هل المرأة العاملة فاشلة أسريا ؟

[razan]

مساؤكم حب وسعاده


انتشرت ظاهرة عمل المرأة تبعا لانتشار العمل والتطور العمراني السريع الذي شهدته البشرية وحصولها على أعلى الشهادات ، وتقلدها أسمى المناصب ، وانتشار العلم بشير خير ينبئ عن رقي المجتمع وازدهاره .




ولكن نأتي إلى نقطة بالغة الأهمية ، وتحتاج منا إلى وقفة مراجعة ، ولحظة تفكر ...ألا وهي : هل عمل المرأة يؤثر على تربية الأولاد ، ويهدد مستقبل الناشئة في الأسرة ؟!!


كثير ما نرى أسرة مترابطة ومتكاملة تنتج أبناء على مستوى عال من التربية والتعليم وتكون الأم في تلك الأسرة غير عاملة أو غير متعلمة أصلا !!.
وبلاشك أن الجزء الأكبر من مسئولية تربية الأبناء يقع على عاتق الأم لكونها هي اللبنة الأساس في الأسرة وهي العامود الفقري لها !!
لانريد الخوض في أهمية الأم في الأسرة أو تحديد مهامها لأن ذلك يحتاج إلى موضوع مستقل ولسنا بصدده الآن .



المهم



نحن نريد أن نناقش هذه المسألة وهل هي فعلا مؤثرة على الجو الأسري ؟؟
والسؤال الذي يطرح نفسه ، ويبحث عن إجابة بعيدة عن الفلسفات الخيالية ،والتحليلات الغير واقعية .....



السؤال هو :



هل المرأة العاملة فاشلة أسريا ؟


نتمنى أن نجد من يضع الأصبع على الجرح ليوقف النزيف ، ونرى من يفتح لنا من خزائن المعرفة التي حباه الله بها ويطرح النقاش البناء والهادف ..


تحياتى

[doiss]

"" السلام عليكم ""

" ازيك رزان "

" موضوعك جميل جداا ومهم جداا "

" ويناقش وضع مهم للأسرة والمرأة المصرية "

" وعلاقتة بالتربية والتقويم للطفل "

" اسجل حضوري في الموضوع

" الهام جداا ولي عودة ان شاء الله "

"" اخوكي ضياء ""

[warm heart]

والله يا رزان الحكاية دية بتختلف من واحدة للتانية

ودة بيبقي علي حسب نظرة المرأة لبيتها واولادها

وكمان علي حسب نوع الشغل بتاعها

[قلم بلا حبر]

موضوع مهم يا رازان ولو انى عارف ان المناقشه فيه بتكون صعبه لانها لازم تتناول الآثار الجانبيه سواء الضار منها والنافع

انا حكلمك عن رأيى الشخصى بعيد عن الشعارات

اللى يحدد مدى منفعة عمل المرأه من عدمه هو المجتمع نفسه

كلنا عارفين ان عمل المراه بيأثر على حياتها الآسريه ده واقع مش كلام مرسل

وان المرأه غير العامله فى الغالب بيكون بيتها مستقر الى حد ما

طيب المشكله فى عمل المراه كمكون كلنا بنسعى الى تحقيقه

محدش ينكر ان الاقتصاد متداعى مش عندنا بس لا دى ازمه بيتعرض ليها العالم كله

ومن قبل الازمه كمان ,, احنا كمجتمع اقتصادى بنصنف على اننا دوله ناميه

اللى حصل اننا استعرنا التجربه كصياغه مش كواقع

بمعنى

لو فى اجراء حيفيد البعض ويضر باقى المجتمع يبئى ده بالاكيد اجراء سلبى حتى لو كان فيه ايجابيات

مش معقول علشان حد يذود دخله يحرم حد تانى من الدخل

وبعيد عن موضوع الارزاق اللى بأيد ربنا طبعا ,, بس احنا مطالبين بالآخذ بالآسباب

مجيش على ناتج قومى وميزانيه بتحقق عجز مالى بيعدى الـ 40 مليار جنيه ,, وبطاله بتقدر بمليون وكسور

واقول ان عمل المراه ضروره يتطلبها المجتمع

بلاش نتكلم عن المراه والرجل بالتفرقه فى الجنس علشان نبعد عن العنصريه ضد المراه

خليها احسن (( المتكفل بأسره ))

لو حندور على العداله الاجتماعيه حنلاقى اننا مطالبين بتوفير عائل واحد لكل أسره وبعد كده نبدأ فى القبول بعائل أخر مساعد لزيادة الدخل وتحسين الوضع

