مافيش حد عدل!!

[SiLver Spectra]

زي ماهو العنوان بالظبط
مافيش حد عدل

البداية من وسائل الاعلام
في فرق كبير جدا بين موقع الأخبار و بين راي مذيع أو مقدم
المذيع أو المقدم هو شخص ,بديهي هيكون له راي و تحيز و الانحياز مش عيب ,
العيب فعلا هو انك تبقى انسان صاحب عقل و ضمير و تشوف الغلط و تسكت عنه بحجة الحيادية ,,,لكن خلينا نقول إن كل ما المذيع يقدم اصحاب وجهات نظر مختلفه كل مايكون اكثر مهنية

أما موقع الاخبار فدا كل ما هيكون حيادي كل ماهيكون اكثر مهنية
لان موقع الاخبار مش شخص , المفروض انها مؤسسة
واقعيا مافيش موقع اخبار في العالم كلو حيادي بنسة 100%
لكن بتتفاوت بينهم النسب و كل ما الحياد و الموضوعية يزيدوا كل مايكون اكثر مصداقية

تعالوا نشوف وسائل الاعلام امس (اثناء فرز صناديق الاقتراع)

هنا , مافيش آراء و لا في اختلاف في وجهات نظر شهود عيان و لا اي حاجه,,مجرد محاضر فرز و بيتم نشرها

نمسكها من صفحات (الفيس بوك)
أغلب صفحات المعارضة كانت بتعرض محاضر الفرز الي فيها (لا) أكثر و بطنش الي فيها (نعم) أو بتعرضها على حياء
و على النقيض ,, الصفحات الي بتوالي الأحزاب المؤيدة تركيزها كلوا على محاضر فرز (نعم) على الاقل في البداية (عشان المعنويات) و كانت بتعرض (لا) على حياء كمان
و من أحسن الي تابعوا الفرز كان (اليوم السابع)
و (رصد) في عرض النتيجة النهائية مش في عرض محاضر الفرز الي كان فيها تحيز,,و برغم توجهاتها الاخوانية الي بتظهر في تجاهل المظاهرات المعارضه للرئيس و خلافه الا انها كانت متفوقة في متابعة الفرز كنتيجة كلية اولية ((معرفش لو كانت النتيجة ب(لا) كانوا هيبقوا ايه ))

دا بحد ذاته يأكدلك ان صفحات الفيس بوك آخر مصدر ممكن توثق منه أي احداث بتحصل

نيجي للاعلام
الاعلام كمان كان متحيز بطريقة مفضوحه,,بس لو حبينا نعمل قائمة للاكثر تحيزا فهنلاقي في القاع (محطات الاسلام السياسي) زي الناس و الحافظ,, أما مصر 25 فمش تابعتها بصراحة امبارح فمش هحكم عليها في الفرز
أون تيفي و الحياة و القاهرة و الناس و غيرهم و ان حتى اقروا في النهاية بالنسبة لكن اثناء المتابعة مش بيكون حلو لما تحس ان في تحيز,,و شخصيا بشوف انهم ماكانوش اد المستوى ,,,بل اني استغربت من قناة (القاهرة و الناس) و هي بتعرض شريط (خبر عاجل) اثناء عرض برنامج مسجل عن عدم نزاهة الانتخابات منقولا عن قول منظمة ,,و الاستغراب هو ان القناة عمرها ماكانت قناة اخبارية و لا عمرها كتبت عاجل ,,,أظن cbc كانت افضلهم و لكن لاقيت عماد اديب في بداية برنامجه بيشكك في الاستفتاء و كنت منتظر يجيب تسجيلات و لكنه اكتفى بعرض نقاط عن اسباب عدم النزاهة

راي أنا شخصيا : مافيش انتخابات هتحصل بدون انتهاكات ,لكن في انتهاكات مش بتاثر على سير العملية لانك عشان تعمل عملية انتهاك واسعه هيكون الامر مفضوح ,,استحاله تزور في مليون صوت بدون ما تتكشف ,,عشان كدا انا بستبعد ان في اي انتهاك غير في النتيجة و لو كان حصل كانت انتشرت عشرات المقاطع (زي ماكان بيحصل ايام مبارك)

دا كلو بيعكس حالة الاستقطاب الي وصلنالها

و قبل ما نسيب الاعلام المرئي
من المضحك امبارح هو اني لاقيت حازم ابو اسماعيل بيلف على المحطات و بيتصل بيهم واحده ورا التانيه عشان يقولوهم انا ماليش دعوة في التعدي الي حصل لحزب الوفد (( مع العلم ان هو معترض على المحطات دي و مخلي انصاره يعتصموا ادام المدينة)) أظن انه بكدا استخدم المحطات عشان يفند التهم الي وجهة اليه من (بدوي) على ان انصاره هما الي تعدوا على مقر الحزب ,, يعني خلوه يقول و يعرض وجهة نظره !!

