حلقات برنامج ( بدون برنامج )

[morshooo]

اقتباس المشاركة الأصلية كتبت بواسطة nour magic moon ما شاء الله لقاء جميل وكويس والله طارق فوق الوصف فى احترامه للاعضاء واحلا حاجه يا طارق انك بينت سبب الحظر للاعضاء هههههههههههه علشان كنت فاهم غلط انا و اهلا بيك يا مرشو وبطل مشاكل بقا نورت من جديد

اهلا بيك

اشكرك على التواجد

[morshooo]

اقتباس المشاركة الأصلية كتبت بواسطة arco baleno حوار ممتاز من مبدع منتدى بنات مصر طارق ربي يسعدك على روحك الطيبه وتوضيحاتك النيره اخي طارق ونورت اخي احمد ويارب ترجع الى عطائك ونشاطك من تاني حلقه رائعه وممتعه

اهلا اهلا

المنتدى منور بأعضائة

اشكرك على التواجد الجميل دائما

اتمنالك التوفيق

[morshooo]

اقتباس المشاركة الأصلية كتبت بواسطة ♥ حـــــنــون ♥ يوووووووووووووووووووووه تانى احمد تانى مش معقوله كدااااااااااااا :d لا بس بجد خبر جمييييييييييييل نورت من تانى يااحمد بيتك اكيد الى مايستغناش عنك مهما كان الى حصل بس اكيد المنتدى افتقدك كتير جدا وكالعاده طارق شخصيه قويه وبيعرف ازى ماهما حصل بينه وبين الاخرين انو مش ياثر على علاقته بيهم وهو دا الادارى الناجح ^^ حلقه جميله بجد نورت يااحمد وشكرا ليك ياطارق

يووووووووة انتى تانى ^_^

اهلا حنون منورة بس مش اوى :biggrin:

سعيد جدا بمرورك المميز دائما

اتمنالك التوفيق

[Lαzєzα]

فيه حاجات بتحصل ف المنتدى وانا معرفش ^^
انا مش كنت عارفه اصلا انك اتوقفت مورشو ^^
منور المنتدى من تانى
وأحسن حاجه ف الحلقه بجد
ان احنا نحترم بعض مهما حصل خلاف بينا
ونفصل بين المنتدى والصداقه ^^
تسلم الايادى

[game010]

ايوة كده فهمت الموضوع
على العموم اختيار موافق يا طارق
وحمدالله على السلامة يا احمد
ان شاء الله ترجعلنا نشاطك من جديد

[خارج عن القانون]

والله ياض يا مورشو

زعلت لما عرفت انك اتحظرت

ع العموم حمد لله ع السلامه

واديك اهه جربت البدله الرصاصى ام شرطه

وحلقة وحوار جامدين كالعاده يا طارق

وعلى راى المثل ياض يا احمد

يا عزيزى كلنا محظورين^^

[مشتاقه للجنه]

حمد الله على سلامتك يا مورشو

بجد منور المنتدى كله ومنور قسم اليوميات

طارق ماشاء الله عليك ربنا يكرمك بأخلاقك الكريمه

ونعم المدير الجيد

تحيااتى لكم

[SiLver Spectra]

حلقة جديدة من بدون برنامج

إن شاء الله الحلقة تعجبكم ,, شخصيا جاتلي هستيرية ضحك من ساعة ما قريت اجاباته
يمكن عشان كدا قررت أعمل معاه الحلقة بدون أي ترتيب
ضياء غني عن التعريف و بيمتاز بقوة تشبيهاته و تحليله الموازي للواقع و المبني على خبراته و تجاربه
مش هطيل عليكم ,,
بس قبل ما هبدأ , الإجابات هنا بتعتمد على رأيه و حكمه الشخصي
و ليس الغرض منها الإساءة لأي جنسية كانت , فنحن هنا نحترم الجميع بدون أي تمييز
و حاولت الموازنة في الأسئلة حتى لا يعتقد البعض أن الغرض تشويهي بالرغم من أن الحلقة كانت من المفترض أن تخصص للبلد التي بها التجربة و التمتع بجو الإختلاف بحلوه و مره ,,,

