الشبوكشي

[єLмσsħαx]

الشبُوكشي للإنتاج السينمائي !!

مَنْ منّا لا يعرف الشبوكشي المُنتج السينمائي الكبير .. رجُل الفضيله والشرف والأخلاق , النيل رواه .. الخير جواه .. ومصر كلها معاه المساهم الأكبر في توعية شباب مِصر والحفاظ علي أخلاقهم من الضياع , لقد كِدنا ننحرف ولكـن بفضل الله ثـُم الشبوكشي تغيّر حالنا وأصبحنا .. زي الفل - ميّه ميّه - ملوخيه بالأرانب

(صوره للشبوكشي لحظـة تفكير وتركيز عميقه )

الشبـوكشي رجـل ناجح , لا يُضيع وقتـه كثيراً .. كل دقيقه بالنسبه لهُ تساوي المال .. كل ثانيه يستفيد منها في جني المال ,والشبوكشي ايضاً يعمل في أكثر من مجال , وهو أول مُخترع لـ " استخراج الراقصات " ذلك الإختراع الذي فاز عن طريقه بكثير من الأموال .. فما هـو " استخراج الراقصات ؟ , وكيف يستفيد منه السبـ .. قصدي الشبوكشي



,, إستخراج الراقصات ،،

إستخراج الراقصات لا يختلف كثيراً عن إستخراج البترول , فكما يقـوم مُهندس البترول بإستخراج البترول يقوم الشبُوكشي أفندي بإستخراج الراقصات وإنتشالهم وإظهارهم في الفيلم , اياً كانت فكره الفيلم , وإليكم شرح بالتفصيل ..

مثال رقم 1 :


فيلم عن الطبقه الفقيره وناس طالع عينهم في المُجتمع ومش لاقيين فلوس والكلام اللي إحنا عارفينه ده , طيب إزاي الشبوكشي هيقدر يربطالرقص بالفيلم ده ؟

ببساطه هيخلي بنت جميله من الطبقه الفقيره تلجأ أنها تشتغل رقّاصه عشان تصرف علي أهلها , وبالتالي نجح الشبوكشي بذكاءه وعبقريته إنه يدخل الرقص في فيلم ملوش أي علاقه بالرقص ويستخرج راقصه من هذا الفيلم !! ..


مثال رقم 2 :


هنفرض أن الشبوكشي عامل فيلم عن الطبقه الغنيه ! .. أظـن بقي مستحيل يطلّع رقاصه من الطبقه الغنيه .. صح ؟! .. لا مش صح , الشبوكشي هيخلي واحده جميله من الطبقه الغنيه تتخذ الرقص كهوايه هي بتحبها مش مصدر للفلوس ! .. أو ممكن يخلي البنت تنفصل عن أهلها الأغنياء وتحتاج للفلوس وتشتغل رقاصه , أو ممكن البوي فريند الصايع قليل الأدب بتاعها يجبرها تشتغل رقاصه .. وبالتالي نجح الشبوكشي يستخرج راقصه من الطبقه الغنيه !

مثال رقم 3 :


فيلم عن دار مسنين ..

انت بتقول في سرّك : مستحيل يطلع رقاصه من دار مسنين ! .. إزاي اصلاً هيعمل كـده ! .. مستحيل طبعاً .
انا بقولك : يبقي إنت متعرفش الشبوكشي , الشبوكشي يا حبيبي عنده حل لكل مشكله .
الشبوكشي هيخلي واحده عجوزه من دار المسنين تشتاق لأيام الشباب والرشاقه والحيويه , وبالتالي هتحاول ترقص وهتحاول تشتغل رقاصه عشان تثبت للعالم كله إنها لسا في عزّ شبابها ,
يا سلام عليك يا شبوكشي .. عبقري من يومـك .



أنواع أفلام الشبوكشي ؟

الشبوكشي بيقدم كل أنواع الأفلام :-
أكشن : الراقصه تتخطف
كوميدي : الراقصه تسقط أثناء الرقص
دراما : رحله الوصول للكباريه ( قصدي قصتها وهي صغيره وإزاي أصبحت رقاصه ووصلت لطريق المجد )
رعب : الرقاصه تطلع راجل متنكر
غموض : الراقصه ترقص طول الفيلم بقناع وتكشف عن شخصيتها في النهايه
مغامرات : الراقصه تنتقل من كباريه لكباريه آخر
نـحـن نعترض !


