هام من الإدارة,,

[SiLver Spectra]

بسم الله الرحمن الرحيم
في البداية لو انت حاسس ان الاجراءات الي هتم دلوقتي فيها ديكتاتورية فهي ماعدتش فارقه بصراحة معايا شخصيا لأن الناس الي هتأيدنا مش هتشوفنا ديكتاتوريين , أما الي هتعارضنا فهما أغلبهم كانوا موافقين على ديكتاتورية مرسي ايام الاعلان الدستوري فالمفروض دي حاجه عادية بالنسبالهم يقبلوها

نتكلم جد شوية
البداية هي فكرة الأحزاب الي أنا تعمدت اسميها عصابات
و الي هيتأمل في السبب (قسم العصابات مش الاحزاب) هيدرك ان الهدف منها كان العمل الجماعي و النشاط في المنتدى بعيدا عن التحزب الي حاصل في الواقع
بمعنى آخر الفكرة مش اتعملت عشان ناس تعرض شكاويها هناك و نقطع في فروة بعض ,في حين العضو يقدر يدي ملاحظاته في قسم الشكاوي و احنا بنرد على كامل قسم الشكاوي مافيش مشاكل عندنا
(و دا الاداري المنتخب بيعمله , و لكنه بيحافظ على الخصوصية و السرية عن طريق التراسل بالخاص)

في الحقيقة انا فكرت كتير في موضوع عمل احزاب في المنتدى , و كنت بتردد في تنفيذها لسببين مهمين
1) هتولد نوع من التعصب و العداء بين المجموعات
2) هتقسم المنتدى وبدل من ان الاراء في اي موضوع عشوائية ستصبح فيها نوع من العداء حسب الحزب الي بينافس
3) هتخلق نوع من عدم الثقة مع الادارة (في ناس هتشوفها مع حزب ضد حزب و خلافه)

و يمكن دي الاسباب الي كانت بتخلي (ابو أدهم) يحظر اي فكرة من شأنها تكوين مجموعات و تحزبات في المنتدى سابقا
و استكملنا الفكرة بعدها لكن انا بيني و بين نفسي قولت مافيش مشكلة اننا نجرب و نشوف هنوصل لايه و حتى نكون كسبنا شرف المحاولة

طيب الفكرة انا عملتها ليه ؟
العامل الهام الي خلاني أعمل فكرة الأحزاب هو اني كنت ناوي نكون مجلس تشريعي وظيفته يراجع القوانين أو يقر اي اجراء جديد (زي انك تحط بنر دعم او رفض للدستور باعلى الصفحة مثلا ) أو (تمديد فترة الاداري المنتخب) و خلافه من الامور الكثيرة
و كنت ناوي احطله ضوابط تمنع حدوث اي مشادات بين المراقبين عن طريق منع تخصيص التشريعات على فرد بعينه
و كان العضو (أحضان الحبايب) من الناس الي اقترحت فكرة البرلمان , و نتيجة اني لاقيت صعوبة في عمل عشر مواضيع انتخابية لاختيار عشر نواب و حسيت انها مش هتكون عملية بحيث اننا نستمر عليها على طول (زي الاداري المنتخب) فلجأت لفكرة تكوين عصابات

واحد ممكن يسأل طب اشمعنا الاداري المنتخب الي مكمله ؟
هقولك ببساطه لان فكرة تنظيمها سهلة جدا , و دا الشيء الي أنا بسعى اليه دايما ( في اني اعمل فكرة سهلة التنظيم و بعيده عن التعقيدات التنظيمية و المشاكل بحيث اني اقدر اعيدها أكثر من مره بشكل مستمر ) لأن الفرق بين المسابقة و بين الاجراء الروتيني هو ان المسابقة بتتعمل مره واحده أو حسب مزاجك و دا ممكن يخليك تتعب فيها لانها في النهاية بتتعمل بمزاجك على عكس اجراء زي الانتخابات الادارية بيكون مستمر

و الي عايز مثال عن الفرق بين الفكرة المعقدة و الفكرة البسيطه يشوف قسم الراديو
فكرة الراديو حلوة جدا و ماحدش يقدر ينكر على انها عملت جو مختلف و جديد في المنتدى ,, و لكن نتيجة انها عايزه تحضير و معقدة في الاستمرار و التنظيم و خلافه , الفكرة مش كملت و دا كنت متوقعه من البداية بصراحة و كنت عارف انها هتبقى موضه و هتنتهي بعد زهق الاعضاء و خاصة ان الراديو بيبث من جهاز شخص مش من سيرفر آلي

