عندك بنت؟ تعالي أقولك شيليلها ايه في الجهاز

[jasmean]

أولا: نصايح وخطوط عريضة: 1- ابدأي اشتري جهاز بنتك في سن الثانوي (أو الإعدادي لو عوايدكم الجواز بدري).. لهذه الأسباب... (أ) ماتضمنيش هاتتجوز ولا لأ لا قدر الله.. طب هتتجوز بعد كام سنة؟؟؟ (ب) في السن ده تفكيرها وشخصيتها هتوضح فهتقدري تاخدي رأيها في شراء الحاجات (يعني مش تشتري على مزاجك وترجعيلها بالحاجة فإيدك.. لأ شاركيها في الرأي وعرفيها المناسب ايه) 2- اشتري بالمعقول وبما يرضي الله عشان متقعيش في دايرة التبذير والإسراف... وكلنا عارفين آية إن المبذرين... وماتشتغليش بالك باللي يرضي الناس ويخليهم مايتكلموش .. لأن الناس كده كده بتتكلم يعني مش لازم صيني وبايركس وأركوبال وأركوبايركس وكريستال وزجاج.... وفوقيهم طقم عشا للمطبخ اختاري حاجة واحدة فقط ماتضمنيش بنتك تتجوز امتى؟؟ أو مساحة شقتها هتسمح بوجود نيش ولا لأ؟؟؟ أو.. أو... أو... 3- اعملي حسابك إنك مش هتشتري حاجة على بعضها وتقولي أنا كده خلصت جزء يعني مثلا مش تشتري 10 أطقم ملايات سرير ولا 12 طقم فوط وبشاكير وتقولي أنا كده خلصت منهم.. لازم تخلي طقم أو اتنين تجيبهم قبل الجواز على طول 4- شراء الذهب بدل تحويش الفلوس.. أجمع عليه فتوكات كتير بس خلي بالك من نقطتين مهمتين وفاصلتين بين حلال وحرام أولا: إنك لو اشتريتي الذهب بغرض الإدخار يبقى عليه زكاة كل سنة.. لكن مامتي كانت بتشتري وتلبس منه ولما أنا كبرت بقيت ألبس منه معاها فمكنش عليه زكاة ثانيا: الناس اللي قالت نحط الفلوس في دفتر توفير أو حساب أو وديعة في البنك عشان الفلوس تزيد لوحدها كلنا عارفين إن البنوك (ماعدا الإسلامية) فوايدها ربوية يعني هتدخلي مال حرام على مالك الحلال.. وده أكيد عمره ما هيخليه يزيد.. اللهم قد بلغت اللهم فاشهد اللهم اكفنا بحلالك عن حرامك واغننا بفضلك عمن سواك ثانيا بقى .. الجزء الذي طال انتظاره بالتفصيل بقى... تشتري ايييييييييييييييه؟؟؟؟ بس اسمحولي هاقسم الموضوع على مشاركات متتالية نظرا لطووووووووووله وكتر الكلام فيه فرجاء عدم الرد حتى اكتمال الموضوع والأقسام بإذن الله كالتالي : 1- المطبخ ولوازمه 2- متفرقات 3- المفروشات 4- الأجهزة الكهربائية 5- الملابس 6- متعلقات شخصية أولا: المطبخ ولوازمه... وما أدراكي ما المطبخ ولوازمه.....هههههههههه وطبعا أنا بدأت بيه لأنه أكتر حاجة بتاخد فلوس ووقت في الشراء في نفس الوقت أكتر حاجة ينفع تشيليها سنين بقلب جامد وماتخافيش على الموضة وهو متقسم لجزئين (أ) الحاجات اللي الفتوكات اتفقوا عليها تماما واللي نفعتني فعلا في جهازي..وهي كالتالي 1- البلاستيكات بأنواعها سواء كانت مستلزمات مطبخ أو حمام (طقم الهلال والنجمة لو فاكرينه اللي كان بـ 550 جنيه كان شامل كل حاجة) وطبعا معاها جميع أدوات النظافة اليدوية العادية بس فرشة تنظيف التواليت خليها قبل الجواز على طول.. عشان برضه بينزل منها موديلات وألوان وهي تختار حسب لون حمامها 2- التيفال بأنواعه (حلل - صواني - طاسات) وفي كل الأحوال لأنه غالي جدا طبعا مش لازم تشتري الطقم على بعضه.. يعني مثلا الحلة مقاس 16 مبتفرقش كتير عن 18.. يبقى ممكن مثلا تجيبي 18 و 24 و 28 و 32 بدل ما تجيبي الطقم على بعضه ومن الطاسات اتنين مثلا..