---

أهلا بيك يا ضيا في الحلقة التانية من بدون برنامج

أول برنامج عشوائي في المنتدى :biggrin:

هههههههههههههههههه
طبعاً انت عارف اني ميت من الضحك بعد مقريت الاسئلة واول مقولتلي

حبيت المرادي تحكيلنا عن تجربتك و خبرتك المنتداتية , أنا عارف انك منتداتي من زمان صح و لا لأ ؟
ايوة من ايام ما اخترعوا العجلة كدة تقريباً منتدياتي وعجلاتي :079:

احكيلنا بدايتك في المنتديات ؟
عالم سمسم :cv25:
عالم سمسم يا طارق ههههههههه
عالم سمسم دة يا سيدي فية كل الدمي والعرايس ونفس الشخصيات بالواقع بالظبط ويمكن جزء كبير منة حقيقة اكتر من الواقع
كل واحد بيعبر فية عن حقيقتة لأن الصدق حقيقة والكذب حقيقة ,
يعني مفرقتش كتير عن الواقع بالعكس هنا المساحة بتزيد سواء للصدق الزايد عن حدة اللي ممكن يتطور لكذب زايد عن حدة او اللي كان بيحلم بإسلوب حياة مقدرش يحققة بالواقع او السيستم المعتدل زي اي بني ادم طبيعي زيك انت كدة معتدل زي الحقيقة وزي معرفتك .
:cv10:
يعني المجال مفتوح للجميع .
وانا بديت بالصدفة بمنتدي خليجي بالدفاع عن عمرو خالد بقضية اثيرت هناك بتطعن بشخصة وان الانسان دة بحترمة جدا وحضرت لة محاضرات ومتابعة كويس وعارف معدنة الطيب ,
وبدءت الرحلة بعدها لهنا ,


انت حبيت فكرة المنتديات و كان واضح في شغفك و سرعة تطور أداءك فيها , تعليقك ايه ؟

عارف لما تبقي عندك انبوبة معجون اسنان اول متفتحها بتبقي مليانة علي اخرها وتعمل صوت بمجرد متشيل الغطا وعاوزة تفرغ الكبت بحاجة ؟ كدة بالظبط :biggrin:
تقدر تقول زي المنتديات كانت برنامج فك الضغط بالنسبالي ,
اكنك حملت فيلم لمدة سنين ومش حينفع حد يشوفة الا لما تفك الضغط بتاعة بالبرنامج هههههههههه
حتي دة طبعي بالحقيقة او بشغلي لما بهتم بحاجة بكون زي الانسان الآلي مش بركز غير فيها وبس معرفش اكون صاحب بالين .


طيب نخش بقى على أساس و لب الحلقة الي معمولة عشان تحكيلنا عن تجربتك السعودية , عشان نعرف الأعضاء بس , انت سجلت في منتدى سعودي و شاركت فيه و تمت ترقيتك لمنصب رفيع هناك , مراقب على ما أظن و كان ليك صلاحيات ادارية, قولي الأول انت اترقيت هناك بسرعة و لا أخدت وقت و الموضوع جه ازاي ؟

:078:
ماشي هههههههههههههه
انا فعلاً بشارك بكذا منتدي سعودي واللي مركز عليهم اتنين والثالث متقطع اتنين عضو فيهم والتالت خدت منصب اداري فية وتسليمي لوحة الادارة كاملة بشكل كبير ,
كنت بكتب فية من زمان بس مكنش عندي فية غير حوالي 600 مشاركة بس وصراحة مكنتش حابب اي مناصب عاوز اعيش براحتي زي باقي الناس .
بس اتعرض عليا بعدها دخول الادارة ورفضت صراحة وبمنتهي الحزم لأني مش حابب كنت اشييل مسئولية واعيش حر ,
لحد ما كلمني صاحب الموقع شخصياً علي الخاص وصراحة انا كنت احترمة جدا من قبلها ودة اللي كان مخليني اواظب علي الدخول للموقع من غير زهق ,
وبمنتهي الصدق الراجل كلمني وحسيت انة انسان محترم ومقدرت ارفض طلبة ,
فتم ترقيتي بصلاحيات كاملة كإداري بشكل مراقب عشان محدش يزعل من الناس القديمة ويمكن عشان الراجل شاف فية حاجة كويسة فأأتمني !



