ذكرى عبد الناصر

[قلم بلا حبر]

بسم الله الرحمن الرحيم


السلام عليكم

الف مبروك عودة المنتدى ,,,

فى ذكرى جمال عبد الناصر ::

يستوقفنى الشعب المصرى ,,,,

فعلى مدار فترة حكمه التى امتدت من عام 1954 الى عام 1970 شابت العلاقات المصريه الامريكيه توترا ما بعده توتر

وهتف وصفق الشعب لكل خطاب كان يلقيه عبد الناصر ويكيل الشتائم والسخريه للمسؤولين الامريكان ,, بل ويضيف بان ما يقدموه من معونه (( على الجزمه )) ,,(( واللى مش عاجبه يشرب من البحر )) ,, وكانت تتعالى صيحات الاعجاب كلما اشار الى اخوانه العرب وكيف هى القوميه العربيه السبيل الى تحقيق الرخاء والنماء لشعوب المنطقه ,, وان الوجود الاسرائيلى شئ من قبيل الصدفه لابد وان يمحى , وان استقلال القرار المصرى هو من يحفظ لها دورها الاقليمى

أيده الشعب وصفق له وبايعه وناصره وهتف لاجله !!!!!!

من عام 1970 حتى عام 1981 تولى السادات حكم مصر ,, وهنا تغيرت السياسه الخارجيه المصريه 180 درجه فى اتجاه تحسين العلاقات مع امريكا

فامريكا صارت الحليف الاول لمصر ,,, بل وازدادت المعونه من 50 مليون جنيه الى ان وصلت فى ايامنا تلك الى مليار ونصف المليار دولار وانفتحت الاسواق الامريكيه امام البضائع المصريه فيما سمى انذاك (( بعصر الانفتاح )),,, واصبحت خطابات السادات تشع بالمحبه والوئام الذى يجمع بين مصر وامريكا ,, بل وتعدى الامر الى مهاجمة الاخوه العرب مع كل خطاب له وزيارته للقدس واعترافه باسرائيل ,, واصبحت جملته الشهيره مثار ضرب الامثال (( علشان خاطر كارتر ))

أيده الشعب وصفق له وبايعه وناصره وهتف لاجله

لا مجال لعقد المقارنات بين الشخصيتين مع التباين الشديد فى مواقفهما

ولكن انظر الى هذا الشعب الذى يؤيد ويصفق ويبايع ويناصر ويهتف لاجل من بيده الحكم بصرف النظر عن سياساته سواء اتفقت ام اختلفت مع توجهات هذا الشعب

على رأى (( كرم غباوه )) فى فيلم دكان شحاته (( شعب طيب ,, شعب ولد حلال ))

[SiLver Spectra]

الفترة بين 56 و 67 بعتبرها العصر الذهبي لمصر
سواء اتفقت او اختلفت مع عبد الناصر فهو في النهاية السبب وضع مكانة مصر في الريادة السياسية و حتى و ان ماكناش في الريادة فهتلاقي المحللين بيقولوا : تعود مصر لدورها الريادي في المنطقة . أو : فقدت مصر دورها الريادي
أعتقد ان بنسبة كبيرة الريادة بترجع لفترة حكم عبد الناصر
ممكن تتخيل شخص حكم مصر و كان خامل زي مبارك كدا , لو تخيلت و قارنت هتحس فعلا بقيمة الفترة الذهبية الي بقولك عليها ابان حكم عبد الناصر

بأمانة أنا بسمع خطاباته دلوقتي بحس انه كان سابق أوانه ,
كاريزما و تلقائية و القاء و مضمون و ارتجال , حاجه مش طبيعية
مش زي دلوقتي تسمع كدا تحس بام الملل ,و لا خطبة الجمعة ,,و بحس ان هو اصلا ملان من نفسه و هو بيعيد في كلامه (واخد بالك انت)

[قلم بلا حبر]

مفيش اختلاف ,,, وده اللى بيخلينى اقول ان السادات يا اخوانا مش الداهيه اللى انتم شايفينها بالعكس ,,, انا شايف انه اسس على اخر حاجه وصلها عبد الناصر قبل ما يموت بعد حرب الاستنزاف وقدر بمعاونة قاده اكفاء زى سعد الدين الشاذلى انه يخوض حرب أثر عليها هو سلبا بقراراته الغلط اللى اتخذها ومنها تطوير الهجوم اللى اتسبب فى حدوث الثغره ومحاصرة الجيش الثالث المصرى

