط
بس بيني وبينك الوحيدة اللي مريحاني
وما بتتعبنيش الكبيرة
سهير: موني دي كلها أبوها شكل وأخلاق هي دي اللي فيهم
شوشو :خلينا في المهم أنا عايزة واحدة زي اللي عندك
سهير: عليكي وعلى كريمان هي اللي بتوردهم

كريمان دي أخت جوز الست شوشو وتبقى أخت سهير
أخصائية أشاعة في المستشفى العسكري
وما بيعجبهاش حال الست شوشو
سهير:هي بتجيبهم وتنظفهم ويقعدوا عندها أسبوع تعلمهم الشغل وبعدين تجيبهالك تشتغل عندك
على بال ما يجي ميعاد الغداء تكون وصلت ابقى
قوليلها
شوشو:لما تيجي أبقى أقول لها

وجاء ميعاد الغداء وحضرت كريمان وطلبت شوشو منها شغالة تقعد عندها في البيت
زي اللي عند سهير
يتبع

[فداااااااااااء]

هههههههههههه حلوة الطريقه جدا فى سرد القصه أعجبتنى بصراحه
تسلم الايادى الحلوة

[emyemz]

الغدا خلص والكل قعد حوالين السفرة
الكبار على السفرة

والصغيرين على سفرة تانية اصغر
ماهو ماشاء الله
كل واحدة عندها
ربنا يزيد ويبارك 5
الست سهير خمس بنات
والست شوشو أربع بنات وضابط
قصدي وولد
وسبحان الله الواد جه في النص بالضبط
قدامه بنتين ووراه بنتين

وكريمان ربنا ما رزقاهاش بالخلفة
وكانت قوية ومش بتحب الاولاد
إلا ديك البرابر
كانت البنات بتخاف منها لأنها شديدة
ومهوسة نظافة
وكانت لما تقع عينها على بنت
تمسكها تفليها من راسها لساسها
تفتش على ظوافرها
ملابسها الداخلية والخارجية
حتى شعرها

طبعا ماهم بيروحوا المدارس وممكن حاجة يلقطوها من هنا والا هنا
وبدأت في رمي الكلام والمقصود طبعا الست شوشو
كريمان: ماهو لازم الواحد دايما ياخد باله علشان العيال ما تلقطش حاجة
أصل الستات اليومين دول
بيرموا ولادهم للشغالات ومش بيلاحظوهم

الست شوشو وهي فاهمة المغزى
وبتقرقش تحت سنانها زلطةوتبتسم ابتسامة صفراء
شوشو : أيه يا كريمان ده أنت فاكرة نفسك في الجيش والا مدرسة
دا أنت عملت زي السجانة هههههههههههه

كريمان : ماهو ده اللي بيحصل يا شوشو العيال ما بقاش حد ياخد باله منهم والمدارس بتلم دلوقت
ترد شوشو بأعتزاز
شوشو: دي المدارس الحكومية مش الخاصة
سهير: والنبي ما تقوليش كدة هي المدارس الخاصة إلا للعيال اللي مش فالحة أنا عارفة أيه اللي خلاكي تدخليهم خاص
كنت أول ما جيتي من بره قدمتي لهم في المدرسة اللي في وش البيت
قدامك حلوة وزي الفل والمدرسين ممتازين
وكل ولاد الناس فيها
إحنا مابيخشش المدارس الخاصة عندنا الا الخايبين

وطبعا سهير كان عندها حق لأن في ذلك الوقت المدارس الحكومية هي الريادة
وكان لاداعي للمدارس الخاصة خاصة ان اولاد الست شوشو كانو ا بيدرسو عربي لانهم محولين من دولة عربية وفي ذلك الوقت لم تكن قد انتشرت مدارس اللغات في تلك الدول
سهير: انت لازم تنقليهم علشان العيال مستواهم ما ينزلش ووفري الفشخرة على حاجة تانية
فشخرة : ابتلعت شوشو الكلمة وخاصةأنها عجبت زوجها الذي أقتنع
بفكرة نقل الاولاد عندما عرف المستوى الدراسي الذي تحظين به بنات أخته سهير

شوشو:كريمان أناكنت عايزة بنت شغالة في حدود 15 أو 16 سنة تقعد عندي في البيت
كريمان : خلاص يا شوشو أنا حأكلم البواب اللي عندي يجي معايا بلدهم أنقيلك واحدة أأقعدها عندي كام يوم
أنظفها وأحميها وأفليها وأعلمها الشغل وأجيبها لك متعلمة جاهزة
شايفين انقيها آه على الزمن هو النهارده حد بيلاقي واحدة حتى
كله بيجي باليوم ينظف ويمشي أخر النهار
شوشو: بس بسرعة يا كريمان أحسن
البوابين مطلعين عيني
كريمان : بس اياك ماتخيبش زي بناتك

