هذا ليس دفاعا عن الحبيب .. تمت إضافة لينك مهم جدا

[Words Whisper]

أولا الموضوع ارتجالي و هكتبه بالعامية

من باب التبسيط ..

الفيلم اللي ظهر مؤخرا وبيتعرض للنبي عليه الصلاة والسلام والإسلام بشكل سيء

بصراحة أنا مش قرأت عنه ومش عارفة بيعرض ايه ومش عايزة أعرف

احنا لما نكون بنحب حد مش بنرضى نسمع أصلا بحقه كلمة سيئة

مش بنقعد نسمع الإساءة وبعدين نرد

لاااااااا مش بنرضى نسمع أصلا ..

سئل الإمام الشعراوي رحمة الله عليه

عن كتاب أحد المسئهزئين بالإسلام في التسعينات

فرد :: لم أقرأه ولن أقرأه

فقالوا :: كيف وقد كثر الكلام عنه ؟؟!!

فقرأ قول الله تعالى في سورة النساء ::

(( قد نزل عليكم في الكتاب أن إذا سمعتم آيات الله يكفر بها ويستهزأ بها فلاتقعدوا معهم حتى يخوضوا في حديث غيره

إنكم إذاً مثلهم إن الله جامع الكافرين والمنافقين في جهنم جميعا )) ...

ومن وجهة نظري كثرة الكلام عن الفيلم دا غلط

لأنه كدا بنلفت الأنظار له وبنشهره أكثر ..





أنا حقيقي مش كنت عايزة أتكلم في الموضوع دا

لأني عارفة أني أكثر الخلق تقصيراً

لكن يمكن بكلمة أقولها هنا الله يغفر لي ومن باب إبراء الذمة ..

مش غريب اننا نتجمع بالآلاف في مظاهرات

واحنا بنردد :: نصرة لرسول الله

ورسول الله أصلا منصور من الله

بينما المساجد تبحث عمن يكمل الصف الأول ؟!!

مش غريب نردد شعارات

ومن ضمن اللي بيرددوا ناس مش بتصلي ركعة ؟؟!!

دا مش دفاع عن حق رسول الله عليه الصلاة والسلام

دا مجرد غضب بصفتنا مسلمين لكن مش أخلاق المسلم ...





بنطالب بمحاكمة اللي وجهوا الإساءة دي

أولا كدا هو مش باسم الحرية لأنه كلنا وحتى اللي ساهموا في إخراج الفيلم دا

عارفين انه فرق كبير وواضح بين الحرية وبين الانفلات وقلة الأدب واللااحترام

الفيلم باسم الكره

ثانيا مُسلَّم بأن احترام الأديان فرض إنساني على الأقل

والأنبياء وإن لم يُؤمن بهم من البعض لهم قدسيتهم

ثالثا النصرانية دين سماوي بالأساس وهم أهل كتاب

وأيا كان اعتقادنا عن الدين دا ففيه حاجة أساسية

انه بما انه دين سماوي

فالله أنزل كل الأديان بالـــ سلام و الـــ حب و الــــ تسامح

ودي أصول لاتتغير مهما غُيِّرَت الأديان بمفهوم الأشخاص ..

محاكمة اللي ساهموا في اللاأخلاقية واللادينية دي

هتعمل تأديب و ردع تقوييمي

لكن مش هتغير القلوب ولاهتغير النظرة لديننا ونبينا عليه الصلاة والسلام

يعني عايزة تقولي ايه ياأسماء ؟

أقول لحضراتكم بشكل تاني

الإدمان ظاهرة خطيرة و تأثيراتها السلبية على المجتمع كله بتكون مش بس الفرد .. صح ؟

و الإدمان دا بردوا اختلال أخلاقي لأنه بيخرج الإنسان عن إنسانيته في كل حاجة

يعني نوع من الجريمة بردوا

طيب نفرض مسكنا مجموعة مدمنين

هيبئا حاجة من ثلاثة ::

