::: فعاليات المنتدى :::

أهلا وسهلا بك إلى منتديات بنات مصر.
أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.

آخر 12 مواضيع
عودة
الكاتـب : نزارالفاضل - آخر مشاركة : Lamees - مشاركات : 2 -
* غُـربـة حـــب*
الكاتـب : وليد الطويل - مشاركات : 218 -
فجر جديد
الكاتـب : احساسى صحيح - مشاركات : 0 -
قوانين
الكاتـب : نزارالفاضل - آخر مشاركة : وليد الطويل - مشاركات : 5 -
عتاب
الكاتـب : gntlsoll - آخر مشاركة : منيرة محسوب - مشاركات : 10 -
عتاب
الكاتـب : gntlsoll - آخر مشاركة : نزارالفاضل - مشاركات : 2 -
سيناء الحب
الكاتـب : نزارالفاضل - آخر مشاركة : ياسر عبد الباقي - مشاركات : 15 -
يناديك النبض
الكاتـب : فادي العراق - آخر مشاركة : fanaa - مشاركات : 15 -
أوله
الكاتـب : خالد عبد الحميد المصرى - آخر مشاركة : محمد خلاف - مشاركات : 1 -
نداء
الكاتـب : فادي العراق - آخر مشاركة : ياسر عبد الباقي - مشاركات : 10 -
جلا جلا....
الكاتـب : مارد الغضب - آخر مشاركة : ياسر عبد الباقي - مشاركات : 9 -
بقلمي🖤
الكاتـب : ana aboodya - آخر مشاركة : aboheba - مشاركات : 5 -

إضافة رد
 
LinkBack أدوات الموضوع انواع عرض الموضوع
قديم منذ /10-05-2012, 01:11 PM   #1

المراقب العام سابقا

 

 رقم العضوية : 24798
 تاريخ التسجيل : Jul 2009
 العمر : 29
 الجنس : ~ ذكر
 المكان : Benha..Egypt
 المشاركات : 13,455
 الحكمة المفضلة : Easy come ,,, Easy go
 النقاط : Mo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond reputeMo7aMaD 3aLa2 has a reputation beyond repute
 درجة التقييم : 1430885
 قوة التقييم : 716

Mo7aMaD 3aLa2 غير متواجد حالياً

إرسال رسالة عبر Yahoo إلى Mo7aMaD 3aLa2

أوسمة العضو
Exclamation (حــوار مع الكبــار) مع قلم بلا حبر (الحلقة الثالثة)








نعــــود من جديد مع برنامج [حــــوار مـــع الكبــــــــار]




فـــى يوم عودة النشاط الى المنتــــدى




وان شاء الله لــن يتوقف وهيكون كل أسبوع حلقة على الاقل ,,






هيكون معانا النهاردة ضيف مميز جداً وصاحب فكر رآقى








قلم بلا حبر
|§| المراقب العام |§|









اهلا بيكـ يا سيد فى برنامج حوار مع الكبار

وبالمناسبة ,, احب ابدى اعجابى بقلمكـ الرائع ومواضيعك الهادفة وآرآئك المنطقية ,,

ان شاء الله هيكون موضوع الحوار سياسى اجتماعى بيخص الاوضاع الحالية فى مصــر


اهلا بيك يا محمد ,, واكيد شاكر ليك التقدير ده ويارب اكون عند حسن ظنكوحسن ظن الجميع






نبـــــــــدأ الاسئلــــــــــة




1/ ما هو تقييمكـ لـ آداء الرئيس محمد مرسى منذ بداية تولية منصب الرئاسة حتى الآن ؟

ممكن البعض يتعجب لما يلاقونى بقول ,, انا فعلا منبهر بالاداء ده ,, وفى اقصى احلام يقظتى مكنتش منتظر ان تتحقق نتائج ملموسه على ارض الواقع بالشكل ده فى خلال اقل من 90 يوم ,,, طبعا فى حسابات اخرى من ضمنها تنفيذ وعود الـ 100 يوم ,,بس احنا اتعلمنا لكل مشكله اصل ,, لو قضيت على اصل المشكله بالتبعيه حتتحل كل المشاكل النابعه منها ,, والاداء اللى انا بشيد بيه دلوقتى يعتبر علاج جذرى وأساس قوى يقدر صانع القرار ينطلق منه بعد كده لمعالجة المشاكل اللى بتوةاجهنا فى حياتنا اليوميه واللى ارتكزت عليها الوعود دى ,, لان الموضوع مش سهل انك تتحول من مرحلة ثوره لمرحلة دوله ذات مواقف سياسيه داخليه وخارجيه ومسيطره على مؤسساتها ومستقله بقرارها فى الفتره القصيره دى ,, واللى حيتابع الشأن الدولى حيفهم ان التحول ده كان طبيعى يتوصف من صحف اسرائيليه بانه انجاز بالمقارنه لما حققته تركيا فى سنوات عديده هى فترة حكم رئيس الوزراء رجب طيب اردوغان ,,, فانا بالنسبه ليا اجمالا ما تحقق انجاز لمن يستطيع ان يكون محايد ومنصف فى حكمه على الاخرين مهما اختلف معهم ,, واكيد الاغلبيه هنا مدركين اختلافى مع سياسات وتوجهات الاخوان كجماعه ,,,








2/ كان من ضمن الدعاية الانتخابية للرئيس محمد مرسى بعض الانجازت والتى سينجزها خلال اول 100 يوم ,,
من وجهة نظرك هل نجح فى انجازها او نسبة منها وهو قد تولى منصب الرئاسة فى 30 يونيو 2012 ,, اى ان الـ 100 يوم يتبقى لها اسبوعين تقريبا !! ؟؟