انما من غير المقبول نهائيا انى اتيح لحد انه يحسن من مستواه عن طريق اثنين يعيلوا الاسره وممكن يزيدوا

فى الوقت اللى في اسر مفيش ليها عائل واللى بيقدروا بأكثر من نصف المجتمع تحت خط الفقر

من منظور العداله الاجتماعيه اللى معاه حيكون فى رفاهيه للمجتمع ,,, عمل المراه بيعطل ده

وده مش للعموم ,, لان فى ,, المراه المعيله بالفعل ,, وفى المراه المتفوقه والمتميزه بمجالها

ومنقدرشى ننكر حقهم وحقنا فى الاستفاده منهم

انما لما الاقى ان عمل المراه بئى ديكور ,,

يعنى فى وظايف كتير ممكن يقوم بيها اى شاب نلاقيها مقصوره على الست كنوع من الديكور الوظيفى ,,

فى الوقت اللى فيه الاف المتأخرين عن الزواج بيبحثوا عن مصدر رزق

محدش يقدر ينكر الواقع ان فى ناس مش محتاجه الوظيفه ومع ذلك بيتمسكوا بيها علشان الديكور الاجتماعى او للتخلص من الفراغ

وساعات فى ناس بتحسبها ان البنت لو قعدت فى البيت مش حيجيلها عريس !!!!!!

بل الآنكت من كده ,, اننا كتير بنلاقى ان فى شاب يكون محتاج الوظيفه علشان يعيل اسره كامله ومتفوق ولديه المقومات اللى محتاجاها الوظيفه وتلاقى حد تانى بقدرة قادر اتوظف مع ان مقوماته مش على نفس الدرجه

وده فى الذكور لو مقبول ,,, اكيد فى المراه وخصوصا اللى مش محتاجه الوظيفه امر يناقض العداله الاجتماعيه

لو حنبص للموضوع من زاوية الانا ,, يبئى الامور عال العال ومعاهم حق اللى بينادوا اكتر بعمل المراه

انما لو حندور على بعض ونحس باللى حوالينا يبئى حنادى اننا نحقق العداله الاجتماعيه علشان يكون عندنا مجتمع غير ساخط وقادر على الانتاج ,, واللى من خلاله ممكن نوفر الاف الفرص الوظيفيه بعد كده سواء للمراه او لغيرها ,, بس حيكون عندنا اكتفاء ذاتى لكل فرد ومعيشه يقنع بيها

انما فى عز القهاوى اللى ماليه الدنيا واللى بئت اكتر من الصيدليات نلاقى فى ناس الانا ظاهره عندها ويقولك

ازاى ,, امال تعليمها تعمل بيه ايه ,, وكمان المراه ليها حق زيها زى الراجل و...و...,و....و....

كلام مش حينتهى ,,,,,,,,,,,,

بس اللى عايز اقوله استحاله يكون فى مجتمع متماسك طالما ان مفيش عدالة توزيع للدخل

وطول ما فى ناس مش لاقيه تاكل ,,

حنلاقى الشوارع مليانه بالمتشردين ,, والاماكن الضلمه مليانه باللى مش لاقيين ليهم لا شغله ولا مشغله

والمتسولين طبعا مش محتاجين كلام ,,

نفسنا فى جريده من غير صفحة الحوادث ,,

وده عمره ما حيتحقق الا مع عدالة التوزيع للدخل

المشكله ان الضرر مبقاش على الناس اللى متاثره بالبطاله من عمل المراه ,, بالعكس

المشكله بئت اوضح للآسر اللى المراه فيها بتحاول تبرز شخصيتها وبتبتعد عن دورها اللى الراجل ميقدرشى يعوضه

دور الامومه ,,,

الدخل اللى هى حيجيبه الراجل لو فى عداله اجتماعيه ,, حتلاقى المرتبات حتذيد واللى معاه دخله حيزيد مش لازم يعوض اللى هى كانت حتاخده بس على اقل الفروض حيعوض الاسره وحيساعد مع الوقت على الارتفاع بمستواها

انما دور الامومه ده ,, مين يعوضه ؟؟

علشان كده كانت اول ظواهر التفكك الاسرى ,, ظاهرة التحرش والاغتصاب

لو غابت التربيه والمتابعه ,, تنعدم الآخلاق ويكون الضرر علينا كلنا ,,

وكلنا تابعنا ظواهر التحرش على الفضائيات وعارفين تفاصيلها

ويمكن مسلسل ,, (( قضية رأى عام )) اتعرض للمشكله دى ,, وبين قد ايه ان لو عندنا مثلث لفساد الشاب