ومن الصواني اتنين مختلفين برضه للكيك والحلويات 3- الألومنيوم بأنواعه طالما أصلي ومتين (حلل سواء طقم أو فرداني - صواني - طاسات - لبانة - براد - كانك القهوة – دماسة الفول لو بتستخدميها – المصافي خصوصا أم رجول بتاعة المكرونة - كسارولة) 4- علب الثلاجة بأنواعها (بلاستيك – صاج – بيركس أو زجاج) 5- صواني العشا وصواني تقديم الشاي سواء استانلس أو ميلامين 6- شيالة الكحك والبسكويت الأدوار 7- بونبونيرة كريستال أو صيني ذوقها حلو 8- طبق الفاكهة وشيالة العيش 9- معالق خشب وطقم توزيع فرداني غير اللي هتعلقه على الحيطة 10- طواجن الفخار كبير وصغير (أساسي معاكي اتنين كبار مقاسين مختلفين والصغيرين لو بتعملي أم علي مثلا يبقى هاتي منهم عدد 6 أو 12) 11- أورمة التقطيع الخشب أو البلاستيك اللي مش بتتكسر ويستحسن يكون حجمها كبير 12- السكاكين البلاستيك لزوم الصواني والطاسات التيفال 13- مريلة مطبخ وماسك حلل (وهي ممكن تزود طقم جديد قبل الجواز على طول) 14- زجاجات المياه والعصير(في أشكال عليها رسومات حلوة ومش هتبطل أكيد) 15- الأجهزة اليدوية اللي مفيش بيت بيستغنى عنها وممكن تتنسي في زحمة الجهاز زي: المبشرة - الشباسة - فتاحة العلب والبيبسي قطاعة البيض - ماكينة وقطاعة البسكويت والبتيفور مقشرة البطاطس - مقوار المحشي - مخرطة الملوخية منخل الرز والدقيق - صفاية الشاي والعصير - المضرب السلك اليدوي قطاعة البيتزا - حامل البيتزا والتورته (المعلقة المثلثة دي) مسن السكاكين – هراسة الثوم – هراسة البطاطس– مدق البفتيك عصارة الليمون والبرتقال – قطاعة التفاح – فرش دهان البيض والصواني أعواد الشيش طاووق – الشياطة بتاعة الرز – البلورة مانعة فوران اللبن قواعد الصواني السخنة عشان لما تتحط على السفرة مقص الفراخ والسمك – نشابة فرد العجين – ملقط الحلوى والجاتوه مفتاح الأنبوبة – قوالب الثلج – ولاعة البوتاجاز خلل الأسنان وقطن الأذن – معلقة الأيس كريم الجوانتي الأصفر بتاع الأعمال الشاقة وجوانتيات بيضاء بتاعة الدكاترة........ إلخ) (ب) حاجات اختلف رأي الفتوكات فيها.. معظمها حاجة النيش البايركس والأركوبال وطقم الصيني الكبير وطقم العشا اللي بيتحط في المطبخ في ناس قالت نشيلهم عشان مع الوقت جودتهم بتقل وسعرهم بيغلى وفي ناس قالت لأ.. عشان خاطر حتى دول بقى فيهم موضه جديدة وشكل جديد كل سنة أما بالنسبة للكاسات والكوبايات والمجات عشان دول بنحتاج منهم أكتر من طقم يبقى ممكن تشتري طقم أو اتنين حلوين كده موضتهم محايدة وتخلي الباقي بنتك تشتريهم على الموضه قبل الجواز على طول ولو هتشتري من أي شئ طقم واحد بس يبقى طبعا تخليه قبل الجواز على طول وماتشيليهوش في الجهاز أما أطقم الاستانلس والصاج والميلامين فدول على حسب عوايد كل أسرة في استخدامهم من عدمه *** نصيحة ماتكلفيش نفسك وتشيلي أي شئ من حاجة النيش والمطبخ غير اللي مكتوب ده يعني مثلا الناس اللي هتسأل عن شنطة المعالق أنا رأيي صراحة إنها تبذير ومنظره على الفاضي ده غير إنها برضه ليها موضه وأذواق أنا مثلا بتاعتي مركونة في الدولاب رغم إنها فضة أصلي.. لكن موضتها قديمة