- يااما القانون يُنفذ معاهم ويعاقبوا بالسجن

- يااما اضافة للقانون هنمارس العقاب المجتمعي والرفض لهم

- يااما هناخد المدمنين دول ونعالجهم في مصحة ونفهم منهم ايه وصلهم لكدا ونعالجه

تمام كدا ؟؟

في الحالة الأولى كل اللي عملناه اننا حبسناهم وبس

و في الحالة التانية أوجدنا داخلهم رفض متبادل

انما في الثلاثة فاحنا فعلا عملنا حاجة إيجابية

لاننا كدا ساعدناهم يكونوا أشخاص أفضل ودا هيفيد المجتمع الانتاجي ككل

إضافة لأننا هنفهم الأسباب فنعالجها كمان مش بس السطح من برا

وبكدا نقدر نقلل فعلا الظاهرة دي ..

هو الموضوع كدا بالضبط

محاكمة اللي أساء مهمة القضاء فلنتركها له

انما احنا عملنا ايه عشان نفهم الناس دي ديننا ؟؟!!

اللي عملوه كان سببه كره ،، يبئا في أسباب للكره دا

والمفروض دا دورنا بجد

اننا نكون مثال بجد للإسلام وأخلاق الرسول عليه الصلاة والسلام

عشان الناس تعرف الدين بينا مش احنا اللي نسيء للدين بتصرفاتنا وبعدين نقول ليه الرفض دا

للأسف الشديد كلنا عارفين واحنا مسلمين وعارفين أخلاق النبي وعارفين الدين

انه فيه مننا اللي بيسيء للدين دا بنسبة أخطاؤه للدين

انه فيه اللي خلوا الجهاد ارهاب و استباحة للدماء فخلوا دي نظرة اللي مش يعرف الدين للإسلام

مع انه الجهاد لم يُشرَع إلا ليحترم الإنسان ويحترم العقيدة ..

لما نسجن ونعاقب هنعالج بس من برا

لكن مش هنغير النظرة دي

مش هنخلي الناس تشوف النبي الإنسان الراقي الفريد عليه الصلاة والسلام

مش هنخلي الناس تشوف سلام وتسامح الــ إسلام ..

الدفاع الحقيقي عن حق النبي عليه الصلاة والسلام

انه نساعد الناس تشوف روعة محمد عليه الصلاة والسلام وروعة الــ إسلام

مش انه نكسر ونزعق ونشتم ..





عن أبي هريرة رضي الله عنه قال ::

جاء الطفيل بن عمرو الدوسي إلى رسول الله صلى الله عليه وسلم فقال ::

إن دوسا قد عصت وأبت فادعُ الله عليهم ،، فاستقبل رسول الله صلى الله عليه وسلم القبلة ورفع يديه

فقال الناس :: هلكوا ،، فقال ::

(( اللهم اهدِ دوْساً وائتِ بهم ،، اللهم اهدِ دوسا وائت بهم ،، اللهم اهد دوسا وائتِ بهم )) ..

ليه مش دا اللي بنتعلمه من النبي عليه الصلاة والسلام بدل دعاوي الحرق اللي منتشرة بيننا دي

بدل مانقول اللهم احرقهم اللهم العنهم

مانتقدي بحبيبنا عليه الصلاة والسلام اللي احنا ثائرين عشانه ونقول ::

اللهم اهدهم وائتِ بهم فإن لم يكن بهم خير فأرِح العباد من شرهم ... آآآمييين

احنا هنستفيد بجد من الدعاء لهم بالهداية مش الحرق

الـــ إسلام هيُنصر بهداية اللي كان بيسيء له

كدا هنبئا ساعدنا بدعوة في خدمة ديننا

خالد بن الوليد رضي الله عنه كان من أكثر الكارهين للــإسلام

وقاتل ضد المسلمين في غزوات وكان بيتمنى قتل النبي عليه الصلاة والسلام

لكن النبي عليه الصلاة والسلام كان بيتمنى له الهداية وبهداية خالد بن الوليد نُصِر الإسلام

وبئا خالد بن الوليد اللي كان بيحارب الإسلام ،، سيف الله المسلول ...