شوشو: ليه بقى انا بناتي زي الفل
كريمان : فل مين دول عايزين الرمي هو انا مش بأجي عندك واشوف
ده الواحد بتيجي له كوباية الميه مجيرة
غير بنات سهير البنت تجيب الكوباية
بتبرق وتحتيها طبق بنات فلة
شوشو: موني ياموني
جاءت البنت من غرفة بنات عمتها ولم تكن تنصت للحديث
شوشو: هاتي لعمتك كوباية ميه
ذهبت البنت الى المطبخ فلم تجد الشغالة لأنها كانت ترفع الطعام
والأكواب داخل الحوض فأخدت كوباية
وغستلتها بالسافو طبعا في تلك الايام لم يكن هنالك منظف سائل
غسلت الكوباية وشطفتها جيدا
ووضعت الماءو أخدت من المطبقية
طبق فنجان ووضعته تحت الكوب
وذهبت لتسقى عمتها

شوشو: الكوباية بتبرق أهي وتحتها الطبق أيه رأيك بقى
كريمان: أصل دي موني اللي جابتها
وموني دي حاجة تانية طالعة لعماتها وأبوها
انما الباقي عندك كله عايز الرمي
وكانت كريمان محقة فموني لأنها تقضى معظم وقتها عند عمتها سهير فقد كانت ترى كيف النظافة في ذلك المنزل
فهي كانت تعشق عمتها فهي التي ربتها
عندما كانت في نفس البلد العربي مع والديها
وكانت تقطن معهم في نفس البيت
وكانت الست شوشو بتروح المستشفى كل يوم وموني كانت تجلس مع عمتها وبناتها فأرتبطت بهن منذ الصغر

شوشو في داخلها: الحمد لله انها ماطلبتش كوباية مية من حد تاني
احسن كانت حتتمرع لما يتحقق كلامها
وخرج الجميع من عند سهيركل لمنزله
مع وعد من كريمان بإحضار شغالة لشوشوالأسبوع القادم

مر الاسبوع ووفت كريمان بوعدها
وأتت بشغالة لبيت أخيها ولكن لأنها كانت مشغوله وعندها سفيرة للأسكندرية مع زوجها لم تستطع
أن تأخذها لديها لتمرنها
فذهبت بها عند شوشو على طول

دخلت كريمان بالشغالة من البلد
وطلبت من شوشو أنها تحضر الحمام الصغير لتقوم بإحمامها كريمان وتلبسها ملابس أخرى وترمي ملابسها

كريمان : حضري يا شوشو مية سخنه علشان البنت أحميها في الحمام الصغير وهاتي هدوم من هدوم موني تكون واسعة شوية
وهاتي علبة بيرسول ومقص وحته بيضاء ومشط وفلاية

شوشو أحضرت ما طلبته كريمان وأخذت تلاحظ ماتفعله كريمان لتتعلم
أخرجت كريمان من شنطتها جوانتي طبي واجلست البنت على الأرض
ووضعت الفوطة البيضاء على حجرها
وقصت شعر البنت ثم قامت برش البيرسول على رأسها ثم ربطت شعرها بقطعة القماش البيضاء
جلست البنت قرب الساعة على هذا الحال
والجميع يشاهد وهو في استغراب
أما موني فكانت متألمة لما يحدث للفتاة التي كانت تكبرها بخمس أو ست سنوات
وكانت ترى مونى أن عمتها جبارة لأنها لم تنجب أولادا وليس في قلبها رحمة ولا حنية لذا لم تكن تكن لها نفس الحب الذي كانت تكنه لعمتها سهير
مرت الساعة قامت كريمان بفتح الفوطة اللي على رأس البنت ومش حأقول لكم على اللي كان موجود تصوروا أنتم بقى

ثم أخذت تسرح شعر البنت بعد ما اصبح قصيرا واللي نزل نزل
ثم لفت الفوطة زي ماهي بالشعر المقصوص ووضعته في ورقة جرنال
ثم أخذت البنت لتحميها
وفي الحمام جولة أخري بالفلاية بس مع الصابون
خرجت البنت من الحمام زي الفل وارتدت ملابس موني وكانت في هذه اللحظة لاتفرقيها عن باقي الاطفال في المنزل من النظافة
أما كريمان لمت ملابس البنت مع الشعر ووضعتهم قي جرنال اخر ثم جمعت الجميع ووضعته في كيس كبير
وطلبت من شوشو أن تعطيه للبواب ليرميه خارج المنزل

شوشو: الحمد لله بقى عندي شغالة
ثم وجهت كلامها لكريمان: أخليها تخش المطبخ تخلص المواعين
كريمان : لأ ياشوشو أنا حأوديها عند سهير الأول تشتغل عندها كام يوم
علشان تتعلم وبعدين تجيلك
أنا جبتها هنا الأول علشان أنظفها وتبقي تخلي بالك من طريقة النظافة لغاية ماتتعود لوحدها
بس حأوديها لسهير تعلمها وكمان تتعلم من البنت اللي هناك وبعدين تيجي عندك بس أنت خليك دايما وراها علشان تفضل نظيفة وشغلها نظيف وبلاش تعلموها الأهمال
وأنا لما أبقى أرجع من أسكندية بعد أسبوع أبقى أجيبها لك من عند سهير
تعالي يا إكرام معايا
وأخذت كريمان إكرام وذهبت بها بيت سهير لتتعلم التنظيف اللي على أصله