وعلشان كده انا مرضتشى اقارن ,, لان متأكد ان الحقيقه باينه زى الشمس

لو ده قدر يوصل بلده لرياده سياسيه ونهضه داخليه من خلال قطاع عام كان بيحقق مستوى عالى من الاكتفاء لمصر فى مجالات كتير ,,,, وقدر يحفظ لمصر استقلالية قراراها وبعدها عن هعيمنة الحرب البارده اللى كانت دايره بين الاتحاد السوفيتى وامريكا

يبقى اللى غير الدفه 180 درجه مهما كانت مبرراته اكيد كان حساباتهع اغلبها مش صح ,, وده دليله استقالة 2 وزارء خارجيه قبل واثناء مباحثات كامب ديفيد ده بالنسبه للسياسه الخارجيه ,, اما بالنسبه للقوات المسلحه فكلنا عارفين اللى حصل لسعد الدين الشاذلى من اقصاء متعمد ,, وبالنسبه للانفتاح اللى روج ليه السادات فكان فال الشوم والخراب على مصر لانه اسس لفئة المنتفعين اللى استفحلت بعد كده فى عهد مبارك

محتاجين نعيد كتابة تاريخنا بعيد عن اوبريتات 6 اكتوبر اللى كنا بنشوفها كل سنه

لازم نعرف الحقيقه بحلوها او بمرها ,, علشان نقدر نقيم الاوضاع لالى احنا فيها وايه اللى ممكن نعمله الفتره الجايه ونقدر نقيم الانظمه بتاعتنا دلوقتى

مبروك يا عم رجوع المنتدى

[SiLver Spectra]

بس عارف لو كان عاش كتير
مش بعيد كان يقلب عالقذافي او الاسد )
بجد من ضمن الحاجات الي مجدته هي موته بعد النكسة ب3 سنين
عارف مبارك لو كان حكمنا في التمانينات بس , كان بقى زي الجنزوري كدا ,
الناس كانت عماله تغني بيه و الجنزوري و فين الجنزوري
المقصد انه كان ممكن في الظروف دي يرشح نفسه و الناس تختاره
بس النظرية بتقول ان الشخص الي بيبلط عالكرسي بيقتل مجده , مهما كانت انجازاته

[رووكه]

يصراحه مش هلاقى رئيس زيه تانى

الله يرحمه انا بحبه جدااااااااااا

متواضع وفى خدمه شعبه بحق

وخلى لمصر كرامه فى اى مكان


تسلم على الموضوع الرائع

تحياتى وتقديرى لما قدمت

مع احلى تقيم لى احلى جمال عبد الناصر

[الأميرة رودي]

سامعين دالوقتى انه بعد الاحصائيات أصبح الشعب موافق على قرارات وأداء مرسي بنسبه أكتر من 75 %

طيب ازاى وانا لحد دالوقتى بسمع ناس بتسخط عليه وعلى جماعه الاخوان ( يكونش دول هما ال 25 % التانيين ) ؟

وشايفه ناس تانيين أتغيرو وأصبحو بيهللو لمرسي مع كل قرار ياخده أو كل زياره يعملها أو حتى صلاه الجمعه اللى بيروح يصليها ومعاها حرس بشكل غريب مع أنه قال همشي من غير موكب مبالغ فيه عشان الشعب مايكرهنيش..

مش ده المهم ..

المهم أنى بأيدك قلم فى أن الشعب المصري فعلا بيتبدل حاله ويكون على مزاج الحاكم
أيام عبدالناصر كان بيهلل ل عبدالناصر ويسخط على امريكا
ولما السادات وطد العلآقه بيبنا وبين الامريكـان طلعو قالو رجل الحرب والسلام
ودالوقتى طبعا وبدون خلآف أصبح مرسي هو المنقذ الوحيــد ولآزم الكل يقول آمين على قراراته عشان هو اللى هينضف الدوله !!!!

أنا بتمنى ان ربنا يوفقه ويكمل مسيرته يمكن يكون هو المنقذ فعلا ..
..

[countess]

شخصية سياسية صعب تكررها

~~~~~~

[نهر النيل]

الف رحمه ونور عليه يارب
متشكر جدا
مودتي

[the power of love]

بصراحة انا من وجه نظرى ان ده بجد زعيم من زعماء الامه العربية كلها*

[morshooo]

تسلم يا ابو السيد على التوبيك
مع انى كنت ضد سياسة عبد الناصر فى حاجات كتيرة
انا معاك انة زعيم عربى ومحدش يقدر ينكر دا
ولكن السادات اعتقد ان فترتة كانت افضل بكتير من فترة عبد الناصر
حتى لو كان كمل الى بناة عبد الناصر
بس المهم انة كمل غيرة شوفنا عمل اية مع انة كان
يقدر يخلى مصر تعيش احسن فتراتها بعد الى عملة السادات