لو خيرونى يا محمد بين وعود ال 100 يوم وانهاء حكم العسكر ونفوذهم فى مصر ,, شئ بديهى انى اختار الانتهاء من حكم العسكر ونفوذهم ,, ولو خيرونى بين النظافه والمرور وقدرة مصر على الاستقلال بقرارها وخروجها من التبعيه لدول بعينها ,, حختار بالطبع استقلال مصر بارادتها ,, فجزء كبير من وعود ال 100 يوم متحققشى وده واقع ,, بس فى المقابل اتحقق اللى كنا ممكن نعانى منه فى فترات لاحقه وياريت مننساش عام ونصف من نفوذ عسكرى احبط الكثيرين ,, ونقوذ امريكى فى ترحيل المتهمين الامريكان احبط كل مصر ,,, ده من اتجاه

الاتجاه الثانى - اغلب الوعود المقطوعه فى برنامج الدكتور محمد مرسى تستلزم وجود تشريعات ووجود مجلس شعب للتصديق على التشريعات دى ,, اذا كنا بندور فعلا على حل جذرى لمشاكلنا المتمثله فى رغيف العيش والطاقه والامن والخدمات العامه ,, والا لو مفيش قوانين تسيطر بيها على استمرار وجود العلاج للمشكله ,, حترجع تانى ويمكن اكتر من الاول ,,, وحل مجلس الشعب قبل المرحله التانيه للانتخابات الرئاسيه اربك كل الحسابات فى المشهد السياسى ,,, ومش بس أثر على وعود ال 100 يوم بل امتد تأثيره نحو الاستثمار ,, انا ممكن اتقبل فكرة انك تنقد بس للاسف النقد بدون علم بيبقى مثير للشفقه ,, يعنى لما بسمع اصوات بتنتقد عدم وجود استثمارات جاده زى ما وعد الرئيس ,, فشئ بديهى ان الاستثمار محتاج خلق بيئه مواتيه لرؤوس الاموال اللى حتغامر وتيجى تستثمر فى دولتك ,, مفيش حد عايز ييجى وبعد كده يواجه ببيروقراطية القوانين المصريه العقيمه اللى بتطفش اى مستثمر جاد فى انه ييجى ويستقر برأس ماله فى مصر ,, وعليه فالمستثمرين كلهم منتظرين لاكتمال الوضع المؤسسى فى مصر بعد اقرار دستور جديد وانتخاب مجلس شعب جديد ,, ومن ثم اعادة صياغة تشريعات تدفع بالاستثمار فى الاتجاه الصحيح ,, وبكده رؤوس الاموال حتكون مؤمنه وفى نفس الوقت مسار الاستثمار مش حيكون بنفس التعقيد الموجود دلوقتى ,,

والسؤال ,, عرفت منين ان المستثمرين جاهزين ,,, ؟؟

سهل جدا انك تستخلص نتائج زى دى من معدلات اداء البورصه المصريه فى الاسابيع الاخيره ,,

الحاجه التانيه - ان الموضوع لبعض الدول بتوصل فيه اهمية الاستثمار فى مصر الى مرحلة الاهميه الاستراتيجيه ,,,

والحاجه الاهم يا محمد ان لو فرضنا ان المرور اتظبط ومفيش تعديل وصياغه جديده لقوانين صارمه تحافظ على عدم انهياره مره تانيه ,, يبقى اللى احنا بنعمله زى الرسم على الماء ,,,

اجمالا ,, انا مدرك ان تنفيذ وعود ال 100 يوم كانت تستلزم اكتمال مؤسسات الدوله ,, وبما ان المؤسسات مش مكتمله ,, يبقى اعتقد ان انتقادى حيشوبه شئ من النقص وعدم الانصاف





3/ ما هو رأيك فى الفريق الرئاسى الذى اختارة محمد مرسى ونائب الرئيس ,,
بعد ان كان قد اعلن فى مؤتمر يسبق جولة الاعادة بـ انة سيختار فريق يضم مختلف التيارات السياسية و سيكون هناك أكثر من نائب ؟؟

انا واحد من الناس اللى نادت بانطواء القوى السياسيه فى فريق عمل رئاسى يكون على رأسه الدكتور محمد مرسى ,,, لكن للانصاف برده وبدون التحيز ,, صعب انك تقنع قيادات التيار المدنى بالتعامل او التفاعل مع اهداف تيار الاسلام السياسى ,, وتقريبا الغالبيه منهم اعتذروا ,, وليهم حساباتهم الخاصه ومبرراتهم ,, وانا مش ضد ده ه طالما حسنت النوايا ,,, لكن بقى امر واقع وجود صراع محتدم وانقسام حاد فى الرؤى بين تيار الاسلام السياسى من جهه والتيار المدنى من جهه اخرى ,, وتقريبا كلا منهما بيمارس ضغوطه بطريقته ,, ومنها رفض اشتراك العديد من رموز التيار المدنى فى اى تشكيل سواء فى مساعدى الرئيس او مستشاريه ,, وده استخدم بعد كده فى توصيف الحاله السياسيه على انها اخونه للدوله ,, يعنى الموضوع فى مجمله صراعات ومواقف بيحاول يكسب منها كل طرف مكاسب معينه علشان يقدر ينافس بقوه فى معركة الانتخابات القادمه

علشان كده لجأ الدكتور محمد مرسى لاسماء لا نعرف عنها الا حيادها لتكون اغلبيه متواجده فى فريقه الرئاسى ,,, وتقريبا الاسماء الموجوده فى اغلبها تحظى بالتقدير من الشارع المصرى ,, ولكننا دائما ودوما نطمح فى الافضل وهذا حقنا





