احلام دمرها القدر

[۩۩ سيد الشرقاوي ۩۩]

(( احلام دمرها القدر ))


في البداية احبائي اود ان اطرح عليكم روايتي المتواضعه الاولى علها تنال اعجابكم ...
قد لاتكون طريقة سردها مثل الروايات الاخريات وباراتاات عديده ولاكن ان شاء الله سوف انزلها متتاليه كل يوم اثنين باذن الله

وهي بعنوان (( احلام دمرها القدر ))


صحت من نومها على الساعه 7 المغرب ناظرت ساعة الحائط ..فزت بسرعه
من سريرها وركضت لدورة المياه تتوضى طلعت بعد خمس دقائق ولفت جلال
الصلاه وصلت العصر والمغرب .. انتهت من الصلاة ناظرت المرايه رفعت يدها لشعرها تلمه وترتبه نزلت يدها لبجامت النوم وعدلتها بكسل وطلعت
كانت اجواء البيت هدوووووووء كالعاده نزلت خطوه خطوه سمعت صوت طالع من غرفة ابوها المقعد انعقد حاجبها باستغراب من اللي هنا هالحزه ومن فتح الباب للزائر وكيف عرف ان ابوها هنا وبهالغرفه خاصه .. قشعر جسمها خوووف
قربت كم خطوه لغرفة ابوها سمعت صوت رجل في الثلاثين مع صوت ابوها

الرجل : والله ما اقدر اكون عندك هاليومين تعرف ظروف العمل ياعم
ابو جيانا : ياخساره والله ياولدي تعودت عليك وعلى سوالفك
الرجل : معليه الايام بينا والجيات اكثر
ابو جيانا : ان شاء الله
الرجل: توصي شي ياعم
ابو جيانا : سلامت قلبك ياجعل عمرك طويل
الرجل وهو يحب راسه: مع السلامه
ابو جيانا : فمان الله

جيانا وهي مازالت معقده حجانها وفيها ربكه ركضت ورى باب الصالون بخطوات خفيفه علشان تهرب من هالرجل الغريب ومايقدر يشوفها