عايز أتكلم بجد شويه وبعدين نرجع نهزر تاني ,
انا تعبت من كثرة الإعتراضات اللي شوفتها علي " فيسبوك " و "تويتر" وحتي في بعض البرامج التلفزيونيه وأراء الجماهير معظم الناس مُعترضه علي الأفلام دي , بس اللي مش قادر أفهمه .. لما الكل مُعترض .. أمال الأفلام دي بتحقق أرباح إزاي و ومين اللي بيخش يتفرج عليها لما الكل مُعترض ؟ ,وبفرض اننا قدرنا نفسر المشكله دي , هل الناس أصبحت تافهه لدرجة إنها تخش أفلام زي أفلام الشبوكشي وتهتم أنها تضيع ساعه أو ساعتين من وقتهم علي قلة أدب وتفاهه زي دي , أمال فين الشعارات اللي دماغنا صدعت منها .. " الشعب قبل الثوره غير الشعب بعد الثوره " .. " مش هنسمح لحد يستغلنا أو يضحك علينا " ..


لقاء حصري .. مع الشبوكشي


محمد : مساء الخير استاذ شبوكشي , صاحب شركة الشبوكشي للإنتاج الرقصمائـي قصدي السينمائي !

الشبوكشي : أهلاً يا حبيبي ! .. إزيك ؟

محمد: عايز أبدأ معاك بدايه قويه , إيه رأيك في الإنتقادات اللي بيتم توجيهها للأفلام اللي بتنتجها

الشبوكشي : إنتقادات تافهه ولا أساس لها من الصحه , انا نسبة مشاهده أفلامي عاليه جداً الحمد لله

محمد: مش يمكن عشان اللي بيتفرجوا عليها تافهين زيك وزي أفلامك ؟

الشبوكشي : نعم ياخويا ؟

محمد: , لمؤخذه .. قصدي مش يمكن عشان بتستخدم الراقصات في أفلامك وده بيجذب طبقه معينه من الناس وبيرفع نسبة مشاهده افلامك .

الشبوكشي : انا مليش دعوه , المهم إني بكسب فلوس وخلاص والناس مبسوطه

محمد : طيب مش شايف , إن إستخدام الراقصات حرام وكـده ؟ , ولا مش بياكل معاك الكلام ده ؟

الشبوكشي : دي حرية إبداااع , إيه فهمك إنت ! .. يعني انت هتفهم أكتر من التيارات العلمانيه والليبراليه ؟! ..

محمد : ومعانا إتصال هاتفي .. صميده عبد الصمد صميده !!


صميده : الووووو ! .. معايا الإستاذ هولمز ؟ .. انا عايز أقول للشبوكشي إن بركة السبع كلها بتحبّك وكلنا معاك يا شبوكشي وربنا يحميك ويبعد عنك عين الحسود ! .. ( تمام كده يا شبوكشي بيه , هبقي أعدي عليك أخد باقي حسابي )



الشبوكشي : مش دلوقتي هتفضحني يابن الـ ..

محمد: ومعانا إتصال تاني ؟ .. أستاذ علاء ؟!




علاء : بحبك يا سبكي وملكش دعوه بأعداء النجاح ولاد الـ ..

,, وبعد علاء إتصلت ريهام وساره وهاني ومجدي واحمد ومايكل وسامي ومدحت , وكلها مدح في طيب الذكر الأستاذ شبوكشي وكله بحسابه , وسلملي علي الإعلام ! ,,



محمد : تحب تقول إيه في نهاية البرنامج

الشبوكشي : حابب أقول ان كل النجاح اللي حققته بفضل الفن الهادف والرساله اللي بقدمها , وحابب أشكر كل راقصه تعبت وسطها معانا الأيام اللي فاتت عشان الأفلام تنجح وتسمّع وتلعلع وتولع .




كفايا كـده لأن انا قرفان من الشبوكشي أصلاً ! , بس حابب أقول كلمه في الآخر , إن مفيش إنسان فاسد بينجح في البلد دي بدون مساعدة الشعب , مبارك كان سارق وناهب وناجح في فساده لأن الشعب كان ساكت وكلنا كنا مساعدينه , والشبوكشي برده ناجح في أفلامه بسبب إنهزامية الناس وعدم إتخاذها موقف حازم مع الإفلام دي , بالإضافه للناس اللي بتخش وتشوف الأفلام دي وتضيع وقتها , أتمني كل الرغي بتاعي يجي بفايده والناس تحس بالمصيبه اللي ممكن أفلام الشبوكشي تسببها , نسعي للقضاء علي الشبوكشي وكل أمثاله ..