نيجي للنخبة السياسية
من الأمور الي خلتني استعجب و ابقى كدا
اني الاقي (جبهة الانقاذ) طالعه الساعة 12 (يعني بعد بدأ الفرز بساعة واحده) بتعلن ان النتيجة هي 66% (لا) !!

أنا أعرف ان في فرق بين استطلاع الراي أو بين توقعك الشخصي زي ما أنا عملت كدا في صفحاتي المكشوفة و بين انك تصرح و تقول ((عرفنا من مصادرنا ان النتيجة هي (لا) ب66%)) !!

طب ازاي اذا كان ماتم فرزه وقتها في احسن الاحوال هو تقريبا الف لجنة من اصل 6376 لجنة !!
و بالمناسبة (الفرز مش بيكون مرتب للجان) و دا ممكن يفسر اختلاف النتائج الأولية على المواقع المختلفة
بمعنى ممكن واحد يكون فرز بعض لجان القاهرة و الغربية و طلع نتيجة اولية و واحد تاني فرز لجان اخرى و طلع نتيجة اولية كاملة مختلفة

لكن المؤكد ان استحاله جهة تقدر تعرف نتيجة 6 الاف لجنة بعد ساعة من الفرز ! الا لو كان (ربنا) هو عليم بكل شيء
اما الانسان فعشان يتصل بمنظومة المتابعة هيحتاج وقت و ساعات !
مع احترامي لجبهة الانقاذ و مجهوداتها و وطنيتها و كل حاجه
دي بالنسبالي سقطة كبيره ليهم , مش هحكم على نواياهم بس جايز يكونوا حكموا على القاهرة بس و الحماسة اخدتهم , أو جايز عشان يثيروا الراي العام ان في تزوير ,,مش عارف بصراحة

بس واضح ان الاطراف كلها وصلت لمرحلة كبيره من التشكيك و التخوين

و اصعب حاجه انك تعيش في مكان كلو بيشك في بعضه !
من رئيس الجمهورية لحاد بياع الفول

[الرحــاال المٌتَمرد]

لايك.......

[مشتاقه للجنه]

جبهة الانقاذ الوطنيه
دى جبهة سقوط قويه
تحليل رائع وبيظهر أتجاهات كل فريق
ولعب عالى فى الكواليس ... ههههههههه


بس واضح ان الاطراف كلها وصلت لمرحلة كبيره من التشكيك و التخوين


عجبنى جدا الجمله دى لان فعلا اللى بتمر بى مصر
هى أزمة ثقه ... الكل يشكك فى الكل .. واللى ضايع المواطن الغلبان
المطحون بالاعباء والمصاريف ... تسلم ياريس على الموضـوع ..

[~♥ Queen sozan♥~]

كلمك مظبوط والله يا طارق خصوصا فى
نقطة ان كلو بقة بيشك فى بعضو ,, اتقلبنا
لى شعب مخون التانى وكل واحد شايف التانى غلط
هو لى صح !
وبقة قليل لما تلقى اتنين بيتناقشو ومحترمين
وجهه نظر بعض لازم تقلب با خناق

والاعلامـ بقة تقريا المزيع بيطلع يعرض وجهه نظرو
مش وجهه نظر الاخرين مفيش محايده من اى مزيع
وامبارح كل قناه كانت بتعرض النتيجة لى تعجبها !
ولى يزعلك ان لما تشوف حد بتثق فى كلامو السياسى
بيكدب كده او بيطلع اعلان غلط

ربنا يصبرنا على لى بيحصل دة ,,

ويارب يقدم الخير لى البلدى لان كدهـ احنا بنرجع لى الخلف الاسف .

[الحان الورد]

،

" وأصعب حاجة إنك تعيش في مكان كلو بيشك في بعضه ! "

أي نعم حقيقة
وانتَ جبت الخلاصة اللي للأسف وصلنالها
مافيش حد عدل !
إلا قِلة قليلة عشان منكونش متشائمين أوي ^^

موضوع قيم ، إحترامي ليك يا طارق ..