أما شوشو فجلست في انتظار اسبوعا
لتأتي لها إكرام وهي في قرارة نفسها تحسد سهير لوجود شغالتين عندهالفترة حتى تعود لها خادمتها

[emyemz]

بعد ما مر اسبوع على وجود إكرام عند الست سهير
وصلت للست شوشو اللي كانت على أحر من الجمر لوصولها
استقبلتها بحفاوة
وكانت محضرة لها هدوم جديدة
ودلتها على المكان اللي حتنام فيه
وبدأت الست شوشو في أوامرها لإكرام
اللي إتودكت على إيد الست سهير وبقت فلة

كانت تنظف المنزل وتقوم بغسل الأواني
وتذهب للسوق

والحاجة والدة الست شوشو تقوم بالطبخ
أما الست شوشو كانت مشغولة في صالوناتها
وحالات الولادة اللي بتطلعها
ماهي كانت حكيمة أمراض نساء وولادة

وطبعا ما عملتش بوصية كريمان ولا سهير وماكانتش بتابع غكرام وكلنا عارفين فعندما كانت تذهب لكريمان أو سهير كانت تري بيوتهم لسة أنظف من بيتها
ناسية إن بيتها فوضى وناس داخلة وخارجة والبنت ما بتونش
وللحق البنت ماكانتش بتقصر
بس الست شوشو أولادها هايصين مش متعلمين النظام ولا في هدوء في بيتها

فكانت تنعي حظها في الشغالة ليه مش زي اللي عند سهير وكريمان

أما إكرام كانت زي النحلة وكانت لما تخلص تروح تقعد مع الأولاد الست شوشو
ولما كان سنها قريب من ولادها
فكان أوقات يبقوا حلوين مع بعض وأوقات فيه شد واحتكاك بينهم
ولما كانت موني غير باقي أخواتها فكانت تحب تشتغل في البيت
ولإنها صغيرة في السن فكانت تتنافس مع إكرام

مما جعل إكرام ترى أن موني تتدخل في عملها
فكانت ترى أن موني مركز قوة بالنسبة لها فكانت تقوم ببعض المقالب معها
ففي الصباح تحضر الشاي بالحليب ثم تقوم بعمل السندويتشات
وتذهب لتسأل الأولاد على نوع السندويتشات التي ستقوم بعملها لهم عند ذهابهم للمدرسة

إكرام:عايزين ساندويتشات إيه
موني :أنا عايزة حلاوة
نوسة :وأنا جبنةبيضاء

تذهب الفتاتين إلى المدرسة وتأتي
الفسحة فتخرج كل منهما السندويتشات ويذهبن لشراء الشويبس لأن في تلك الأوقات كانت الصناعة الوطنية هي الموجودة في السوق فلم يكن هناك بيبسي ولا كولا
تتقابل الأختان وتفتح كل واحدة منما كيس السندويتشات
تفاجأ موني بسندويتشات جبنة بيضاء
بدل من الحلاوة
فتسأل أختها:أنت معاك سندويشات الحلاوة بتاعتي
نوسة: لأ انا معايا جبنة
ترد موني في غضب: الحمارة إكرام عملت لي جبنة بدل الحلاوة وأنا بكره
الجبنة وهي عارفة كدة

فتعطي سندويتشاتها لأختها التي كانت تعشق الأكل
وتعود للمنزل دون أن تأكل في المدرسة
ويتكرر الموقف رغم تعنيف موني لإكرام
والتأكيد عليها بعمل الحلاوة
تعود موني ثم تذهب لتشكي إكرام لوالدتها
فتعنفها الست شوشو
فترد إكرام وأنا مالي نوسة اللي بتقولي
ما تعمليش حلاوة وأعملي جبنة
طبعا نوسة تعرف إن موني بتكره الجبنة فستترك لها السندويتشات
أما إكرام فتكون سعيدة بمضايقة موني