حيكون اتنين من التلاته من فئة الاسر التى تعمل بها المراه

واحد كان ابن وزير ومامته طبعا فى النادى مش فاضياله

والتانى كان ابوه وامه فى الخارج بيبعتوا ليه فلوس

والتالت بئى اللى من النصف المتضرر من المجتمع مؤلف المسلسل راعى انه يكون فاسد اصلا ,, لان كتير من النصف اللى بنتكلم عنه ,, بيكون حسن التربيه نظرا لان مفيش وظايف اصلا للرجل عندهم فما بالك بالمرأه ,, فتلاقيها مش وراها اللى تربيه اولادها ,, بس الفرق بينها وبين الآم زمان ,, ان الآم دلؤتى اصبحت متعلمه يعنى دورها بئى مفيد اكتر لاولادها وللآسره ككل

معلشى طولت فى الكلام ,,,

وبشكرك على طرح الفكره ,,,

خالص تقديرى

تحياااااااااااااااااااااااااتى"""""""""""""""

[سمسمة2008]

فى البداية احب احييكى رزان موضوع اكثر من رائع يستحق النقاش بجد
طريقة طرحك للموضوع كمان رائعة
خلينا ندخل بقى فى الموضوع
انا شايفة انه مينفعش اننا نعمم موضوع شغل المراة انه وحش انه بيدمر المجتمع ويدمر البيوت
خلينا نبص للموضوع من كل جوانبه ونبص لسلبياته وايجابياته
اولا خلونا نتفق ان مفيش واحدة بتنزل من بيتها علشان تشتغل وكلنا عارفين يعنى ايه شغل ويعنى ايه تعب الشغل علشان هى غاوية تعب ومهما كانت الست دى مش محتاجة ماديا فبيكون لسة فى حاجة ناقصاها ومش كاملة عندها وده اللى بيخليها تنزل تشتغل خلونا كمان نتفق ان مجتمعنا بيعيش فى ازمة اقتصادية والازمة دى اثرت فى كل حاجة فيه حتى كمان فى افراد المجتمع فاصبح العادى ان الست تنزل الشغل علشان تساعد زوجها وده طبيعى وبعدين مش بس الست اللى بتشتغل فى المصنع ولا فى الشركة ولا فى الجريدة ولا فى المدرسة هى بس اللى بتشتغل لا كمان اللى بتشتغل مع جوزها فى الحقل واللى بتنزل مع جوزها الصياد دى كمان عاملة بس احنا ديما بنشوف اللى واضح بالنسبة لنا واللى بنشوفه ديما هو الست فى المجتمع العمرانى وبعدين مش ديما بتكون مهملة فى بيتها كتير مننا والدته بتشتغل وكتير مننا هى نفسها بتشتغل وفى اللى اختها بتشتغل ومش كل الامثلة دى لازم بالضرورة تكون فاشلة اسريا لا ممكن تكون ناجحة جدااااابس هى المشكلة فى الست نفسها مش فى فكرة عمل المراة يعنى فيه بعض الستات بتعرف انها توازن بين عملها وبين يبتها وبتكون ناجحة جدا فى الاتنين وفى واحدة تانى بتكون ست بيت وبتكون فاشلة جداا اسريا ولا تصلح بالمرة انها تكون زوجة وام
يبقى لما نبص للفشل الاسرى نبص للوضع الاقتصادى للاسرة وللمجتمع ككل طيب والمجتمع ده يساوى ايه
المجتمع= راجل +ست
هو ده التكوين الطبيعى للمجتمع يبقى عرفنا ان مجتمعنا والله مفيش عنده مشكلة اقتصادية والوضع تمام نيجى نشوف سبب تانى السبب ده هو ايه؟
السبب ده هو والله نرجع لبيتها ونتابع ادائها لدورها الطبيعى كزوجة وام وربة منزل كانت مؤدية الدور ده كمان يبقى خلاص منقدرش نقول انها فاشلة اسريا ونطالببها تقعد فى البيت
تعالوا نشوف سبب تانى بيدفع المراة للعمل السبب ده يمكن لما تعرفوه تقولوا دى اتجننت يمكن تفتكرونى باهرج يمكن الاقى الرجالة اللى فى المنتدى بيطالبوا باغتيالى بس برضه هاقوله ولا بيهمنى هههه السبب ده هو ( الراجل نفسه) ايوة الراجل طيب ازاى ده ياسمسمة ؟هاقولكم ازاى لما يكون الراجل بخيل مثلا او بيعتبر مراته دى طالما هى فى البيت هى كم مهمل حاجة كده على الهامش كرسى بيحركه والست اللى بره البيت مهما كانت فى طباعها او اخلاقها فهى افضل من مراته يبقى مش من حق مراته دى انها تكون هى كمان فى عينه ست لها قيمة وكيان حتى لو ده هياثر عليها بس هى كمان مش هتسمح انه يؤثر على بيتها لاكتمال كيان بيتها
وبعدين مين قال ياسيد ان اللى بتنزل للشغل فهى بتنزل تدور على عريس لا فى اسباب اقوى كتير عددها معايا هتلاقى انه مفيش حد بيدور على التعب لنفسه وبعدين تعالوا ورونى واحد هيخلى مراته حاسة بالامان معاه ومش باقصد بالامان الفيلا والعربية انا باقصد الاستقرار الاسرى حتى لو امكانياته مش قد كده بس محسسها انها مع اقل مجهود بتعمله فهى بتتعب معاه وبيحسس ديما انه حاسس باللى بتعمله ويجى يقولها بيتك محتاجك او حتى لو ماقالهاش وهى حست ان بيتها والانسان ده محتاجة اكتر فى بيته ومش هتسيب الشغل
فكرة عمل المراة مش فكرة مطلقة انها بنطلقها كده شعارات فى الهوا لا احنا لينا دوافعنا اللى متهيالى انها منطقية جدا خلونا قبل مانرفع الشعارات الرنانة اللى بتقول الست اللى بتشتغل فاشلة اسريا نبص للاسباب اللى خلتها تنزل للشغل اصلا وبعدين نشوف هى مقصرة فى حق بيتها ولا لا والله طلعت مقصرة يبقى مالهاش حق تتكلم ولازم تقعد فى البيت انما لو كانت مش مقصرة والوضع الاقتصادى لاسرتها متطلب نزولها للعمل يبقى مينفعش اننا نقول انها فاشلة او لا غير لما نتابعها الاول
معلش يارزان رغيت كتير عارفة وطولت جداااا بس حبيت اقول رايى فى الموضوع
ميرسى ياجميلة على الموضوع الجميل
فى انتظار جديدك
تحياتى

