حلقة جديدة من برنامج " رحلة تعمق " ..

[الحان الورد]

السـلآم عليكم ورحمـة الله وبركآته
.
.


عودة لـِ برنامج " رحلة تعمق " في شخصيات الأعضاء
واللي بنحاول بيه نقرب اكتر
من شخصيات أعضاء المنتدى ....,

المرة دي معانا عضو جديد , نشيط في المنتدى
وفي القسم هنا
حبينـا نتعرف عليه أكتر
معانا

.
.


Ѕad Єyes


أهلاُ بيك معانا يا محمود



,......,


...اسمك الحقيقي....
محمود محمد
... وسبب إختيـآرك لـ اسمك المستعار...
حسيته مناسب ليا عن الاسم اللي كنت دايما مشترك فيه
بشوفه معبر عني وكمان عاجبني معناه
... عمرك ...
19 سنه ونص


... تنتقد في نفسك ...
انتقد في نفسي حاجات كتير منها عدم الثقه في النفس اللي بتوصل لدرجه سلبيه في بعض الاحيان
كمان انتقد فيا بعض المبادئ الصح الغلط في الزمن دا

...جربت...
الوحده
...وكرهت ...
الامال
... وخفت أن ...
لا اعيش

...في طفولتك أحببت أن تكون ...
مكنتش في طفولتي من اصحاب الاحلام الكبيره
ولا تمنيت اكون دكتور ولا مهندس ولا من اللي نفسهم يغيرو العالم وينشرو السلام والحاجات دي
كل اللي كنت بتمناه واحب اني اكونه مجرد اكون سعيد في حياتي

وعندما كبرت وجدت أن ... ...
ان حتي دا يعتبر احلام طفوله مش اكتر
وان الانسان مش دايما حر
في حاجات كتير واقفه في طريقه والاغلب اقوي منه

...لا تحب أن يرآك الآخرون وأنت ...
حزين اكيد محبش حد يشوفني في موقف ضعف
... ونقطه ضعفك ...
طيبتي الزايده

... رؤيتك للحيآة انها ...
طريق صعب جداا و اوقات كتير غير عادله
... وأصعب مافيها ...
اممم ممكن الفشل و انكسار الامال ورا بعضها قدامك

... ماضيك ...
غير سعيد بالمره
... و حاضرك ...
مش بيختلف كتير
... ومستقبلك ...
دي حاجه عند الله وحده
اتمني تكون احسن غير الحاضر والماضي

... واجمل مرحلة في حياتك هي ...
مرحله الطفوله اما ماكنش حاجه مهمه في الحياه غير اليوم
مكنش في امال تطلعات مسئوليات انكسارات تعقيدات ومستحيلات
كان اكبر همومنا اللعب وبس

... لا تغلق أبداً نافذة الـ الامل في الماضي في حياتك لأنك مهما كان بصيص الا انه من غيره مينفعش ...






,,


أسئلة عامة :

- " الحياة مليئة بالمحن والابتلآءات ، بتتفآوت درجة المحن زي مابتتفاوت ردة فعلنا وصبرنا ع المحن دي "
انت بتواجه إزاي المحن دي .. وبتحب تعتمد على نفسك ولا ممكن تعتمد على حد قريب منك ؟

ياريت كنت ممكن اعتمد علي حد غير نفسي لكن للاسف دايما نفسي
ومش دايما بتكون عندي القدره علي المواجهه
واوقات كتير بفشل في المواجهه لوحدي
الا اني بحاول علي قد ما اقدر




- دآيماً بنتكلم عن الايجابية وازاي نكون مؤثرين وفعالين في المجتمع اللي عآيشين فيه ،، أيه هو تعريف الايجابية من وجهة نظرك ؟
وتفكيرك -غالباً- بيبقى مهتم بالايجابيات ولا السلبيات ..؟؟
الايجابيه هيا النظره بتفائل وبحلول لكل مشكله بتواجه الشخص مع ثقه في النفس في القدره علي الخروج منها بافضل استفاده
للاسف معنديش النظره دي ومش ايجابي في حياتي