4/ هل يعتبر انهاء خدمة المشير طنطاوى والفريق سامى عنان انجاز كبير لـ الرئيس محمد مرسى ,, ام انة تصرف بديهى لأى مرشح ثورى ؟



انك تقضى على حكم عسكرى مستمر ومتواصل من عام 1954 ,, مش بديهيه

الحاجه التانيه : التقارير الاستخباراتيه بتؤكد ومش من النهارده من زمان وواحد من التقارير دى انا قرأته عام 2010 على ان الجيش ممثلا فى قادة المجلس العسكرى مكنشى موافق على ملف التوريث ,, وده كان تقريبا اشبه ببركان على وشك الانفجار ,, علشان كده تقدر توصف انحياز الجيش للشعب فى بداية الثوره وتخليه عن مبارك على انه تصفية حسابات ,, ,, فمش بديهى ابدا ان القاده اللى مرتضوش بحكم جمال مبارك حيسلموا بسهوله لجماعة الاخوان المسلمين ,, وانا واحد من الناس اللى عاصرت الثوره وانا بقضى خدمه فى الجيش وعارف ايه هى نظرة الجيش للاخوان او لتيار الاسلام السياسى عموما ,,, التاريخ وحده هو اللى حيكشف اللى حصل بالظبط ,, ولو انى مستبعدشى ان الفريق السيسى وزير الدفاع كان ليه دور بارز فى عملية التحول المفاجئ دى ,, لكن فى مجمل الامر مقدرشى اقول انها شئ بديهى لاى ثورى ,, خصوصا ان بعض رموز التيار المدنى وقوى الثوره كانوا بيطالبو الجيش بالتدخل والانقلاب والاستئثار بالسلطه ,, وفى قوى منها كانت بتتعاون بشكل او باخر مع قادة المجلس العسكرى ,,, فانا بعتبره حتى لو صفقه ,, فهو انجاز تحت مفهوم الصفقه




5/ فى ظل الازمة السورية الحالية ,, هل تعتقد ان خطاب محمد مرسى فى ايران يخلى المسؤلية عن مصر وهى اكبر الدول العربية ,, ام اننا نتخذ موقف متخاذل
.. أم اننا نتبع المقولة (ما باليد حيلة) ؟

الموقف فى سوريا انا كتبت عنه بس تقريبا فى الفيس مش هنا ,, واتكلمت من وجهة نظر خاصه والله اعلم بمدى صحتها ان بسبب التعقيد فى الازمه السوريه فاللاعب الاساسى فى الحل حيكون مصر اذا ما اجادت القياده السياسيه انها تلم بكل خيوط الازمه وتبدأ تمارس صفقات وضغوط سياسيه ,,, وكلنا شايفين ان ارتفاع اسهم السياسه الخارجيه المصريه ادى لاضعاف الدور الايرانى فى المنطقه ,, وده اللى انا ذكرته انه فى حالة وجود البديل المؤثر والنشيط واللى يقدر يأمن مصالح روسيا والصين فى الشرق الاوسط بشكل او بأخر فاكيد القوى دى ملهاش الا مصلحتها فى النهايه وايران حتكون مضطره انها تسلم للامر الواقع فى ظل مساومتها على حماية برنامجها النووى بواسطة الصين وروسيا فى مقابل تخليها عن الاسد ,,, ويمكن زيارة الدكتور مرسى للصين كانت فى الاتجاه الصحيح وادت جزء كبير من الغرض ,,, وموقف مصر لحد دلوقتى من الازمه السوريه موقف بيعبر فعلا عن وضع مصر اللى خسرته من فترات بعيده ومظنش انه متخاذل او متراجع ,, لو قيمنا الموقف المصرى بمواقف اخرى لاعبه بشكل اساسى فى المنطقه ,,,,






6/ تعلم ان اكثر الاشخاص ضررا بعد الثورة هم الاشخاص انفسهم التى قامت من اجلهم الثورة وهم الطبقة الفقيرة البسيطة ,,
ماذا تتوقع شكل ردود الافعال من تلك الطبقة ؟

طيب اليساريين هم افضل من يحدثوك عن الطبقات المهمشه ,, لكن عند طلب وضع الحلول لا تجد ما يسد ظمأك وظمأ تلك الطبقات المهمشه

يعنى ايه فقر ؟؟

فقر يعنى قلة حاجه ,, لاسباب عديده

1- بطاله ,,,,,

2- تفاوت بين الدخول والاسعار لصالح ارتفاع الاسعار بيجبر المواطن فى النهايه انه يستدين

3- انعدام تكافؤ الفرص بين الغنى والفقير

4- استئثار القله بموارد البلد وجعلها حكرا عليهم

ومش بس دول فى اسباب تانيه كتير ,, بس خلينا نركز فى دول

لو حنمسك كل العناصر اللى فاتت دى وندرسها كويس حنلاقي الشئ المشترك بينهم هو (( الفساد ))

ومحدش ينكر قد ايه وصل معدل الفساد المالى والادارى والسياسى والامنى والاقتصادى بل والرقابى لمستويات خطيره

انا حديك مثال يقرب الفكره بحكم اننا كلنا ماشاء الله تقريبا بنعرف ننزل نسخة ويندوز

لو فرضنا ان جهاز مليان فيروسات وشء طبيعى انك كل ما تحاول تنزل انتى فيروس تلاقى الجهاز بيهنج وبيقف ,, وده برده طبيعى لان الفيروسات مش حتسيب فرصه لانك تقضى عليها بالسهوله دى

