بحبك يا مصر وحقولها وميهمنيش اى حد

[دكتورة ياسمين]

مصر هي ...أم الدنيا

ومش هامننى الاعلام

وفي اللي يقول غير كدة

مصر

مش عارفة المصايب نازلة ترف على دماغ مصر ليه كدة

زي ما تكون مصر دي بنت البطة السودة واحنا مش واخدين بالنا



المصري في عين دول تانيه هو راجل مش عندو نخوة مش عندو كرامة مش عندو احساس

المصري في عين دول تانيه مجرد راجل منافق ونصاب وحرامي

المصريين في نظره مجرد شوية حثالة عاداتهم زبالة وتقاليدهم زفت

بطبيعتي مش حسكتله ...واذا كنت انت معاك حجة انا معايا مليون

كان نفسي اخده من ايده واوريه رجالة مصر

اوريه رجالة اسكندرية والمطرية وشبرا والسويس وبور سعيد واسماعيلية والصعيد

كان نفسي اعرفه معنى الراجل المصري اللي بيقول عليه مش عندو اي احساس بالنخوة

منين عرفت مصر يا ......؟

من الاعلام؟؟

شوفت فين الراجل المصري ؟ في مسلسل مش عارفة ليه كدة

الاعلام بتاعنا ناقل صورة عننا غريبة جدا

يمكن يكون الاعلام مش صادق في معظم الاحيان

واكيد هو كمان استقبل وفهم الاعلام غلط ..مش عايز ة اقول كل بلد فيها وفيها والكلام ده

انا دليلي وحجتي مش بالكلام

انا دليلي بالفعل
رجالة مصر

خير جند الارض ..شجاعة بلا حدوود..كرامة لا غبار عليها
يمكن عندنا مشاكل سياسية في بلدنا بس مش معنى كدة اننا مش رجالة

فيفي عبده وهالة سرحان وسمية الخشاب مش هما دول المصريين

المصريين هما اللي مشوا الوطن العربي كله في يوم من الايام

المصريين اللي ليهم فضل على بلدك وبلد غيرك وكل الوطن العربي
في نقل العلم ونشر المعرفة

المصريين اللي حاربوا مرة واتنين وتلاتة

ولسة بيحاربوا لحد دلوقتي جوة بلدهم

رجالة مصر

مش سمير صبري وعمرو دياب وخالد ابو النجا

رجالة مصر عايز تشوفهم افتحلي اي كتاب علمي عندك اقري التاريخ شوف مين عملو اصلا
اكيد كل بلد فيها وفيها..بس ده مش يمنع ان الحكم على بلد بحالها عشان شوية اغبياء يبقى ظلم

مسلسل اطفال الشوارع وفلم حين ميسرة وقد ايه المسلسل والفلم ده نقطة سودة في تاريخ العادات والتفاليد المصرية

يمكن الاعلام بتاعنا بيهدف للربح والفلوس ومش حاطط في باله حكاية تشويه صورتنا دي

في بعض الدول مش متخيليين ان في في مصر رجالة عندهم نخوة وشجاعة واقدام

مع ان الراجل المصري خيره على الهند قبل باكستان

وحنروح بعيد ليه...
الثقافة: كلنا عارفين ان الشباب المصري هو اكتر فئة مثقفة ومتعلمة في الوطن العربي كله

الفكر: رغم ان فكرنا مكبوت ومحبوس شوية لكن عمرنا ما كنا زي البهايم ناكل وننام

الاخلاق: اينعم عندنا مطربين ورقاصين وخلافو بس عندنا ناس لو اسمعك اساميهم تقع من طولك كفاية بس الشعراوي او محمد حسان

وفي كل المجالات ( الدين. العلم.الادب.الثقافة.الفكر.الفن)
الشجاعة:مش محتاجين نتكلم عن الشجاعة يكفي اننا مرينا باختبارات والحمدلله نجحنا فيها

مصر مش مجرد مسلسل هايف مثله نور الشريف والا حلقة عملتها منة شلبى

مصر هي التاريخ بتاع الوطن العربي كله

مصر هي امك وام الدنيا كلها وامي انا كمان (مش مرات ابوك )

مصر زي ما جابت فنانة و مطرب تافه

زي ما جابت رأفت الهجان والشعراوي والعقاد ..........

وغيرهم ملااااايييييييييييييييييييييييييييييييييييينلو كان الاعلام بتاعنا مش قادر يوصل للناس قد ايه مصر فيها رجالة قادرة تغير وجه الكون
وبيركزوا بس على الراجل اللي اخته مش لابسة طرحة واللي مامته مطلقة

يبقى الخلل من عندنا احنا مش من عند اللي بيستقبل الاعلام

الراجل المصري تعال اتفرج عليه في رمضان وفي الشوارع وفي البيوت

تعال اتفرج على الرجولة بجد



تعال اتفرج على رجالة مصر بعقلهم الواعي المفتح وفكرهم الرجولي القوي

زي ماحنا بنشوف عندكم جواد العلي وزينب العسكري وراشد الماجد

زي مانتم بتشوفوا اشكال زبالة من عندنا

بس احنا مش بنحكم على شعب كامل من خلال شوية عالم تافهة بتجري ورا الفلوس !!