_ إيه هو دافعك في الحياة .. يعني الشيء اللي بيخليك تعمل وتذاكر وتجتهد ..
وإمتى بتحس انك محبط ؟
اكيد اني اكون احسن وسعيد في حياتي
لكنه مخلانيش اعمل واذاكر واجتهد لاني مش شايفه طريق بيؤدي لتحقيق الدافع دا
محبط في اوقات كتير ودي احد مشاكلي


_ أبرز عيوب شخصيتك ؟
وبتحاول تعالجها ولا مؤمن ان كل شخصية ليها عيوب ؟
عدم الثقه بالنفس
وتسامح وصل ضعف القدره علي المواجهه في اوقات كتير
اكيد طبعا بحاول اعالجها
كل شخصيه وليها عيوبها طبعا بس لازم نحاول نعدل منها
وانا عدلت من حاجات كتير فيا وشايف اني واحده واحده ببقي احسن
وبحاول علي قد ما اقدر اعالج دا


_ بتهتم بـ علم النفس وتطوير الذات ؟
ليـه ؟
مش دايما
لاني مهما حاولت ومهما قريت برضوة مفيش نتيجه بتحصل معاياا
بحسه كلام مش اكتر


_ " الإنسان عدو مايجهل " ,, إيه رأيك في المقولة دي ؟
جمله فعلا صحيحه
وليه غالبية الناس بتبقى ضد التغيير ؟
اغلب الناس فعلا ضد التغيير وبيخافو من اللي ميعرفهوش
بتكون مجازفه وخروج عن الامان اللي اتعود عليه
والناس بتخاف من من المجازفات دي وبتدور علي الامان في حياتها اغلب الناس همها بس تعيش يومها

وانت شخصياً موقفك ايه منه .. بتحب تغير ولا بتفضل الروتين ؟
لكن موقفي انا منه انا بحب التغيير وبكره الروتين وبمل منه جداا
لكن مش كل التغيير ايجابي اكيد
انا مستعد اعمل مجازفات في حياتي لكن بحساب قبلها


بتبص غالباً لـ نص الكوباية الفاضي ولا المليان ؟
وبتعتبر نفسك متفائل قد ايه ؟
لا مش انسان متفائل مهما حاولت
النص الفاضي دايما بيبان في وشي


_ بتفضل تكون خيالي وطموح ولا بتفضل الواقعية ؟
لا انا بفضل الواقعيه في حياتي
مش علي استعداد احلم واتخيل وفي الاخر تصطدم الطموحات دي بالحياه وتقع قدامي واحده واحده

وليه أحياناً الواقعية بتبقى ضد الطموح ؟
الحياه عمرها ما كانت زي مانتمني وزي ما نتخيل ومش عادله
ظروف وعقبات كتير بتقف قدام الطموح الاحلام



_ اول انطباع بيتآخد عن شخصيتك ايه ؟
وغالبا بيبقى صحيح ولا لأ ؟
في الحياه اني شخص هادي وفي حاله
وااه صحيح انا فعلا كده


_ هل اختلف انطباع الناس عنك في النت عن أرض الواقع ؟
وايه السبب ؟
اممم اظن الانطباع ممكن يكون مختلف شويه
بس برضوة علي حسب الشخص ونظرته للجديده
عالعموم اديني اهو اديكم اهو
ايه بقي اول انطباعكم عني


بتعبر ازاي عن
.. فرحك ..
ببقي عايز اعمل كل حاجه في الدنيا
ومش ببقي علي بعضي
لا يمكن اقف في مكاني ثانيتين علي بعض
ببقي مفضوح اووي بيبان علي وشي