بعد ماطلع وسمعت صوت الباب تسكر وتنفست براحه ومشت ناحية غرفة ابوها
وطرقت الباب : بابا .. بابا
ابو جيانا وهو يدس الفلوس تحت مخدته : تعالي يابنتي
دخلت جيانا ببتسامتها المعهوده واللي تعود عليها ابوها : السلام عليكم
ابو جيانا : وعليكم السلام هلا وغلا تعالي تعالي
باست راسه ويدينه وجلست جنبه على السرير : كيفك اليوم بابا
ابو جيانا وهو مبتسم وماسك يدها : الحمد لله يابنتي انتي كيفك وكيف جامعتك
جيانا : الحمد لله كويسه وكلو تمام
ابو جيانا : ايه يابنتي شدي حيلك ابغاك ترفعين راسي بين هالعالم .. مالي في هالدنيا الا انتي الله لايحرمني منك يارب
جيانا تبوس يد ابوها : ولا منك يالغالي .
ابو جيانا : هاه سولفي لي عن يومك كيف قضيتيه
تنهدت جيانا وفي بالها مليون كلمه واستفسار عن هالرجل اللي كان من دقايق مع ابوها وقالت : معليه يابابا مشي حالك محاظرات وجمعت بنات وسوالف وضحك وطلعت من الجامعه ونمت وهالحين تو اصحى وكاني انا اللحين بين يديك .
ابو جيانا لاحظ عليها ان فيها شيء : وراك يابنتي تتنهدين كذا صاير شيء
جينا تعدل جلستها قبال ابوها : لا يابابا بس اممممم
ابو جيانا بخوف : علامك ياجيانا
جيانا بتوتر : لا بس حبيت اسألك ..مين كان عندك قبل دقايق
ابو جيانا ناظر بنته لفتره وثم قال : رجال وانتي وش تبغين تسألين
جيانا زاد توترها : كيف يعني رجال ومن فتح له الباب وكيف دخل وانت مقعد كذا
ابو جيانا عصب : جيانا وبعدين
جينا وقفت وهي معصبه : لا يابابا ماني مستعده يدخل ويطلع على كيفه . انت ماتخاف من هالرجال يغدرك في بيتك وبنتك وانت كذا لاحول لك ولا قوه
كيف ترضاله وانا موجوده هنا بروحي لا اخت ولا اخ ولا ام .. وانت عاجز عن الحركه
ابو جيانا عصب زياده : بس يابنت ماتحترمين ابوك ترفعين صوتك عليه كذا
جيا نا بدت دموعها بالنزول : لايابابا ..مو كذا والله .. بس .. انت عارف انه مايصلح يدخل ويطلع على كيفه بدون اذن وانا موجوده وبعدين من سمح له
ابو جيانا بتحدي : انا
جيانا بتنجن من ابوها : كيف .. انت راضي ان رجل غريب يدخل بيتك .. واصلا هذا منو اللي مايستحي على وجهه
ابو جيانا صرخ : جيااااااناااااا
جيانا متماسكه : بابا منوا
ابو جيانا : مالك شغل
جيانا : بابا لاتخليني اتخذ قرار يضرنا وهالرجل
ابو جيانا وعيونه ناااار : ايش راح تسوين ..تهدديني ..تهددين ابوك ياللي ماتنتسمين
جيانا بدموع : لا يابابا ..بس راح اخلي الشرطه تراقب البيت من بعيد لجل اكشف هالرجل
ابو جيانا : لا ياجيانا تكفييين الا هذا الرجال لاتتعرضين له
جيانا بدهشه : وليش ان شاء الله
ابو جيانا بانكسار : بس من دون ماتسألين
جيانا بحنيه حتى يلين ابوها : طيب منوا شنوا اسمه
ابو جيانا صمت لمده وقال بتردد : هذا فواز والله رجال طيب وينشد به الظهر
جيانا بستفهام : ومين فواز
ابو جيانا تنهد : هذا يابوك اللي وقف معي وقفة رجال ماوقفها احد
جيانا : وهالرجال الشهم يدخل بيت مو له بدون استئذان
ابو جيانا عصب مره ثانيه : جياااناا وبعدين معاك رفعتي ضغطي خلاااص اذلفي عن وجهي
جيانا عصبت : اذلف عن وجهك وانا ما اعرف منوا هذا اللي يدخل في البيت بالطول والعرض ولا هامه ان فيه حرمه ماتجوز له
ابو جيانا ناظرها بنظرات مافسرتها وقال : هو ما يدري انك معي وان عندي بنت بالاساس
جيانا صدع راسها ماتدري من وين تجي مع هالاب كل ماقالت انحلت تعقدت وقالت : على اساس كذا فالها ولد ابوه
ابو جيانا وهو يمسك راسه : جيانا والله صدعتي راسي خلاااص عاد
جيانا بتوتر : بابا انت تفهم ايش معنى يدخل رجل عندك وعندك بنت ومابينكم صلة قرابه والكل عارف ان عندك بنت ..الناس ايش بتقول .. واحنا في ديره مو ديرتنا بابا افهمني شوي الله يرضى عليك ... وبعدين هالرجال لو شافني ايش بيقول لك اكييد راح يضن فيك انت اول صح ولا لا . كيف يصدق ان انا بنتك وانت ابوي وانت ماعطيته خبر ان هنا حرمه لازم يحذر ويستاذن في الدخول والله ربي مايرضاها يابابا.. وبعدين هو حظرة جنابه من متى يعرفك
ابو جيانا ناظر بنته وهو مكسور : من سنه
شهقت جيانا : من سنه وانا اخر من يعرف
ابو جيانا نزل راسه وهو مافي يده حيله .......
جيانا بحذر : بابا
ابو جيانا ناظرها : نعم
جيانا : ايش يبغى عندك من سنه
ابو جيانا : الشاهد يابنتي انه رجال طيب وماعمره دخل الا وهو معطيني خبر عن وصوله ويسأل عن اخباري وحالي و ..... سكت
جيانا بخوف : وايش يابابا كمل
ابو جيانا بغصه : ويبدل ملابسي ويروشني ويبخرني ويصرف لي علاجي وماقصر ولد الناس
جيانا منصدمه وهي تناظر ابوها
ابو جيانا تنهد بدموع : جيانا علامك
جيانا بدموع تسيل : بابا وكل هذا ومخبيه علي
ابو جيانا : ...صمت
جيانا منفعله : بابا وانا وين كنت هالفتره وليش ما اشوفه الا اليوم ... ليش تخبي علي انا مو بنتك المدلله والحبيبه والوحيده ليش يابابا كل ما اسئلك مين سوى كذا تقول انا ومن فعل كذا تقول انا وانت مو قادر ابدا على هالاشياء كلها ...بكت ..........
ابو جيانا ببكي : جيانا جيانا تعالي .. تعالي بحضني والله انا من دونك ولا شيء
طلعت جيانا تركض من غرفة ابوها تبكي وتسندت على جدار الغرفه من برى وبنفس الوقت في الصالون ودموعها تنزل بغزاره وتشاهق : ليش يابابا ليش