[booody99]

ماشي يا عم كلامك كان محايد وموضوعي
وانا بتفق معاك في كلامك
ولكن مش نستبق التحقيقات ونحكم على الشيخ حازم
بشكرك مرة تانية
كل الاحترام والتقدير

[Mahmoud Mohie]

مبدئيا أحييك ع الطرح الرائع والمميز

ف الاعاده ايام انتخابات الرئاسه
حوالى 25 مليون صوت
طلع د مرسي اعلن ان هو الرئيس الساعه 3 الفجر
يعنى فرز 25 مليون ف حوالى 4 ساعات
ف طبيعى ممكن تفرز 10 او اقل ف ساعه
لو كان فرزهم صحيح

-----

بالنسبه للشيخ حازم
طالع ع القنوات بيكرر نفس اللى عمله أيام وزارة الدفاع
الفرق انه المرادى شاتم ف القنوات ودعى لمقاطعتها
وده بيأكد للجميع مين السبب ف أحداث وزارة الدفاع
وهو نفسه المسئول عن حرق مقر الوفد ..

------

اخيرا بقى عندى ف صفحات مكشوفه اتوقعت النتيجه افضل منك :-p وكلامى طلع صح :-p :-p

شكراا'''

[SiLver Spectra]

اقتباس المشاركة الأصلية كتبت بواسطة mahmoud mohie مبدئيا أحييك ع الطرح الرائع والمميز ف الاعاده ايام انتخابات الرئاسه حوالى 25 مليون صوت طلع د مرسي اعلن ان هو الرئيس الساعه 3 الفجر يعنى فرز 25 مليون ف حوالى 4 ساعات ف طبيعى ممكن تفرز 10 او اقل ف ساعه لو كان فرزهم صحيح ----- بالنسبه للشيخ حازم طالع ع القنوات بيكرر نفس اللى عمله أيام وزارة الدفاع الفرق انه المرادى شاتم ف القنوات ودعى لمقاطعتها وده بيأكد للجميع مين السبب ف أحداث وزارة الدفاع وهو نفسه المسئول عن حرق مقر الوفد .. ------ اخيرا بقى عندى ف صفحات مكشوفه اتوقعت النتيجه افضل منك :-p وكلامى طلع صح :-p :-p شكراا'''

استحاله تقدر تعرف النتيجة بعد انتهاء الاقتراع باقل من ساعة
انت اصلك مش بتعد ,,انت بتتصل بكل اللجان
انت متخيل انك بتتصل ب6 الاف لجنه !
لو كان حد يقدر يتصل و يجيب النتيجة بالسرعة دي مع العلم ان اصلا لسه اللجان كانت بتفرز و بتعد
لو حد كان قدر يعمل كدا (فرضا) كان زمان النتيجة بالتفصيل اعلنت من اي جهة
في حين كل الجهات كانت لسه بتحط نتائج اولية لأقل من ألف لجنة

مرسي لما طلع و اعلن فوزه الفجر كان قبلها النتايج ظاهره بالتدريج في اغلب المحافظات خلال 5 ساعات ,,مش جه فجأة كدا و احنا لسه بنسمي في العد و قال انا فزت
تفرق كتير يا محمود

انا انسان عايز ادور على جهة تكون صادقة و دقيقة في افعالها و اقوالها مش عايز حد يشتغلني و يثير عواطفي سواء بيعارض او بيايد

[۩۩ elMagic ۩۩]

انت جيبت الخلاصه
الثقه مبقتش موجوده .
مصر أتجزأت لمجموعات مبقتش أمه واحده
ودا هيأثر بالسلب عليها فى المستقبل
وهيخلق ثغرات بسهوله يدخل منها اى دوله عدوه لينا
ربنا يستر وان شاء الله سواء كانت النتيجه نعم أو لاء
تكون فى صالح البلد
تسلم للمجهود يا برنس ,,

[Words Whisper]

كل شيء ضمن وطننا
بات يخضع للرغبات والرؤى الشخصية
بدءاً من الدين وانتهاء بالسياسة
إذن ليس مستغربا أن يُفقَد الإحساس بالعدل بيننا
كـ شعب على الأقل مع بعضه ...


طرح راقٍ
شاكرة لحضرتك ..


سلمت
ودمت بتوفيق وسعادة ...