رؤي عايزة المرجيحة (تابع المسابقة)

[Lost Pearl]

السلام عليكم ,, اولا بعتذر عن التأخير بس كان غصب عني

و المفروض امبارح كنت هنزل القصة بس النت فصل

معلش بقي يا ياسمينا


القصة قلت احكيها بالعامية عشان تبقي اقرب للقصص اللي بنحكيها للاطفال >>


كان ياما كان ,, ف يوم من الزمان

بنوتة اسمها رؤي ,, عندها 4 سنين ,, عايشة مع بابها و مامتها

كانوا بـيحبوا رؤي اوي

و هي كانت شطورة و بتسمع الكلام

ف يوم خرجت رؤي مع بابها و مامتها راحوا المراجيح

قالت رؤي لباباها :: انا عايزة عصير مانجا يا بابا

قالها :: من عنيا يا حبيبتي ,, و قال لمامتها لاعبي رؤي شوية علي ما اجي

قالتله :: حاضر

راحت مامت رؤي تلاعبها ,, و هم بيلعبوا علي الزحليقة

شافت رؤي مرجيحة كبيرة و شكلها جمييييل اوي

قالت لمامتها :: ماما ماما ,, انا عايزة اتمرجح ع المرجيحة الكبيييرة دي

مامتها قالتلها :: ماشي يا رؤي ,, تعالي نروح نشوفها

راحوا ,, لقوا المرجيحة دي بيتمرجح عليها ولاد كبار و بيزقوها جامد

مامت رؤي قالت :: شايفة بيمرجوها ازاي يا رؤي ,, مش هينفع تركبي هتقعي و تتعوري

رؤي قالت :: لا يا ماما بقي ماليش دعوة انا همسك كويس متخافيش

مامتها قالت :: لأ يا حبيبتي خلاص مامي قالت حاجة اسمعي الكلام بقي

رؤي بدأت تعيط و تقول :: عايزة المرجيييحة

شالت الام رؤي و هي بتعيط و راحت عند باباها اللي كان جاب العصير

بابا رؤي سألها :: ماالك بتعيطي ليه يا حبيبت بابا

رؤي قالت و هي لسة بتعيط :: انا عايزة اركب المرجيحة اللي هناك و ماما مش عايييزة

بابا رؤي قال للام :: ليه يا ماما مش عايزة تركبي رؤي المرجيحة

ماما قالت :: عشان في ولاد كبير راكبينها و بيزقوا جامد و هي هتقع

بابا قال لرؤي :: يا حبيبتي ماما خايفة عليكي لحسن تتعوري و تعدي تعيطي و الدكتور يديكي الدوا اللي مش بتحبيه

رؤي :: لأ انا مش هقع ,, عايزة المرجيحة بقي ,, و رجعت تعيط تاني

ادي بابا رؤي رؤي العصير و قال لماماتها سيبيها هي هتهدي دلوقتي ,, و قعدوا

بابا و ماما بيتكلموا و جه صحابهم قعدوا معاهم ,, و هم مشغولين كانت رؤي بتبص ع المرجيحة اللي عايزة تركبها

و قررت انها هتروح تركبها و هم مشغولين و مش واخدين بالهم منها

و راحت ركبت ,, بعدين و الولاد بيزقوا ,, المرجيحة مالت خالص و رؤي كانت هتقع

عيطت و قالت للولد اللي بيزق :: بالرااحة كنت هتخبط

قالها :: و انا مالي المرجيحة دي للكبار بس ,, و راح مكمل زق

رؤي مكانتش لحقت تعدل نفسها راحت هوب واقعة جامد ع الارض ,, و قعدت تصــــرخ و راسها بتطلع دم جامد و جسمها كله بيوجعها

مامتها و باباها سمعوا صوت صريخ بنت صغيرة ,, بيبصوا جنبهم ملاقوش رؤي ,, عرفوا انها راحت و هم مش واخدين بالهم

راحوا جري علي مكان الصوت ,, لقوا ناس كتير متجمعة و عمالين يزعقوا ,, زقوا نفسهم لحد ما دخلوا ف نص الناس دي كلها و لقوا راجل عمال يحاول يوقف الدم اللي نازل من راس رؤي

بابا رؤي قال حاسبوا دي بنتي ,, و اخدها جري هو و مامتها وبعربيتهم راحوا المستشفي

هناك الدكتور بدأ يعالج رؤي ,, قال لباباها ان راسها اتفتحت و ايدها اتكسرت

بس هو خلاص جبس ايدها و وقف الدم و رؤي بقت كويسة و يقدروا يشوفوها

ارتاح بابا رؤي و قال الحمد لله ,, و راحلها لقاها صاحية

قالها :: ها يا روح بابا عاملة ايه دلوقتي ,, قالت :: راسي بتوجعني يا بابا

قال :: معلش يا حبيبتي حمدا لله علي سلامتك ,, شوية و هتبقي كويسة ,, مش ماما قالتلك خلي بالك