.. غضبي ..
بتفش في الاكل
بتفجع اما بكون غضبان
وفي الاخر بقضيها نوم


.. ايه المواقف اللي ممكن تخليك تلجـأ للسكوت ؟ ..
مواقف كتير بتخليني الجأ للسكوت
مش بيكون سكوت عن حق لا اكيد لا هنا مش بسكت
لكن في مواقف كتير بسكت
كتير بيعتبروني صامت
لكن انا احيانا لساني بيخوني وبيقف
مجرد مش بلاقي كلام




_

- مجتمعنا دآيماً او غالباً بيميل للمجآملات ، وقليل اللي بيتقبل الرأي الآخر والنقد بدون حسآسية ، انت شايف امتى هنقدر نآخد النقد والصرآحة ببسآطة ؟ وانت نفسك بتميل للمجاملات أحياناً ولا بتقول رأيك ومابيهمكش ؟
انا بحب الصراحه لكن ليها طريقتها اللي تتقال بيها مش لازم تتقال وش كده
والمجامله دي حاجه غير النفاق
ومن وقت لوحد الانسان بيحتاج حد يمدح فيه طالما بحقيقه مش بنفاق
فانا بقول رايئ بكل صراحه لكن في حدود باسلوبي الخاص
في ناس كتير مش بتتقبل فانا براعي دا في كلامي



_ الخجل والحياء سمات فطرية في البنت .. إمتى الخجل دا بيتحول لـ خجل اجتماعي مذموم ؟
الرسول عليه افضل الصلاه والسلام قال
( لكل دين خلق وخلق الإسلام الحياء )
مش شايفه ممكن يكون مذموم ابدا


وبالنسبـة لـ خجل الشباب .. أيه موقفك منه ؟
هههههههههههه
وممكن تعتبره نقص في شخصية الرجل ؟
معرفش بقي هو ممكن يكون نقص لكن ما بيد حيله
الخجل افضل بكتير من غيره
عالاقل هيفرض الاحترام في التعامل مع الناس


_
- معروف ان الطفل وهو صغير الام والاب هم اللي بيتحكموا في تكوين شخصيته بشكل كبير
انت شايف ان التربية بتأثر قد ايه في شخصية الانسان ؟
وهل كل وآحد مهما كبر بتفضل جوآه جزء من طفولته ..؟؟

اكيد طبعا هما اللي بيتحكمو في تكون الشخصيه
لو شاف تربيه كويسه هيطلع انسان كويس اكيد
ولو شاف تربيه مش كويسه مش هيكون انسان كويس
كمان التدليل بيطلع شخصيه عقيمه
في كل الحالات طبعا التربيه في الصغر هيا اللي بتكون شخصيه الانسان

_ ,,


- التربية (الام والاب) ، المدرسة ، الاصدقاء ، الاعلام ..
رتبهم من حيث تأثيرهم على شخصية الانسآن ..
التربيه
المدرسه
الاصدقاء
الاعلام
دا في نظري



- مين قدوتك في الحيآة أو ملهمك والشخص اللي بتتمنى تكون شبهه ؟ وليه الشخص دآ بالذآت ..؟؟
لا معنديش قدوه في الحياه
لكن في ناس كتير بتلهمني كتير
منهم سيدنا عمر امير المؤمنين رضي الله عنه


- اكتر موقف مر في حياتك وأثر في شخصيتك ؟
واثر فيها ازاي ؟؟

تجربه مرت عليا في النت مفيش داعي لذكرها
لكنها غيرت فيها كتير شايف اني نضجت فكريا اكتر من بعدها
واختلفت شخصيتي للافضل
واني اتعلمت كتير واتغيرت منها لشخصيه رزينه اكتر وهاديه اكتر ومتزنه في كلامها وافعالها اكتر من اللي كانت قبلها