احنا مش عايزين نعمل زيكم ونحكم على شعب من خلال فئة خسرانة


(لا فرق بين عجمي واعربي الا بالتقوى)

احنا مش عايزين نفرق بين دول احنا بنتكلم عن وحدة عربية

وانتم بيتفرقوا بينا وبينكم من خلال مسلسل اتفرجتم عليه!!

مش حتكلم عن مميزات الاعلام بتاعنا اكيد له مميزات طبعا

بس حطلب منكم انتم تتكلموا عن عيوب الاعلام بتاعكم

لو شايفين ان الدنيا كلها واقفة على راي واحد او اتنين او حتى الف عربي

يبقى مش حقول غير كلمتين

مصر ام الكون كله ....مصر ام الدنيا بحالها
التاريخ شاهد على كدة انا مش بجيب حاجة من عندي

لكن كمان التاريخ بيقول ان انا نفسي مش شوفت ليكم اي تاريخ

فى ناس كتير جدا في الدول التانيه معايا في اللي بقولو ده
وانا مش بكره حد على حساب حد وعمري ما فكرت في العرب غير ان كلنا واحد

لكن مدام حيوصل الامر ان الاهانة تكون لشخصنا ولبلدنا وارضنا
يبقى سوريطظ في اي انسان مش يعترف بان مصر ام الدنيا

(مصر مش مستنيااااااك عشان تعترف بانها ام الدنيا)

والله حتتهموني بالجهل والانسياق والتسرع !!! مش يهمنى

انا الحاجة الوحيدة اللي تهمني (انكم اكيد متاكدين من صحة كلامي) بس كبرياءكم مخليكم مش شايفين

مش شايفين حتى تحت رجلكم

مش عارفين مين الي بينقل ليكم العلم والطب والهندسة والرياضة والادب
مصر زي ما فيها ايهاب توفيق وسمير صبري ومصطفى قمر

زي ما فيها اكبر وافضل علماء الامة ولا نذكي احد علي الله

مش كنت عايزة اسلوبي يكون لازع كدة ..لكن اعذروني دي بلدي

وحتى لو مش بلدي

دي مصر

عارفين يعني ايه مصر

يعني مصر

ادي الرجالة المصرية يا جماعة

اللي في اقل من خمسين سنة مروا بمصايب لو مرت بيها اي بلد غيرنا كانت اختفت وانتهت

لكن احنا مكتوب لينا مش ننتهى

عارفين ليه

عشان احنا مصريين

مين هما المصريين

(مهد للديانات..انبيا ورسالات..لو كنوز الدنيا ما تسوى شبر واحد فيها)

(مذكورة في القران..طريق سلام وامان..ابراهيم والعذرا وعيسى ويوسف خطوا عليها

(طمعوا فيها كتير..بس دفعوا كتير..ارض طاهرة وليها رب كبير)

(من بداية الكون..ربك خلقها تكون..رزقها واسع وكلها خير)



على اســــــــــــ مصر ـــــــــــم التاريخ يقدر يقول ماشاء


انا عنـــــــــــــــ مصر ـــــــــــدى احب واجمل الاشياء
بحبها وهى ملكة الارض شرق وغرب

بحبها وهى مرمية جريحة حرب

بحبها برقة وعنف وعلى استحياء


على فكرة الكلام ده مش كلامى ده كلام ناس كتير

وكلام اى واحد وقفته فى الشارع المصرى وتسأله عن مصر حيدافع عنها وهيقول نفس الكلمتين
تقبلو تحياتى وفائق احترامى
اختكم ياسمين

[SiLver Spectra]

شوفي يا دكتورة

الموضوع عدلت فيه شوية كلمات عشان الإساءة للدول التانيه

و خليته عام

تجنبا للحذف

لأن فكرة الموضوع أثارتني



كل إلي ذكرتيه أنا أوافقك عليه

المشكلة في صورة الإعلام فعلا إلي بنقدمها للشعوب المختلفة

فبالتالي بيفتكروا إن مصر عبارة عن شارع الهرم مثلا!!

طيب أنا عيشت في الدول التانيه دي

و عيشت هنا

بصراحه بدون مجالملات

هنا المجتمع مش مريض زي الدول التانيه

مافيش كره و لا إنحراف بنفس الدرجه

بالذات الشعوب المكبوته

إحنا عندنا في مصر في حرية

الصحافة بتكتب و بتقول إلي هي عايزاه

و بتتكلم عن الوزره بحرية مطلقة

عندنا برامج حوارية

زي (القاهرة اليوم - العاشرة مساء - 90 دقيقة)

و غيرها

ليها درجه عالية من الجرأه و الحرية

فبيناقشوا كل حاجه

فبالتالي الأخ إلي عايش في دولة منغلقة و مش بتنشر الجرايم إلي الواحد لما بيسمعها راسه بتشيب

و لا بتحاسب المسؤولين عندها

هيبص و يقولك دي مصر بلد خربانه و بايظه!!!

