الأطفال العنيدين ومشاكلنااا معهم،،،،!!

[أجمل سعوديه]

الاطفـال العنيدين ومشاكلنـا معهـم !! ( حلول مبسطه ) من وجهـة نظري الخاصه



..

بسـم الله الرحمـن الرحيـم ..

في موضوعـي الاخير جانـي طـلب من وحده بخصـوص الاطفـال العنيدين وكيفيـة التعامل معهـم , واعتقد ان المشكله هذي تمـر علينـا كثيـر بالنسبـة لي مـرت علي مع بنـت اختـي عنيـده جداً ولا تسمـع الكـلام ابداً ..
حتا لو امهـا ضربتهـا وصاحـت نص ساعه وترجع لعنادهـا وتسوي نفـس الشـي الي يضايق امهـا ..

العنـاد شي موجود مع الطفـل ومانقـدر نعالجه عـلاج نهائـي لانه طفـل بالنهـايـه وماراح يفهـم شـي من لغتنـا التخاطبيـه مهمـا قلنـا كل الي راح يفهمه عـدة كلمات ( تعال , رح , لا تروح , اسمه , ياويلك , كل , لا تاكل , لا تلمس , وخـر , ..الخ )
فطبيعي جداً اذا كان عنيـد راح يستمـر في عنـاده مهمـا ضربنـاه او رفعنـا صوتنـا عليـه وقعدنا نهاوشه راح يستمر

مع دراستـي اكتشفت اشيـاء حـلوه ومميزه عند الطفل العنيـد , الطفل العنيد دائماً يكـون ذكـي ويحاول يفرض سيطرته على الكبـار ويحـس انه افهـم منهـم ومايرضـى ان أحد يفرض عليه شـي واحيانا يحاول التحايل على امـه واحيانا يكذب عشان يجلب الانتبـاه وياكثـر الاطفـال الي يكذبـون واحيانا كذبتهـم تدمر عائلـة كامله الله يكفيكم شر كذبهم

من مميزات الطفل العنيد شخصيتـه قـويه حتا احياناً مع تهديدات الام ما يتأثر ولا كأن امه تتكلم معـاه
واحياناً هالتصـرف هذا يحط الام بموقف حرج لا هي الي تقدر تنفذ تهديدهـا ولا هو الي بيسمع كلامهـا
لان يعرف ان امه ماراح تنفذ تهديدهـا ويلتزم الصمت دقايق ويرجع لعناده مره ثانيه
وايضاً عنده ثقـة بقدراته وبنفسـه واعتقد ان كل هالاشيـاء يجب ان نحافظ عليها لانها مهمـه


المهم ماعلينا من هالكلام كلـه , انا عندي بحـث مطـول عن التعامل مع الطفـل العنيد
لكن راح اختصره لكـم بعـدة نقـاط مـع الامثلـه وان شاء الله يارب تستفيدون منـه ..

- المدح والثنـاء :-

عشان الطفل هذا عنيد وماراح يسمع كلامنـا ابداً وخصوصـا ( الاوامر ) , ليش مانحاول نمدحه بالاشياء الحلوه الي يسويهـا مثلاً تجرب الام وتطلب منه يجيب جوالها اذا هو بعيد عنهـا طبعاً باسلوب حلو اول مايجيبـه تقوله كلام يحس نفسـه سوا انجـاز وان امه تفتخر ان ولدها جاب الجوال لهـا ترا مهما كان الطفل يفهـم احياناً اذكى منا في بعض الامـور
ولا نبالغ كثيـر بمدحه بس نمدحه بحدود المعقـول لان اذا بالغنـا بالمدح كبر راسـه علينا


- التجاهـل :-

الطفل العنيد يسوي اشياء غلط وتنرفزنـا وفي اعتقاد اغلب علماء نفس الطفوله , ان الطفل العنيد يستمتع بنرفزة الي اكبر منـه ولما يشوف الانسان الكبير الي قدامه يتنرفز منـه يحس انه سوا انجـاز وان له شخصيه ويقدر يتحكم بالي قدامه متى مايبي وينرفزه بسهـوله ..
افضل حـل التجاهل احيانا فيه بعض الامور تكون بسيطه يسويها الطفل بس تنرفزنـا ليش نتنرفز ويحس نفسه بطل علينا ؟ الافضل نتجاهله ونضيـف عليها بعض الحركات الي تحسسه انه سوا شي غلط بس مانرفزنـا مثل ( الابتسامه البارده ) نعطيه ابتسامه بارده ونتجاهله ولا نقوله ولا كلمه , وراح تكون النتيجه ايجابيه بإذن الله