_
- " اهتماماتنا بتعبر بشكل ما عن افكارنا وشخصياتنا " ، ايه رايك في الجملة دي ؟
وكلمنا شوية عن اهتماماتك وهواياتك ..؟؟
ااه جمله صحيحه فعلا اظن سليمه لكن برضوة بحدود
اما انا بقي اهتماماتي
اممم الرياضه بحب الرياضه جدااا
كورة قدم تنس كره يد العاب قوي اي كانت
بحب الرياضه
يمكن حبي ليها من حبي الشديد للتنافس



ايه هو تعريف الثقة بالنفس بالنسبآلك ؟
الثقه في النفس انك تكون عارف نفسك كويس وعارف امكانياتك ومؤمن بيها
عارف اللي تقدر عليه واللي متقدرش
واما تدخل في حاجه تؤمن بانك هتحققها

وياترى ايه هو الخط الرُفيع اللي بيفصل عن الثقة والغرور ..؟؟
الغرور بيكون انك فاكر نفسك انك تقدر تعمل كل حاجه
وان امكانياتك لا حدود لها لدرجه انك تحس انك احسن من كل الناس انك في درجه ارقي منهم



إيه هي الأسباب اللي ممكن تقلل من ثقة الانسان بنفسه ؟
اكيد الفشل الفشل اما يتكرر بيقتل الثقه دي
كمان تربيتنا واحنا صغيريين للاسف معندناش ثقافه زرع الثقه في الاطفال
تلاقيهم دايما يحسسوك انك ولا حاجه ولا هتعمل حاجه يقولك ابقي قابلني لو فلحت !!
طب دي مش بتحسن دي بتسوء اكتر واكتر

وانت واثق من نفسك بنسبة قد ايه ؟
معنديش الجزئيه دي للدرجه
مثلا 70%



- كل انسان جوآه طاقة كبيرة محتاجة يوجهها في الاتجآه الصح ويستفيد منها وكل انسان ربنا ميزه عن غيره بشيء خآص بيه ،، انت عارف كل موآهبك وقدرآتك وبتقدر تستفيد منها ولا حاسس انك لسه ممكن تكتشف نفسك أكتر ؟
لا انا لسه قدامي كتير اكتشفه في نفسي
انا لحد دلوقت تقريبا مش عارف نفسي كويس
ومش عارف نقط قوتي ايه ولا مميزاتي واللي اعرفه تقريبا مش مستغله
مش عارف نفسي فمش لاقي طريقي اللي امشيه


_ بتحب تكون صداقة مع شخصيات قريبة من شخصيتك ؟
ولا شايف دا شيء مش مؤثر في الصداقة ؟
لا مش موثر للدرجه احيانا التضاد والاختلاف بيجذب اكتر
هو الاهم عندي في الطرف التاني الاحترام والصدق


ماضيك .. بيمثل ليك ايه في حاضرك ومستقبلك ؟
بعضه عقبه في طريقهم
وبعضه تجربه بتمهد الطريق اللي بيترسم


بتعتبر نفسك قيادي وبتتحمل المسؤولية ؟
لا مش شايف فيا القياده لكني المسئوليه ايوه
عارف ان لو جات الفرصه هنتهزها واقدر اكون كده


هل فشلت في تحقيق حلم مهم في حياتك قبل كدا ؟
والفشل دا أحبطك ولا استمريت في المحاولة ؟
حاجات كتير بتعدي في الحياه فشل بيحصل اكيد
لا مستمر في المحاوله


كليتك , داخلها عن اقتناع ؟
ولو لأ .. ايه اللي خلاك تدخل حاجة انت مش حاببها ؟
وكنت حابب ايه ؟
لا لسه دي مجاتش
بعض الفشل واقف في السكه


بنسمع حكم وامثال كتير .. بس في حاجات معينة بتثبت معانا ..
اما لانها لمست حاجة جوانا .. او اننا اقتعنا بيها جداً ..
إيه هي أهم المقولات أثرت فيك ؟
امممم كما تدين تدان
وكلنا كالقمر لنا جانب مظلم
الاولي مقتنع بيها جداا واخدها مبدء
والتانيه حقيقه عجباني اووي