موني : طيب هي بتقول لك اعملي جبنة وأنت عارفة إني بكرهها ليه بتعمليها
الست شوشو: أخر مرة تعمليها ابقى أعملي لها بكرة حلاوة
وتحل المشكلة
وتجلس موني لتنتهي من حل الواجبات وبعد أن تنتهي تذهب لمزاولة هوايتها
وهي تنظيف المنزل مما يجعلها دائما في مشاحنات مع إكرام وخاصة أن موني تقوم بإعطاءها الأوامر في التنظيف
وكان هناك شئ أخر يغيظ إكرام من موني
موني تعشق الشاي ودائما تطلب منها شاي فتتجاهلها
فتذهب موني لتشتكيها
وخاصة أن إكرام تعمل لنفسها شاي وترفض أن تعمل لموني معها
مما عود موني على سرقة كوب الشاي دائما من إكرام
فقررت إكرام عمل مقلب في موني
في أحد الأيام كانت تنظف إكرام زجاج الشبابيك والمريات
وكان الزجاج في ذلك الوقت ينظف بالماء والسبرتو الأحمر وورق الجرائد
لم تكن مصر عرفت الويندكس أو إي سائل أخر لتنظيف الزجاج
وعندما انتهت إكرام من تنظيف الزجاج
أعادت أدوات التنظيف إلى المطبخ
وأطفأت نور المطبخ على غير عادتها
وذهبت للسوق لشراء بعض الطلبات
دخلت موني المطبخ الذي كان مضيئا بنور النهار فوجدت فنجان شاي متروك على طاولة المطبخ
فأسرعت إليه
قائلة:إكرام نسيت تشرب الشاي أنا حأشربه بسرعة قبل ما تيجي
وكان الشاي باردا فأخذت جرعة كبيرة مقدارها نصف الفنجان بسرعة
وما أن نزل الشاي في في بطن موني إلا وأحست موني بحريقة داخل معدتها
لقد كانت إكرام تعلم أن موني ستشرب السبرتو على أساس أنه شاي

وإلى اللقاء في حكاية أخرى من حكايات الست شوشو

[emyemz]

مرت الأيام وبقت إكرام مبسوطة معاهم في البيت وكانت الست شوشو مهنياها تجيب لها الهدوم أول بأول وتصيغها
مرة حلق
مرة خاتم
مرة سلسلة
وكانت كل وقفة عيد صغير تروح البلد
ومحملة إشي وشويات
قمشات من بتاعة الحج والعمرة لأهلها وكستورات
وسكر وشاي ودقيق وصابون غسيل وزيت
ده غير الهدوم اللي كانت بتصغر وتقدم من عندها وعند ولادها
وكمان أحذية وصنادل
يعني رايحة ومحملة

طبعا الست شوشو كان مبدأها أطعم الفم تستحي العين
وبالشكل ده تضمن إن أهلها مش حيودوهاحتة تانية
او يجوزوها بدري
تروح تقعد لها كام يوم مع أهلها وترجع
طبعا أهلها كانو دايما بيجولها طول السنة

مرة أبوها وحد من أخواتها
ومرة مامتها وحد تاني من أخواتها يعني كانت على اتصال بأهالها على طول يجي يزورها ويقعدوا معاهاشوية وتضايفهم
لأنهم بيجوا مع السمسار أو الدلالة اللي بيوزعوهم على البيوت واللي معرفين كريمان على أهالي الشغالات
طبعا بيروحوا كل بيت فيه شغالة من عندهم وبيعملوا رحلات لزيارة البيوت اللي بتشتغل فيها بناتهم يلموا الأجرة
ويشيلوا اللي فيه النصيب من الناس اللي عندها بناتهم
وطبعا الست شوشو عايزة تبان أحسن واحدة كريمة
فبتحملهم وهم نازلين اشي وشويات

المهم نرجع لإكرام

يوم الوقفة تيجي الست اللي بتوزعهم تجمعهم علشان يسافروا لأهاليهم
وتكون أكرام مستحمية ولابسة الهدوم الجديدة ومحضرة شيليتها وواخدة أجرتها ودهبها وعيديتها
وتسافر لأهلها

وهنا بقى تبدأ الست شوشو تأمر بناتها
يسدوا مكان إكرام
طبعا البيت متنظف للعيد بس اللي بعد العيد بقى؟

البيت يرجع فوضى والدنيا تضرب تقلب
وسهير ببناتها جاين وكمان كريمان
وهي مش عايزة تسمع كلمة من هنا والا هنا
تنبه على بناتها إن الشقة تبقى زي الفل
طيب والبنات عايزة تتفسح وتعيد وتروح السينيما وتتفسح
شوشو: ما فيش خروج الا لما الشقة تبقى زي الفل
تقوم موني وبنات الست سهير يلموا البيت وينظفوه
ونوسة تحسوك أصلها كسولة ومش بتحب التنظيف وبتعرف تتملص وتزوغ
وكله يقع على دماغ موني
وتنصاع موني للأوامر وتنظف على قد ما تقدر

علشان تخرج وتقضي العيد مع صاحباتها

خلص العيد ولسة إكرام في البلد
أجازتها لسة ما خلصتيش واخدة أسبوعين
وطبعا الشغل على موني لكن نوسة بستعبط وبالتالي البيت مش مترتب كويس
لأن موني مش حتقدر عليه لوحدها وخاصة الست شوشو زياراتها
ما بتخلصش والجارات داخلين خارجين بولادهم والبيت مش ناقص فوضى
والست شوشو مش عاجبها وطبعا جوزها كمان
ينده الوالد لموني ونوسة ويأنبهم على منظر البيت

الوالد: عاجبكم منظر البيت كده؟ الهدوم في كل مكان
والصالون متبهدل والمطبخ حيمشي
إيه الفوضى دي

