عضو على طاولة الحوار ,, ومعانا ,, ( جبل عالي )

[كبرياء رجل]

تنويه
طبعا نتوجه بالشكر للادره الكريمه
انها اتاحت لنا التعبير بحريه اكبر
في ابداء الراي فيما يخص المنتدى
وهو يعد خطوه تحسب للادراه في تقبل وجهات النظر
ونحيط بالعلم ان ما ستقرأونه وجهة نظر ضيوفنا الكرام
وعلينا تقبل ارائهم ووجهات نظرهم
وفي النهايه كلنا مكملون من اجل رقي المنتدى

معانا قلم
يصمت كثيرا ويعلو صوته في الحق
قلم شامخ اراه دائما مستقيم ﻻ يتعرج وﻻ يتمايل
نسعد بمتابعته ونحزن عندما تغيب صاحبته
ما اجمل ان نرى عقولا تدرك معنى الحرف وما تقصده
من بين السطور ما اجمل ان نراكي دائما بيننا المميزه بالحضور

جبل عالي .

والله أجمل مقدمة من أجمل أخ يا كبرياء وأنت عارف ده كويس

وعلى فكرة تقريبا كل المنتدى بدون أستثناء رأيه فيك واحد

ربنا يخليكي يارب انتي تستاهلي اكتر من كده بجد

. اهلا وسهلا بيكي في البرنامج ..

اهلا بيك كبرياء

/ جبل عالي ليه جبل عالي وما تقصديه من اﻻسم .

انا بجد إتسألت قبل كده السؤال ده ..
.بس هقولك بجد الإسم مرتبط بحياتي الشخصية

/ جبل عالي
هل معنى الاسم انه التحمل رغم كل الصعوبات يعني الصبر .

فعلا ياكبرياء .... والله حتى الآن لما أستعرض حياتي أعرف
إن اللى كنت ولازلت شايلاه كتير

والصبر على العند بتاع الدنيا

/ الفرق بين جبل عالي امامنا وما خلف الشاشات ..

بصراحة ... جبل عالى اللى بينكم أهدى بكتييييييييييييير
من جبل خلف الشاشة

لا ورومانسية كتييييييييييييير برضوووو عن خلف الشاشة
هى ضغوط الحياة اللى بتتحكم فى المود بتاعنا سواء أمام أو خلف الشاشات

/ لو حابه تقولي اسمك وسنك ممكن لو حابه نحذف السوال
اكيد زي ما تحبي .

الاسم \ أمل السن ... هههههههههه خليها فى سركم
بس مش صغيرة والكل عارف

/ ماذا يمثل المنتدى لجبل عالي .

بصراحة المتنفس والمكان الذى اصبحت انسى همومى
وأحمل هموم اخرى عليه

/ توقيع والمقصد منه ( كبرياء وسط ضجيج الحرف وقهره ) ؟

بصراحة المقولة دى عزيزة عليا جدا جدا ....
بتعبر عني أوي .... واللى إختارها لي بالتوقيع

الراقي والنبيل بالفعل ..... أحـــمــــد الــــحــــلـــــو

ولو قلت لك بالمناسبة احمد هو اللى ساعدني فعلا
إني أتخطى مرحلة اليأس اللى قلت عليها

احمد الحلو شخصيه راقيه ويستهل كل خير بجد

/ولقب والمقصد منه
وتر يقطر نغم

ده برضو إختيار إنسان عزيز على قلبي جدا جدا جدا

بس متهيألي على قسم النقاش مش هينفع ههههههههه
مش كده ولا إيه ؟؟

/ اذا كنتي سائره على قدميكي امام مدينة المنتدى فأمام اي قسم
سوف تنظرين اليه وامام اي قسم سوف تحزنين وامام اي قسم
ستتجاهليه وتمضي واي قسم سوف تبتسمي لعبورك من امامه ؟

المنتدى الذى أقف أمامه وأتأمله بالفعل هو القسم الأدبي
وسأحزن أمام قسم ... الخواطر بجد أحزن جدا جدا جدا
والقسم الذى أتجاهله ....معتقدش فى قسم اتجاهله الا لو مش هفهمه

/ لما ستحزن جبل على قسم الشعر والخواطر اثناء المرور من امامه .