جيانا بنت حبوبه وطيوبه مملوحه بشرتها بيضاء بحمره قصيره نوعا ما وجسمها حلو مرتوي وجهها دائري عيونها كبااار وشفايفها صغار مره توووت
خشمها حاد تجنن حجانها مقرونه بشكل خفيف طالعه عذاااااااااب البنت
عمرها 20 ثاني جامعه تخصص فن وتصميم ....
كان ابو جيانا وحيد امه وابوه وكان قائم على برهم لحد ما توفاهم الله بعمر الشيخوخه .. زوجه ابوه من بنت صديقه ام جيانا
كانت ام جيانا لها اخت واخ مع امها وابوها وانتقلوا بعد زواج ام جيانا لدولة ****************** للتجاره قديما وبعدها صارت الحرب .. ****************** والعراق وتوفوا في ذلك .....
وظلت ام جيانا فتره ماحملت حوالي 12 سنه وكان زوجها يموت فيها ومتحمل لجل عيونها ولا تاثر بالحاح اهله للزواج من ثانيه ..كان لايريد غيرها زوجه ...... وبعدها حملت وانجبت جيانا كانت نفسها ببنت وتسميها هالاسم وبالفعل جات جيانا ورحلت امها ... واصبحت جيانا ....
وحيدة ابوها بعد وفاة امها لها اثناء الولادة .. وبعدها رباها ابوها لحد ماصار عمرها 11 سنه وبعدها صار على ابو جيانا الحادث وانشل ..واصبح مقعد ... جلست عند جيرانهم فتره مرض ابوها .. وبعد سنه انتقل ابوها من منطقته بالرغم من رفض اهل الحي لاكن خرج في اعتقاده من الاحراج لمنطقه اخرى تابعه لمناطق الرياض واقام فيها ومعه بنته وكان القائم على شؤنه خادم على مسؤوليته ويقوم بكل مايحتاجه ابو جيانا لحد ماتعرف فواز على ابو جيانا من الخادم المسؤول وبعدها تكفل فيه بعد محاولات منه ورفض من ابو جيانا وبعدها قام فواز بكل شؤونه واعطى الخادم المسؤول تاشيره خروج وسفر وظل فواز منذوا سنه كامله القائم على ابو جيانا ... وكان يحظر هالفواز كل يوم او يوم ورى يوم يروش وينظف ويبخر ابو جيانا وظل على هالحال كل صباح من تروح جيانا للجامعه يجي فواز لحدود ساعتين وثلاث عند ابو جيانا باتصال منه يطبه بالزياره في هالوقت خصوصا .. حتى يبعد النظر...
لحد ما اكتشفت جيانا الموضوع من نفسها .. وكان فواز جاي ويعطي ابو جيانا مصروف اذا احتاج وكانت لاول مره يجي المغرب لانه ما مر من يومين على ابو جيانا وكانت لحظه اعترافه لبنته بهذا الرجل الغريب .......

