بداية جديدة للمنتدى بتاريخ 5/10/2012

[Mo7aMaD 3aLa2]

الســـــــلام عليكــــــــــم



ازيكــــــــم ؟

ان شاء الله تكونوا بخير ,,,


بداية ,,مبروكـ عودة المنتدى الى شكلة المعتاد بل و احسن لانة يتضمن خصائص جديدة مش كانت متوفرة قبل كدة ,,

وان شاء الله مش هيحصل أى مشاكل تانى


ندخل بقى فـ الموضوع


موضوعى عن حالة الخمول الحالية فـ المنتدى
انا شايف انة المنتدى محتاج start ,, زى بالظبط لما تكون فاتح لعبة من غير ما تبدأها ,,

فـ انت اسمك فاتح لعبة لكن فـ الحقيقة مبتلعبش

فـ انا فكرتى اننا هنعمل start جديد للمنتدى
حددت يوم ,,
فـ اليوم دة هننزل بتقلنا وهنسترجع نشاط المنتدى فى هيئة مواضيع ومشاركات طبعا

على سبيل المثال

انا هسترجع من جديد برنامج (حوار مع الكبار) وهتنزل الحلقة التالتة فـ اليوم دة ,,

مورشو هيسترجع برنامج (اجمد عضو ) وتنزل حلقة فـ نفس اليوم

ماتركس يستعيد برنامج (شبابيك) وتنزل حلقة فـ نفس اليوم

طارق يقدملنا (مسابقة جديد) وتنزل فـ نفس اليوم طبعا

دول اللى انا اقدر ادبسهم حالياً ,,

بس دة مش كل اللى عندنا,, كل عضو كانت لية فكرة واتوقفت لظروف المنتدى الاخيرة او لاى ظروف هيسترجعها معانا فـ اليوم دة

سواء بقى برامج ف اليوميات او الهوايات او ف الخواطر والاشعار او ف قلم الاعضاء او اى قسم ف المنتدى


وهيبقى يوم دسم ,, الدسامة دى ليها مردود نفسى ايجابى هيفرق كتير صدقونى معاكوا ,,

اختيارى ليوم 5/10 ,, هيبقى يوم جمعة ,, يعنى تقريبا كلة فـ البيت وتانى يوم 6/10 هيبقى اجازة طبعا ونقدر نتابع مردود المجهود اللى اتعمل ف اليوم الاول براحتنا

فى مساحة 6 ايام من دلوقتى كافية جدا لان كل واحد يجهز فكرتة
اللى هيشارك بيها ,,

مش ناقص غير ان كل عضو مشارك يعلن هنا ف التوبيك هيشاركـ باية ؟

وعايزين حد يصمملنا اعلان عن اليوم دة نحطة ف التوقيعات
و كـ بنر ع الرئيسية



اتمنى الكل يشترك معانا ,,



المشتركين حتى الآن


Words Whisper
ماتركس
silver spectra
دمعة حائرة
نهر النيل
ياسمينا
Countess
طمطم
Arco Baleno
morshooo
جنرال 25 يناير
۩۩ elMagic ۩۩
ملكة الهدوء
كبرياء رجل
وهج الايمان
الحان الورد
عاشقة الليل الحزين
yooka
وحيد القمر
واد حبيب
حبرالقمر
sokara
مشتاقه للجنه
جبل عالى
Silver Flower
dii-dou
همسه الجوارح
## تيتشـــر نفشـهـ ##
~ ‏‏‏‏♥ Queeη sōmą ‏‏♥ ~
احمد الحلو
عاشقة الهدوء
عاشقة ذكر الله

[Words Whisper]

حلوة الفكرة كتير

بس المشكلة

هل دا هيكون بعد عودة الفورم للثالث ولا قبلها ؟

ولو قبل هل أكيد المشاركات مش هتتأثر ؟؟

ولو على تصميم بنر

أنا متكفلة بيه ان شاء الله ..

بالتوفيق ..

دمت بحفظ الرحمن ..