معاملة الأدمن و طاقم الإدارة و الاشراف عامة كانت طيبة و لا كان في اشكاليات ؟

والله يا طارق من غير مجاملة بالنسبة للأدمن دة انا اعتبرة اخويا بجد . سعودي متفتح جداً وراجل وأصيل لأبعد حد ,
الراجل دة لو كتبت فية صفحات ما تكفي والله وانت عارف لو مش كويس مش حتفرق معايا وهقولك .
يعني اجمع جميع صفات الرجولة وحطها فية طيب وجدع وشهم ومخلص واصيل وصاحب واجب كمان ,
وطاقم الاداريين جنسية مختلفة بنوته سوريه وبنوته سعوديه الجنسيه عاوز اقولك مثال للإخلاص والطيبة الاثنين نسمات شغال معاهم ومنتهي الحب والوفاء وما يشتروا الرخيص بالطيب واكيد شخصية الادمن كدة يبقي هيكون اغلب اللي حوالية طاقم محترم ,
وبالنسبة للإشراف كان فية شوية اشكاليات لاني طبعا اترقيت عليهم كلهم فجأة من عضو لإداري فمش كل النفوس زي بعضها ,
بس عاوز الحق اللي تعبني بالاول جامد المصريين :teehee: بس مش كلهم بس كتير منهم ,
لكن طبعاً بوجود طاقم اداري محترم مفيش بينه اختلافات الامور بتنظبط ,


حسيت بأي تمييز ضدك باعتبار انك صاحب جنسية مختلفة ؟
والله يا طارق التمييز كان بيطلع من ورايا :cv18:
بس عموماً انا اول مبتديت كإدارة إنتهجت نهج قوي بقرارات لمنع التمييز لأن الموقع فية جنسيات مختلفة من اول الخليج لحد المغرب لكن الاكثرية سعوديه ,
انت عارفني مبسبش اي شكوي او مشكلة الا لما اجيب قراراها فواجهت كل اشكاليات التمييز بالموقع بمنتهي الحزم بجميع الاقسام فظبطت الامور ,
ومنكرش ان الدافع كان الادمن لأنة كمان مكنش بيحب التمييز ولا حتي الاداريين معايا فالإركان لمنع التمييز كانت مكتملة ,
ونجحت للحد منة بس دة ميمنعش ان كان يوصلني جميع الشكاوي مني علي الخاص من البعض زي كدة (وش هالمصري الفرعون اللي الادمن مخلية يسوي حالة علينا)
(عشنا وشوفنا هالمصري يمشينا علي فتاويه)
(ملعون هالمصاري اللي يدافع عن المسيحيين)
(هالمصري مسوي حالة علينا يبي الدعس)
بس طبعاً دة من البعض وفية ناس كويسة جداً وفوق الوصف وما تحس انك تتعامل مع حد مش من بلدك ,
بالعكس منتهي الاخلاق والطيبة كل مكان فية وفية ,

طيب الاسئلة الي جايه مطلوب منك الصراحة التامة بدون مجاملة و بدون مراعاة شعور أحد , كلمنا بعشوائية مطلقة :biggrin:

شكلك ناوي علي خرابها يا سيدي المنتدي هنا فية جنسيات تانية وزوار هتخرب بيتنا وهنتشتم بمواضيع وعضويات جديدة ويقولك مصري طعمية ومصري فسيخ ومصري ريحتة توم وبصل:079:
قال يعني مش بياكلوهم يا اخويا ويدخلو الحمام زي اي بني ادمين يعملوا ببي:078:

قولي ايه هي أهم مميزات المنتدى هناك و المنتديات السعودية عامة ؟

بمنتهي الصدق وعشان اكون بدي كل واحد حقة .
هما يتميزوا عننا بالشعر والخواطر والكتابات الادبية .
وكمان بالابداعات اللي بتقوم علي برامج زي السويتش ماكس والسوني فيجاس وال3دي ماكس ,
وفيهم ناس مثقفة كتير زي هنا بس الحوار والنقاش والكتابات سواء نظام المقال او القضايا او الحوار عندنا اقوي بكتير ,


قولي ايه هي عيوب المنتديات هناك ؟
الكسل .
صراحة بس مش كلة طبعا فية وفية بس الغالب كسلانين وما يحبوا النشاط , وكل شيء ع الجاهز يعني كتير لو طال يأجر حد يكتبلة المشاركة مش حيتردد ,
يعني اغلب تريقتهم علي السودانيين والكسل مع احترامي للشعب السوداني بس هما كسلانين اكتر منهم ,
ودة يضايقك كإداري لما تقعد تحرك بالاعضاء كل شوية وكل خططك تفشل بتحس بإحباط مرة بعد مرة وبالاخر تكتشف انة طبع مش حاجة فردية !
واغلب المشاركات يسلمو ويعطيك الف عافية !
يبقي الموضوع يجبرك انك لازم تنطق وتكتب حتي سطرين وبردو لا حياة لمن تنادي هههههههه
فطبعاً اكبر عيب لما يكون عندك بالمتواجدون 50 عضو وكل 5 دقايق حد يرد ! هههههه طبعاً تزعل وبالذات لو نفسك الموقع يقوم ويكبر ,
وفية ناس نشيطة بس قليلين ,
والعيب الاكبر هو العلاقات هو بكل مكان طبعا مش هناك بس ,
بس عموماً من واقع احتكاكي بالمنتديات الخليجية عموماً العلاقات بتمثل لشريحة مشكلة كبيرة اوي ومتناقضة بنفس الوقت !
المشكلة الاساسية والكبري والرئيسية هي العلاقات المختلطة لأن اللعبة قواعدها مش شريفة ولا بتكون شريفة ولا هتكون شريفة علي ما اعتقد ,
ودة بيحصل بأي مكان طبعاً بس هناك المشكلة معقدة اكثر من هنا بمراحل .
علي قدر ان المجتمعات الحقيقية هناك شبة محافظة لكن علي النت الآيه بتنعكس وبصورة خطيرة تثير القلق .
بالظبط زي ميكون كنت حابس بني ادم 100 سنة بمكان حاطط لة شاشة يتفرج علي كل العالم لكن مش طايلة فلازم هيطلع بصورة مقلقة ,
ودة كمان بينعكس لما بيسافروا خارج دولهم ,
يعني كل الحاجات السلبية اللي بيتعمدوا اخفائها بمجتمعهم بيعملوها بمجرد ميحسوا بتحرر خارج مجتمعهم ودة بيبان بعلاقتهم بالإنترنت !
عيب اخر لشريحة ليست صغيرة ايضاً . مينفعش تتناقش بظاهرة سلبية بمجتمعهم لازم تخبي وتداري !
يعني الخوف علي المنظر بيخليهم يعملوا الغلط وينكروة وميعترفوش بية حتي لو الغلط صايبهم ! ودية مصيبة !
لما تبقي النار بتحرق بيتك ومش قادر تتصل بالمطافي او تقول الحقوني او علي الاقل تصوت وتعبر عن شعورك انك بتتحرق !
ودة بيبان علي الإنترنت وبيظهر بصورة الحمد والشكر ع الفاضي والفاضي والنص فاضي والربع فاضي !
تقدر تسمية هروب من الحقيقة بتبرير وتكبر !