جيانا مازالت تبكي بصمت وتناظر الارض ويدها خلفها كانها طفله ....
ابو جيانا بالم : جيانا حبيبتي وين رحتي
جيانا رفعت راسها ومازالت دموعها مبلله خدودها وعيونها حمرااااء من بكاها المر ..... تحركت ومشت لغرفه ابوها بصمت ووقفت عند باب الغرفه ووهي تناظر ابوها المقعد على السرير ..ظلت فتره بسيطه تناظره ودموعها تسيل ....رفع ابوها راسه وناظرها بأسى وقال : قربي تعالي وانا ابوك
ركضت جيانا لبوها بدمووووع وزادت شهقاتها وحضنت ابوها : ليش بابا ليش هئهئ هئ هئ .... تبكي بحرقه وكانت دموعها تبلل صدر ابوها ولحيته
كانت مثل الطفل تتكلم وهي تبكي : بابا هئ هئ لاتروح وتتركني هئ بابا احبك موووت والله احبك موووت
كان ابو جيانا دموعه مو اقل منها كان يحضنها بقوه ويقربها منه يحسسها انه قريب منها ولايمكن يتركها لأين كان ...
ابو جيانا بتهدج دموع : روح بابا .. جيانا
كانت ماتبغى ترد وتزيد في احتضانه كان وجهها بين صدره ولحيته
ابو جيانا : جيانا حبيبتي خلاص والله بقولك كل شيء بس يكفي دموع .. والله قطعتي قلبي
تركها لحد ماهدت من نفسها ورفعت راسها وناظرته في عيونه ...بادلها نفس النظره بكل حنيه ورقه الاب واخذ منديل ومده لها وقال : جيانا
اخذته ومسحت عيونها ودموعها وهانت تتنهد مثل الاطفال بين فتره وفتره
ابو جيانا وهو يبتسم بالم : عسوله
جيانا نزلت دموعها مره ثانيه ...مد ابوها يده بسرعه ومسح دمعتها وقال : خلاص ياعمري وربي ما احب اشوف دموعك.. كيف وانا السبب فيها
جيانا بصوت مبحوح وهي حاضنه يديه بين يديها الصغار الناعمه : بابا ممكن سؤال
ابوها : سمي
جيانا تنهدت وقالت : امم كيف عرفته
سكت ابو جيانا فتره وسرح في هذيك اللحظه والموقف وبداية ماتعرف على فواز ,,, وقص السالفه عليها
كان جالس على عربيته عند الباب والخادم جالس جنبه ... هذيك اللحظه كان ماشي فواز من عندهم ورايح للمسجد كان يوزع فطور وكان عصر اليوم الخامس من رمضان .. كان مشارك في عمل تطوعي لفت انتباهه هالرجل المقعد وخادمه وغير مسيره لهم وسلم
فواز : السلام عليكم
ابو جيانا : وعليكم السلام
فواز : كيف الحال ورمضان مبارك عليكم وكل عام وانتم بخير
ابو جيانا : علينا وعليكم يالطيب وانت بالف صحه وسلامه
فواز متلعثم : اممم معليش ياعم محتاج شيء تبغى شي احنا اخوانكم من الندوه العالميه للشباب الاسلامي واحنا في عمل تطوعي لهذا الحي بافطار صائم
ابو جيانا مبتسم : مشكووووور الله يعطيكم العافيه ويبارك فيكم ويرفع شأنكم
فواز وهو يمد الافطار : تفضل ياعم افطار صائم
ابو جيانا : مشكوووور ياولدي والله ماتقصر وما احنا في حاجه احنا بفضل ونعمه .. وعطه اللي محتاجين
فواز ببتسامه : الله يعافيك ويشفيك ياعم ويخليك لعيالك
ابو جيانا اختفت ابتسامته فجأه ..ولاحظه فواز بس ماعلق ... تردد وبعدها قرر يمشي : مع السلامه
ابو جيانا : مع السلامه