يبقى الحل واحد من اتنين

1- انك تشيل النسخه القديمه وتنزل واحده جديده تقريبا حيبقى معاك ال ( C ) نضيف لانك عملت ليه فورمات ,, فحتقدر تعمل setup للانتى فيروس براحتك وتعمله ابديت كمان وتعمل سكان لجهازك وتنضفه

2- انك تاخد الهارد وتروح بيه لواحد صاحبك وهناك تعمل سكان ,, ولما تخلص تفاجئ انك برده محتاج تنزل نسخة ويندوز جديده ,,,

نسخة الويندوز دى هى النظام اللى فسد من كتر الفيروسات اللى فى ,, فكده كده كان لازم نتخلص منه ,, هو فى ال 18 يوم اللى كان الثوار فيهم فى ميدان التحرير كان بيطالب بالحل التانى

انما احنا طالبنا بالحل الاول ,, وقدرنا نشيل النظام القديم ودلوقتى بدأنا فى انشاء نظام جديد ,, مفضلشى غير انك تنضف البلد من الفيروسات (( قصدى الفساد )) علشان تقدر تنفذ برامج التنميه والاستثمار اللى حتقلل نسبة الفقراء فى مصر وحتقلل البطاله

وطبعا حيحتاج منك وقت لانه بيعتمد على حجم الفساد نفسه ,, واظن كلنا نعرف قد ايه حجم الفساد فى بلدنا

لكن من الخطأ جدا انك تستغل قضية الفقراء وانت مدرك فعلا انك لو فى السلطه مش حتقدر تعملهم فى الوقت الحالى اللى بتحاول تحرج الاخرين فى طلبه منهم خصوصا اننا استلمنا مصر وهى ثالث اكبر دوله فى العالم عليها ديون بعد اليونان واسبانيا وحجم الديون بتاعتنا وصل ل (( 82% )) من اجمالى الموازنه العامه ,,,, يبقى التلاعب باحلام البسطاء مش فى صالح البلد لو انت فعلا همك البلد مش مجرد استغلال لقضيتهم فى معارك سياسيه ,, الكلام مش ليك طبعا انا وجهته من البدايه لليساريين






7/ ما هو تقييمكـ لكل من ( حمدين صباحى - محمد البرادعى) فى الفترة الاخيرة ؟


صباحى مش القائد المنزه لكنه مجتهد وكاريزما ,,, والبرادعى بينجرف لاحداث التوازن فى المشهد السياسى باى طريقه حتى لو كانت ضد مبادئ احنا عرفناها منه وامنا بيها ,,






8/ ما تعليقك على حديث وزير التنمية بانة لا يوجد مشروع نهضة !! ,, وهو فرد ضمن حكومة الرئيس محمد مرسى ؟


انا مش فى الاخوان علشان اقدر احدد الدواعى للتصريح ده سواء منه او من خيرت الشاطر ,,, لكن انا بالنسبه ليا مفيش حاجه اسمها بلد بينهض بمشروع ,, لان مفهوم الدوله بيختلف عن مفهوم ادارة الاملاك الخاصه ,,, فى مفهوم الدوله انت مش بتكون لوحدك علشان تمارس كل صلاحياتك وتنفذ كل رؤاك بالشكل اللى يناسبك ,, بيبقى فى ضغوط داخليه وعوامل خارجيه بتأثر عليك ,, فى النهايه مفيش حاجه اسمها مشروع كامل متكامل يتطبق ,,فمصر تنهض ,, انما فى أسس وقواعد لو وضعت بالشكل الصحيح نقدر نأسس عليها ,,, انما انا تابعت زى ما انتم كمان تابعتم الاجزاء الرئيسيه لبرنامج الدكتور مرسى واللى تقريبا بيماثل باقى البرامج المطروحه من باقى المرشحين السابقين ,,, عموما فى اخبار بتتناقل عن توجهات مختلفه فى دائرة الاخوان نتيجه لسياسات الدكتور محمد مرسى اللى وقفت حائل قدام كتير من افكار طرحت من قاده فى الاخوان المسلمين وعلى رأسهم خيرت الشاطر ,,,, لكن فى النهايه لا يعنينى مسمى المشروع على قد ما يعنينى الاسس اللى منها حتقدر اى حكومه مستقبليه انها تنفذ افكارها فى تطوير وتنمية الاداء الادارى والاقتصادى والسياسى والامنى للدوله






9/ من وجهة نظركـ ,, ما هى الاخطاء التى وقع فيها الرئيس محمد مرسى منذ بداية تولية منصب الرئيس ؟


كلمة خطأ حتستلزم منى انى اكون مقتنع بحجم الكلمه لما انسبها لقياده او مؤسسه فى حجم مؤسسة الرئاسه ,,, اكيد فى سقطات هنا وهناك وتأخير فى بعض القرارات وردود افعال مش على قد المستوى بس مقدرشى اوصفها على انها اخطاء بحسب فهمى الشخصى لمصطلح الخطأ ذاته ,, وتبعية استخدامه






10 / ما تعليقك على غموض نتائج التحقيق بخصوص مقتل افراد مجندين على الحدود المصرية الاسرائلية ,,
خصوصا بعد انتشار معلومات تفيد بانهم ذات هوية فلسطينية ,, وما هو التصرف المقبول والذى يعيد لأهالى الشهداء حقوقهم من رأيك ؟