نرجع لموضوعنا
و من هنا جت فكرة تنظيم عصابات ,بحيث ان كل عصابة تعمل قائمة من عشر اعضاء تدخل بيها الانتخابات و حسب النسبة الي هتفوز بيها كل قائمة تاخد كراسي في المجلس التشريعي
و دا كان هيخلينا نعمل موضوع انتخابي واحد بدل ما نعمل عشر مواضيع انتخابية
حلو الكلام ؟

المشكلة بقى الي واجهتني من يومين تقريبا و أنا بفكر كانت ان أغلب الاعضاء بقوا بينتموا لأحزاب!
بمعنى آخر العضو مثلا رئيس العصابة بيبعت لكمية كبيره جدا من الاعضاء ينضموا للحزب , فالنتيجة هو ان حزب واحد بس اعضاءه لو استمرينا على الوضع دا هيوصلوا ل40 عضو و اكثر
و الي يلاحظ اي انتخابات ادارية كنا بنعملها هيلاقي ان عدد الناس الي كانت بتصوت بيتراوح بين 100 الى 240 بالكتير أوي
(آخر انتخابات ادارية كان فيها 160 صوت)
دا معناها ان الحزب الي هيعمل دعوات كتيره لاي عضو ينضم اليه هو الي هيكسب بالاغلبية (لأن أعضاءه هتصوت بشكل مكثف)
و هنا هيكون في خلل في مبدأ (الكفاءة) و هنتحول لفكرة (زعيم القبيلة) ((ممكن تراجعوا موضوعي الصوتي في اليوميات عشان تفهموا اكثر الفرق))
و من هنا كمان بدأت أفكر ,,ايه الوسيلة البديلة الي ممكن تتعمل ؟
هل اننا نخلي الحزب عدد أعضاءه فقط عشره ؟
بحيث اننا نساوي بين جميع الاحزاب في الانتخابات و نترك قاعدة كبيره من الاعضاء تكون حرة في التصويت بعيدا عن الانتماء الحزبي
أو اننا نخلي التصويت من لجنة مختصة !
يعني ايه لجنة مختصة ؟
يعني نختار عشره لعشرين واحد حيادي يقيم و يصوت لقائمة الحزب الي شايفها اكثر نشاطا و اكثر ايجابية
بس وقتها هنلاقي اختلاف في اختيار اللجنة , مين هيختارها و على اساس ايه ؟ و خاصة كمان اني منتسب لحزب و حتى لو استقلت منه هتحسب برضو على اني تابع للحزب دا و منحاز ليه!!
غير ان الفكرة المفروض تكون قائمة على اصوات الشعب
و الشعب كلو بقى متحزب زي ما ذكرت الا فئة قليلة
بمعنى آخر (الفكرة مش كملت اسبوع من فتح الاقسام و بقى عندنا اكثر من 70 عضو منتمين لاحزاب !)

و بناء عليه و من غير زعل , لأني عارف ان ناس كتير حبت الفكرة و كانت بتخطط ليها
قررت ألغي فكرة التحزب

