Benim sayfaları yazma öğretti olanlara selamlar

[Mind language]

هيفضل المنتدى هو اهدئ مكان
تميل اليه النفس هنا ذكرياتي
ومستقبلى بأذن الله نفس عميق
هنا ونرجع لزحمة الحياة العادية
ومتهاتها لو علية مش عايزة ارجع
انا عايزة اتحبس هنا مع ذكرياتى
عايزة ارجع لاصعب مشكلاتى بتاعت
زمان واقولها يااااه قد اية انتى تافهه
تعالى شوفى التقيل هنا اللى وصلت
لية وحاجات كتير عايزة ارجع لاول
نظره عايزه اتخانق اول خناقة عايزة
اول مقابله عايزة اول محادثة عايزة
حاجات كتير من اولها عشان ارجع احس
انى عايشة مش عايزة ضغط ومسئولية
مجبوره عليهم عايزة حرية مش عايزة
حاجات تتاخد بالمواعيد اى غلطه نرجع
من نقطة الصفر عايزة اخرج اروح مكان
غير شغلى من غير ما تفكيرى يكون مع
اولاد اخوية اكلوا ولا لا مين لبسهم طيب
مين خرجهم ازاى انا اطلع واستمتع وهما
محبوسين فى البيت اية الانانية دى يخربيتى
مش عايزة تانيب ضمير عايزة حياة بسيطة
مع شخص اللى اخترته مش عايزة قيود
عايزة حرية شوية حرية تحسسنى بقيمة
موهبة الرسم اللى عندى ومش عارفه اغذى
الموهبه واكبرها بكورسات هتاخد من وقتى
ساعتين ليومين فى الاسبوع مش عارفه اهربهم
لازم اروح بدرى فية ناس مسئولين منى يارب
جوايا تمرد ع كل حاجه اتفرضت علية
ساعدنى يارب

[Mind language]

ممكن عيلتنا الجميله متحشرش مناخيرها
فى حياتى وكل واحد يشوف خيبة عياله؟

ممكن دا بعد اذن حضراتكم ممكن

[Mind language]

مالك مش باين لية قلبك تايه من مدة كبيرة
خايف تتكلم لية فى عيونك حيرةوحكاوى كتيره
متغير ياما عن زمان قافل على قلبك البيبان حبيت
وفارقت كام مكان عايش جواك احساسك كل يوم
يقل وتخطى وخطوتك تذل من كتر ما احبطوك تمل
فين تلقى دواك بتودع حلم كل يوم تستفرد بيك الهموم
وكله كوم والغربه كوم والجرح كبير مبتديش حاجه اهتمام
أهلا أهلا سلام سلام بقى طبعك قلة الكلام ومفيش تفسير
دارى ياقلبى مهما تدارى قصاد الناس حزننا مكشوف وأهو
عادى عادى محدش فى الدنيا دى يتعلق بشئ إلا وفراقة
يشوف ..

[Mind language]

ياجماعة سؤال وعايزة حد يجاوبنى علية
لسة فية حد فى الدنيا حظه اسوء من حظى
قولولى ومع ذلك لسة مكمل وبيضحك وواقف
مستنى اليوم اللى ربنا هيعوضه فية عن كل
اللى شافه فى حياته لسة عنده امل فى بكره
انهى امل وانهى حياة اللى تتعاش من بعد
ابوية الحياة من غير الاب يعنى خوف وعدم
امان يعنى حنية الدنيا كلها خلصت مفيش
حنان تانى مفيش حد هيدعيلك فى كل ركعة
صلاة مفيش حد لما تغلط تطمن انه هيصلح
كل حاجه بعد ما تحكيله مفيش حد لما تضايق
اول واحد يفهمك من نظرة عنيك لية مفيش حد
هيتصل عليك بمجرد ما تتاخر دقيقة عن ميعاد
رجوعك البيت مفيش حد هيثق فى تفكيرك
ويديك الحرية لانه عارف تربيته مفيش حد
هيتصل بيك لما تسافر ويقولك البيت من غيرك
ملهوش طعم تعالى بسرعة وحشتينى .. ابوية اتوفى
وسبنى من غير مايوصلنى لبيتى ويفرح بيه الموت
حق فعلا بس انا مش مصدقة لحد دلوقتى انه سبنى
لسة ببص ع الباب واستنى رجوعه كل يوم مش قادره
لما احكى عنه اقول الله يرحمه اللى لسة لية أب عايش
يروح يبوس رجله لانى احساس فى منتهى البشاعة
لما تصحى متلقهوش فى حياتك اللهم اغفر لوالدى
وارحمه وادخله فسيح جناتك اللهم اجعل قبره روضه
من رياض الجنة .