أنا كدا لخصت اللي جوايا عن الموضوع دا

والكلام دا لنفسي قبل أي حد

لأني عارفة كويس اوووي اني اكثر الناس تقصيرا

بس اهوه نحاول مش نكون احنا السبب في ان حد يكره ديننا

نحاول نكون السبب في ان الناس تحب ديننا و تحب النبي عليه الصلاة والسلام

مش لازم يسلموا لكن لما نعرفهم بديننا ويحترموه لأنه يستحق الإحترام هنكون كسبانين ..




تمت بحمد الله ..

دمتم بحفظ الرحمن ..

[ساحر الأحزان]

الاسلام دين سماحة ورسولة غنى عن التعريف ونصرتة واجبة علينا كمسلمين هناك اصوات خرجت بمحاكمة المتسببين فى الفيلم

وهناك المظاهرات التى تندد بالفيلم نحن كمسلمين لا نتعدى على احد ولا نسىء لاحد لاننا هكذا علمنا كيفية المحافظة على ديننا

فديننا معصوم وهؤلاء قلة تريد الشهرة وهى ابعد ما تكون عن ذلك

موضوع قيم منك

دمتى بكل خير

[نهر النيل]

عليه الصلاة والسلام
ومؤكد موضوع متميز منك
بس ليا اضافه
موضوع المساجد دا آه فيه تقصير وتقصير ملموس كمان
انما ومش دفاعا لكل حد ظروفوا
يعني لما يكون واحد عامل جراحه كبيره وممنوع من الاطباء نزوله الشارع
مؤكد هيصلي بالبيت
وكمان دفاعنا عن سيد الخلق
امر منتهي
وامر محسوم
وامر طبيعي
احنا شبعنا وملينا ديبلوماسيات مع الغرب
ودي تاني مره
كفايه حماقاات وتطاول منهم
متشكر لموضوعك الراقي

[Words Whisper]

اقتباس المشاركة الأصلية كتبت بواسطة ساحر الأحزان الاسلام دين سماحة ورسولة غنى عن التعريف ونصرتة واجبة علينا كمسلمين هناك اصوات خرجت بمحاكمة المتسببين فى الفيلم وهناك المظاهرات التى تندد بالفيلم نحن كمسلمين لا نتعدى على احد ولا نسىء لاحد لاننا هكذا علمنا كيفية المحافظة على ديننا فديننا معصوم وهؤلاء قلة تريد الشهرة وهى ابعد ما تكون عن ذلك موضوع قيم منك دمتى بكل خير

بالتأكيد الدفاع عن حرماتنا فرض علينا

والدفاع عن محمد صلى الله عليه وسلم فرض

ولكن المهم أن ندافع عن النبي بأخلاق النبي صلى الله عليه وسلم ..


شاكرة تواجد حضرتك الراقي

سعدتُ به ..

دمت بحفظ الرحمن ..

[Words Whisper]

اقتباس المشاركة الأصلية كتبت بواسطة نهر النيل عليه الصلاة والسلام ومؤكد موضوع متميز منك بس ليا اضافه موضوع المساجد دا آه فيه تقصير وتقصير ملموس كمان انما ومش دفاعا لكل حد ظروفوا يعني لما يكون واحد عامل جراحه كبيره وممنوع من الاطباء نزوله الشارع مؤكد هيصلي بالبيت وكمان دفاعنا عن سيد الخلق امر منتهي وامر محسوم وامر طبيعي احنا شبعنا وملينا ديبلوماسيات مع الغرب ودي تاني مره كفايه حماقاات وتطاول منهم متشكر لموضوعك الراقي

أكيد طبعا فيه ظروف وناس معذورين

بس الأكيد انه مش كلنا معذورين

ولاحتى أغلبنا معذورين

وممالااختلاف عليه انه الدفاع عن النبي صلى الله عليه وسلم فرض علينا

لكن المهم أن ندافع عن النبي بأخلاق النبي صلى الله عليه وسلم ..

شاكرة تواجد حضرتك القيم

سعدتُ به ..

دمت بحفظ الرحمن ..

