كان نفسى اتجوزها

فريق العفة · منذ /04-10-2012, 12:34 AM

حلقة 4

ياسر رجع علي الشغل وكله حاله حزن وكآبة .. وشايل هم ازاي هيروح الفرح؟؟

فكر يقول لعمر صاحبه وزميله في الشغل انه يجي معاه الفرح

وبالفعل راح علي مكتب عمر .. وخبط الباب

ياسر: عمر هو ينفع تيجي معايا انهاردة؟

عمر: اجي فين؟

ياسر: فرح نهال

عمر: هو انت رايح؟؟

ياسر : مقدرش مروحش .. هتزعل .. وانا مش عايزها تزعل في يوم زي ده

انا لسة سايبها عند الكوافير .. ورايح بليل علي القاعة

عمر : بس انا ورايا مشاوير مش هتخلص قبل 10 بليل .. تستناني؟

ياسر: استناك وماله .. تحب اعدي عليك علي 11 ونروح سوا.. كدة كدة الفرح سهرة لحد الساعة 2 بليل علي الاقل

عمر : لالا نتقابل احسن علي 10 من برة برة .. بدل ما اطلع البيت وانزل تاني

ياسر : ربنا يخليك لية يا عمر .. دايما واقف جمبي ومبتتأخرش

عمر : عيب يا جدع ده احنا اخوات .. متقولش كدة

---------------

في بيت ياسر ...

ام ياسر : حبيبي انت جيت ؟؟

ياسر : لا يا ماما انا لسة في الشغل

ام ياسر : هههههههههههههه يجازي شيطانك يا واد يا ياسر .. غير هدومك وتعالي عملالك مكرونة بالبشاميل اللي انت بتحبها

ياسر : مليش نفس يا امي .. انا هناملي ساعتين علشان فرح بليل

ام ياسر : اسمع الكلام يا ياسر وغير هدومك وتعالي جوة في اوضة التليفزيون علي ما احضر الغدا .. عيزاك في موضوع

ياسر : حاضر يا ماما

------
ياسر غير هدومه وراح اوضة المعيشة يستني والدته تيجي بالغدا

وقاعد بيفكر ..

ياتري يا حسام هتعمل ايه في نهال اكتر من كدة .. طب نهال لسة صغيرة وطايشة .. وانت شكلك هتضيعها اكتر .. ده كفاية انك بتقولها متلبسش هدوم واسعة !!

ياسر ماسك ريموت التليفزيون ولسة بيفتح .. لقي اعلان بريل (مشروب شعير) شغال والممثل بيقول ( راجل يا حسام )!!

انطلقت من ياسر ضحكة مدوية.. (هم يضحك) .. سمعتها والدته في المطبخ

ام ياسر : مالك يا ياسر .. ايه اللي ضحكك كدة؟؟ ضحكني معاك

ياسر : ههههههههههه ولا حاجة يا امي .. اعلان بس فكرني بحاجة كدة .. هم يضحك والله

ام ياسر : ثواني هروح اجيب الاكل .. انا غرفته في الاطباق خلاص

ياسر : انا جاي اخد منك الاطباق

ام ياسر : طب قولي بقي .. فكرت واستخارت في موضوع قريبتك ده؟

ياسر: تقصدي بنت عمتي اللي معرفلهاش اسم دي ؟

ام ياسر : ايوة صحيح بنت عمتك صفية .. اسمها اعتدال

ياسر: نعم ؟؟!! اعتدال؟ دي عندها كام سنة؟

ام ياسر : لا دي صغيرة شكلها في العشرينات

ياسر : انا مش عارف ليه حاسس ان اسمها هيطلع هايدي .. بس انتي اللي بتحبي تشوفي كل حاجة علي ذوقك .. علشان انتي طيبة وحلوة

ام ياسر : هايدي ؟؟! بقي ده اسم ده ؟ طب ده اعتدال احلي

ياسر : ههههههههههههههه احلي وماله .. هو صحيح يا امي اخواتها اساميهم ايه ؟

ام ياسر : والله يابني مش فاكرة .. الصغيرة اسمها روحية باين

ياسر : يا ستير يارب .. خلاص بانت .. الصغيرة اسمها روحية .. والوسطانية اسمها اعتدال .. اكيد الكبيرة اسمها ام رمضان!!