موني: يابابا أنا بشتغل طول النهار ونوسة مش بتعمل حاجة
نوسة: لأ بشتغل
موني : طيب قولي أنت نظفت إيه
نوسة بنظف معاك
موني :والله يابابا مش بتعمل حاجة تروح تنظف شوية وبعدين تهرب وأنا اللي بأعمل كل البيت
الوالد:خلاص انا حأقسم الشغل بينكم وأحدد كل واحدة بتعمل إيه علشان يبان مين اللي بيقصر
بيقول كده وهو عارف إن نوسة تنمبل وبتزوغ من شغل البيت
بس علشان يجبرها على الشغل
خلاص كل يوم واحدة تنظف البيت والتانية المطبخ
واليوم التاني تعكسوا الشغل
يعني اللي كانت بنتظف تمسك المطبخ
واللي كانت في المطبخ تنظف البيت
مفهوم

وتذهب الفتاتان كل الي الشغل اللي
باباها قالها تعمله
وتاني يوم يعكسواالشغل
طبعا موني تشتغل بنظافة وذمة ونوسة
زي ماانتم عارفين بقى
تدخل نوسة العصر لتغسل الصحون والكاسات بعد الغذاء وتخرج
من المطبخ وهي لاوية بقها ميت بوز

طلب الوالد من موني أن تعمل له كوب من الشاي
فتذهب موني لأعداده فتفاجئ
بأن نوسة أغلقت المطبيقية بالشريط اللاصق فتذهب لها وتسألها

موني: إنتي قفلتي المطبقية بالسلوتيب ليه هو ببابها أنكسر
نوسة: لأ بس خلاص أنا غسلت الكوبايات والأطباق وياويل اللي حيستعمل حاجة منها أنا مش حأغسل تاني واللي حيمد أيده على حاجة منها حأكسره من الضرب
موني: أزاي يعني . مش حنشرب ولا نأكل
نوسة ماليش دعوة
طيب عايزة أعمل شاي لبابا
نوسة : المطبقية مش حتتفتح
تذهب موني لتشتكي لباباها
الذي يعنف نوسة ويأمرها بفتح المطبقية
نوسة : خلاص اللي حيوسخ حاجة يغلسها أنا مش داخلة المطبخ تاني
أنا تعبت أي حاجة تغسليها أنت بكرة ماأنتي اللي عليك المطبخ بكرة
موني: يعني المواعين اللي حتتوسخ النهاردة حأنظفها مع مواعين بكرة
نوسة أيوة أنا خلصت خلاص المطبخ ماليش دعوة
وترضخ موني لكلام نوسة

وفي الصباح تذهب موني لتستلم شغل المطبخ
وتدخل الجدة قبل الظهر لعمل الطعام وتبحث عن الحلل والصواني فلا تجدها
تسأل موني التي لاتعرف عنها شيئا وتذهب لتسأل نوسة
موني: أنت خبيتي الحلل كمان طب قولي هي فين تيتا عايزة تعمل الأكل
نوسة : عندك في الدولاب اللي تحت الحوض
موني : أيه ليه أنت عارفة أن تحت الحوض للزبالة
حد يحط الحلل جنب الزبالة
تذهب موني لتخرج الحلل وتفتح الدولاب أسفل الحوض
وتذهب صارخة للست شوشو
ماما: نوسة حطت ميه في الحلل وسابتها ومغسلتهاش
من أمبارح
أيوة أنت مش النهاردة عليم المواعين سبتهم لك تغسليهم
الست شوشو: طيب يا نوسة لما يجي بابا من الشغل وأنت يا موني معلش خلاص أغسليها انت علشان تيتك تعمل الأكل
موني : يعني هي ما تغسلش غير الأطباق والصحون والملاعق والشوك والسكاكين وأنا أكمل شغلها
والله ده ظلم

تستسلم موني لأوامر والدتها وتذهب للشغل راضخة للأمر الواقع
ومنتظرة عودة إكرام علشان تعتقها من
الشغل
وتعود أكرام ويرجع كل شئ لوضعها قبل سفرها وترتاح موني من الشغل
ويظل الوضع هكذا خمسة أعوام
لتكبر إكرام وتصبح عروس وتذهب لزيارة أهلها ولا تعود للست شوشو
لأنها ستتزوج
وإلى مغامرة أخرى من قصص الست شوشو

[emyemz]

أنتظرت الست شوشو
إكرام علشان ترجع وما فيش فايدة
طلبت من كريمان معرفة ما حدث
لإكرام وسبب عدم عودتها
وبعد يومين عادت كريمان بالرد

كريمان: البت يا شوشو اتجوزت أنا سألت الست الدلالة لما عدت علشان
تأخد أجرة البت اللي عندي
وقالت لي
شوشو: طيب ليه ماقلوش قبل ما تمشي علشان الواحد يعمل حسابة ويجيب واحدة تانية
كريمان: أصلهم كانوا خايفين لما تعرفي ما تبعتيش حاجة مع البت
ماأنت إيديك سايبة معاهم
خافوا لميجيش حاجة مع البت
أديك خسرتي الحاجات اللي بعتيهالهم