ليه ؟
لأن في بوادر بداية انقسامات و مشاحنات لمستها في عدد من الرسائل الخاصة بدون ذكر اسماء
خلافا على ان في حزب بدا يعرض شكاوي من الأعضاء (( و بالمناسبة هكلمكم عنها في الآخر )) و دا بحد ذاته هيخلق تشاحن و خلافات كبيره جدا لايحمد عقباها مستقبلا ,,
شايفك يا الي بتقول (ايه الديكتاتورية دي :d)
بص يا معلم ,,لو عليه أنا فقول الي يعجبك , و أنا سبت الموضوع الي فيه صياغة لوم ضد الادارة في الشكاوي
لكن الفكرة بصفة عامة و هي اننا نجيب شكاوي و نتكلم فيها في حين في امور بتكون مش ظاهره للعضو بشكل كامل خلافا على المثال الي تم طرحه
و أنا كإداري مرت عليه آلاف الشكاوي و مدرك تماما ان نظرة العضو مهما كان هتكون قاصرة بسبب عجز في الصلاحيات ممكن تخليه يطلع اكثر خلافا على ان المراقب وظيته رقابيه أكثر من اي حد تاني
يبقى احنا لما نوصل لمرحلة (هو المشرف الفلاني ثبت ليه الموضوع العلاني و حد يجي يقول آه اصلها كوسه , و دا بيثبت لصحابه و خلافه من الكلام و الافتراءات و ان كان في منها صحيح لكن هيكون في منها غير صحيح و هتولد مشاجرات و خلافات و سوء سمعة و نظره بين الاعضاء احنا بغنا عنها)
حد هيقولك طيب امال لما احب اوصل صوتي اوصله ازاي لما اشوف ظلم ؟
ببساطه تقدر توصل الي يعجبك في قسم الشكاوي ,,قسم الشكاوي فيه خصوصية بتمنع اي حد انه يشوف الموضوع حتى المشرف نفسه , بس المشكلة هنا في حيادية الادارة في الحكم !
هنيجي للموضوع دا في الآخر

و قبل ما أنهي الجزئية دي , فكرة المجلس التشريعي هحاول افكرلها في طريقة افضل مستقبلا , بس مش دلوقتي
لكن اننا نوصل لمرحلة مجلس تشريعي بيفلي ورا المراقبين و احزاب بتناقش شكاوي ,, يبقى كدا هنوصل لمرحلة الفوضى و المشادات الي مش هتنتهي
دا احنا كدا و في مشاكل كتير بتحصل و مشادات بين المراقبين نفسهم :d
دا في النهاية منتدى ,,الموضوع ابسط من كدا بكتير


نيجي لآخر حاجه و هي مذكرة (عباقرة الثرثرة)
((مذكرة كانت بتتهم الإدارة بالتعسف))
ما اقدرش انكر و لا اضحك على نفسي قبل ما اضحك عليكم و اقولكم ان مافيش تعصب من جميع الأطراف نتيجة الظروف الي بنمر بيها
و دا انعكس بالسلب على أدائي أنا كإداري و خلاني ما اقدرش احافظ على الحيادية الي بتبناها دايما في اتخاذ أغلب قراراتي

و بناء عليه قررت الآتي :
1) هنمنع المواضيع السياسية في الاقسام و في الاهداءات لمدة اسبوع من اعتماد الموضوع لنزع فتيل التعصب و محاولة خلق نوع من الهدوء في المنتدى (باستثناء قسم صفحات مكشوفة الي مش بيسمح لعضو بالرد على آخر)
2) أي عضو اتخذ في حقه اجراء هتتم مراجعته بطلب منه عن طريق مراسلتي عبر الخاص أو الميل و هكلمه بكل ترحاب , و لو العضو ماكنش بيدخل فممكن اي عضو يبلغه بالخبر دا

في النهاية احنا هنا مش عشان نحرق في دم بعض بقدر ما المفروض بندخل عشان نشارك افكار بعض و تقضي وقت ترفه فيه عن نفسك
و الكلام دا مش معناه انك تتنازل عن رايك و فكرتك , و لا حد عمره هيقدر يوحد عقول البشر بفكر أحادي
لكن دي اجراءات استثنائية حبيت اتخذها عشان أنا مش يرضيني احس ان في ناس شايفه الادارة (جهة الاحتكام) مش حيادية و أنا أولهم ,,و بالتالي هيروح لمين عشان يشتكيله !
لأن مهما كان فالاداري هو الي بيفتح اقسام و بيخصص صلاحيات و بيحظر و بيرقي و خلافه من الامور
يبقى لما يكون في عندنا مشكلة في نسبة الحيادية المقبولة تبقى مصيبه و مطلوب اننا نراجعها قبل اي حاجه تانيه

و ارجوا ان ماحدش يزعل بسبب الغاء فكرة الأحزاب الي بالمناسبة ناس كتير حذرتني من عيوبها
و ان شاء الله هنحاول نعمل فكرة شبيه لكن هتكون فكرة مسابقاتية الغرض منها هو التفاعل في المنتدى
و بشكر جميع الناس الي ساهمت و تعبت في الفكرة سواء أعضاء أو رؤساء للأحزاب و أولهم (مستر ميرو)

و سامحوني هغلق الموضوع