لان اول مادخلت المنتدى مكنش بالشكل ده فعلا ..... ولا بالهيصة المفتعلة دى .... واكيد الكل عارف

/ واي اﻻشخاص تنطبق عليهم المراحل السابقه

أشخاص ... أقف طويلا أمام من صادقتهم
وعرفتهم عن قرب ولمست فيهم مالم يعرفه أحد
وأحزن ... على أشخاص فعلا فعلا لم ولن يعوضهم القدر
يوماً على الأقل بالنسبة لجبل
وأتجاهل ... أى منازعات تجعلنا نخسر هؤلاء الأشخاص

/ ايه احساسك لما بتشوفي المنقول وطريقة الرد عليه بيكون قوي .

قمة الحزن وقمة العصبية وقمة الألم والله لدرجة ساعات بحس ان المقصود
إن أصحاب الأقلام تمووووت ...فعلا هى مؤامرة للقضاء على الأقلام
اللى بتكتب حصري ده رايي

/ يعني مؤامره يعني اتفاق بين بعض اشخاص لانهاء شئ ما وهو
ما تقصديه من القضاء على الاقلام في المنتدى .

بالفعل هو ده اللى أقصده طبعا ... يعني لما يكون كام قلم بينزل

حصري عالقسم وبقلمه الشخصي

ومايتقدر فى فترة ما .... ويجي البعض الآخر بأقلام مصطنعة

وأقلام مزيفة ومنقولة وفجأة

تلاقيهم أصحاب أوسمة وحجات ... هنا لازم تعمل وقفة مع نفسك
وتتسائل .... هو فى ايه بالضبط ؟؟

ده غير بئا معلش يعني لما يقتصر قسم من الأدبي بتمييز
الموجودين فيه فقط لاغير بالرغم من تميز

البعض الآخر تحت مسمى إنه بيكتب للإبداعات فقط
لاغير ......... مع الأسف ده إسمه إيه ؟

غير إنه إهدار لحق الأقلام الأخرى .... دى وجهة نظري وماتقول
ده تقصير من مشرف ولا غيره

لأن لو مشرف مقر (مثلا) طب فين المراقب ؟؟؟ ولا كلامي غلط
؟؟؟

/ هل جبل عالي عصبيه !

هههههههههههههه الفترة الأخيرة فعلا باعترف قمة العصبية بس
يارب مايكون حد زعل مني
وبعدين لولا فى ناس جمبي فعلا انا كان جرالي حاجة بجد

/ مش شايفه ان المنتدى لما يتعبنا يبقى قلته افضل
طالما حاجه هتيجي على صحتنا .

كلمتك بالفعل ياكبرياء والله صح ..... وصح جدا كمان ...
وبصراحة ده اللى كنت بدأت أنفذه بالفعل

/ ما هو سبب تأخر جبل عن اﻻشراف وليه قسم النقاش مع ان اغلب نشاطك ادبي .

سؤال وجييييييييه جدا جدا ...... تأخر جبل والله أعلم ممكن
عشان كنت فى حالي أوى
ده غير ان موضوع الترقيات كان مغلق على فئة معينة ومحددة
لدرجة ساعات كنت باقول
ان كانت أسامي تطلع بليل تسجل تاني يوم تتكرم ويتحط لها
مشاركات واوسمة موووووولد
كنت بشوف كل ده واستغرب ... وممكن عشان كنت بثور لو
عضو اتحظر ولا اتوقف لسبب منعرفوش
فطبعا ده يقلق هههههههههه معرفش بصراحة السر فيييييييييين

اما ليييييييييييييه قسم النقاااااااااش ههههههههه فعلا انا كل شغلي
عالأدبي ده صحيح
بس يظهر آخر كام يوم قالوا جبل بتتكلم كتير وده مناسب
للقسم ... ده غير ان ممكن برضو
يكون عشان جبل يتهد بئا هههههههههههه مع انى كنت ساكتة
والنعمة ياكبرياء هههههههه

ههههههههه ربنا يستر يا اختي

/ هل جبل عالي قادره على ادارة قسم النقاش جيدا وتقبل الراي الاخر خاصه انه هناك اشخاص لا يتقبلون الرأي الاخر .

ان شاء الله عندي قدرة على تقبل وجهة نظر الآخر .... على
شرط هو كمان يتقبل وجهة نظر اللى قدامه

لسه كنت بتكلم مع مستر ميرو وبقوله .... ماينفعش نطالب حد
بإحترام رأينا الا لو إحنا إحترمنا رأيه

ومش ضروري نوصل بالخلاف فى وجهات النظر الى مرحلة
التجريح وخسارة بعضنا البعض زى ماللأسف حاصل الفترة دى
بجد فعلا مأساة ...... ربنا يصلح الحال

/ كيف ستتعامل جبل مع الجميع داخل القسم .