بصرف النظر عن هويتهم ,, ومحاولة البعض للربط بين التقارب فى الرؤى بين قيادات حماس والدوله المصريه فى الوقت الحالى ,, واستخدام الربط ده فى توجيه سهام النقد لمؤسسة الرئاسه كون ان مديرها فى الوقت الحالى ذو مرجعيه تتشابه او تتلاقى مع افكار حركة المقاومه الفلسطينيه حماس فى العديد من النقاط , او كما يصفها البعض باخوان فلسطين ,, فى النهايه الامر بديهى ان الحكومه المقاله بغزه برئاسة اسماعيل هنيه مش من مصلحتها حدوث اى نوع من انواع التوتر بينها وبين الجانب المصرى ولا سيما بعد التقارب الاخير والتفكير بشكل جدى فى فتح منطقه اقتصاديه حره بين القطاع ومصر ,, لكن على اية حال الحدث فى مجمله بيدينى تصور قد ايه هى العقبات اللى بتوجه مصر فى محاولتها للاستقلال بقرارها وتوجهاتها فى سياستها الخارجيه ,, ومن العيب انه يتم دعم واضعى تلك العقبات والعراقيل من الداخل سواء بقصد او بدون قصد بصرف النظر عن اختلافنا السياسى مع نظام الحكم الحالى

وغموض نتائج التحقيق بيدل على اننا بتنا فى مرحله جديده لا يتم فيها سلق النتائج وتوجيه الاتهامات جذافا كما حدث فى الاعتداء على كنيسة القديسين بالاسكندريه وده كان تصريح صادر من المتحدث الرسمى للقوات المسلحه ,, فى ان مفيش تعجل باعلان اسماء المتورطين حتى يتم التيقن وكشف كل الملابسات وده فى حد ذاته توجه صحيح ,, مالوش اى دلالات سياسيه كما يحاول البعض تصويرها

ومننساش اننا بنواجه فى سيناء جماعات جهاديه ,, ومن متابعتنا للحرب الامريكيه على الارهاب نقدر نفهم ظروف الوضع القتالى الموجود فى سيناء شكله ايه ,, بالاضافه للتوتر السياسى بين اسرائيل ومصر بعد جيئ الدكتور محمد مرسى رئيسا لمصر ,, وده اللى بتحاول اسرائيل تستوعب وتحتوى أثاره السلبيه على حليفها السابق فى المنطقه سواء بالترغيب تارة او بالترهيب تارة اخرى ,,, فمفيش اى داعى للاستعجال ,,





11/ ما هو تقييمك لـ آداء اللجنة التأسيسية لوضع الدستور ,, فى ظل انسحاب الكثيرمن الشخصيات الليبرالية الثورية
بداعى ان الدستور يعبرعن تيار واحد وهو التيار الاسلامى ؟



مبدئيا بس كان فى 4 انسحبوا ورجعوا تانى ... وتقريبا المستقيله حتى الان هى الدكتوره منال الطيبى ممثلة النوبه

ده بقا علشان مطولشى فى الاجابات لانى شايف ان الاسئله كتير حطلب منك انك تراجع موضوع (( دستور يا اسيادنا فى قسم بقلم الاعضاء )) تقريبا ناقشت ف يه الوضع برمته ,,

لكن على سبيل الاجمال ,, فالدستور مش بيعبر عن فصيل واحد وانما هى مرحله فى اطار نزاع على النفوذ فى المشهد السياسى المصرى بين طرفين احدهما الاسلام السياسى والاخر قوى التيار المدنى وكل واحد فيهم بيحاول يمارس ضغوطه بالشكل اللى يجلب ليه اكبر مكاسب سياسيه ,, اما الاختلاف على بعض المواد فى الدستور فده امر طبيعى ووارد انك تلاقيه فى اى لجنه بتضع دستور لاى دوله ,, تقريبا الاتفاق بشكل كامل على مجمل النقاط امر غير وارد ,,, علشان كده انا بأيد فكرة اننا نخلى التصويت فى اللجنه التأسيسيه للدستور بدلا من النصف +ا الى الثلثين ,, بكده حنقدر نوصل لنتيجه الى حد ما مقنعه ,,,





12/ التيار المدنى ,, هل لازالت أمامة فرصة للتوحد من رأيكـ ؟


احداث التوازن فى المشهد السياسى المصرى ضروره بيتطلبها الوضع الحالى ,, وعدم انفراد تيار واحد يحدد ملامح ولادة مصر المستقبل ,, لان ده حيأثر بالسلب على مسار التنميه فى شتى المجالات ,, ومن هنا كلنا امل فى حصد التيار المدنى لنسبه مرتفعه من التمثيل النيابى تكون عامل ضغط قوى فى وضع السياسات العامه للدوله فى المرحله المقبله ,,

لكن عندى تحفظ على مصطلح التوحد ,,

توحد التيار المدنى مش فى صالحه ,, وانما حيكون عامل زى الاسبرين بيخفف الالم فقط لا غير ,,, تقدر تقول تنسيق بين قوى المعارضه ,, هو ده المسمى اللى ممكن اقبله ,, اما مسألة التوحد دى فكتبت عنها (( سمك لبن تمر هندى )) ومغامره مش محسوبه لاطرافها خصوصا فى ظل تنامى الوعى السياسى لدى المواطن المصرى ,, اللى فى الغالب بيقيم كل اللى بيحصل حتى لو مش بيشارك فى صنعه ,,, بس اجمالا حيظهر فى شكل التصويت فى الاقتراع

لو حنستخدم مصطلح التنسيق ,, فالاحرى ان كل تحالف من التحالفات المدنيه اللى جرى تشكيلها كان يركز على بناء قاعده جماهيريه ويخرج بره عباءة انتقاد النظام الحاكم ,,, لو نفتكر ان نقمة المصريين على الحزب الوطنى منح الاخوان فى انتخابات 2005 80 مقعد ,, بس ياترى نفس الاسلوب ممكن ينجح مع التنسيق اللى حاصل دلوقتى

