الصدمه -1- انا ضد تطبيق الشريعه

[قلم بلا حبر]

بسم الله الرحمن الرحيم

السلام عليكم

الصدمه هى سلسلة مقالات ,, اوعدكم ان فى كل مره حتلاقوا اللى يصدم البعض فعلا واحيانا ممكن الاغلبيه

السلسله مش عاملها حب ظهور او سباحه ضد التيار او حب اختلاف او شو اعلامى (( والا كنت عملتها فى الراديو احسن :d ))

الصدمه هى مجموعة افكار ومعلومات وحقائق تاريخيه لما تتربط ببعض تلاقيك اتصدمت

ممكن تتصدم فى المقاله ,, وممكن تتصدم فى شخصية اللى كاتب المقاله

لكن الى اقولهولك ان بالرغم من انى سميتها الصدمه ,, الا انى بتمنى ان محدش يتصدم والاقى اتساع افق يقدر يستوعب الافكار اللى حتتعرض فى السلسله دى

جايز تتفق معايا فى مقاله وتتصدم فى الاخرى ,, بديك حرية الا تفاق والاختلاف والانتقاد بس فى حدود الاحترام

بمعنى ان نقد الفكر مش بس بمهاجمته ,,, انما نقد الفكر بيكون بفكر زيه

من زمان القسم هادى ,,, فايه رايكم نسخنه شويه :d


اول مقالات سلسلة الصدمه بعنوان


(( انا ضد تطبيق الشريعه ))

مش محتاج اقولكم ان لو قلت كده وسكت اكون ضمنت حظ وفير من التكفير والسب والاحتقار حتى لو مش بشكل علنى فحيكون من داخل القلوب

ودى افتنا فى النقاش اننا بناقش رؤيتنا احنا من غير ما نسيب للطرف التانى فرصه انه يدينا الاساس اللى عليه حناقشه

تمام زى (( ولا تقربوا الصلاة )) لازم تكمل الايه علشان المعنى يستقيم فى ذهنك (( وانتم سكارى حتى تعلموا ما تقولون ))

اول انتقاد حاخده (( الحاج السيد بعد ما حج بيت ربنا جاى بيرفض تطبيق شريعته !!!!! ))

مع ان ده من اهم الاسباب اللى خلتنى ابدأ السلسله دى بالمقال ده بالذات

لما افتكر انى واقف فى نفس المكان اللى خطب فيه الرسول صلى الله عليه وسلم خطبة الوداع بييجى فى بالى على طول الايه الكريمه (( اليوم اتممت لكم دينكم واتممت عليكم نعمتى ورضيت لكم الاسلام دينا ))

وبييجى فى بالى برده حديثه صلى الله عليه وسلم (( تركت فيكم ما ان تمسكتم به لن تضلوا بعدى ابدا كتاب الله وسنتى ))

لما بحاول اركز فى الايه الكريمه والحديث الشريف الاقى اننا للاسف فهمنا بقى أضيق كتير ممن سبقونا بالاسلام الى الله

بالرغم من الايه الكريمه بتوجب ان الدين اكتمل ,, الا ان مفيش حد من الصحابه انكر على ابو بكر الصديق رضى الله عنه اجتهاده فى السماح بعمل لم يقم به رسول الله صلى الله عليه وسلم الا وهو جمع القرأن فى مصحف واحد

وبرده لم ينكر احد على سيدنا عمر ابن الخطاب رضى الله عنه اجتهاده فى تعطيل حد السرقه فى عام الرماده

وبرده لم ينكر احد على الائمه الاربعه (( ابن مالك وابن حنبل والشافعى وابو حنيفه )) رضوان الله عليهم جميعا استنادهم الى انواع من الادله فى احكامهم غير الكتاب والسنه زى القياس والاجماع

اذن الاسلام دوما بيتطلع للتجديد بما لا يخالف ثوابت الدين المنصوص عليها فى القرأن والسنه وبناءا عليه كان اجتهاد المسلمين الاوائل واستنباطهم لاحكام تتناسب مع ما استجد فى عصورهم

لكن النهارده وبعد اكتر من 1400 سنه بلاقى نفسى مطالب بالاقتناع بتطبيق مجموعه من الاحكام تم الاجتهاد فيها فى عصور تلت وفاة الرسول صلى الله عليه وسلم ولا تأخذ فى الحسبان ما نحياه الان من مستجدات

مع العلم ان من اعجاز القرأن الكريم والسنه النبويه ان كتير من الاحكام الوارده بهما كانت فى شكل ردود افعال على احداث معاصره لنزول الايه او الحديث