هتعامل إزاى ؟؟ زى مابتعامل ... انا بانتهز الفرصة وبطلب من
أى حد له نظرة فى جبل يصارحني بيها

ولو حد له موقف مع جبل يقولي ..... لأن بالفعل تعاملي المباشر
كان مقتصر جدا جدا

/ كلمات جبل تخصها يعنى تعبر عنها و تعبر عما يدور من حولها .

بالفعل كلماتي هى جزء لا يتجزأ مني ... بل هى من دمي

/ متى تثور جبل وﻻ تهدأ .

أثور ولا أهدأ .... لما أشوف ناس لها مكانة ورونق يهدر
حقها ...وتتعامل كما يتعامل
الحصان المسن ....عارف ازاى ؟ يعني يجيبوه بالرغم من انه
بصحة اينعم مش قوية
زى الأول لكن شغال ..يجيبوه ويعدموه رميا بالرصاص .... مع
انهم ممكن يسيبوه ويستفيدوا برضو منه

/ هل جبل شخصيه قياديه ام ﻻ .

الظروف منذ الصغر حتمت عليا أكون شخصية قيادية وقيادية جدا كمان
بس صدقني كله بالحب ..قيادة بقلب أم أو صديقة

/ مفردات جبل قويه عن داراسه ام مارسه للقراءه ؟

مفردات جبل والله نتيجة حب أصيل فعلا للغة من التعليم وبصراحة لم أدرس
لأجل المفردات دى .... فعلا أجد المعاني تأتيني بسرعة لما افكر فيها لغويا
لكن غير ذلك احس ان الكلام ضعيف

/ رغم ان كتاباتك بقلمك ومعظمها حصرى لكن تكون بالخواطر
وليس الابداعات يا ترى ايه السبب ؟

أقولك ليه وده بقوله من اول ما بدأت اكتب بالمنتدى والرأى ده
قلته لناس كتير بجد وماهوش فلسفة
لا عن إقتناع وزاد اقتناعي اكتر بعد اللى شفته عالمنتدى طول
المدة اللى فاتت
وجهة نظرى ...إن كلمة إبداعات ...كبيرة معناها كبير ...
وإحنا مجرد هواة ياجماعة محناش مبدعين
والألفاظ الكبيرة دى .... وانا مارأيت بنفسي أى ذرة إبداع ...أصل مبدع يعنى تجيب حاجة او معنى
او فكرة او مصطلح او تصوير محدش وصله قبل كده ...
أو يكون كلامك منمق جدا إملائيا
وصحيح جدا جدا نحوياً ...وحط تلاتين خط تحت نحوياً دى ...
ده غير الفكرة تكون غير مطروقة
من قبل ..... ممكن هنا يكون الإبداع ......
لكن عشان نرص كام كلمة ونحاول نوزن
ولا نتوهم إننا الفرذدق ولا جرير ونقول إبداع .......
ممممممم معرفش بالنسبة لى محستش
اني أستحق كلمة مبدعة دى ابداً ........
ممكن تسميه إحترام زيادة عن اللزوم للغة ومفرداتها
ملحوظة بس ياكبرياء .......
انا عمر مانزلت حاجة بالخواطر غير حصري
الا فقط يمكن كام خاطرة مؤخراً .....
وده سببه نفسي بالدرجة الأولى

/ جبل تقرأ دائما بين السطور متى تقرر الرد لظهور المعنى ومتى تتجاهل ؟

بصراحة شديدة ... عمرى ماتجاهلت ما أجده بين السطور ...
ودايما كنت اسبق بالرد
لكن ... عندما وجدت تعمد كبير للتجاهل ...وتعمد أكبر للزيادة
بما يحدث
رغم اني كثير كنت ارسل كلماتي للإعتراض على هذا الحال ...
الا ان العكس هو ماكان يحدث
فاتبعت التجاهل فى الفترة الأخيرة بعد ان بالفعل يأست من تغيير
الحال
الى جانب ..(ولأول مرة أعلنها) ...
أنه قد أصابني تدهور بالصحة والضغط
نتيجة إنفعالاتي النفسية ....فقررت رسم التجاهل ,,
ولا أنكر ان هناك كثير ممن ساندني بتلك الأيام
والله لولا تواجدهم بحياتي فى تلك الأوقات ماكنت اعرف لفين هوصل