انا شايف انه (( اه )) فعلا ممكن ينجح انه ييجى بتمثيل اعلى لقوى التيار المدنى من التمثيل السابق ,, لكن يبقى الاصل فى الى متى سيظل المشهد السياسى فى مصر عباره عن صراع ارادات وبعيد عن برامج حقيقيه تمس المواطن البسيط ,, ؟؟ الى متى يظل التناحر الايدولوجى هو سمة الصراع السياسى فى مصر فى ظل اوضاع اقتصاديه تنذر بالخطر ؟؟

الجميع مطالبون بعودة الثقه وباى تمن وتحت اى مسمى ,, وليدرك الجميع ان مصر لن يحكمها فصيل منفردا






13/خلال الفترة الاخيرة ,, تم تسليط الضوء على الاعلام ,, ما هو تقييمك للاعلام ,,
فى الوقت الذى يستمع معظم الاشخاص الى المحطة الاعلامية التى ترضى فكرهم وينتقدون الاخريات لمجرد انها ضد آراءهم ؟

من 10 سنين كنا نقرا عن تأثير الاعلام على صانع القرار الامريكى فكنا نستغرب ,, بالنسبه لنا كانت القناه الاولى والتانيه بتمدح ليل نهار فى حسنى مبارك فمش فارق معانا وكان الاعلام بالنسبه لنا هو فيلم السهره يوم الخميس

النهارده اصبح للاعلام دور بارز فى وضع العديد من السياسات بل وفرضها فى بعض الاحيان ,, وده من مكاسب الثوره اللى لازم نحافظ عليها

بس المهم هنا ,, هل هذا التأثير موجه ام غير موجه ,, بالطبع وبدون مجاملات موجه ,, فالاعلام العالمى موجه من المال الصهيونى وكلنا نعرف الحقيقه دى ,, فى مصر برده الاعلام موجه لخدمة مصالح بعينها ,, وده مش اتهام او قذف للاعلام

لان فى النهايه قطار الوعى حيوصل بينا الى مرحلة ان المشاهد يقدر يفرز من خلال افكاره الشخصيه واراؤه ايه هو اللى ينفع يتابعه وايه اللى يقلب من عليه وكانه لم يكن ,, وساعتها حيكون الاعلام مطالب انه يراعى الى جانب انه موجه انه يحتوى افكار المشاهد اللى فى النهايه هو المستهدف من العمليه الاعلاميه ككل





14/ماذا تتوقع بشأن مستقبل مصر السياسيى وانت شخصية مفكرة وبالتأكيد قد رصدت بعض المؤشرات ؟

بتحفظ على حكاية (( شخصيه مفكره )) ,,, انا يدوب بستهجى سياسه معاكم وانتم بتتحملونى

مستقبل مصر مش حيتحدد بالقوى والرموز السياسيه الموجوده فى الوقت الحالى ,, مستقبل مصر حيتحدد من الوعى المستقبلى اللى حيكون عند فئه كبيره من المصريين اللى حيقدروا يظبوا بوصلة تأييدهم لما فيه الصالح العام بعيد عن اى تحذب او انسياق اعمى لاحد الشخصيات

احنا فى مرحله انتقاليه ثانيه ,, وممكن ندخل فى مرحله انتقاليه ثالثه ,, تطور الدول مش بيحصل بين يوم وليله ,, لانه بيمر بما يشبه الفلاتر , مع انتهار كل مرحله بيخرج الشعب اكثر وعيا وتتساقط الاقنعه من فوق البعض وهكذا

لن تنتهى الاقنعه ,, كما ان الشعب لن ينتهى سعيه الى المذيد من الوعى ,, وهنا حنكون على الطريق الصحيح

وده اللى حاصل فى اى ديمقراطيه حديثه فى العالم ,, الاقنعه لاتنتهى ,, لكن الشعب يعاقبها فى الصندوق ,,, ويستطيع فرز المواقف والبرامج ,,,

واحنا لسه فى اول الطريق ,,, ومش معنى ده ان الوضع اللى فى نظر البعض انه قاتم حيستمر ,,,

بالعكس مع كل مرحله بتنتهى ,, تقدر تقيم الوضع واكيد حتلاقى اختلاف مبنى على مقدار ما اكتسبه الشعب من وعى وعدد ما اسقطه الشعب من اقنعه
وعى المواطن البسيط هو الضمانه الحقيقيه لتطور ونمو البلد دى
ولا اخوان ولا سلفيين ولا حمدين ولا البرادعى ولا موسى





وبـ كدة تنتهى الاسئلة
وبكل تأكيد ,, كنت منورنا يا سيد
وبتمنى انة البرنامج يكون عجبكـ
..


ياريت بس محدش يضايق من الاطاله اللى حصلت ,, وبعتذر عنها مقدما ,,

ولو حندى لكل واحد حقه ,,, فطبيعة الاسئله فى حد ذاتها بتقول ان اللى كاتبها شخصيه محترمه ومثقفه وواعيه جدا بكل المطروح على الساحه من قضايا

بتمنالك التوفيق يا محمد
وللجميع بشكركم للمتابعه


بشكركـ طبعا على كلامكـ يا سيد
وشكرا لقبولكـ الدعوة
وشكرا لكل الاعضاء على المـــتابعة
..







