Benim sayfaları yazma öğretti olanlara selamlar

[Mind language]

[Mind language]

ما لها الحياة من على الموبيل
ماهى حلوة اهى وكلة ماشى
تمام التمام وناس رايحه وناس
جاية وماشية الحياة عادة خالص
وهكذا تمضى الايام على مر الزمان
لقيت نفسى بذاكر باليمين ببص
على ايدى الشمال لقتها فاضية
ينعع كدا لا طبعا قولت مبدهاش
ادخل نت من على الموب انزلى
كام برنامج للجلاكسى مينى واطمن
عليكم انتم ومواضعكم وهكذا يعنى .

[Mind language]

انا اكبر حاجة شيفاها على الصفحة
هى رمزيتى بحبها قوى الرمزية دى
ولا عمرى هفكر اغيرها لانها بحس
انها اختى فى الرضاعة شبهى جدا
حتى عيونها خضره زي حالاتى هههه
الله يمسيكى بالخير يا ايمى انتى اللى
كتبتيلى عليها اسمى

[Mind language]

ياسلام لو الواحد يسافر سفرية لتركيا

على فكره فيه فى الجامعه منح تعليميه

على حساب الطالب حسبين انى الطالب

فى مصر مليونير ميعرفوش انى الحياة

ضنك ضنك في مره كدا من مرات الروقان

بقولك لوالدى فيه منح تعليمية لسفر

لتركيا قاللى جميل قدمى فيها قولتله

يعنى هترضى انى اسافر قاللى ايوة

اية المشكله لسه بقول كلمة على حساب

الطالب قام قاللى ادخلى المطبخ كملى

كملى اللى وراكى احسن من رائى

لكنى الفكره فى دماغى بردوا هسأل

عليها وأشوفها بكام واروح باذن الله : )

[Mind language]

انا بشجع النوعية دى من الاغانى وممكن

جدا تكون نغمة لموبيلى اوقات كتير دا ان

مكنش الاغلبية العظمة منهم عندى

وبستعملهم كمان

[Mind language]

فى يوم من الايام ابيه عبد الرحمن جوز اختى اشترى

عربية جديدة ركنها تحت بيتهم بمجرد ما عدى عليها

كام ساعه الساعه 2 بالليل لقيها مولعه هى وعربيتين

تانى جنبهم كان المنظر بشع على حسب ما اتوصف لية

الحمدلله صلح العربية واخدت مبلغ وقدرة فقولنا لية

حلاوة العربية الجديدة لازم تفسحنا بالفعل اول ما لقى

يوم اجازة اخدنا وفسحنا فى مدينه اسمها الكوامل او

مدينة سوهاج الجديدة هكذا يقال بصراحة اول مرة اشوفها

عبارة عن تحفه فنية مرسومه رسم من مبانى وجامعات

ومصانع بالعربى مدينة كامله ومتكاملة من حيث المبانى

اما من حيث الناس فلا حياة لمن تنادى مات المخرج ومات

الممثلون ومات المشاهدين جميعا رحنا نشوف شقة اخوية

اللى بناها هناك هى مش كبيرة بس منطقتها حلوة جدا

هستمتع بالمناظر اللى هنا شوية واعمل خناقتين تلاته مع

على وعمر وارجع البيت اذاكر تانى انا مكنتش عايزة اروح

بصراحة وكنت هكمل نوم لكنى والدتى حلفت لازم اروح

واحنا تحت امر الحكومة دايما سمعا وطاعة .

[Mind language]

ياجماعه والله الواحد احتار فى امر
الوزه اللى عندنا انهاردة على الغداء
هى وكام جوز حمام والدتى كل ما
تقابل حد انهاردة تقوله تعالى انا
عزماك انهاردة على وزه انا خايفه
لتكون فكراها ديك رومى وبيفقس
كتاكيت ولا حاجة قابلت جوز اختى
قالتله عزماك اتصلت على مرات
اخوية قالتلها عزماكى الله ياخوفى
لكون انا على قائمة الضيوف اللى
بيجوا فجآه ولا حاجة شكلها هترسى
على جناح ودا ان طلته يبقى بركة
ياجامع واحمد ربنا علية كمان
والله مابخل منى ولا حاجة لكنى
اللى يعزم يا اما يعزم على حاجة
قيمة يا اما بلاش هكذا تكون
العزومات عندنا فى الصعيد .

[Mind language]

والله ياجدعان قلبى واجعنى على
الوزة وخايفه عليها من الخضة
تتسخط فرخة ومحدش يلحق
حاجة بس الحمدلله ربنا حاسس
بمعاناتى اتجاه الوزة جوز اختى
اعتزر علشان عنده مشوار ومرات
اخوية اعتزرت بردوا كدا مش
فاضل غير على وعمر ووالدتهم
وشكلهم كدا داخوا من المشوار
ورايحين يناموا الحمد لله وزتى
حبيبتى رجعت لية من تانى كنت
فقدت الامل فيكى الحمدلله
اما اروح اصلى الظهر هصلى
كمان ركعتين شكر لله حمدلله
على سلامتك ياقلبى .

[Mind language]

ههههههههههههههههه
والله الوزه دى ما مكتباللى لسه
حالا اللى داخل اخوية التانى هو
ومراته وابنه اياد هكذا تمضى
الايام تكون فى بقك وتقسم
لغيرك سبحان الله سبكم انتوا
والله ما فية اجمل من اللمه
على الاكل حتى من غير وزه
احنا ممكن نعتبر الوزه ضيفة
شرف وكآنها لم تكن من البداية
هههههه اتفضلوا معانا لسة الوزة
فيها كتيرررر ماهى شكلها قلبت
على خروف وانا مش واخده باللى .

[Mind language]

يسخرون من أملى الكبير

ويرون تفاؤلى خيال

وحلمى محال الا يعلمون

بأن الله على كل شيئ قدير .