[yasmine refat]

موضوع مهم جداااااااا * المراءة العاملة فاشلة أسرية*

طبعا من المعروف أن الشرع لم يمنع عمل المراءة بل وضع له ضوابط وهي
* أن يكون مناسب لتركيبها, أن لايؤثر على تربيتها لأولادها,أن لايؤثر على عمل الرجل *كأن يسبب بطالة له*, أن يكون خالي من الإختلاط والخلوة*

وبالطبع لو كان الأمر ضار 100% لكان الشرع حرمه

فبالتأكيد هناك فوائد ناتجه..

فنحن نحتاج نساء لتعمل كطبيبة للنساء أو مدرسة للفتيات أو طاهية ...ونحوه

وهذه الوظائف عادة أنسب للمراءة...فهناك ضرورة قسوة لعمل المراءة

طيب خليني بقى أتكلم بالعامي وأعبر عن رأي الخاص ..

المرأة * فين مكانها المناسب* في البيت لأن المرأة مهما عملت أستحالة تملي فراغ الرغبة في وجود أسرة

لذلك أكبر مثال هو الدول الأوربية نسبة كبيرة من النساء فضل البيت على العمل الخارجي وغير كده أن الأغلب مل من التوتر والضغط النفسي والجسدي الي تركبتهم الطبيعية والنفسية غير قادرة على تحملها على خلاف الرجل الي ربنا خلقوا لذلك..وفي كتير أستقالوا

بس برضوا في حالات تستلزم ذلك..