/ موضوع من رحل ﻻ يعود انتي شايفه ان فيه حق لناس مش بتاخده ؟

طبعا ... طبعا ... طبعا ....
في حاجات كتيير اوي بجد لناس أعطت والتصميم
لازال ان يهدر حقها او .... يعطى لها ولكن ...
بصورة مخجلة وللاسف الشديد

/ كنتي متوقعه ان كل الناس اللي هترد في الموضوع هتتفق
معاكي في رأيك ؟

والله وبصراحة شديدة لا ...... أنا فوجئت بالردود ...
ولو قلتلك اني بكيت يمكن ماتصدقنيش
صعب بجد لما الناس تكون شايفة الحق ومابتتكلم لاى سبب كان ...
يمكن عشان كده ماقدرت ارد عالكل

/ يا ترى عدم رد اﻻدراه هل رأت الموضوع وتجاهلت ام انها لم تراه ؟

ده اللى نفسي بجد بجد نفسي اعرفه ..... لأن عدم رد الإدارة
خلاني أتأكد ان في تصميم
على الأسلوب ده ... طب ليه ؟؟؟ نفسي اعرف ...ولو تعرف كبرياء قوووولى

والله يا اختي ما اعرف وهعرف منين
عموما بعد الموضوع ده كل حاجه هتظهر ان شاء الله

لو في سوأل معين حابه توجهيه ليا
ايه هو السوال ؟

سؤالي .....

ياترى إنت إيه رأيك بصراحة فى تكليف جبل بإشراف النقاش

وياريت يكون رأي مفصل ( يعني بالتفصيل )

أيا كان رأيك ...يعني سواء شايف إنه صح ؟ أو غلط ؟
أو شايف إن جبل يقدر ؟ او لا ؟

هو اللي شفته في جبل طبعا من بداية تسجيلي ان قد ايه
هي شخصيه حكيمه وعاقله فيها جدعنة ولاد البلد
قلم يقوي يدرك كعنى وصيغة الحرف جيدا
واكيد تنفعي قياديه جدا في اي مكان سواء في الممنتدى
او خارجه

لحد كده تمام

ندخل بقى على الاشراف
اشراف و على النقاش صعب شويه
مش على جبل انها مش قد المسئوليه لا ابدا والله
على الاختلاف نفسياً هتتأثري كتير وربنا يستر خوفا عليكي
لانك بتاخدي كل حاجه على اعصابك
لان قسم النقاش معناه فتح مجال لتبادل الاراء بجديه واحترام
وابداء رايي وسماع الرأي الاخر بسعة صدر
انتي شخصيه جاده جدا وعارف انك مش هتعدي اي حاجه
ولو في غلطه سواء في موضوع او هتعدلي وتحذفي
نظامي يعني بس هتلاقي كتير يختلف معاكي في رئيك
وانا مؤيد لوجهة نظرك لاني عارف مين جبل وبتتكلم ازاي
بس كتير لا يتحمل وجهات نظر اخرى

اقول حاجه تانيه منع المواضيع السياسيه ده حاجه كويسه جدا
لاني احيانا كنت بدخل القسم كان دمي بضايق جدا بصراحه
لدرجة اني اطلقت على القسم في فتره من الفترات
قسم الاختلاف في الاراء قسم الخلافات
ربنا يسهل وان شاء الله تكوني مميزه باشرافك
لانك نورتي اسرة الاشراف اكيد
ربنا يوفقك واحنا من بداية دخلولنا بنتعلم منك اختنا

سعدت بتواجدك الجميل اختي
ربنا يكرمك وانتي عارفه قد ايه انتي انسانه انا بحترمها
وبحترم رأيها جدا وعقليتها
ربنا يوفقك وتفضلي منوره دائما

انتظروني وحلقه قادمه جديده وعضو على طاولة الحوار

[Mo chahin]

الله عليك يا سامى ..

ادارتك للحوار كانت على اروع ما يكون ,,

قرأت الحوار مرتين والحمد لله استمتعت جدا بك وبجبل ,,

وبمناسبه السؤال الى طرحته جبل .. اعتقد انها قادره على اداره القسم ,,

لأنك كما قلت .. شخصيه حكيمه ومنظمه وقياديه ,,

ودا اللى شوفته من خلال تعاملى معاها .. انسانه محترمه جدا ,,

بجد حوار جميل جدا جدا ..

