الركن البعيد الهادي...

[سهـــر]

في مقوله بتقول ما محبه الا بعد عداوة
المقوله دي بحسها بتطبق عليا انا كـ سهر
معظم الناس اللي ببتدي معاهم بدايه حلوة مع الايام بكون مش طيقاهم
والناس اللي بيعملوا معايا تاتش معين ويقفلني منهم الاقيهم حبايبي بعد كدا
وفي ناس تالتين سمعتهم بتكون سبقاهم ودول موقفي بيكون محدد منهم

[سهـــر]

الذين يشاهدون محتوى الموضوع الآن : 3 ( الأعضاء 1 والزوار 2)
‏سهــــر

نفسي اعرف انتوا مين

[سهـــر]

انك تكون مظلوم احسن من انك تكون ظالم
بدعوة واحده بس ربنا يرجعلك حقك
بس تكون مظلوم والظالم هو حد من اهلك وناسك
لسانك ساعتها بيكون عاجز مش قادر ينطق ويدعي
هتعدي وتفوت وتقول ربنا الهادي
الظلم هيكبر والافتراء هيكتر
بس هنستحمل لحد امتى
هيجي يوم وهقول حسبي الله ونعم الوكيل فيك/ي
بس لما اقولها هيكون فاض بيا خلاص

[سهـــر]

صلح من نفسك قبل ماتكون مُصلح اجتماعي

[سهـــر]

ساره فرحت اوي انك رجعتي هنا
وحشتيني اوي


حطوا الهاند
وعلوا الصوت ع الاخر
واسمعوها ^_^

[سهـــر]

قال النبي صلى الله عليه وسلم قال : ( ثنتان ما تردان : الدعاء عند النداء ، وتحت المطر ) .

واحنا في الشتاء دلوقتي ومعظم الوقت بيكون في مطر الحمدلله
استغلوا الوقت ده في الدعوات لعلها تكون ساعه اجابه
وابقوا افتكروني في دعواتكم
^_^

[سهـــر]

صفحات مكشوفة (يشاهده 53 زائر)

الرقم ده كان بيكون موجود زمان ايام الزمن الجميل في 2013 و 2014
المنتدى دلوقتي بينش ولا البيت المهجور

[سهـــر]

اللي زعلانين من الدراسه اوي وبيتمنوا يقعدوا في البيت
اليكم يوميات وحده قاعده في البيت ^_^
هتخلصوا الكليه وتاخدوا كام كورس وتخلصوا الكام كورس
وتقعدواا في البيت بئا
هتحفظوا كل المسلسلات اللي في الدنيا واللي ملحقتهوش في رمضان
هتتفرجوا عليه بعد رمضان ده الصبح
وانتي بتعملي غدا ولا بتروقي البيت كدا اصلك فاضيه وقاعده في البيت
يعني كل صغيره وكبيره في البيت على راسك
خلصتي ترويق وغدا
هتغسلي بئا المواعين وتشوفي لو في هدوم هتتغسل وتنشريها وكدا
نيجي الساعه 8 بئا تجيبي توب شيف او ران وي او ارب ايدول يخلص من هنا تدوري على اي فيلم اجنبي مالقيتيش هتضطري للاسف تتفرجي على عربي مفيش هتضطري للاسف الاكبر تشوفي هندي ودي درجه من البؤس رهيبه على فكره
ويالهوي بئا لو البرامج دي خلصت يبئا من الساعه 8 انتي قاعده تتفرجي ع الدوري المصري مع الحاج ودي كارثه اكبر من الافلام الهندي عشان لو انتي اهلاويه وباباكي زملكاوي هتلاقي الرموت طاير في وشك ممكن الموبايل اي حاجه يعني
وبالنسبه للشغل بئا فهتفضلي طول اليوم من موقع لموقع وتتصلي على ناس كتير وفي الاخير هيتحددلك مقابله في القاهره وانتي اصلا من طنطا وسافري بئا اعملي الانتر فيو وبعدها تاخدي الخازوق الكبير ويقولوك الشغل في القاهرة مش طنطا
الدراسه نعمه احمدوا ربنا عليها اقولكم حاجه بعد الكليه اعملوا دراسات واعملوا كل حاجه بس متخلصوش دراسه ابدا

[سهـــر]

بعمل مكرونه بشاميل
المشكله مش في البشاميل
المشكله ان مفيش عندي مكرونه اقلام
والجيش قالك اتصرف فهعملها باسباجيتي
خايفه ما تزبطش
وساعتها بابا هيروحني على بيت جدي
وانا مخاصمه جدي ومش بكلمه

[سهـــر]

زمان وانا صغيره قالولي في المدرسه
لما انسى اقول بسم الله الرحمن الرحيم في اول الأكل
اقول لما افتكر بسم الله اوله وأخره
وكدا الشيطان هيرجع الاكل اللي كله وبطنه هتوجعه
طبعا ده كلام للتبسيط
الفكره استمرت معايا
ولحد وقتنا هذا
لما اجي اكل بقول بسم الله
بس لو الاكله انا بحبها اوي
بقول لا هسيب الشيطان يدوق لقمه ولا اتنين
ويشوف قد ايه طعمها حلو بعد كدا اقول بسم الله اوله واخره
فالشيطان يتعذب بئا وبطنه توجعه



فجـــر
هيا المكرونه طلعت حلوة بس متعرفيش تاكليها بشوطه ولا معلقه
اوعي تفكري في يوم تعملي البشاميل باسباجيتي
واوعي تحطي عليها موتزريلا عشان ده عذاب من نوع اخر



الاهــلي هيلعب مع المصري النهارده
انا الفريق ده بكره من معاميع قلبي
خصوصا بعد احداث بور سعيد
ممكن اقبل ان الاهلي يخسر من اي فريق في الدنيا حتى الزمالك
الا المصري ده مش بحب الاهلي يلعب معاه اصلا
المفروض الفريق مينزلش ويلعب معاه
المهم ادعولهم يكسبوا النهارده احسن حتى لو اتعادلوا هزعل اوي وربنا