يعنى اللى بيقرا قرأن بشكل متاابع وتركيز شديد حيلاقى ان فى ايات نزلت فى مواقف معاصره فى حياة الرسول صلى الله عليه وسلم ,, وكتير من الاحكام كانت عباره عن استفسارات من الصحابه رضوان الله عليهم للرسول صلى الله عليه وسلم وكان بينزل فيها قرأن او بيوحى بيها للرسول فيحكم بما اوحى اليه وتم وصوله لنا فى شكل حديث فى سنته صلى الله عليه وسلم

يبقى الاسلام من بدايته مدرك لحقيقه مهمه ,,هى ان الحياه فى تطور دائم يستلزم مرونه لاحتواء كل ما يستجد على البشريه من احداث ومواقف

والحقيقه دى مغابتشى على السلف الصالح وهم بيجتهدوا فى استنباط الاحكام لما استجد فى عصرهم من احكام ,, لكن للاسف توقف الاجتهاد وتجمد النمو الفقهى الاسلامى عند عصر معين ,,,

وده اللى البعض عايزين يصدروه لينا على اساس ان هى دى الشريعه الواجب تطبيقها

وده اللى خلانى اقول انى ضد تطبيق الشريعه الاسلاميه بين قوسين (( حسب رؤية البعض ))

محدش ينكر الاختلاف الكبير بين الحياه دلوقتى والحياه فى عصر النبى والحياه فى عصر الخلفاء الراشدين

واللى بيستوجب منا اننا قبل ما نفرض احكام ونحطها فى اطار التطبيق نشوف هل فيها نقص ؟؟؟؟

انا مش حدخل فى متاهة اعادة تقييم الاحكام الفقهيه ,,, مع ان ده مش جديد ,, الامام الشافعى رحمة الله عليه بعد ما وضع مذهبه فى العراق لما نزل مصر اسس لمذهبه الجديد وتراجع عن كثير من فتاويه

ولو حضرتك عملت بحث فى جوجل عن كلمتين اتنين (( تراجع عن فتواه )) لحتلاقى النتايج بتوضحلك ازاى ان مفيش كلام مقدس بعد القرأن والسنه المطهره مهما كانت درجة العلم لقائل هذا الكلام

انما خلونى اروح لمنطقه مش حيكون فيها جدال ,, وهى الاحكام المعاصره

الصحابه لما كان بيستجد عليهم امر كان بيجتهدوا فى انهم يلاقوا الحكم الشرعى المناسب اللى ميخالفشى الكتاب والسنه وفى نفس الوقت يضع اطار لتطبيق الامر المستجد ده

وعلى كده تبعهم التابعين والسلف الصالح ,, كان لما يستجد عليهم امر وحكمه مش موجود فى الكتاب او السنه يجتهدوا بطرق عديده زى القياس مثلا ويوجدوا الحكم الفقهى السليم المتفق عليه للامر ده

علشان كده كانت الشريعه فى وقتهم ملمه باغلب الامور والمواقف والامور الحياتيه

النهارده فى امور كتير بيتم البت فيها بشكل عشوائى من خلال فتاوى عديده ,,, وده اللى حضراتكم تابعتوه على مدار الاعوام السابقه من فتاوى كانت تشيب لها رأس الولدان

زى فتوى ارضاع الكبير مثلا ,,, انك لو موظف ومعاك موظفه فى نفس المكتب يبقى لازم ترضعك علشان تبقى تحرم عليها بالرضاع

وفى امور لازالت الاحكام الفقهيه التأصيليه غايبه عنه بحكم تراجعنا العلمى زى ما انتم عارفين ,, انا فاكر لما الستالايت ظهر تضاربت الفتاوى واغلبها حرمه هو والتليفزيون من قبله ,, فى الوقت اللى دلوقتى القنوات الدينيه مغرقه النايل سات

وقيس على ده كتير اخرهم فتوى هدم ابو الهول والاهرامات ,, ومتفتكرشى اخى القارئ ان مثل تلك الشطحات ستنتهى ,, طالما لم يوجد اطار متكامل لا يستطيع العبث به مرضى الكهنوت الدينى او السيطره باسم الدين

اذن فالشريعه الاسلاميه ليست كما يصدرها لنا البعض انها محفوظه فى كتاب سنرجع له عند الاختلاف ,,, احنا مش سذج قوى كدا