[Mo7aMaD 3aLa2]

اهلا اسماءمحمود كان قال امبارح المنتدى هيرجع لشكلة القديم خلال 72 ساعة كـ حد اقصىفـ بالتالى اليوم دة هيكون بعد ما المنتدى رجع لشكلة المعتاد للاعضاءوشكرا جدا على تشجيعك و تصميمك للـ بنر..

[ماتركس]

صباااح الخير يا ابو علاء

بصراحه الواحد فاضي بس كنا عايزين زقه كده وانتا اديك بديت الزقه دي ياريس

الواحد كل ما يدخل المنتدي مبيلقيش جديد فبتجلي حاله خمول ويئس

بس باذن الله ياريس اوعدك انو هنبدا معاك في الحمله دي ونبدا نرجع المنتدي ز الاول ونرجع احنا كمان معاه

بجد فكرتك جااامده يا ابوعلاء وانا معاك يا معلم ومنتحرمش منك ياريس وربنا يقدرنا ونعمل اللي علينا

ما احنا فاضيين والا شغله والا مشغله:biggrin:

[نهر النيل]

صباح الخير
مؤكد اي شيئ فيه تفاعل او تنشيط للمنتدى
والنهوض لعودتوا من جديد امر مهم مننا كلنا
ويمكن عشان كده
انا كنت نوهت هنا باعلان عن حمله تكون ضخمه
نسميها
حملة حب المنتدى
بكل الاقسام
منها ننشط المنتدى
ومنها يكون فيه تعويض عن حجم خساير المنتدى والناس هنا
بس يمكن عشان ظروف الاداره مشغوله بالاصلاح محدش خد بالوا باعلاني واقتراحي
انا بقترح على حضراتكم تفاعل الحمله بقوه لكل الناس يد بيد
وبقترح كمان تحاولوا حضراتكم فريق الاداره نظره للناس اللي خسرت مشاركات وما شابه
ما هو عشان الناس ترجع بقوه
لازم تلاقي عروض تعويضيه عن خساراتهم اللي لا المنتدى كان سبب فيها ولا الاداره
وحسبي الله ونعم الوكيل في اللي عملوا كده
ومؤكد وبصفه شخصيه متفاعل ومع حضراتكم وبدأت فعلا اقترح كام اقتراح على بعض الفاضلات المشرفات لتنشيط اقسامهم
منهم من رد ومنهم لسه
وفيه حصريات كتير
بس نظره للغلابه يا ادارتنا الغاليه
وربنا يوفقنا كلنا لعودة المنتدى احسن مما كان
واسف للتطويل
يوم سعيد يارب

[حنـــــون]

بجد فكره جميله جداااااااا
عجبتنى اننا كلنا ننزل فى يوم
واحد ونحس اننا فعلا بنرجع الروح
الجميله زى زمان
بالتوفيق يالول وان شاء الله
كله هيبئه تمام

[SiLver Spectra]

دايسين معاك يا كبير
و هبدا في تحضير الفكرة ليوم 5 اكتوبر

[Mo7aMaD 3aLa2]

ماتركس - طارق

شكرا على قبول التدبيسة يا رجالة

حنان - نهر

منورين والله ,,

يالة ناقص اسبوع من دلوقتى

مين هيشارك معانا فـ اليوم القومى للمنتدى ؟ )

[SplendiD SouL]

احم احم
كل واحد بقي يجيب الممسحه بتاعته وجردل مايه وادوه
عاوزين نشوف شغل عال العال يارجاله :d
عاوزه ارجع الاقي المنتدي حاجه تانيه
لا فوكريره توحفه ياقليوبي بجد بالتوفيق فيها
لو كان عندي حاجه كنت عملت حاجه بس مش عندي ومش فاضيه بقي :d

[دمعه حائره]

اكيد فكره جميله هاترجع النشاط تانى وتفكرننا بالمواضيع الجميله
وان مشاركة معاكم ان شاء الله بموضوع فى الابداعات
كان اتوقف من يوم مشكله المنتدى
يسلمو علاء وربنا يوفق الجميع