واكتر ما لفت نظرى .. هو اختلافك مع قسم الابداعات ,,

اتفق معكى فى حاجات وحاجات لا بالنسبه للموضوع دا ,,

جزيل الشكر لكى جبل .. واحترامى الشديد لك سامى ,,

دمتم فى رعايه الله وسلامته ,,

[booody99]

بصراحة حلقة جميلة مع شخصية احترمها بكل صدق
ويمكن أنا كنت بحسبها رجل في الأول من الأسم
ولكن عرفت بعد كده ههههههههه
جبل عالي بصراحة لا بتنافق ولا بتجامل وده ما يميزها عن غيرها
وبصراحة أنا شايف انها كانت زي الجندي المجهول في الأول
وشايف أنها تستحق الأشراف فعلاً
سواء على النقاش او القسم الادبي
ولكن النقاش احسن عشان هي محايدة وبتقول رأيها بكل صدق
وفعلاً واجب عليا اشكرها ويمكن كانت هي من الشخصيات الي شجعتني على الكتابة
حلقة رائعة يا كبرياء واسئلة رائعة وإجابات أروع
كل الاحترام والتقدير

[morshooo]

اولا الحوار جميل جدا وجبل عالى
اعرفها كا أسم فى المنتدى لكن
ماتعملتش معاها بس واضح
انها شخصية مميزة جدا
انا كان من وجة نظرى الشخصية
قسم النقاش دائما بيتظلم فى اختيار مشرفينة
ودا مش تقليل من جبل عالى او شاهين
ولكن .
الى اعرفة ان اختيار المشرفين بيكون على الاقسام
المميزين فيها واعتقد انكم مش مميزين فى قسم النقاش
او مكنتوش متابعين لية بشكل كويس
وعلى فكرة معظم الى بيتحطو فى قسم النقاش
بيكونو ملهمش علاقة بيو او مش مميزين فية
فربنا يسهل الفترة الجاية والاختيارات على الاقسام
تكون بشكل كويس.


كبريانوووووووووو
حلقة لوز اللوز يا نجم ^_^
ودائما مشرفنى ابرطم اسديقى
^^

[دمعه حائره]

حلقه جميله جدا مع اخت غاليه علينا ومبدعه رغم انك مش حابه الكلمه بس ده حقك
وليا تعقيب بسيط على كام نقطه
لو تفتكرى ياامل زمان انتى اخدتى تميز وانتى فى قسم الخواطر
وانا والسفينه وبحر ولكن كلنا كنا فى الخواطر
واخر تميزوتكريم عملناه بردو كان لاعضاء اغلب نشاطهم فى الخواطر
مافيش حاجه اسمها التميز بيكون لقسم معين
وكمان الاشراف كان ليه ظروفه يمكن دخولك المتقطع وغيابك فتره عن المنتدى
ده غير كنا انا وانتى زمان لو تفتكرى قاعدين فى قسم النقاش
وكان قسمنا المفضل بعد الخواطر
ممكن اختيار قسم النقاش ليكى
ده لان عقلك كبير وتقدرى تديرى قسم زيه
وتكريم المشرفين تم على فترات فاتت من الادارى المنتخب
ورجعنا بالفعل بدأنا فيه انا وواد حبيب لسكره والحلو وعصام وشاعرة
ودى مسؤليه مشرفين كل قسم لان الاداره مش هاتاخد بالها
مين غايب او ساب القسم ومين متواجد
متفائله جدا بوجودك انتى وميرو على قسم النقاش
وحاسه انه هايرجع زى زمان واحسن
ربنا يوفقك اختى ويسعدك دايما
شكرا على الاستضافه سامى

[الرحــاال المٌتَمرد]

جبل عالي

إسم له وزنه ومكانته فى الاقسام الادبيه
لها فلسفه خاصه ومن الاقلام اللى شجعتنى كتير فى البدايه على الاستمرار
وكتير قدمت لى نصايح ,, انا فعلا بشكرك عليها يا جبل ,,
وعن حوارك بتفق معاكى فى نقط كتير ,,
وبتمنالك كل التوفيق فى قسم النقاش
شكراً سامي على الحوار الطيب مع جبل عالي
تحياتى وتقديرى

[تيتشر نفشه ツ]