زي أن المراءة تكون مطلقة ولا يوجد عائل أن يكون العائل بخيل * مع أن هذه الحاله أجاز الشرع أن تأخذه منه بدون علمه بالقدر الكافي لها ولأولادها* وفاة الزوج وممكن يكون الوضع الإجتماعي لهم غير مناسب ويحتاج إلى دعم وغير هذه الأسباب كثير الي بتخلي الأم تعمل وبرأي في أغلب الأحيان ستقصر لأنها بشرية

طيب من كلامي كأني بقول *لا* لعمل المرأة (طبعا لأ لأني عن نفسي عايزه أشتغل)

لكن شرط أن ققدر أوازي وأعطي للشيئين مايستحقاه نقطة مهمة * بس هل هي مممكنة* أيوه ولي لأ

لو كان في تعاون بين الأب والأم ويحالوا تنسيق أوقاتهم مع بعضهم علشان يكون واحد منهم موجود أما يغيب الآخر ليقوم بدور التوجيه والرقابة لو على الصبح الجميع هيكون في المدرسة والشغل * يعني مش قضية* وطبعا هذا مبدأ مش متاح للجميع لأنه بيعتمد أزاي الأب والأم بيفكروا وماهي نظرتهم للزواج وأي أهدفهم,,يعني مثلا في أب بيعتقد أن عبئ التربية للأم وحدها وفي آخر بيشوف أن الزوجه لازم تكون متفرغة له طول الوقت وتاني بيشوف أن العمل حاجه ثانويه لاتستحق العناء

وأحب أذكر نقطة مهمة أن الكيف في التريبية أهم من الكم ففي أم قد تعطي في ساعة ماتعطيه أخرى في سنين بس طبعا الكم مهم في الرقابة وذكرت قبل كده أنه ممكن يتحل لو حصل تناوب

بس في مشكلة تانية الطفل خلال السنين الأولى محتاج الأم عالطول ولو الأم أخذت أجازة طويلة من العمل هيتقلها بيباي إذا لازم الحكومة تراعي بإن المراءة أم وفي نفس الوقت وجودها في بعض الوظائف مهم لأنها الأنسب

أنا مش ضد عمل المراءة ولكن لو حصل تقصير *دون الحاجه للعمل* فالأهم ثم المهم

وعمل المراءة يارزان عمل * غير موثوق فيه بيطير في الهوى وفي الأغلب لايقدر* لأن للأسف حتى الستات نفسهم مبيثقوش في عمل الست زيهم وده واضح

تقوليلها روحي عند دكتورة أسنان تقولك الراجل أضمن

فعمل المراءة حتى يكون لي قيمة لازم نثق فيها ونثق أنها على قدر المسؤلية



أنا بدأت أخرج عن الموضوع وطولت ...

فخليني أنهي كلامي

وشكرااااااااااااااااااا على الموضوع الجامد

أختك في الله:080402gudl_prv:

[razan]

شكرا لمروركم على موضوعي وهذا شرف لي

[د موع تبتسم]

الموضوع جميل اوى رزان وكمان
كمان الفكرة بتتغير من شخص لاخر
لان كل انسانة لو طابع
فية انسانة ممكن توفق بين شغلها وبين اسرتها
وفية واحدة مش بتعرف توفق بينهم بس بتحب الشغب وفية وفية

[عاشق الجمال]

رزان
المرأة أولا نصف المجتمع بل أرى أنها المجتمع كله فهى التى تربى وتنشئ
وقد أثار عمل المرأة جدلاً أيضاً فى الدول الغربية وهذا ما أكدته الكاتبة الأمريكية ليزلي بينيتس في كتابها "غلطة امرأة"والتى أشارت من خلاله إلى عدد من الأبحاث الاجتماعية التي أجريت علي الأسر التي تعمل فيها الأم وأخري تفرغت فيها للبيت ،ووجدت أن غالباً ما تكون الظروف الاقتصادية الصعبة التي تجتاح العالم ، والتي تحتم عمل المرأة لتدر دخلاً إضافياً للأسرة.
اخواني المراه المتعلمة تصلح منزل لا تفسده
وأنا أرى فى عمل المرأة كثيراأمن المكاسب بشرط
1- أن تعمل المرأة مربية ومعلمة فى المدرسة والجامعة وهذا أفضل مكان لها فمهمة الأم اللأساسية هى التربية لأنها أفضل من يربى كما قال الشاعر :
الأم مدرسة إذاأعددتها أعددت شعباً طيب الأعراق
فيا أختاه لا تهملى منزلك و بيتك وأولادل ولتعلمى أن لزوجكى عليكى حق ولبيتكى عليكى حق ولأولادك عليكى حق ولنفسكى عليكى حق ولربكى عليكى حق وأنتى الأجمل دائماً فى المنزل فأنتى ريحانة الأسرة وجنتها
رزان موضوعك كبير قوى
موفقة دائماً فى اختيار الأفضل