بعد يومين مر فواز ومعه ثلاثه من المتطوعين يوزعون على مساجد الحي انتبه لنفس الرجال وهو جالس على عربيته ويناظر الاطفال اللي يلعبون كوره
تنهد فواز بينه وبين نفسه هالرجال من اول مره ماغاب عن باله حاس ان فيه شيء
استأذن من الشباب اللي معه ومشى ناحية ابو جيانا والباقين كملوا عملهم : السلام عليكم
ابو جيانا سرحاااااان بحااال الدنيا
فواز قرب منه ورفع صوته : السلام عليكم ياعم
انتبه ابو جيانا : هلا وعليكم السلام
فواز ببتسامه محرجه : كيفك اليوم وكيف رمضان معك والصيام
ابو جيانا ببتسامه عذبه : الحمد لله بفضل من الله ياولدي
فواز بتردد : عم معليش بسالك وين عيالك علامك جالس بروحك من هاك اليوم وانا حاس ان فيك شيء
ابو جيانا تنهد بحرقه وسكت
انحرج فواز وتمنى انه ماجاء ولا ساله : معليش اسف على الازعاج
ابو جيانا بسرعه : لا والله ياولدي مابه احراج ولا شيء بس حال الدنيا المؤلم يوجعك
فواز عقد حجانه وجلس على سطل بويه قديم : عسى ماشر
ابو جيانا : حكى له القصه من اولها لآخرها بستثناء انه ماذكر ان عنده بنت حاليا في البيت لانه خايف عليها
فواز حن وشفق على حاله : الله المستعان الله يعوضك يارب خير من ذلك
ابو جيانا : معليش كدرت خاطرك
فواز بحزن : لا والله بالعكس ياعم انت انسان فيك خير وربي ان شاء الله يحبك علشان كذا الله ابتلاك ومالك الا الصبر .. ومن صبر ظفر
ابو جيانا : اللهم آمين ..... ماقلت وش اسمك
فواز بحنان : معك فواز
ابو جيانا ببتسامه: ماشاء الله والنعم والله
فواز بحب للشخص اللي قدامه : الله ينعم بحالك يارب
ابو جيانا : تفضل حياك
فواز وهو يوقف : لا والله مشكور والله يا ابو ... وسكت
ابو جيانا مبتسم : معك مشاري
فواز ببتسامه : والله ياعم مشاري اني مشغوووول وان شاء الله اقابلك مره ثانيه
ابو جيانا : الله يستر عليك
فواز : مع السلامه ....... ومشى للشباب يكمل عمله

وبعد اسبوع تطورت العلاقه بينهم الاثنين وحلف فواز انه اللي راح يتكلف بكل شيء يحتاجه عمه مشاري ويقوم بكل شيئ كان يسويه الخادم وسفر الخادم على حسابه ومن ذاك اليوم لليوم وفواز ماترك ابو جيانا ... اعطاه ابو جيانا نسخه من مفتاح البيت لانه اذا جاء بالصبح لازم يدخل وماراح احد يكون موجود علشان يفتح له الباب ابو جيانا مشلول ومقعد على كرسي وجيانا تداوم بالجامعه واعطاه مشاري النسخه ورقم جواله وصاااار مثل ولده اللي يلازمه ويقضي لوازمه وحوائجه