  رد مع اقتباس
قديم منذ /10-05-2012, 01:33 PM   #2

مشرفة الخزعبلات سابقا

 

 رقم العضوية : 40541
 تاريخ التسجيل : Jan 2010
 العمر : 29
 الجنس : ~ بنوتة
 المكان : فى عشق قلبى (بلدى الحبيبة .. مصـــر ) .
 المشاركات : 26,339
 الحكمة المفضلة : أيقنتُ تماماً , أنّ اليأس " أبداً " لآ يليقُ بأروآحِ المؤمنينْ
 النقاط : ~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute~♥ Queen sozan♥~ has a reputation beyond repute
 درجة التقييم : 1168189
 قوة التقييم : 585

~♥ Queen sozan♥~ غير متواجد حالياً

أوسمة العضو
افتراضي

ما شاء الله يا سيد انا تعبت من كتر القراءه
بس فعلا احنا اختارنا محمد مرسى مش عشان هيعدل المايلة
لا عشان نخلص من حكم العسكر ونحس با النظام
والامن ولا ون دة محصلش ,, لحد الان مفيش امن
لان مفيش دستور وأدينا مستنيين ..

محمد حلقة مميزة منك مع شخصية سياسية متميزة
متابعين دايمآ







  رد مع اقتباس
قديم منذ /10-05-2012, 01:39 PM   #3

 

 رقم العضوية : 13962
 تاريخ التسجيل : Feb 2009
 الجنس : ~ ولد
 المكان : مصر
 المشاركات : 18,573
 الحكمة المفضلة : سأل الممكن المستحيل : أين تقيم ؟ فأجابه في أحلام العاجز
 النقاط : morshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond repute
 درجة التقييم : 2964942
 قوة التقييم : 1483

morshooo غير متواجد حالياً

 

 

 

أوسمة العضو
افتراضي

فى البداية اشكر علاء على الاستضافة الجميلة
مع نجم المنتدى ( قلم بلا حبر )
الحوار جميل جدا رغم طول التوبيك ^_^
وسيد اكلم بطريقة جميلة جدا وحلل المشهد السياسى
بشكل مميز كالعادة .
بس كنت عايز اعرف حاجا من ( قلم بلا حبر )
ياترى لو قامت انتخابات رئاسية الفترة القادمة هيتم ترشيح مرسى مرة اخرى ؟
تسلمو على التوبيك الجميل
تحياتى للجميع







  رد مع اقتباس
قديم منذ /10-05-2012, 01:50 PM   #4

مشرفة التنمية البشرية سابقا

ღмεмoяιεѕღ

 

 رقم العضوية : 6436
 تاريخ التسجيل : Sep 2008
 الجنس : ~ بنوتة
 المكان : سمــآء ثآمنـة
 المشاركات : 7,022
 الحكمة المفضلة : You only live once , but if you did it right .. once is enough
 النقاط : الحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond reputeالحان الورد has a reputation beyond repute
 درجة التقييم : 2375124
 قوة التقييم : 1188

الحان الورد غير متواجد حالياً

أوسمة العضو
افتراضي

،

طريقة الحوار رائعة فعلاً
تستحقوا الشكر عليها .,
دلوقتي بما ان الـ 100 يوم قربت تخلص
الاستفتاءات كتير جداً عن تقييم المواطنين لـ اداء محمد مرسي ,
لاحظت في واحد منهم ان كمية اللي مش راضيين كانت كبيرة نوعاً ما
من رأيي , لان الانجازات اللي حققها د.محمد مرسي
انجازات ليها علاقة بالخارج اكتر بكتير من الداخل , يعني هتبان على المدى البعيد
عشان كدا الناس مش حاسة بيها اوي , مع ان قرار زي قرار المجلس العسكري
كانوا بينادوا بيه من زمان ..,
الموضوع زي ماحضرتك قلت يا سيد , ان هو شبه بيظبط الوضع
عشان لما ييجي بعد كدا يبص لـ مشاكل المواطنين يقدر يحلها كويس .,
حاجة كمان , ان ساعات بيبقى في بطء في اتخاذ القرارت ,,
ع العموم , احنا لسه قدامنا وقت كبير عشان نحكم عليه ..,
بشكرك جداً يا محمد على الحوار الرائع وبشكر قلم بلا حبر ..
بالتوفيق







  رد مع اقتباس
قديم منذ /10-05-2012, 01:55 PM   #5

مشرفة عالم الطفل سابقا

 

 رقم العضوية : 29574
 تاريخ التسجيل : Aug 2009
 الجنس : ~ أنثى
 المكان : القليوبية
 المشاركات : 13,254
 الحكمة المفضلة : كما تدين تدان
 النقاط : ياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond reputeياسمينااا has a reputation beyond repute
 درجة التقييم : 437792
 قوة التقييم : 219

ياسمينااا غير متواجد حالياً

أوسمة العضو
افتراضي

دي كلها اسئله يا محمد
تعبت من القرايه ههههههه
حلقه جميله جدا واستضافه اجمل
وقلم منور الحلقه
فكر سياسي مميز
تسلم ايدك يا محمد
بانتظار الحلقه القادمه ان شاء الله
تحياتي







  رد مع اقتباس
قديم منذ /10-05-2012, 02:15 PM   #6

مشرفة سابقة

 

 رقم العضوية : 40527
 تاريخ التسجيل : Jan 2010
 العمر : 24
 الجنس : ~ بنوتة
 المكان : PortSaid_Egypt
 المشاركات : 14,081
 الحكمة المفضلة : انا والكابتشينو .. قصة عشق لن تنتهى ♥/!♥
 النقاط : طمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond reputeطمطم has a reputation beyond repute
 درجة التقييم : 2465427
 قوة التقييم : 1233

طمطم غير متواجد حالياً

أوسمة العضو
افتراضي

حوار رائع بجد رغم طوله ..
بجد انا بيعجبنى جدا تفكير أ/ " قلم بلا حبر " وآرائه
..
حوار مميز ي محمد
تسلم ايدك بجد ..
ف انتظار الحلقة النيو بقآ
,,