[دمعه حائره]

الرسول عليه الصلاة والسلام تعرض الايزاء فى حياته ممالايحتمله بشر
ولم يرد الاساءة بالعكس عاملهم بالحسنى حتى يهتدوا
كنت بشوف برنامج من كام يوم لأحد المصريين المهاجرين للخارج
وكان بيحكى ازاى اتصرفوا مع التشويه فى فتره سابقه
بإنهم وقفوا فى الشوارع بكل تحضر
يوزعوا كتب صغيره للتعريف بالرسول والاسلام
وحققوا اكبر نسبه اعتناق الاسلام فى الفتره دى
لو كانوا كسروا او حرقوا كانوا اعطوا صورة سيئه لدين ورسول
أتى ليتمم مكارم الاخلاق
مافيش شك ان واجبنا الغيره والغضب ولكن بأخلاق رسولنا ودينا الحنيف
اكيد المساجد بتعانى من الهجر احيانا لكن ضغوط الحياه بتفرض على الناس ده
وربنا يقوى ايمان الجميع ويستطيعوا اتباع سنه رسولنا على اكمل وجه
موضوع قيم جدا وتوضيح لوجهة نظرك بمنتهى القعل والبساطه
يسلمو اسماء وموفقه دايما يارب

[راجية الشهادة]

جزاك الله خيرا
تحياتي لسموك

[Words Whisper]

اقتباس المشاركة الأصلية كتبت بواسطة دمعه حائره الرسول عليه الصلاة والسلام تعرض الايزاء فى حياته ممالايحتمله بشر ولم يرد الاساءة بالعكس عاملهم بالحسنى حتى يهتدوا كنت بشوف برنامج من كام يوم لأحد المصريين المهاجرين للخارج وكان بيحكى ازاى اتصرفوا مع التشويه فى فتره سابقه بإنهم وقفوا فى الشوارع بكل تحضر يوزعوا كتب صغيره للتعريف بالرسول والاسلام وحققوا اكبر نسبه اعتناق الاسلام فى الفتره دى لو كانوا كسروا او حرقوا كانوا اعطوا صورة سيئه لدين ورسول أتى ليتمم مكارم الاخلاق مافيش شك ان واجبنا الغيره والغضب ولكن بأخلاق رسولنا ودينا الحنيف اكيد المساجد بتعانى من الهجر احيانا لكن ضغوط الحياه بتفرض على الناس ده وربنا يقوى ايمان الجميع ويستطيعوا اتباع سنه رسولنا على اكمل وجه موضوع قيم جدا وتوضيح لوجهة نظرك بمنتهى القعل والبساطه يسلمو اسماء وموفقه دايما يارب

كلامك تمام اوووووي يامنون

+ انه اكيد فيه فضول عالي عند اللي مش عارف لمعرفة النبي اللي الفيلم تعرض له دا

فطبعا تعريف الناس بالنبي عليه الصلاة والسلام في الفترة دي

هيكون له منافع كتير وعليه اقبال اكتر زي ماسبق ودا حصل

وكانت النتيجة ارتفاع أعداد معتنقي الإسلام ..

بيج بيج ثانك منون ع وجودك الرائع ..

دمتِ بحفظ الرحمن ..

[Words Whisper]

اقتباس المشاركة الأصلية كتبت بواسطة بقايا طعنات رجل جزاك الله خيرا تحياتي لسموك

شاكرة تواجدكِ

سلمتِ

ودمتِ بحفظ الرحمن ..

[غريـب ألأطـوآر]

انا بـأمانة مش هتكلم كتير

لأن ألكلام اللى اتقـأل من هنـأ ومن هنـأ

لأ هو سر ولا جديد

والاغلبية عارفـأه

بس هيا ألنفس البشرية وأسرأرهـأ

وأستخدـأم البشر للبشر فى تحقيق مصالح معينة

بس هنعمل ـأيه مهمـأ صرخنـأ

البلطجية هما هما
الحرامية هما هما
النصابين هما هما
والاندال والخونة هما هما

بمعنى أوضح

ديل الكلب عمره ما هيتعدل ولو ربطوه فى جبل المقطم

توبيك فى منتهى الجمال والروعة واحلى تقييم ي اسماء