امووووووله

واخيرا عرفت اسمك يابنتي

حلقه جميييييييله جدا مع سامي وامل

استمتعت بالصراحه والشفافيه اللي اتكلمتي فيها ياأمل

ايا كان رأيك ف يُحترم جدااااااا ,, شخصيه متزنه وواعيه ماشاء الله ربي يحميكي

ويارب يبعد عنك كل الهموم والاوجاع ,, وتفضلي قويه زي محنا متعودين عليكي

تسلم كتير ياسامي ع الحلقه الجميله دي

بالتوفيق يكم يارب

[۩۩ elMagic ۩۩]

حوار راقى جدااا
مبروكـ استاذه امل على الاشراف
واكييد حضرتكـ تستحقى اشراف النقاش
اتمنالكـ التوفيق بإذن الله
تسلم يا سامى للمجهود المميز
خالص الاحترام والتقدير ,,

[ساحر الأحزان]

اقتباس / يا ترى عدم رد اﻻدراه هل رأت الموضوع وتجاهلت ام انها لم تراه ؟ ده اللى نفسي بجد بجد نفسي اعرفه ..... لأن عدم رد الإدارة خلاني أتأكد ان في تصميم على الأسلوب ده ... طب ليه ؟؟؟ نفسي اعرف ...ولو تعرف كبرياء قوووولى

يمكن يوم ما انتى نزلتى موضوعك انا رديت عليكى ومع اخوة افاصل تانين وهل يا جبل؟الطقم الرقابى والاشرافى

مش من ضمن منظومة الكادر الادارى .ومهمتهم توصيل الصورة للادارة .عن نشاط الاعضاء ’وقلت يوميها فى الرد

يمكن انا حذكرلك حاجة حصلت معاية من بعد ما أنضميت للمنتدى وكانت معى فى دفعتى دمعة ودسما وداسماء

وغبت لظروف ورجعت لقيتهم اتميزم ودمعة بقت مشرفة وسما كمان ,وكنا على قدر واحد من النشاط,

والوقت دة كنت لسة ما تميزت وبعدها بحاجة لقيت اسمى نزل فى المتميزين,

وبعدها بفترة لقيت طارق بعت لية للاشراف انا مش بقول على شان أدافع عن الأدارة ولكنى والله يعلم

بقول كلمة حق حصلت معاية شخصيا ’ولاول مرة اذكرها هنا أحنا بتمر علينا ظروف وبنكون فى قمة النشاط

وبنغيب وقت التكريم او قبلة فمش معنى كدة ان فية نسيان احنا مهمتنا كمشرفين ومراقبين تابعين

للطاقم الادارى بنرشح الاسماء وبنعرضها على الادارة

وهى من خلال متابعة العضو بترشحة سوء فى تكريمات او ترقيات ’

وبخصوص المواضيع المنقولة صعب انك تمنعى تواجدها فى الاقسام لان ما فيش حاجة بتمنعها ودة طبعا

مش فى كل الاقسام لان فية أقسام حصرية لا تقبل المنقول’

واختيارك لقسم النقاش مش جاى من فراغ لانك شخصية واعية وتقدرى تحتوى أجواء النقاش بطريقة كويسة

ودة شىء هام جدا عند اختيار مشرفى النقاش ’

واتمنى لكى التوفيق فى قسمك ومع مستر ميرو

ونرى قسم النقاش بصورة نشيطة ومميزة,

لان مشرفية على كفائة عالية ونشاط وتواجد قيم منهم

نورتى الحلقة جبل بحسن تواجدك الطيب والمميز كشخصية نحترم لها تواجدها

وتحياتى لكبريانو على الحوار الشيق,,

دمتم سالمين

[فــــــــــرح]

استضافه طيبه لشخصية لا اعرف عنها شيء
سوا انها ( جبل عالي) ..
ومن ما قيل هاهنا استطعت تكوين جزء بسيط وصوره
مصغره لشخصيه تجمع بين الجد والهزل رغم ماهو ظاهر من حكمه
ومنطقيه الا ان هناك جانب مبعثر غير ظاهر للعيان
جانب معترض.. شديد اللهجة بطريقه قد تهابها يوما ما

اجابات منطقيه خاليه من اي مثاليه بل بالعكس عفويه التمستها
لصدق وصلني مما استشفيته من اجابات ..

والمضيف لن ننكر فضله وحقه ابدا
شخصيه قادره على ادارة حوار عقلاني منطقي واقعي جدا
منفرد عن غيره ..

من القلب لكلاكما ..

شكــــراً