شوشو تحاول إغاظة كريمان

1. :دول أغبياء لو كانوا قالوا كنت إديت البنت فلوس النقطة
2. كريمان:ده انتي اللي حتجبيلي نقطة
3. ما أنت مش حاسة بأخويا ولا الفلوس اللي بيجيبها وتعبه بيها

شوشو:ليه بقى الحمد لله الفلوس كتير
هو أنتي شايفاه بيشتغل في الفاعل
كريمان: طيب ياختي أنت حرة أنت وأخويا
شوشو: المهم دلوقت حأعمل ايه
أنا عايزة واحدة جديدة شوفي لي واحدة تانية

كريمان:ما أنا طلبت من الولية تجيب واحدة تانية

أحسن ما يصحش بيت أخويا يبقى من غير شغالة
تشيل البيت ده انتم تدودوا
ليه بقى ما البيت زي الفل أهو
كريمان:هو في حد بيشتغل غير
موني
والمدارس داخلة وبنتك عندها شهادة يعني لازم تخلي بالها من المذاكرة
المهم كلها يومين والبنت تيجي عندي أنظفها وأعلمها الشغل
وأجيبها لك
شوشو ربنا يسهل وما تتأخرش
وبعد أسبوع عادت كريمان ومعاها ثلث بنات
شوشو:ايه يا كريمان فين البنت
كريمان :مافيش بنات كبيرة بقوا بيشتغلوا في المصانع
الست جابت لي العيال دي
أهم يكملوا بعضهم
واحدة تشتغل في البيت والتانية للمواعين والتالتة للمشواير
وعلشان هم صغيرين حتدفعي فرق مش كبير عن الشغالة الواحدة
شوشو بس دول عيال

كريمان: مش قوي
البت اللي عندها 12 سنة تمسك البيت
وأم عشرة تنزل المشاوير
والبت دي عندها 9 خليها للكوبيات والأطباق وتساعد الكبيرة
أنت جبتيهم منين دول وازاي اهاليهم سابتهم يشتغلوا
كريمان البت أم 12 مش وحشة يعني تنفع
والأتنين التانين أخوات أمهم وأبوهم ماتوا وجدتهم ست كبيرة وهي اللي ربتهم وهي اللي طلبت تشغلهم
وكويس صغيرين يقعدوا معاكي مدة لاجواز ولا احزانون
انا مالحقتش اعلمهم قوي علشان انتي عارفة البيت عندي صغير وما أقدرش اخليهم كلهم عندي ابقى علميهم أنت
تعالي ياسعدية دي الكبيرة
والأتنين اسمهم صابرة وصباح
يالا يابت انت وهي خشوا المطبخ وروقوا الشقة
استسلمت شوشو للأمر الواقع
وأخذت البنات
وبدأت رحلة جديدة مع الشغلات

1. 

يتبع

[emyemz]

أستقرت البنات عند الست شوشو
وكانو شغالين تمام
سعدية الكبيرة ماسكة معظم الشغل
وصابرة بتساعدها وتنزل المشاوير القريبة من البيت
يعني لغاية البقال اللي تحت البيت والخضري اللي جنبه
أما باقي الطلبات فكانت يأتي بها البواب
أو جوز الست شوشو


وصباح كان يدوب عليها غسيل الكوبيات والأطباق ولم ما يسقط على الأرض من أوراق أو ملابس للأولاد ما أحنا أتفقنا
إنهم فوضى

والحياة ماشية حلوة إلا من مقالب البنات لبعض
وبعض المشكلات الصغيرة

الست شوشو:يا سعدية أعملي فنجان قهوة للبيه
عملت سعدية القهوة وذهبت لتحضر الصنية وكأس الماء وذهبت مسرعة لتقديم القهوة وهي في سعادة لإنها
ذات أهمية دون عن الباقيات
طبعا ده في نظرها وكانت دايما تغيظ صابرة
وبعد دقائق من تقديمها للقهوة
سمعت الست شوشو تصرخ منادية لها
الست شوشو:سعدية تعالي هنا
ايه القهوة اللي انتي عملتيها للبيه دي؟
حاطة للبيه ملح

سعدية: دي أكيد البت صابرة هي اللي حطت الملح علشان متغاظةمني
الست شوشو: بت يا صابرة تعالي هنا
الحديث موجه لصابرة التي اتت وهي خائفة من رد فعل الست شوشو
عارفة لو عملتي كدة تاني انا حأقول لكريمان وهي تتصرف معاك
صابرة: حرمت مش حأعمل كدة تاني
الست شوشو : مصايبكم مع بعض حسكم عينكم تعملوها تاني وبالذات مع البيه
يالا كل واحدة تروح تشوف شغلها
وأنتي يا صابرة خدي الصنية وأغسلي اللي فيهم
وسعدية روحي أعملي فنجان تاني