جدا لأنها كانت بتاعة مامتي ومستحيل حتى أعرضها في النيش ثانيــــا: المتفرقات برضه دول ولا ليهم موضة سنة بعينها ولا بيبوظوا من الركنة ومفيش بيت بيستغنى عنهم 1- سجاجيد الصلاة 2- الشماعات (عادية ولانجيري) 3- علبة المجوهرات الصدف (أو حسب ذوقك) 4- الشنط الكبيرة بتاعة السفر أو السوق أو الرحلات 5- ترمس شاي وكولمان مياه 6- حبال الغسيل ومشابك خشب وبلاستيك 7- ترابيزة المكواه والكسوة بتاعتها 8- قواعد الثلاجة والغسالة والأنبوبة 9- ساعات حائط أشكال مختلفة (فواكه للمطبخ – لعب للأطفال – ألوات سيلفر أو دهبي أو بني أو أسود أو بيج عشان تليق على أي ديكور) 10- طفايات وطقاطيق السجاير (ربنا يتوب على المدخنين) 11- مفارش بلاستيك للثلاجة وأدراج الدواليب والمطبخ (في رول كبير كده بلاستيك ملون أو مخرم موضته متغيرتش بقالها سنين) 12- مفارش السفرة البلاستيك بتاعة العزومات (سواء اللي بيتغسل أو اللي بيستخدم مرة واحدة ويترمي) 13- أدوات الخياطة (مقص – إبر – بكر خيط ألوان) 14- ورد مجفف (ألوان مختلفة) 15- علب المناديل وباسكت القمامة الملونة أو المشغولة بالحبال والدانتيل (برضه خليكي في الألوان اللي تليق على أي ديكور) 16- بخاخات بلاستيك أحجام وأشكال وألوان مختلفة (مش هتحتاج أكتر من 3 أوب 4 بالكتير) 17- فرش تنظيف الأحذية واللبيسة واللي فاكرة حاجة غيرهم تفيدنا برضه وفاصل ونواصل بإذن الله ثالثــــــــــــــــا: المفروشات (أ) اتفاق بالإجماع على إمكانية شيل واحدة أو اتنين من الحاجات دي 1- البطاطين.. طبعا الدوبل أساسي (مش هتحتاج أكتر من واحدة) ومعاها بطاطين فردي (اتنين مثلا) ويستحسن تكون ألوانهم لايقة مع بعضهم عشان لو عملت سريرين في غرفة الأطفال 2- الكوفرتات كبيرة وصغيرة (ممكن اتنين من كل مقاس) 3- طقم لحاف السرير الكبير..(بلاش بتاع الأطفال لأنه فيه موضه أشكال حسب ولد ولا بنت خليها تشتريهم براحتها لما ربنا يكرمها بالحمل) 4- الفوط القطن بأنواعها وأحجامها (صغيرة – وش – بشاكير) 5- أطقم متنوعة من الملايات الكبيرة (منقوشة ومشغولة وسادة) والصغيرة (أشكال أطفال تمشي ولادي وبناتي) 6- المفارش الدفاية اللي بتتحط على السرير في الشتا (برضه هاتي واحد أو اتنين للسرير الكبير واتنين شبه او نفس الألوان لغرفة الأطفال) (ب) ما يفضل شرائه قبل الزواج على طول 1- طبعا طبعا مفرش السرير الكبير 2- طقم ملاية ليلة الدخلة 3- جميع المفارش (السفرة والأنتريه والكومود والترابيزات الصغيرة) 4- طبعا الستاير ووالسجاجيد والمشايات بقى بعد ما تختار عفشها وديكوراتها رابعــــــــا: الأجهزة الكهربائية: برضه الحاجات اللي تحسي إنها فعلا قيمة وهتعيش,, وفي نفس الوقت جابت آخرها في التطور والحداثة 1- مضرب البيض الصغير المعروف للجميع 2- الخلاط سواء العادي أو العمودي اللي طالع جديد 3- جهاز الزبادي لو بتستخدموه 4- الكشاف الكهربائي بتاعة النور لما يقطع 5- مسدس الشمع 6- كيتشن ماشين ماركة نظيفة لأنه مفيهوش موضة جديدة خلاص كل اللي موجود نفس الاستخدامات بس موديلات مختلفة 7- مروحة سقف أو ستاند (مش هتاخد مكان في التخزين وفي نفس الوقت لا غنى عنها) 8- ممكن دفاية صغيرة من اللي هي موضتها برضه مش