ام ياسر : هههههههههههههههههههههه بس يا ولة هتجيب للبت تهمة .. قال رمضان قال .. متاخدنيش في دوكة وقولي

ياسر: نعم يا ست الكل

ام ياسر : رأيك؟

ياسر: والله يا امي لسة مش عارف .. انا علشان خاطرك بس هقعد معاها.. بس هي هتيجي فرح نهال؟

ام ياسر: وايه اللي هيجيبها؟

ياسر: مش بتقولي انهم جيران العريس؟

ام ياسر : ايوة بصحيييح .. دي صفية مأكدة علية انها هتيجي الفرح وقلتلها تجيب البنات معاها

ياسر : طيب خير .. باذن الله .. انا هقوم انام ساعتين علشان قبل الفرح

ام ياسر : طيب يا حبيبي .. نوم العوافي يارب

-----------

ياسر صلي العصر ونام .. وصحي صلي المغرب وفضل يقرأ قرآن لحد العشاء

قرر الوقت ده يبقي تعبد .. ويصفي قلبه من حب انسانه مش زوجته .. حب مكانش حلال .. ويخلي مكانه حب اللي خلقه

وبعد صلاة العشاء كان بيدعي ربنا ينور بصيرته ويعوضه بواحدة في عفة السيدة مريم وتقوي السيدة آسية

وبيستخير ربنا في بنت عمته .. لأن ربنا وحده اللي عالم الخير فين

وبعد صلاة العشاء .. كان بيدعي ربنا ان عمر يجي في ميعاده

والساعة 8 لقي والدته بتخبط عليه باب اوضته

--------------

ام ياسر : انت صاحي يا ياسر؟

ياسر (بضحك) : لا يا جميل انا نايم .. بس بحلم

ام ياسر: ههههههههههههه نوم الهنا يا حبيبي .. انا نازلة مع خالتك علشان نروح القاعة قبل العروسة .. مش هتيجي توصلني؟

ياسر: مش هقدر بجد يا امي .. روحي انتي معاهم وانا هاجي علي 11 كدة .. انا محتاج اقعد مع نفسي شوية .. وكمان براجع جزء حفظ في القرآن

ام ياسر : ربنا يفتح عليك يا حبيبي .. طب انا نازلة .. سلام عليكم

ياسر: وعليكم السلام يا امي

تليفون ياسر رن
تررررررررررررن ترررررررررررن

عمر !!
يتبع<<

عاشق المستحيل557 · منذ /04-10-2012, 12:51 AM

هه وبعدين شدتنى فالقصه دى
انت ياسر منين ؟ممكن اكملك القصه دى لو عرفتك منين

~CuTe.GiRl~ · منذ /04-10-2012, 12:47 PM

الله قصه حلوه اااوى بجد

بانتظار باقى القصه متتاخرش علينا بقى مستنينك

رنا هشام · منذ /04-10-2012, 03:09 PM

طَرحْ رَـآئِعْ

morshooo · منذ /04-10-2012, 04:51 PM

الحوار جميل بصراحة

بس كنتى نزلى الحلقات دى فى اليوميات افضل

تحياتى

بسمة العمر · منذ /04-10-2012, 09:01 PM

كان جميله خالص القصه المرادى

ومنتظرين الباقى على خير

فريق العفة · منذ /04-10-2012, 10:07 PM

ازاى انزلها فى اليوميات وشكرا

booody99 · منذ /04-11-2012, 01:05 PM

كــلــمــات مــعــبرة فــعلاً وقــيــمة

واســـتـفـدنــا مـنهـا ومـن اســلـوبــك الــراقــي

ســلمـت الأيــادي علـــى الطـــرح المتـــمـيز

كــل الأحتـــرام والتـــقــدير

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كان نفسى اتجوزها	فريق العفة	مواضيع عامة - ثقافة عامة	0	05-14-2012 03:58 AM
كان نفسى اتجوزها	فريق العفة	مواضيع عامة - ثقافة عامة	3	04-24-2012 07:17 PM
كان نفسى اتجوزها	فريق العفة	مواضيع عامة - ثقافة عامة	4	04-20-2012 11:03 PM
كان نفسى اتجوزها	فريق العفة	مواضيع عامة - ثقافة عامة	4	03-27-2012 11:29 AM
كان نفسى اتجوزها	فريق العفة	مواضيع عامة - ثقافة عامة	5	03-20-2012 12:18 PM

الذين يشاهدون محتوى الموضوع الآن : 1 ( الأعضاء 0 والزوار 1)

..{ فع‘ــآآليـآآت المنتــدى }..

الإهداءات

كان نفسى اتجوزها

مواضيع عامة - ثقافة عامة