ابو جيانا وهو يناظر بنته : وهذي كل القصه لحد جيته اليوم
جيانا مو مصدقه ابد شيء حاسه انها في حلم وجاها شعور ناحيه هالفواز ماتعرف وشهوا ودها تواجهه وتشكره على تحمله ابوها قالت : طيب بابا
هو اللي كان يتقضى الاغراض .. مو عامل السوبر ماركت
هز راسه ابو جيانا بالموافقه .. وبصمت
تنهدت جيانا وظلوا ساكتين فتره وكل واحد سرح بعالمه ... لحد ماصحت جيانا عل ابوها اللي يكح
جيانا بخوف : بابا انت تعبان
ابو جيانا : فلونزا شوي متعبتني
جيانا : من متى
ابو جيانا : من البارح .... بس اخذت علاج قبل شوي
جيانا ناظرت ابوها وقالت : اعطاك علاجك فواز صح
ابتسم ابو جيانا وقال : وش دراك
جيانا بشوي غيره : ومنو غيره هالفواز يعني
ضحك ابوها عليها وحضنها بقوه : والله انتي اغلى من فواز بس بعد فواز مثل ولدي وعزيز على قلبي
جيانا : بابا مو كان فواز صار الغالي
ابو جيانا يضحك
جيانا وهي تناظره وتبتسم : دوم يارب هالضحكه
ابوها : امين وياك
جيانا : بابا
ابو جيانا : روح وقلب ابوك
جيانا بتردد : بس لازم تخبره ان هنا حرمه موجوده .. يمكن يوم من الايام ما اداوم وتكون الصدفه بمعرفته اني موجوده
ابوا جيانا باسف : بس يابنتي انا خايف عليك ... وانتي عارفه الشيطان
جيانا : لا يابابا فواز ان شا الله مو من هالاشكال ... وبعدين ليش ماخفت على من الخادم يوم كان هنا
ابوها : الخادم يابنتي في غرفته برى بالملحق وانا دايم معه برى واشوف وين يروح ووين يطلع وضامنه ان شاء الله
جيانا : وفواز
ابوها : فواز رجال والله والنعم وهم واثق فيه ان شاء الله بس انتي عارفه الناس ايش راح تقول مدخل ولد غريب لبيته ومعاه بنت والناس ماترحم ابد يابنتي
جيانا بتردد : يعني مو خايف من فواز
ابوها : لا يابنتي مو كذا .. بس لازم الحذر ابليس مازال حي وموجود وكون فواز يدخل بيتي فمهما كان لازم اخاف عليك ومن الناس بعد
جيانا بحيره : بس يابابا مايصير لازم يعرف علشان مايزورك الا باوقات ما اكون موجوده مو مثل اليوم وقت المغرب ..فرضا دخلت عليك وهو موجود او دخل علينا واحنا جالسين مع بعض
ابوها : ان شاء اذا جاء بعد يومين راح اخبره
جيانا : وليش ... انت من راح يرتب امورك في هاليومين
تنهد ابو جيانا وسكت
جيانا بحزن : خلاص بابا انا راح اقوم بكل شيء
ابوها بسرعه : لاياجيانا مراح تتحملين ثقل جسمي ووانا مستحيل اكشف ملابسي عندك
تنهدت بالم وسكتت وبعدها : طيب ايش راح نسوي في هاليومين
ابو جيانا : مثل كل يوم
جيانا بحيره: طيب انت كيف بتستحم وكيف تبدل
ابوها بحنيه : بتتعدل ان شاء الله وبيسرها ربي
جيانا بتساؤل : وين مسافر
ابوها : مو مسافر بس مشغول بالعمل
جيانا : وين يعمل
ابو جيانا : يشتغل مع ابوه في الصباح في الشركه وفي العصر في الندوة العالميه للشباب الاسلامي متطوع فيها
كانت جيانا تناظر ابوها وهو يتكلم وقالت : ابوه يعرف عنك شيء
ابوها : لا
جيانا بشده : ليش