- المحفزات :-

الانسان بطبعه بحاجـة الى تحفيـز قـوي يعطيه الدافع لفعـل الاشيـاء , يعني الطفـل العنيـد نقدر نكسـر عنـاده ببساطـه عن طريق التحفيـز والنقطـه هذي مهمه جداً وخصوصاً في ( المسائل الدينيه ) ,
مثلاً الاب يقـول لأبنـه ( الي يحط المنبه على صلاة الفجـر و يقومنـي صلاة الفجـر راح اعطيـه مبلغ او راح اشتري له او او او .. الخ )
الطفـل راح يحط بباله شي واحد حتا لو كان عنيد راح يحط بباله ( المحفـز ) لانه يبي يوصل لـه بأي طريقه ..
وماله الا طريقه وحده انه يحط المنبـه حقه على وقت صلاة الفجر واول ما يسمع صوت المنبه راح يصحى من نومه وراح يصحي ابـوه معاه لصلاة الفجـر ومن بكره لازم لازم لازم الاب يجيب له الي وعده اياه لان لو اخلف مره معاه الطفل العنيد راح يفهم شي واحد ان ابوه يلعب عليه وراح يفقد الثقه بالاب وماراح يسمع كلامه ابداً ..
وبعد مايجيب للطفل الي وعده فيه راح يفرح الطفل كثير بالانجاز الي حققه اني صحيت ابوي لصلاة الفجر وجاب لي الي قالي عنـه وراح يحس بينه وبين نفسه انه حقق انجاز عظيم في حياته ..
طبعاً الطفل العنيد لازم نمشي معاه حبه حبه ولا نجيه ونطلب منه اشياء كبيره ينفذها لا مانبي منه الا اشياء صغيره جداً تعوده على الانضباط وتحقيق الذات والاحساس بالانجاز ..

الحين بيجيني واحد ويقولي طيب وش الفايده
اصبر وخلني اكمل

الحين يجي دور الاب مره ثانيه ويقول لأبنه اذا بتروح معاي صلاة الفجر راح اعطيك كذا وكذا طبعاً مو شرط تعطونه اشياء كبيره بس لازم تشوفون الشي الي يثير اهتمامه ويبيه هو حتا لو شي بسيط جداً ..
وراح يروح الابن مع ابـوه للصلاة ومن بعدهـا راح تشوفون تغيـر عجيب بإذن الله وراح يتعود على هالشـي ويبدا يلين راسـه شـوي من هالعناد


- سحـب الامتيازات

الطفل العنيد اذا مانفعت معاه الطرق الي فوق راح تنفع معاه هالطريقه هذي , وهذي( الامريكان ) دائماً يستخدمونهـا في التربيه لان هم مايعترفون بشي اسمه هواش ويرفعون ضغطهم ويضربونه لانه بالنهايه طفل عنيد وماراح يقتنع بكل هذا ..

وطريقـة سحـب الامتيازات دائماً يكون تأثيرها اقـوى وخصوصاً بعد الطرق الي فوق لاني ما انصح احد يستخدمها على طول الا بعد مايجرب الطرق الي فوق ..

سحب الامتيازات ( الحرمان )

بعض الاطفال يتعلقون بألعابهـم مهما كانت الالعاب مستحيل تلاقي طفل مايتعلق بلعبه محدده ويحبها
فالحرمان افضل حـل بس بشـرط !!!
بعد مايتم تنبيه الطفل ثلاث مرات ..
ليش نقول بعد ثلاث مرات ليش مانقول بعد اول مره لان قالوا بعض علماء النفس ان عقل الطفـل لا يستوعب الشي الا بعد تكراره بثلاث مرات , يعني لما نحذره اول مره وماسمع الكلام ونحذره ثاني مره وماسمع الكلام ونحذره ثالث مره وماسمع الكلام نبدا بالحرمان
والحرمان لازم يكون مفاجأه يعني لا نقوله ( ترا بحرمك من اللعبه ) هذا غلط ..
نقوله ( لا تسوي الشي الغلط الي سويته قبل شوي ) واذا عادها نعيدها عليه الى ثلاث مرات وبعدهـا نبدا نفاجأه بالحرمـان
راح يكـون تأثيرها اقـوى على الطفـل بالطريقه هذي

طبعاً هذا مختصـر بحثـي عن الطفـل العنيد واتمنى الحلول الي انطرحت تفيدكـم وخصوصاً ان الاطفال هـم شبابنـا في المستقبل واعتقد التربيه هـي ( اساس ) الانسـان ..
وكلنا نشـوف كيف العالم برا تطور وخصوصاً ان علماء النفـس ونظريـاتهـم النفسيـه تفوقت علينا كثيـر وان شاء الله راح نتقدم عليهم من جديد مثل ماكنـا متقدميـن عليهم بالامـس وسبقونـا اليوم

طبعاً كل ماكتبته اختصرته قدر الامكـان وفسرتـه بالعاميـة عشان يكـون اسهل للفهـم والاستيعـاب

وبحثـي هذا نال اعجاب ثلاث دكاتـره قريبين منـي جداً ودائماً اتعلم منهـم



..


منقول

[۩۩ سيد الشرقاوي ۩۩]

تسلم الاياادي
علي التوبيك
القيم دي معلوومات
قيمه جداا

[fankosha]

توبيك مهم
تسلمى يا سكرة