هتتصرف ازاي :

اتظلمت من حد معين .. هتتصرف ازاي مع الظلم دا ؟
بحدد وبرتب تفكير وبجهز كلامي وهواجه وهثبت اني فعلا مظلوم
او في بعض الناس مش بتهمني فمش بحاول معاها

انت وزميلك عندكو فكرة معينة حابين تشرحوها للناس .. مين غالباً اللي هيقوم بشرحها .. انت ولاهو ؟
انا ممكن اكتب وهو يقرأ
عندي مشكله مع الجمهور انا



علاقتك بـ الناس .. ايه اهم قواعدها .. وعندك خطوط حمراء في التعامل ولا
منفتح من الجميع ؟
الحمد لله شايف علاقتي كويسه مع الكل واكيد ليها حدودها اهمها الاحترام والصدق
انا منفتح لدرجه كويسه وبتعامل كويس مع الكل في حدود اللي فات


_ رؤيتك لـ الصداقة .. وحياتك بيوجد فيها شخص تقدر تقول عليه انه صديق فعلاً ؟
لا مفيش في حياتي حد اقدر اقول عنه صديق طالما اتفرقنا منبقاش كده
كمبيوتري هو صديقي الحالي
والصداقه حاجه جميله طبعا بتخلي الدنيا اسهل بس لو حقيقيه مش مبنيه علي مصلحه



,,


أسئلة ليها علاقة بـ المنتدى :

بما انك عضو جديد
إيه السبب اللي خلاك تسجل في المنتدى ؟
انا اللي خلاني اشترك في المنتدي العضوه ريرو والعضوه ملاك
هما اللي جابوني هنا زي هجره لينا

ولحد دلوقتي استفدت منه ايه ؟
لحد دلوقت لسه اكيد مش عارف
لكن ككل منتدي جديد وناس جديده وشخصيات اكتر آفاق جديده بتفتح
اكيد هيفيدني كتير في الايام اللي جايا ان شاء الله


بتؤمن بالصداقة النتية ؟
اااه بمؤمن جدا جدا
ويمكن صديق النت دا تقدر تقوله حاجات غيره ميعرفهاش
بشوفه بيلمس شخصك الحقيقي عن الواقعي
كمان بترتاح وانت بتفضفضه لان الخساره هنا اقل بكتير
يمكن انا بترعب جدا اما تزيد عن كده
لكن اكتشفت انها اوقات بتكون الزياده دي للاحسن

ومين أقرب حد ليك هنا ؟
هما تعتبر شله قريبه مني
لكن الاكتر ريرو

هل اتهمك حد قبل كدا في المنتدى بشيء ضايقك ؟
أو حسيت انك مفهوم غلط ؟
هنا لا
لكن في تعاملي السابق في المكان اللي كنت فيه ااه حصل
اتهمت بحاجات واتكررت كتير وادايقت طبعا
لكن في الاول والاخر انا عارف نفسي كويس في الجزئيه اللي اتهموني فيها
وكان معايا اللي بيأكدلي كلامي وبيدافع عني
ومش هتفرق معايا خلاص وانا مشيت ومش شايف اني انا اللي خسران طبعا
بالعكس

كلمـة أخير توجههـا لـ كل الأعضـاء ؟
بنات مصر منتدي كبير وله وضعه طبعا وانا يشرفني اني اكون عضو فيه اتمني الاقي مكاني فيه
واتمني يكون في مساحه للتفاعل والنقاش وابداء الاراء اكتر من كده
واتمني تقبلوني وسطكم واكون عند حسن الظن


.
.