ذهبت كل لعملها وفجأة صرخت صابرة
وأخذت تبكي وذهبت تشكي سعدية
للست شوشو
صابرة :ستي سعدية حطت لي دبوس
في ليفة المواعين وغزتني في إيدي
وخرت دم
أخذت الست شوشوزجاجة الكلونيا وعقمت يد صابرة وندهت على سعدية
الست شوشو: انتي يازفتة ياسعدية تعالي هنا
أنت ازاي تحطي للبنت دبوس في الليفةوتعوريها وايه المشاكل اللي على الصبح دي
دلوقت البيه في الحمام ولما يخرج ويشوف اللي بيحصل
حيزعق ومش حيعجبة اللي بيحصل
أتلموا أحسن ابعت لكريمان وأنتم عارفين ايه اللي حتعملموا فيكم
يالا كل واحدة تشوف شغلها ومش عايزة حاجة تحصل تاني وانا حأشوف ايه حكايتكم بعد ما اقوم من النوم
وذهبت الفتيات للعمل وطلبت ثم عادت الست شوشو للنوم

عادت موني من المدرسة ووضعت كتبها وغيرت ملابسها ودخلت المطبخ
لتعمل كوباية شاي وأخذت كوب لعمل الشاي
فوجدت الأكواب مغسولة ولكنها غير نظيفة ولحظت قلة عدد الأكواب ولكنها لم تسأل لأنها تعرف والدتها
عندما تبدي أحدى صديقاتها بأي شي عندها تقدمه لها خاصة أن هذه الأشياء
غالية الثمن وليست موجودة في مصر لأنها كانت تأتي بها كلما تذهب لعمرة او حج لذا فلم يلفت انتباه موني سوى أن المواعين غير نظيفة وخاصة أن موني تربية الست سهير عمتها
فكانت مشكلةالنظافة دائما تلفت نظرها

موني:صباح. الكوبيات مش نظيفة واكيد الأطباق انت ليه مش غسلاها صح
بصي يا بنتي الكوبايات تتغسل كدة
كدة
وأخذت تغسل موني كوباية وكمان كوباية ثم وجهت كلامها لصباح
موني: وريني حتغسلي أزاي
أخذت صباح تغسل كوبا فتناولته موني
منها وقالت لها
موني: يا بنتي مش كدة أغسلي كدة
كدة
أغسلك كمان

فهزت صباح رأسها
فأخذت موني تغسل وتقول لها
كده كده
وظلت موني تغسل إلى أن أستوعبت الموقف
كانت صباح بتشتغلها وجعلت موني تغسل معظم ما في الحوض
موني : يا نهارك مالوش ملامح أنت بتضحكي على وخلتيني أغسلك
المواعين طيب يا ناصحة كملي الباقي زي ما وريتك لغاية أما أخش
الحمام أخد دش وأرجع لك
زي ما وريتك
دخلت موني الحمام وأخذت الدش
ولكنها سمعت صوتا غريبا وهي ترتدي ملابسها
سمعت صوتا مثل:فيشك فيشك
ففتحت شباك الحمام الذي كان على المنور وكان أيضا يقابل شباك المطبخ
فرأت موني يدا صغيرة كانت خارج الشباك تدخل
فرمت بعينها إلى أسفل فقد كانت شقتهم في الدور الأول بعد الأرضي
مما يجعلها ترى أرض المنور
فرأت بقايا زجاج
فقد كان الزجاج مفتفتا مثل حبيبات الرمل وأيقنت موني أن اليد الصغيرة هي يد صباح التي كانت تتخلص من
الكوبيات حتى لاتغسلها
استوعبت موني قلة الأكواب وكانت تظن أن والدتها أهدتها لإحدى صديقاتها
ولكن ظنها طلع خطأ
اذ كانت صباح تتخلص منها لكثرتها
وهكذا انتهى يوم من أيام الست شوشو مع شغالاتهاوإلى لقاء في حكاية تانية

[emyemz]

مرت الأيام والشهوروالتلات بنات
نازلين مقالب في بعض لغاية ما أتعودوا
عل بعض وأصبح الأمن مستتبا
وأتعودوا على البيت وبقوا أفراد فيه
وكانوا بعد مايخلصوا الصغيرتين شغلهم يقعدوا يلعبوا من ولاد الست شوشو الصغيرين بعد ما يرجعوا من المدرسة

وبما إن البيت عند الست شوشو فوضى فإتعلمت الصغيرتين الفوضى
وأهملوا في شغلهم وكانوا يفضلون
اللعب عن العمل وكانوا مطلعين عين الست شوشو ومش بيشتغلوا زي الناس فأخدتهم كريمان عندها
خاصة إن البنت اللي عندها ذهبت ولم تعود لزواجها