من ضمن العيوب ايضاً القائمة علي التعتيم هي عدم فهم معني التعايش السلمي بين المسلم والمسيحي !
ودة ممكن يظهر بنوعيات الإطروحات !
ودة شيء طبيعي إذا كنت انت مسلم زية وممكن يتكبر عليك فمابالك بعقيدة مختلفة ؟ :762:
العيب الاكبر هو التمجيد بالحكام صراحة كما كان يمجد اللات والعزة ايام ابولهب وانا حتي الان بخفي شعوري . لأن أمانتي تحتم عليا اخفاء شعوري ولازم اكون محايد حتي لو موجوع من شيء لأن الأمانة لازم تكون اقوي من المشاعر عشان مظلمش حد نتيجة لعقيدتي الشخصية !

ايه المميزات عندنا في بنات مصر و العيوب برضو ؟

المميزات هنا ,
كتير والله
النشاط والثقافة والإبداع وحب المساعدة تفاهم الإدارة ومرونتها وتفاهمها ودة عكس السابق وكل القدامي شايفين دة جداً . ومش هكتب مميزات كتير عشان ميبقاش بمدح بحد علي حساب حد ,
لكل مجتهدٍ نصيب ,
بس ممكن اتكلم عن العيوب ..
العيوب هنا من وجهة نظري ممكن تكون صح او غلط , بس اعتقد انها صح .
طبعاً الآفه المعروفة عند شريحة كبيرة من المصريين بيفهم بأي حاجة ويتكلم بأي حاجة ويعرف اي حاجة ويحشر نفسة بأي حاجة ,
زي بالظبط لما تنزل الشارع تسأل علي عنوان مينفعش حد يقولك معرفش !
:hayth1:
يا عم الحج لو قولت متعرفش مش عيب ؟
مفيش فايدة .. المعلم نصه بالظبط :078:
ودة بيطفح ويوصل طبعاً لنقطة الإنغلاق . يعني اللي اتعلم القراءة بس تبص تلاقية لامم اللي مبيعرفش يقراءو وعامل عليهم عمدة وشيخ الفهيم !
وكل واحد من اللي قاعدين حوالية يمشي من عندة يعمل المعلم نصة علي اللي اقل منه !
:bb1:
وبالأول والاخر بنوصل لنقطة إنغلاق بالتواصل لأن شريحة كبيرة بتبني معلوماتها علي المعلم نصه !

عيب اخر .. الطفح الديني المتشدد بالاقسام ودة نتيجة عدم التفرقة بإستسقاء المعلومة من كل متخصص !
مع ان اللي بيجيلة مرض بيروح لدكتور مش للشيخ او للقسيس !!

عيب اخر .. وجود شريحة لا تقبل اي شكل تنظيمي يؤدي الي إرساء الحقوق !
يعني فية شريحة عاوزة تعيش ملكة نفسها محدش يقيدها بنظام !
مع ان المنتدي دة مجتمع لازم يكون منظم بضوابط وقوانين !

عيب اخر لمستة بالفترة الاخيرة .. شكاوي من التشدد بالقوانين والتنبيهات وبالمقابل شكاوي من المجاملات !
وطبعاً الاتنين عكس بعض ودة بيخليني اتأكد انها عيوب فردية وشخصية او نادرة ومش ظاهرة لأن السببين عكس بعض !
:bb3:

عيب اخر .. بعض مجاملات المشرفين لبعض الاعضاء او المشرفين زيهم ودية مش ظاهرة بس موجودة وشوفتها كذا مرة واللي هقفشه هطلع عينة انا منبه عليكم بقسم المشرفين (آآآه متشدد شوية) بطل تشتم بسرك ياللي بتقرا :078:
عيب اخر ... النقد بغرض التجريح وتجاوز الحد ,
وكفاية كدة عليكو لحسن تقولوا مبقولش غير عيوب مع اني كاتب مميزات اكتر من كدة
لا والله انتوا اي حد يبقي فرحان انه معاكوا وبينكم حتي اللي مش طايقيني بسبب الثورة قاعد علي قلبهم لحد ميقولوا احدٍ احد :749:
واوعدهم لو الثورة حققت اهدافها واللي بياخد مرتب 300 جنية وبتضحكوا علية انة يسكت عشان عجلة الانتاج اللي هتزودة 10 جنية بس ! لو بقي ياخد 1000 جنية مرتب وقتها هبقي كويس معاكوا
:712:


كلمني عن الغرور , أعتقد دايما بشوف اسماء مغرورة في اي منتديات بس أعتقد بتزيد في المنتديات السعودية , انت ايه رايك ؟

ايوة عندك حق صراحة ودية ظاهرة بكل المنتديات الخليجية مش صغيرة اغلب الالقاب بتمجد بالكبرياء والتعالي .
يعني تلاقي مثلاً هامة - شموخ - كبريائي فوق الوصف - هامات السحاب - شموخ ملك - هيبة امير .
عرف ديك - فرخة مش بتبيض - معزة مش بتمآآء ماااء _ بطاطس بالكاتشب .. وهكذا
المهم لازم تلاقي اللقب عاوز يحط علي راسة ريشة عن اللي حوالية حتي لو من نفس جنسيتة .
انا بقول نصدرلهم ريش فراخ ونخلص ؟
او يغيرو الترقيات بدل مراقب عام وفوقية نجوم يبقي ديك تنك احمر وبدل مشرف قسم يبقي فرخة شمورت وبدل عضو جديد يبقي بيضة محتاجة تفقس وصورة الاداري تبقي فرخة كبيرة راقدة علي بيض اللي هو الاعضاء الجدد ,
ونعملهم قسم البوتجاز بالمرة عشان اللي يغلط يدخل المحرقة :vb30:
يا عم هتودينا بداهية قولنا وهنتشتم ونتبهدل بسببك :078:
طبعاً انا بتكلم عن شريحة معينة لان ليا اصدقاء خليجين زي اخواتي واخواني واكتر والله العظيم واحبهم واحترمهم والا مكنتش اتواجد وسطهم طبعاً .
بس والله هو طارق اللي متعمد ينكشني عشان عارفني مش حسكت :bb3:

كلمني عن الاختلاف بين التجاوزات هنا و هناك ؟

مفيش اختلاف كبير بالنسبة لتوعيات الاقسام اغلبها واحد .
التجاوزات هناك 90% منها بسبب عدم الاختلاط ودية موجودة عندنا طبعاً بس هناك الضعف ,


الأخلاق هنا و هناك ؟

لا الأخلاق اخلاق شخصية ومينفعش احكم علي فصيل بسبب مجموعة حتي لو كانت اكثرية لأن انا عندي الواحد الكويس يشفع لمليون ,
سواء هنا او هناك ,

الحب هنا و هناك ؟

بص يا سيدي ..
مش هقدر احصرها برد علي سؤال بس هقولك بشكل مختصر ومش شامل طبعاً كل قاعدة وليها شواذ ,
عموماً المراهقة مبتختلفش باي مكان هية هية مراهقة بردو ..
طبعاً الحبيبة هيزعلوا ويقولوا مراهقة اية يا عم تفهم اية بالحب انت :bb3:
ممكن يختلف نظامها لكن بالاول والاخر علاقة بين ولد وبنت .
بس عموماً الحب بالمواقع المصرية غالباً مبيخرجش عن اطارات معينة ..
يعملك دكتور نفساني - يعملك او تعملك مصدوم او مصدومة - تعملك ست صاحبة مرض - يعملك متدين عشان يقفش الفرخة - تعملك متدينة عشان تقفش الديك - يعملها شلبي ابوقلب حونين وعاطفي - تعملة سنية ارجوك متقربليش
:gathering:
وآلخ ..