نورتنـا يا محمود
بتمنالك التوفيق ودوام النشاط
واتمنى الحلقة تكون عجبتكم
بالتوفيـق

[❀ ЯeRōŎō ❀]

واااااااااااااااااااااو

حلقه جامده جدا يا الحان وايه الاسئله دي كلها دي ولا اسئله الامتحانات ههههههههه

لا بس بجد حلقه رائعه اوي واجابتك يامحمود جامده جداا بجد ورزينه وكلها عقل ^^

وبجد بتمنالك انك فعلا تكتشف نفسك بجد وتحقق الي انت عايز وتبقي واثق من جواك انك هاتنجح لانك عندك قدرات النجاح

بس مش عارفه مكسل تستخدمها ولا مش عايز ربنا يوفقك يارب

وبجد حلقه رائعه جداااا

[ابتسامة الزهر]

حلقة روعة واسئلة جميلة ومفيدة

بتمثل واقع يعيشة بعض الناس

اجوبة رائعة ولكن فى معظمها حزن وعدم تفاؤل

اهم شىء انصح به محمود الامل والتفاؤل وانت لسه فى بداية الطريق

والاهم الثقة بالنفس حتى لو فشلت مرة الاصرار والمحاولة هما طريق النجاح

وربنا يوفقك

[PrinCesS Gege]

حلقة جامده جدااااااااا
تسلم ايدك بجد
وضيف لذيذ واجابته حلوه قوووى
وربنا يوفقك يا محمود ف حياتك وان شاء الله تتغلب على عيوبك اللى مش بتحبها وتثق ف نفسك اكتر من كده
لان اهم حاجة ف الانسان ثقته بنفسه
مودتى ^_^

[ملكة الهدوء]

حلقه جميله اوى

واسئله واجوبه اجمل من بعض

يسلموا الايادى يا الحان

بنتظار المزيد

[سَـلمَى]

أخيرآ عرفت إسمك :d

منـــور الحلقة كلهآ يــآ محمود

وبجد أجوبتك روعة

وتدل إنك إنسان وآعي وعارف طريقك

والشخصية ده مش كتير بتتلاقى

بحيك على أجوبتك وأسلوب كلامك >> دنتى في كله بقى مش بس الرياضة :d ماشاء الله

بس عايزة أقولك حاجة

أوعى تكره الأمل

لآن الأمل هو الطريق ال بيوصلك لكل حآجة

سوآء أمل بربنــآ

أو أمل بالمستقبل

أول أمل بنفسك

خلي حيآتك كلهآ أمل وتفآؤل

وصدقني مش هتخاف من حاجة

والبسمة مش هتفارق وشك

وربنــآ يوفقك يآكآبتن ^_^

مـــرسي يآقمر على الحلقة الجميلة

والأستضآفة الأجمل لمحمود

أحسنتي إختيار الضيف

ومستنين الحلقات التانية ^^

[ساحر الأحزان]

استضافة جميلة الحان

مع محمود وبسم الله ما شاء الله

عقليتة ناضجة وواعية

ودة واضح جدا من كلامة

تحياتى لكى للمجهود

ولمحمود على االضيافة القيمة

[Mo7aMaD 3aLa2]

منور الحلقة يا محمود واجابات مميزة

ربنا يوفقكـ ف حيآتكـ

تسلمى الحان ع التوبيك الرائع

..

[الأميرة رودي]

حلقه مميــزه جدا ألحان
عجبتنى الاسئله وكمان اجابات محمود
ماشاء الله عليه اجاباته تدل على شخصيته العقلآنيه الموزونه
.
ربنــا يوفقه فى كل حياته ويقدر يحقق أبسط أمنياته وهى انه يكون سعيــد
طموحك بسيط ويتمناه اى انسان بسيط ربنا يسعدك داايما
شكــرا الحان حبيبتي على استضافتك
وفقتى فى الاختيار
5 نجوم تقييمي

[سارية فى درب الرسول]

ماشاء الله يا الحان اختيارك للاسئله ممتاز

حلقه قيمه وضيفك اجابته مميزه وعاقله

يدوم التميز والابداع