بتبطل وفاصل أخييير وينتهي الموضوع بإذن الله خامســـــــا: الملابس طبعا ده الاتفاق عليه كان شبه مستحيل عشان اختلاف المقاسات والأذواق بس لو اقتنعتي إنك مش هتبدأي تشتري لبنتك حاجة قبل الثانوي بإذن الله يبقى بإذن الله مش هنختلف على البنود اللي مكتوبة دي وخلي بالك إنك برضه مش هتشتري كل حاجة.. يعني هتشتري نصف الكمية مثلا وتخلي الباقي قبل الزواج مباشرة 1- بعض ملابس البيت القطنية أو الليكرا (كارينا وأخواتها) اللي موضتها مش بتبطل ومقاسها بيمط زي مثلا.... البديهات الفرداني ألوان بأنواعها (كت وحمالة ونص وكم طويل وكتف وكتف وكروس و رقبة) البناطيل او الشورتات أو البنتاكورات الفرداني برضه أطوالها المختلفة وسواء واسع أو وسط أو استرتش (بلاش الجينز عشان المقاس) 2- بعض البيجامات والترنجات والجلابيات سواء شتوي أو صيفي 3- بعض اللانجيري المتعارف عليه بس متكتريش (طويل وقصير وبيبي دول) وطبعا ألوان مختلفة 4- بعض الأندرات والبراهات القطن بس خلي بالك من المقاس 5- إسدال الصلاة وخمار طويل أو قصير 6- ممكن الروب واحد صيفي وواحد شتوي 7- طقم برنس الحمام لو قدامك خامة نظيفة وموديل حلو 8- شباشب البيت البلاستيك.. أنواع وأشكال لأن دي مش بتبطل ولا بتخسر 9- لكاليك أشكال وألوان (جاهزة – كروشية – ليج وورمر...) 10- ممكن تشيلي الشرابات الفيليه بتاعة الخروج 11- ممكن شال كروشيه لطيف كده تدفى بيه في البيت اللي تشتريه بإذن الله قبل الجواز بفترة بسيطة 1- اللانجيري خصوصا بتاع ليلة الدخلة 2- باقي البيجامات وملابس البيت 3- الأطقم الداخلية سواء بيت أو خروج 4- أطقم ملابس الخروج (بالطرحة والشنطة والشوز) سادســــــا: متعلقات شخصية 1- البوينهات البلاستيك بتاعة الشاور 2- فرش وأمشاط شعر مختلفة 3- طقم العناية بالأظفار (قصافة ومبرد وغيره) 4- بكر لف الشعر أو لفافات الكيرلي 5- مراية صغيرة للتسريحة 6- ملقاط 7- حجر خفاف سواء طبي أو الطبيعي 8- بنس الشعر التقليدية والكلبسات عشان لف الشعر 9- سفنجة تفرقة أصابع القدم عشان الباديكير والمانيكير 10- ممكن بعض الاسبرايهات أو البرفانات مفتوحة الصلاحية كده أن فضيت لكم كل اللي في مخي وطبعا طبعا الموضوع مفتوح لآراءكم ومشاركتكم عشان تكملوا بعدي اللي أنا قصرت فيه أفكرك تاني... رأيك يهمني كتير.. وتقيييمك (لله).. بإذن الله هينفع غيرك وتكسبي وتكسبيني معاكي حسنات وأشهد الله إني أحبكم فيه

[أجمل سعوديه]

كلنا عارفين إن البنوك (ماعدا الإسلامية) فوايدها ربوية يعني هتدخلي مال حرام على مالك الحلال.. وده أكيد عمره ما هيخليه يزيد..كلام سليم ,, وفي الصميم موضوع جداا رائع وشامل تسلم يمينك ياقمر

[jasmean]

ثانكس علي المرور

[Sh2wA]

ايهــ ي بت الجمال دهــ
بجد موضوع مهمــ جدا حبيبتى ♥♥
لكل فتاه بتحضر شوارها ومنهم انا هههه
دوااام النشاط
ودى /♥

[jasmean]

ثانكس علي المرور

[shrOok]

موضوع مهم جدااااااااا
تستاهلى فايف ستارز
بصراحة عينى عليكى باردة

[jasmean]

ههههههههه

ربنا يخليكي ياشروووق

وششكرااا علي المرور

[سارة بنت مصر]

مشكوووووور والله يعطيك الف عافيه

[jasmean]

شكرااا علي مرورك

[Ŗăήćy]

توبيك مهم جدا يـآ ياسمين
تسلم ايدك