شوشو: صباح وصابرة مش نافعين يا كريمان بقوا زي الأولاد عايشين في فوضى ومش بيعملوا شغلهم
ويومهم كله لعب حتى لو الولاد في المدرسة
كريمان: ده منك أنتي ياشوشو لو كنت بتلاحظيهم وعلى إيديهم واقفة كانوا إتودكوا وعرفوا يشتغلوا كمان أنتي
في سابع نومة ومش فاضية غير للجيران والعزومات والحفلات والسهرات
وبتصحي متأخر وفطارك بيجيلك لحد عندك في السرير
عايزاهم يتعلموا إزاي ويبقوا نظاف
العيب منك إنتي. والله أنت حتخيبي بناتك اللي مدلعاهم وعمرهم ما حيبقوا ستات بيوت
وعلمتي الشغلات الفوضى والدلع
شوشو : ليه بقى ما قدامك موني أهي حاجة تفرح
كريمان :يا ختي ما تقعديش كل شوية تقولي موني موني
دي تربية سهير علشان معاها على طول وهي اللي مربياها من أيام ما كنتم برة سوا وكنت أنت بتشتغل وهي معاها في البيت
دي لولا سهير كان زمانها زبالة زي الباقين
إنتي عاملة زي القرعة اللي بتتباهى بشعر بنت أختها
شوشو: بنت أختها إيه دي بنتي وبنتي وبنتي
على العموم أنا البت اللي عندي مشيت أنا حأخد صابرة وصباح
مدام أنت مش عايزاهم وحأمشيهم على عجين مايلخبطهوش وأنا لا عندي عيل ولاتيل وإبقي شوفي حيبقوا فل إزاي
شوشو: خديهم يا ختي والقلب داعيلك

أخذت كريمان البنتين عندها وعلمتهم من أول وجديد وظلوا سنين عندها حتى كبرت البنتين ولما كانت صابرة حظها من الجمال قليل سبقتها أختها في الزواج وظلت صابرة لدى كريمان
الى ما أصبحت واحدة من المنزل وبما إنها كانت عقيما فأتفقت مع زوجها وتبنت صابرة وظلت صابرة معها ليومنا هذا في المنزل حتى بعد وفاة زوجها سيادة اللواء



أما سعدية فقد ظلت عند شوشو لحد ما جه دورها في الزواج

إحتاست الست شوشو من غير شغالة
وبدأت ندرة الشغلات تصبح مشكلة
كبيرة في مصر وأصبح من العسير الحصول على شغالة ذهبت شوشو
تستنجد بكريمان التي أعتذرت لها
كريمان :فين بقى يا شوشو خلاص بقوا عملة نادرةوأنا من ساعة ما سبت الشغل
والولية الدلالة كمان قطعت رجلها بينها ماتت والا كبرت وما بقتش تشتغل
بقى خلاص
أنت عليك وعلى بناتك بقى يشتغلوا في البيت ما هو لو كنت علمتيهم شغل البيت كان زمانك مرتاحة ده أنت عندك
أربع بنات
أضطرت شوشو تعتمد على بناتها وكمان طبلت عليها
لأن أختها أخدت مامتها معاها في البلد اللي هي فيها علشان كانت بتشتغل مدرسة وماكنتش تقدر تسيب ولادها الصغيرين في البيت لوحدهم
فأصبح على شوشو أن تطبخ بعد ما كانت هانم جوة البيت
ولم تيأس فكانت دائمة البحث عن الشغلات عن طريق المعارف والجيران

وكان الشغل معظمه على موني بعد ما ترجع من الجامعة
وباقي الأخوات كانوا بيشتغلوا لما ياخدوا في جنابهم
بس البلاطة بتاعتهم كانت هي الأغلب
وكانت موني تقوم بغالبية الشغل
وكان يتخلل تلك الفترات دخول الشغالات وذهابهم لكثرة طلبات الست شوشو
ولما كانت تعمل موني كانت تطلب منها أيضا طلباتها الكثيرة التي لايتحملها الكثيرين
فكانت موني تدخل المطبخ لغسل الأواني فيأتيتها صوت الست شوشو
شوشو:موني إعملي شاي لتانت بثينة وفيفي

تترك موني الحوض وتذهب لعمل الشاي وتقديمة فتعود الست شوشو
شوشو: موني هاتي مية ساقعة
تذهب موني لجلب الماء فيدق الباب
شوشو:موني أفتحي الباب
وبما إن موني كانت في الجامعة وتتحكم في مواعيدها بخلاف أخواتها اللآتي كن في المدارس فكان تواجدها في المنزل كثيرا خاصة أن الجامعة بالقرب من المنزل
شوشو: موني هاتي من الأوضة الهدوم الجديدة علشان يتفرجوا عليها

موني :والله ياماما لهم حق يطفشوا منك أنت تطلبي طلب وقبل مايجيك الطلب تطلبي غيره أنا حأعمل إيه والا أيه؟


شوشو :طيب والله لأجيب الشغالة الآلي ولا الحوجة ليكم أهي حتشتغل من غير ما تنطق
موني :صحيح الربوت مش حينطق بس معاك ومع طلباتك حيقف يبص لك وبعد كده بوووووووووووووووم
حينفجر لأنه مش حيستحمل
وتضحك شوشو وموني والجارات وينتهي يوم جديد من أيام ومغامرات الست شوشو