[Mind language]

فترة صعبه ومتعبه جدا

حزن دائم وضغط ع الوجع

عشان اقدر اكمل حياتى

مش عايزة اهمال عايزة

اهتمام يخرجنى من حالتى

مش معنى انى بضحك وبتكلم

انى جواية سليم يعلم ربنا بحالى

الليل بيعدى علية سنين واوقات

كتير مابنمش ولو نمت بيبقى هروب

عشان محسش بحاجه اللى بيبحنى

يدعيلى انى اقدر اتجاوز الفتره دى

واعدى منها على خير ..

[Mind language]

بعد وفاة الاب هتلاقى حاجات كتير

زاهوتها بتختفى من جواك قلبك واجعك

اغلب الوقت اقل موقف بيحصل بتتمنى

لو انه موجود بتصعب عليك نفسك قوى

لو حد اتكلم عن حاجه فكرتك بيه بتختفى

من عيون الناس عشان محدش يشوف دموعك

ومع ذلك هتضعف وتبكى قدامهم معلش اصلى

الجرح اللى جواك بيبقى عميق بعمق السنين اللى

عشتها معاه بحتاج لوالدى فى كل ثانية مش

مستوعبه انى رمضان هيجى السنة دى من غيره

لدرجة انى بتغاضه عن اى بوست اشوفه تهنئة

لرمضان مش عايزة رمضان يجى وهو مش معاية

اللهم ارحم فقيد قلبى وهب له سعه فى قبره لا يرى

لها نهاية يااااااااااااااااااااارب الصبر من عندك

[Mind language]

عيد كئيب فلقد رحل والدي
15/6/2018
اللهم ارحم ابي واغفر له.

[Mind language]

الله المنتدى فى ثوبه الجديد

اصبح اكثر رونق بدل الاورنج اللى كان جايبلى اكتئاب

ولا اللبنى اللى بيزغلل عنية ولا الاحمر انه لون الدم

لا بس جامد الاستايل الجديد تسلم الصوابع من الاول

للرابع انا كأميرة أنبهرت دا حتى الاعضاء اصبحوا اكثر

نشاطا قال يعنى اللون اللى كان مانعهم من الابداع

شوفوا سبحان الله ولاحول ولاقوة الا بالله العلى العظيم

[Mind language]

اوقات ضغوط الحياة بطلع منك مواهب

وتعصرك ايوة احنا شعب مبنشتغلش صح

غير لما يضغط فى وقت من الاوقات حبيت

يبقالى شغلى الخاص بيه غير مهنتى وبعيدا

عن هوايتى الرسم اتفرجت بالصدفه على فيديو

لاكسسوارات هاند ميد وقولت لية معملش زيهم

دول تافهين جدا نزلت لمحل متخصص واشتريت

الكمشات والمستلزمات وعملت وبيعت لاول ناس

اخواتى البنات ربنا يخليهملى وسعت المجال شوية

عملت بيدج للاكسسوارات بدوا معارفى ياخدوا منى

طورت من نفسى اكتر وبدات اربط الاكسسوارات بعمل

فيديوهات ليها عملت قناة ع اليوتيوب لكنى مش فاهمه

فيها قوى اهملتها بس هرجعلها تانى باذن الله فى وقت

اوفر مع تطور اكتر وهكذا الى ما لا نهاية من يومين قابلتنى

واحده قالتلى يخربيتك انتى اية كورسات وبتاخدى كومبيوتر

وانجلش رسم وبترسمى وبتعملى شغل الحضانه قاعتك احلى

قاعة فى المدرسة اكسسوارات وبتعملى عيال اخوكى وبتربى

فيهم انتى ايييية ياشيخة بتجيبى وقت من فين لكل ده امال لو

عرفت انى بفكر فى مشروع جديد هتعمل فيه اية الله اكبر من قرك

طالما الواحد ربنا مديله القدره هتكاسل لية الله المستعان فى كل

الاوقات والافعال ولله الحمد .

[Mind language]

ندخل على الحتة الشمال شوية القلب والحب

والذى منه المعادلة مابين اى اتنين بيحبوا بعض

هى التقدير لظروف بعض مش شرط انه يكلمنى

ويهتم اوقات بتكفى فكرة انه بيتعب عشانى

بيشتغل عشان يوصلى منكرش انى كنت بعمل

مشاكل كتير لانى بشر برضوا وبحتاج لاهتمام

لكلمة حنين فى ظروف صعبه ووقت ضعف

لكنى لما اقدر الظروف بتغاضه عن الاهتمام

شوية مش كتير وارجع اعمل مشاكل تانى هههه

لانى بطبيعتنا بشر وخصوصا احنا كبنات حتت

المشاعر بتوجعنا قوى اقل حاجة بتصعب علينا

نفسنا ونبكى ونتقهر ونام من غير عشا ونصحى

من النوم نتعشى ونام تانى امال يعنى اموت من

الجوع الفكره هنا التفاهم مره عليك ومره علية

هتمشى الدنيا انما الشد مش بيجيب غير الخسارة

لمفترق الطرق كان نفسى ارغى معاكم اكتر الا انى

عندى مدرسة 6:30 استودعكم الله .