م\ن

[beauty angel]

جميل جدآ الموضوع وطريقة عرضة مشوقة
أحسنت الأختيار ،،
للأسف الأفلام كلهآ بقت افلام هابطة وفاشلهـ
بيعتمد على اثارة الغرائز والقصة المكررة أكتر من مرة
وغالبا بيبقى رواد الأفلام دى من فئة المراهقين !!
والغريب فعلا أن كل مازاد اعتراضنآ ونقدنآ لنوعية الأفلام دى إلا أنها
ومع ذلكـ بيتزيد ايراداتها وبتحقق نجاح ونسبة مشاهدة عالية للأسف ,,

اقتباس مبارك كان سارق وناهب وناجح في فساده لأن الشعب كان ساكت وكلنا كنا مساعدينه , والشبوكشي برده ناجح في أفلامه بسبب إنهزامية الناس وعدم إتخاذها موقف حازم مع الإفلام دي

متفقة معاك جدآ فى النقطة دى
بينقدوهآ ومع ذلك يدخلوا يتفرجوآ عليهآ
الشعب محتاج توعية بشكل مكثف
قرأت رأى وأعجبنى بيقول أنك علشان تحارب شىء لازم تستخدم نفس سلاحة
المقصود طبعآ فى المقابل يعملوا أفلام محترمة وراقية
وهادفة يكون فيهآ قصة ومضمون يجذب المشاهد
والأهم يكون عندنآ توعية دينية وقرب من ربنآ
يمنعنا أننا نشوف اى مهازل من الى بتحصل دى
وفى النهاية ربنآ يهديهم ,,
تسلم على التوبيك وبعتذر على الاطاله
لكن الموضوع مهم بجد
تم تثبيت التوبيك لفترة ,,
رجاء تابع الردود باءستمرار
موفق ان شاء الله

[єLмσsħαx]

اقتباس المشاركة الأصلية كتبت بواسطة beauty angel جميل جدآ الموضوع وطريقة عرضة مشوقة أحسنت الأختيار ،، للأسف الأفلام كلهآ بقت افلام هابطة وفاشلهـ بيعتمد على اثارة الغرائز والقصة المكررة أكتر من مرة وغالبا بيبقى رواد الأفلام دى من فئة المراهقين !! والغريب فعلا أن كل مازاد اعتراضنآ ونقدنآ لنوعية الأفلام دى إلا أنها ومع ذلكـ بيتزيد ايراداتها وبتحقق نجاح ونسبة مشاهدة عالية للأسف ,, متفقة معاك جدآ فى النقطة دى بينقدوهآ ومع ذلك يدخلوا يتفرجوآ عليهآ الشعب محتاج توعية بشكل مكثف قرأت رأى وأعجبنى بيقول أنك علشان تحارب شىء لازم تستخدم نفس سلاحة المقصود طبعآ فى المقابل يعملوا أفلام محترمة وراقية وهادفة يكون فيهآ قصة ومضمون يجذب المشاهد والأهم يكون عندنآ توعية دينية وقرب من ربنآ يمنعنا أننا نشوف اى مهازل من الى بتحصل دى وفى النهاية ربنآ يهديهم ,, تسلم على التوبيك وبعتذر على الاطاله لكن الموضوع مهم بجد تم تثبيت التوبيك لفترة ,, رجاء تابع الردود باءستمرار موفق ان شاء الله

زى ماحضرتك قولتى لو فى افلام محترمه ودينيه
وقربنا من ربنا الافلام دى مش هتنجح بس
بردوا الغريب ان بيبقى فى افلام محترمه وكويسه
وبتفشل عشان مش فيها رقص وكلام من ده
مش عارف العيب فى مين العيب تقريبا
فىشبابنا معدتش فى اخلاق وارجع واقول
ان سبب فى ده افلامه بردوا
ثانكس لمرورك وللتثبيت

[Eng Esraa]

مبارك كان سارق وناهب وناجح في فساده لأن الشعب كان ساكت وكلنا كنا مساعدينه , والشبوكشي برده ناجح في أفلامه بسبب إنهزامية الناس وعدم إتخاذها موقف حازم مع الإفلام دي


كلامك جميل جدا
وموضوع جميل
و الجمله دي اكتر حاجه
موافقاك فيها بجد

[طمطم]

انت قولت كل حاجة ممكن تتقال ف الموضوع ده
..
تقييمى بجد ليك
وحلوة اوى طريقة عرضك للفكرة
,,