ابوها يهديها : جيانا علامك ..الولد يسوي عمله لوجه الله مو كل شيء ينقال
جيانا مازالت متوتره : يعني يسوي فيك خير ويتصدق من امواله علينا
ابوها بهدوء : لا مو كذا
جيانا بخنقه : اجل شلون
ابوها بوقار : ماقد سمعتي ان فيه ناس يعملون لوجه الله ويحتسبون الاجر
قاطعته : يحتسبون فينا ليش على باب الله وفواز هذا شفقان الحين عليك مو
ابوها بشده : جياانااا عيب هالكلام الولد محترم وماعمري حسيت انه يسوي شيء وهو منقرف ولا متكبر ولاعمري لمحت الشفقه في عيونه ابد
جيانا هذا فواااز وما ارضى عليه ابد حطي في بالك انه مثل ولدي وغالي على قلبي .. آآآه تعال يافواز واسمع ... والله بيزعل عليك ياجيانا مايرضى على نفسه ولا علي ابد
جيانا راسها بنفجر :وهالفلوس منين يجيبها وليش
ابو جيانا : انا حاس انك تعبانه بعدين نكمل
جيانا بعناد : لا انا مافيني الا العافيه .. بس ليش يجيب الفلوس
ابوها بتردد : لك
جيانا انصدمت : لي انااااا .. مو قلت انه مايعرف ان عندك بنت
ابوها بحسره : ايوه ..انا اللي اطلبها منه
جيانا عصبت : لييييييش يابابا .. ايش الله حادك على هالشيء .. مو غصب ادرس ولاآكل ولا البس ...اذا ماكان مومن تعبي ولا من رصيدك .. يابابا انت تعرف اني ما احب العطيه والصدقه انا مو بحاجتها ..... بكت ........
ابوها حاس انه غلط : بس يابنتي منين تجيك الفلوس وتشترين اغراضك الناقصه ولبسك للجامعه لازم اعطيك
جيانا تبكي .....
ابو جيانا بحزن كئيب : يابنتي انا آسف اذا كنت غلطت بس والله غصب عني لازم اسوي كذا
جيانا تهز راسها وهي تبكي
وقفت وناظرت ابوها اللي يبكي بصمت وقالت من بين دموعها : بابا تحتاج مني شيء
ابووها بتنهد : لا
مشت لغرفتها بكل انكسار ودموعها تسبق خطواتها
دخلت الغرفه واغلقت الباب وتسندت عليه وبكت بكل صوتها وبكل حيلها ..آآآآه ماتعرف ليش راحت وتبخرت بعض احلامها اللي راسمتها في مخيلتها
حاسه انها محطمه ..كانت مذهوله من كل شيء شافته وسمعته مو مصدقه طول هالسنه عايشه على فلوس غيرها ولا وابوها اللي يطلبها مو فواز اللي يعطيه ..آآآآه ما اقساها من عيشه .. مو عارفه شلون تسوي .. تمنت لو كانت امها موجوده وتقاسمها بعض آلامها تمنت لو كان لها اخت او اخ مو قادره تتصرف حاسه انها في مصيبه .. تفكيرها وقف ..جلست بروحها وتواسي نفسها .. لحد مانامت

[sokara]

قصه رائعه بتسلسل جميل
شدتنى لاخرها واتمنى اقرا باقى القصه
سلمت يمينك تقبل تحياتى والتثبيت

[قلب وكلمات]

روعة يا كبير

يا صديقي قمة في الجمال

تسلم اديك وقلمك الرائع

خالص تحياتي

قلب

[شظايا عمر]

قصه رائعه وشيقه جدا

منتظرين التكمله بفارغ الصبر

تحياتي

[booody99]

قصة معبرة فعلاً ومؤثرة

واستفدنا منها ومن كلماتك الراقية

سلمت الأيادي على الطرح القيم

كل الأحترام والتقدير

[قلب وكلمات]

يا صديقي قمة في الجمال

تسلم اديك وقلمك الرائع

خالص تحياتي