  رد مع اقتباس
قديم منذ /10-05-2012, 02:34 PM   #7

مشرفة القسم العام سابقا

المشاركة المثقفة

 

 رقم العضوية : 24420
 تاريخ التسجيل : Jul 2009
 الجنس : ~ أنثى
 المكان : القاهرة
 المشاركات : 7,768
 النقاط : Sєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond reputeSєяєєη●•ʚɞ has a reputation beyond repute
 درجة التقييم : 1790046
 قوة التقييم : 896

Sєяєєη●•ʚɞ غير متواجد حالياً

 

 

 

 

 

أوسمة العضو
افتراضي

حوار بالرغم من طوله الا انة ممتع جدا
عجبتنى الاسئله اللى طرحها محمد وعجبنى ردود سيد عليها
كلام منطقى جميل
تسلموا ع التوبيك..







  رد مع اقتباس
قديم منذ /10-05-2012, 02:43 PM   #8

مشرفة سابقة

 

 رقم العضوية : 50416
 تاريخ التسجيل : Jun 2010
 العمر : 25
 الجنس : ~ بنوتة
 المكان : مش فاكره بالظبط
 المشاركات : 7,805
 الحكمة المفضلة : مافيش هه :(
 النقاط : تيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond reputeتيتشر نفشه ツ has a reputation beyond repute
 درجة التقييم : 5671162
 قوة التقييم : 2836

تيتشر نفشه ツ غير متواجد حالياً

أوسمة العضو
افتراضي

بسم الله ماشاء الله عليك يامستر سيد

كلامك عين العقل والله وفعلا احنا مش عايزين مرسي غير علشان نخلص من اللي اسمه حكم العسكر

بعد كده بقا يعمل احتياجات المواطنين

بس بيتهيألي 100 يوم دا قليل بصراحه على مايعمل انجازات لصالح الشعب عشان يدوه حقه في التقييم

عموما

ربنا يقدر لمصر الخير الدايم يارب

حلقه قويه جدا ي محمد كما اعتدناك

مع اروع عضو وأعقل عضو وصاحب الفكر الراقي والاسلوب السلس

ومش تعتذر على الاطاله

خصوصا المواضيع السياسيه الواحد لما بيتكلم لازم يدي لكل سؤال حقه في الاجابه

وانتا كفيت ووفيت ..

منور الحلقه والدنيا كلها ياسيد ..

تسلم ايدك ي م / محمد

رنيــــــــــــن ..







  رد مع اقتباس
قديم منذ /10-05-2012, 05:28 PM   #9

 

 رقم العضوية : 7111
 تاريخ التسجيل : Sep 2008
 الجنس : ~ ولد
 المكان : Damietta
 المشاركات : 22,348
 الحكمة المفضلة : لو القرد مات القرداتي هيعرف يشتغل ؟
 النقاط : SiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond reputeSiLver Spectra has a reputation beyond repute
 درجة التقييم : 5769582
 قوة التقييم : 2885

SiLver Spectra غير متواجد حالياً

إرسال رسالة عبر Yahoo إلى SiLver Spectra

أوسمة العضو
افتراضي

حلو الحوار يا علاء
اختيار موفق لعودة البرنامج
اقتباس:
من 10 سنين كنا نقرا عن تأثير الاعلام على صانع القرار الامريكى فكنا نستغرب
حلوة الجزئية دي , فعلا مقياس و ترمومتر نظامك لو عايز تعرف هو فين بين الديكتاتورية و الديمقراطية شوف حرية الاعلام هل بتضغط على الحاكم أو العكس , الحاكم الي بيضغط عليها

منور يا c سيد







  رد مع اقتباس
قديم منذ /10-05-2012, 09:13 PM   #10

 

 رقم العضوية : 45025
 تاريخ التسجيل : Mar 2010
 العمر : 26
 الجنس : ~ رجل
 المكان : الرياض
 المشاركات : 98,748
 الحكمة المفضلة : سأدع الدنيـا تفعـل بـيّ مـا تشاء . فــهــي " لــن "تتجـرأ ان تفعـل " أكثـر " مِمـآ كتبـه الله لـــيّ
 النقاط : ۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute۩۩ elMagic ۩۩ has a reputation beyond repute
 درجة التقييم : 16445873
 قوة التقييم : 8223

۩۩ elMagic ۩۩ غير متواجد حالياً

إرسال رسالة عبر Yahoo إلى ۩۩ elMagic ۩۩

 

 

 

 

 

MY MmS

أوسمة العضو
افتراضي

حوار جميل قريت جزء كبير منه من بدرى ولكن مش كله
دايما منور بوجودكـ وبقلمكـ المميز أ/ سيد
بالتوفيق ان شاء الله
ثانكس للمجهود علاء ,,







  رد مع اقتباس
إضافة رد

الكلمات الدلالية (Tags)
الثالثة, الحلقة, الكبــار, بلا, حبر, حــوار, قلم


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
(حــوار مع الكبــار) مع الأميـــرة رودي (الفقرتين) Mo7aMaD 3aLa2 منتدى يوميات الاعضاء 70 11-18-2012 02:51 PM
(حــوار مع الكبــار) مع Words Whisper (الفقرتين) Mo7aMaD 3aLa2 منتدى يوميات الاعضاء 61 11-07-2012 04:42 AM
نساء فى حياتى الحلقة الثالثة عشر عازف الكلمات قصص - روايات - حكايات ...منقولة 8 11-05-2012 02:16 PM


الساعة الآن 11:52 AM


Powered by vBulletin® Version 3.8.7
Copyright ©2000 - 2020, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w