وبالنسبة لهناك
الوضع يختلف شوية ويتشابة بردو بحاجات يعني ممكن يكون متجوز 3 ولا اربعة ويحبلة 16 وهي تبقي عارفة - تعملة ست صاحبة مرض - يقرطسوا بعض ويبقوا عارفين ومطنشين - يطلب صورها عشان يمسك عليها زلة ويهددها ليقول لأهلها يا اما تقابلة - نهاية العلاقة لازم تكون مأساوية جداً وممكن تتحول لمصايب - وآلخ

النقاش هنا و هناك ,,في فرق ؟

كل مكان فية وفية ثقافات طبعاً بس الميول المصرية نقاشية اكتر من الخليجية بنسبة كبيرة ,


الوعي السياسي هنا و هناك ؟

هناك فية مشكلتين هما السبب (اخفاء وعدم مواجهة الواقع) ودة بيتسبب بالتعتيم المتعمد (تقديس الحاكم كـ آلآله)
يعني مش بيعتبروة بشر زيهم وان حكمة عليهم حكم موظف شغال عندهم وممكن يمشي لو فشل زي اي انسان يفشل بشيء !
وفية عادات وتقاليد بتطغي علي الحقوق الشخصية والفردية , ممكن تكون كانت بتناسب الماضي لكن التطور والزمن مش بيقف والجمود بيجيب نتيجة عكسية ,

وبالنسبة لهنا ,
احنا لسة بردو كعامة الشعب يعتبر سنة اولي سياسة ودة شيء طبيعي 60 سنة حكم عسكري يعني اسمع ونفذ ولو اتكلمت هتتكدر ,
فلما تيجي تقول لواحد خد السندوتش دة بتاعك ومن حقك !
فيقولك لأ انا عاوز حتة بس !
يا عم كل واشبع دة بتاعك ! تتفاجيء انة بيصنفك ويظهر التمييز !
عموماً لسة شوية علينا مادام اللي بيروح يكشف عند دكتور مسيحي وبعد ما يعالجة يشكرة ويجي بعدها ميقولوش كل سنة وانت طيب يبقي عندك مشكلة بالمفاهيم والثقافة والتعايش مع ابناء الطائفة الواحد او الطوائف المختلفة .
والعكس اللي يشوف حد بيدافع عن حقوق الاقلية بمصر ويروح بعض الكنائس يسمع انهم اعدائهم يقولم يوقف لة مصلحة ولا شغل . اعرف ان لسة شوية علي فهم مبدء التعايش والتسامح !
لو الشعب دة عرف ان الدكتور بتاع مرضي والمهندس هو اللي بيعمل الكباري والمحامي هو بتاع المحكمة والشيخ هو بتاع الدعوي والقسيس هو بتاع الدعوي هيبقي ابتدينا نتقدم .

الجو العام كان مع أو ضد مبارك أثناء و بعد الثورة ؟
الحق الجو العام كان مع المخلوع لأني زي مقولت الحاكم عندهم مقدس حتي لو شافوة ماسك ضحية وجثة بيمثل بيها !

و هل كنت راضي عن وعيهم و فكرهم السياسي عامة ؟

مش الاكثرية طبعاً زي ما فية عندنا .
بس كان فية ناس متفهمة وواعية جداً طبعاً بس زي مقولتلك الخوف هو المحرك الاساسي ,
وعموماً نظرية المؤامرة لو عندنا 10% هناك الحكام مخلينها 20%

قولي شغفهم ايه ؟

والله الارجيلة هي الشغف الاول للشباب (الشيشة يعني) :741:
بعدها الكورة .
بعدها التفحيط .
وطبعاً العلاقات زي اي مكان .

لو قولتلك ايه الي بيريحك هنا عن هناك هتقول ايه ؟

الوعي السياسي والنشاط .

و لو سألتك العكس ,, ايه الي يريحك هناك عن هنا ؟

التنوع بالاجناس من كل الدول وليا اصدقاء هناك احبهم جداً سواء سعوديين مغاربة سوريين فلسطنيين .
صراحة احبهم جداً واحترمهم .