عشان إحنا بنتكلم و هما عندهم الكلام ممنوع


مافيش أي دوله عربية فيها حرية زي مصر و لبنان و تونس

الباقي كله و لا يجي ذرة في الحرية عندنا


طبعا في ناس عندهم قناعه إن إحنا في مصر مش بنقدر نتكلم!!

بيشوف الجماعات زي الأخوان إلي بيتمسكوا و يقولوا مصر مافيش فيها حريه!!!

بإعتبار إن الحرية واقفه عند الإخوان


أنا مش هكبر المسأله و هقول إن إحنا عندنا حرية 100%

و لكن لو إحنا عندنا حرية بنسبة 10%

يبقى الدول التانيه عندها 0.1%

التنظيمات السياسية محظوره

طبعا لاسباب فينا إحنا قبل ما تكون في الديمقراطيه و الحرية

إحنا بنشوف الدول العربية إلي سابت الحرية السياسية للأحزاب و صلت لفين

لبنان أو فلسطين

كلها إنقسامات

يبقى قبل ما أقول حرية سياسية لازم شعبي يكون واعي يعني ايه حرية سياسية



أما صورة الإعلام في الأفلام و المسلسلات

فللأسف الصورة سلبية جدا

يعني و زي ما بيقولوا زودوها كتير

بيفكروا إن إحنا مثلا واقفين في طوابير العيش

و بنشحت تحت الكبري!!

و البيوت عندنا مفلقه و باب الشقه فيه شراع

إلي هي الصورة النمطية إلي بتيجي في المسلسلات


لو نشوف افلام الأبيض و الإسود

إلي فعلا الواحد بيفتخر بيها لأنها بتعكس صورة حضارية رائعه جدا لمصر

أفلام من الأربعينات و الخمسينات

و في من التلاتينات

كفاية إن أول فيلم يتصور في مصر كان في أوائل القرن العشرين

كان فيلم صامت

و أول سينما إتفتحت في إسكندرية في أواخر القرن التاسع عشر



و للاسف وسائل الإعلام الإخباريه

زي قناة الجزيرة

لما يتكلموا عن الحكام العرب...على طول مصر

طيب ما في دول تانيه روح إتكلم عنها

لأ على طول يقولك مصر و يذكر إسم الرئيس

الدول التانيه يخاف منها لحسن تعمله حظر!!

خليها تتكلم عن الحياة السياسية في الدولة إلي بتبث منها

مافيش!!


عشان كدا أنا مش بتفرج غير على الbbc

إعلام مستقل




مش هقول أم الدنيا

لكن مصر في الآخر بلد كبير

و له إحترامه

حتى و لو غيرنا ما إحترمناش فدا بيكون جهل و غطرسه

شوية فلوس نسوه إن طول عمره كان عايش حياته على صفر

في حين مصر طول عمرها بلد حضاري



تحياتي

[بنوته متغربة]

بسم الله الرحمن الرحيم

مش عارفه ارد اقول ايه لان كل الكلام ده الى انا نفسى اقوله من زمااااااان اووووووووووى ونفسى اصرخ باعلى صوتى واقوله للعالم كله

للاسف الاعلام عندنا بيحصر المصريين فى كم فئه كده ومش بيذكر الشئ الكويس ولا الشخصيات العريقه غير كل فتره وباقى الشعوب رغم انهم غلطانين فى حكمهم على شعب اكتر من 75مليون من كم تافه ممثل ولا رقاصه ولا مغنى رغم انهم معذورين بعض الشئ احنا مفروض نوصلهم المصريين الى بجد فى كل حاجه حتى فى اعلامنا
وفعلا مصر مش فيفى عبده ولا ايناس الدغيدى ولا سميه الخشاب ولا .. ولا .. ولا زيهم كتيييييييير اوووووووووووى
مصر احمد زويل والبرادعى وسعد زغلول
يا ريت دايما لما تفتكروا مصر افتكروا زويل مش فيفى عبده
وده مجرد رأى بسيط اوووووى بس فعلا الموضوع اكيد كتير مننا كان نفسهم يناقشوا من زماااااان اوووووووى
تقبلى مرورى

[دكتورة ياسمين]

اخى سيلفر واحبيبتى بنوتة
مش عارفة اقول اية نورتو صفحتى بمرووركم العطر بجد
وانا معاكم فى كل كلمة بتقولوها
ربنا يهدينا ويهدى جميع الدول يارب