قالت :: انا كنت ماسكة كويس بس الولد الوحش ده موقفش لما قلتله

دخلت مامت رؤي و قالت :: شفتي بقي اني كنت خايفة عليكي ,, افرضي كان حصلك حاجة وحشة دلوقتي بعد الشر

رؤي قالت :: انا اسفة يا ماما ,, بعد كدة هسمع كل كلامك علي طول

حضنتها مامتها و قالت :: جدعة ,, هي دي حبيبة ماما

بعد ما رؤي خفت ,, روحت البيت مع باباها و مامتها

و اتعلمت الدرس و بقت دايما بتسمع كلام ماما و بابا


و توتا توتا خلصت الحدوتة :d ,, حلوة بقي و لا ملتوتة هههههههه


بقلمي ,,

[تجملت بالعفآف]

ههههههههههههه
حلوه الحكايه ياا لوست
جهزيلي السرير اصلي نعست ههههههههه
تسلم الايادي
انتظر جديدكـ بكل لهفه واشتياق
لا تحرمينا من قلمكـ

[Lost Pearl]

اقتباس المشاركة الأصلية كتبت بواسطة ~ ♥ ورده الأحلام ~ ♥ ههههههههههههه حلوه الحكايه ياا لوست جهزيلي السرير اصلي نعست ههههههههه تسلم الايادي انتظر جديدكـ بكل لهفه واشتياق لا تحرمينا من قلمكـ

ههههههههه

اتريقي مااااشي

منورة يا قمر

[ساحر الأحزان]

هو فية كتير كدة من الاطفال دماغهم ناشفة وتحاول تقنع فيهم ما بيسمعشى

الكلام الا لما يشوف بعينة زى ما حصل مع رؤى

واسالى ياسمين على كلامى

جميل القصة لوجى

اتمنى لكى التوفيق

[countess]

جميله يا لولو

موفقه بالمسابقه يارب

[دمعه حائره]

هههههه
جميله اوى يالوجى اسلوبك شيق وجذبتنى جدا الحكايه


تسلمى ياقمر وموفقه ان شاء الله

[Lost Pearl]

اقتباس المشاركة الأصلية كتبت بواسطة ساحر الأحزان هو فية كتير كدة من الاطفال دماغهم ناشفة وتحاول تقنع فيهم ما بيسمعشى الكلام الا لما يشوف بعينة زى ما حصل مع رؤى واسالى ياسمين على كلامى جميل القصة لوجى اتمنى لكى التوفيق

هههههههه اااه اوي

ماشي هسألها :d

منور يا امجد

[Lost Pearl]

اقتباس المشاركة الأصلية كتبت بواسطة countess جميله يا لولو موفقه بالمسابقه يارب

تسلمي يا حبيبتي

نورتي :*

[Lost Pearl]

اقتباس المشاركة الأصلية كتبت بواسطة دمعه حائره هههههه جميله اوى يالوجى اسلوبك شيق وجذبتنى جدا الحكايه تسلمى ياقمر وموفقه ان شاء الله

ههههههه طيب كويس انها عجبتك يا قمر

تسلمي ,, منورة :*

[قلب وكلمات]

جميله جداً لوجي

وعلى فكره الناس فهمه غلط بالنسبه لطريقة سرد

القصص الأصل فيها اختيار ما هو مناسب للمستمع

أو المتلقي فإذا كان بسيط أو طفل لا يجوز للكاتب أو الراوي أستخدم

لغويات وتشبيهات صعبه على إدراكه ، بل يجب عليه التبسط ليحصل على نتيجه

هو يريد الوصول إليها وهي الإستحواذ على القارئ أو المستمع

مثال على ذلك عندما أنزل الله القرآن ليكون هدى وكتاب مبين كان بنفس لسان

القوم الذي أراد الله هدايتهم ( كِتَابٌ فُصِّلَتْ آيَاتُهُ قُرْآنًا عَرَبِيًّا لِّقَوْمٍ يَعْلَمُونَ )

الأمر فيه تفصيل وأن شاء الله لو عندي الوقت هكتب بالتفصيل

كيف تكتب القصة ولمن ، كنت هنا رائعة لوجي بلغتك البسيطة

المحببه والسهله لتصل إلي الطفل

تقيمي ونجومي ، بالتوفيق في المسابقة

خالص تحياتي

القيصــــر

قلب وكلمات