قدرت تندمج معاهم بسهولة ؟

لا بالنسبة للإندماج الحمد لله عندي القدرة علي إفراغ ما اريدة بأكثر من شكل بحيث يتوائم مع المكان وكمان اكون انا مرتاح اني فرغت الشيء اللي محتاج افرغة ,

و هل قدرت تعبر في مواضيعك بالعامية بشكل مطلق لو على سبيل المثال الافيهات أو التشبيهات الي بيكون الغرض منها الضحك , هل كان في عدم فهم و لو جزئي ؟ لأن أعتقد دا بيشكل نسبة كبيرة من الاندماج ؟

والله اكتر حد كنت اموت من الضحك معاه الادمن وهو سعودي لأن دمة خفيف جداً زينا
يلية الجنسيات التانية وخصوصاً المغاربة دمهم خفيف زينا جداً
ولو فية جزئيات مش مفهومة بالافيهات دية بترجع ليك انت هتترجمة للي براك ازاي :biggrin:

مع اختلاف العادات و الفكر , هل دا كان عائق في طرحك للمواضيع ؟

لا والله كنت بكتب بطبيعتي وبراحتي جداً ,
وكمان فية هناك ناس مثقفة وتشجعك علي النقاش هما قليلين بس نوعية ممتازة وفوق الوصف ,

ايه الي اتعلمته و عرفته من تجربتك السعودية ؟

عشان اختصرلك ,
لازم تكون انت هو انت سواء هنا او هناك ومتغيرش نفسك مادام الادارة محترمة ,
وعموماً لو انا ربنا كان كارمني بشوية كرم بالشخصية زادت بعد تعاملي مع الادمن السعودي لأنة شخصية كريمة جداً مع الاعضاء ,

لو تسنت ليك الفرصة لتجربة سعودية تانية هتكررها و لا هتكتفي بالتجربة الماضية ؟

حالياً لأ مش حقدر عندي قضية بدافع عنها واللي يحرم ع البيت يحرم ع الجامع .

كلمة أخيرة لو حابب تقولها
علية العوض ومنة العوض فيك يا طارق هتخرب بيتنا
:hayth1:
هههههههههههههه
انت عصرتني يا راجل والله بالاسئلة دية وانا بحسبهم سؤالين تلاتة هههههههههههه
بس البرنامج حلو واول مرة تستضيفني انت شخصياً بموضوع خلية للذكري بئي :biggrin:
عارف لو اتشتمنا بالاقسام ولا المواضيع ولا حد دعي علينا هتبقي انت السبب :078:
انا عارفك بتنكشني وانا مبصدق معاك ونقلبها مراجيح
بقولك اية صح
انت دفعت تمن الميكروباص كاش لواد حبيب ولا علية اقساط ؟
:769:

يلاا اشوفكم علي خير ويارب لو حد زعل مني يجيلة فسفوسة بصباع رجلة
:gathering:

نورت يا ضياء و التعليق للأعضاء ,,

[غزاوية وافتخر]

اول شي مبسوطه لاني اول واحده بالساحه وارد علي التوبيك
اللي اسموا من دون اسم ههههههههههههههه..
بجد توبيك رووووووعه ويسلموا افكاااااااااااارك يا ابو الافكااااااااار يا دكتور
(مابئر)
حوار كان في قمه الرووووووووووعه وكلام مستر ضياء عجبني وخصوصا
عرف الديك والمعزة مش يتماء ههههههههههههه
ياعيني علي ردك ..
وانا بعكس كلاموا بالنسبه للنشاط انا شايفه ماشالله عليه المنتدي متل خليه النحل شغال؟؟
وتقريبا اغلب الاقسام فيها شغل ونشاط..بس معاك بالردود اغلبها يسلموا وشكرا..
ياريت تقضي علي هالظاهره..
والله حوار كان شيق وحلووووووووووووووو..
بانتظر لقاء مع عضو تاني ؟؟بس بالراحه عليهم تارء دنته بتعصرهم بجد..ههههههههههه
يعطيك الف عافيه طارء..وضيفك كان خفيف الظل..
تحياتي

[طمطم]

ههههههههههههههههههههههههههههههههههههههههه
حلقة جامدة جدا انا من كتر الضحك قعدت اعيط
واجابات ضياء تموت من الضحك اصلا
وفكرة جامدة اوى بدون برنامج دى