الشريعه الاسلاميه بها كتير من الاحكام مستنبطه وليست واضحة الدلاله وادلتها مبنيه على الاجتهاد اللى بيقبل الخطأ ,, وده اللى خلى الامام مالك قبل موته يتمنى بان لو يجلد عن كل فتوى قالها

يبقى الشريعه الحق ناقصه كتير لقفل باب الاجتهاد منذ زمن ,,,

طيب ازاى نطبق شرع الله فى ملكوته ؟؟؟؟

1- فتح باب الاجتهاد وتكوين لجنه من افاضل العلماء يعكفوا على ايجاد التكييف الفقهى المناسب لكل ما استجد من احداث ومواقف وامور حياتيه تحقق للمسلم الفائده وتمنحه حريته فى التعايش فى عصره بحسب ادوات هذا العصر

2- ان يجمع علماء الامه على اطروحات تلك اللجنه فالاجماع فى حد ذاته دليل ,, لمن يدرك اصول احكام واصول الفقه

بعد كده بقى نقدر نطبق شرع الله كاملا بدون قلق وبدون خوف من تشدد او تطرف

طيب ليه مش عايزين نطبق الشريعه دلوقتى حالا ؟؟؟

السبب الاول / كل اللى انا زكرته فوق

السبب التانى / فى حالة اننا طبقنا الشريعه دلوقتى فكأننا منحنا لتيارات معينه سلطة الافتاء وتطبيق رؤيتهم الخاصه سواء اكان مجمع عليها ام لا ,,, وفى تلك الحاله فان كل ما سيصدر عن تلك التيارات سيعد ضمنيا فى اطار الشريعه الاسلاميه التى تم النص عليها فى الدستور

يعنى ببساطه الامور الكتير المعاصره التى لم تحسمها الشريعه باحكام فقهيه مجمع عليها ,, حيكون من حقهم انهم يقولبوا احكام حسب فهمه الشخصى للدين ويصدروه لينا على انه هو ده الشرع ولازم يتنفذ ولو خالفت يبقى بتخالف شرع الله ,, وده مش حقيقى

عرفتوا ليه (( انا ضد تطبيق الشريعه ))

لان ببساطه محتاجين نوصل لاطار للشريعه كلنا نعرف وندرك احكامه ونطمئن لادلتها ,, ولو فى سبيل لاعادة الاجتهاد فى بعض الاحكام اللى وردت الينا من السابقين فميش مانع لانهم نفسهم كانوا بيتراجعوا فى بعض فتاويهم

العنوان صادم ,,, بس يارب يكون الشرح الغى الصدمه او على الاقل خففها

شكرا على المتابعه

والمجال مفتوح لكل انواع الردود ,,, وطبعا مش محتاج اقولكم انا مش ححجر على اى رد

عرضت وجهة نظرى مطلوب من حضراتكم تعرضوا وجهات نظركم سواء بالتوافق او بالاختلاف

بس تحطوا فى بالكم انى مش حنتقد اى رؤيه مهما كانت درجة الاختلاف وده حيبقى طبيعة عرض السلسله ان شاء الله

انا بكتب الموضوع وبتابع الاراء وبنظم الموضوع لحذف الردود غير اللائقه او منع تجاوز اى عضو بحق اى عضو اخر

اللى عايز يعبر بحريه فده شئ مكفول ,, بس يعرف انى برده بكفل حرية باقى الاعضاء فى التعبير بحريه عن ارائهم

يمنع التعليق على اى رد من جانب اى عضو ,, فقط ضع ردك واطلعنا على وجهة نظرك فى المقال

بالتوفيق للجميع

[Mahmoud Mohie]

اولا احييك ع الطرح الرائع والمميز كالعاده
ثانيا : بالنسبه لموضوع ان العصر غير العصر ، فأنا هقولك مثال صغير جدا
انا كنت قرأت ف كتاب بيتكلم ع البحث العلمى
كان بيقول ان من خصائص البحث العلمى مرعاة الظروف والعوامل المؤثرة ف البحث
بمعنى انك مينفعش تحكم على حدث وقع ف الماضى بمفهوم الحاضر دون النظر للظروف المحيطه بالحدث وقت حدوثه ..
اظن ان الن ده نفس اللى انت عاوز توصله ف الجزئيه دى
ثالثا بالنسبه للفتوى الأولى اللى اتكلمت عنها
انا سمعت مسرحيه اسمها قهوة ساده وف جزء مفهمتهوش منها خالص .. شكرا انك فهمتهولى يا صديقى :-d :-d
خلاصه الكلام لو عاوز تطبق الشريعه هتبقى قدام واحد من اختيارين
الأول انك تطبقها بحازفيرها وده مينفعش الا لما توفر شغل وسكن و و و و و و حاجات مش هتقدر تعملها بعد 100 بطريقتك دى :/
وفى الأخر هتبقى دوله زىالسعوديه وانت عارف ايه اللى موجود ف السعوديه يعم ده الممنوع مرغوب !
الثانى : تطبقها بمفهوم العصر وهتاخد كميه فتاوى للصبح
وما اكتر الفتايين ف عصرنا :/
بانتظار الطرح القادم
شكراا"""

[SiLver Spectra]

المشكلة يا سيد ان في تيارات و افكار بتشوف انها بطبق الشروط الي انت ذكرتها
و بالاخص التيار السلفي

انت مهما تجيبه يمين في شمال هيقولك انا الصح و مش بعيد يكتبلك القرآن كلو في الرد
و أظن انت عارف انا بتكلم عن مين :d ( تصدق انه وحشني هههه)

المشكلة في فرض رؤية معينه و انه مش بيعترف بالاستثناءات و لا الظروف حتى لو قالك انا براعي الظروف

[الرحــاال المٌتَمرد]

مرحباً بك يا سيد ,,

عوده قويه مع سلسله الصدمه

الله يستر


انت عرضت فعلا وجهه نظر ,, قد يحدث ما توقعته وقد لا يحدث

هى (تخمينات) والله اعلم ,,

او قد تكون رؤيه لمستقبل مصر فى حال تطبيق الشريعه الاسلاميه

بس أكيد زى ما فى سلبيات ,, فى إيجابيات لتطبيق الشريعه

اما عن المقترحات ,, أعتقد ان مصر مش هتقدر تعمل تخطيط زى دا

إحنا بقالنا سنتين بنمشى بضهرنا ,, تقولى تخطيط وتنظيم !!


عموما انا شايف ان البلد بيتغير حالها على مدار الساعه 3 او 4 مرات

والله اعلم باللى هيتم فى النهايه ,, دا لو كان فى نهايه .

الله يوفق ,, ويصلح الحال


منتظر باقى السلسله ,, والله يوفقك فى الاختيار وعرضها




احترااامي

[حنـــــون]

احتكار التفسير والشريعه لافراد معينه
هو الى فجر جوانا اننا مش عاوزين نطبق الشريعه
الدين من الحق الجميع انو يتامل فيه ويتفكر فيه
ويحاول يفسره بطريقه مناسبه لاحكام ربنا وليحاتنا دلوقتى
لما يجى شويه ناس تكفر فى دا وتلعن دا وكله تحطه تحت اسم الدين
يبئه من حقنا نفرض تطبيق الشريعه بتاعتهم مش شريعه ربنا
لانها كلها شعارت مزيفه ماخفى وراها كان اعظم
بشكرك ياقلم على وجه نظرك الامثل للى بيحصل
تحيااااااااتى

[روح صامتة]

بحييك ع موضوع الصدمة دا ,,
مش عارفة كل ما ادخل المنتدى الاقيلك موضوع كده قوي ^^ يعني حلو :d
انا عاجبني جدا ,, ان الناس بقت تثقف نفسها ذاتيا عن الدين
كنت زمان مثلا تلاقي اي حد يتفرج ع اي شيخ
ويسمع الكلام ويردد سبحان الله ,, او مثلا ياخد الفتوى اللي الشيخ تكلم عنها
مغفلا الفتاوي الثانية من غير ما يفكر ,,
فيه حاجة اسمها قواعد الفقه ,, وفيه الفقه نفسه
انا القواعد دي بمشي عليها لما باجي احكم ف مسالة انا قصدي ع الشيوخ يعني ,,
زي الضرورات تبيح المحظورات ,, وف الاخر هتلاقي بيحكم بعد ما يستوفي كل الشروط او القواعد دي ..
وحجات تانية بيستفتي فيها الانسان قلبه ,, واللي يميل له اكثر من الفتاوي دي ..
وفعلا فعلا احلى نقطة اتكلمت فيها استحواذ بعض الطوائف المتحكمة او اللي هية واصلة لسدة الحكم
بقواعد الشريعة و يصنفوها حسب الاهواء ,, فعلا الخوف من كده ,, مش عايزين نرجع للعصور الظلامية
الدين الاسلامي احلى حاجة فيه انه مرن ومتطور ., طول ما هوة ما اخلش بالاساسيات
حقيقي بشكرك ع موضوعك
استمتعت بيه ف انتظار الباقي
ارق تحياتي