حلقـة جديدة من برنامج " رحلة تعمق في شخصيات الأعضاء "

[الحان الورد]

السـلام عليكم ورحمة الله وبركاته زي مامكتوب في العنوان ^^ حلقة جديدة من برنامج " رحلة تعمق في شخصيات الأعضاء " ,, البرنامج طبعاً وقف ورجع و وقف ورجع تاني وحاجات كتير كدا ومش عارفة بصراحة هكمله ولا لأ ,, ممكن نبقى نفكر في حاجة جديدة بقى ^^ المهم , خليكو في الحلقة دي ^_^ حلقة مع شخصية من الشخصيات اللي ليها تاريخها في المنتدى وموجودة من زمان ^^ غابت ورجعت تاني ,, شخصية عن نفسي بعزها جداً جداً معانا الإدارية السابقة misho نِسمع أحلى تحية بقى أهلاً بيكِ يا شيماء معانا ,, أول فقرة : الفراغات .. اسمك الحقيقي شيماء ، وسبب إختيـآرك لـ اسمك المستعار انا دخلت المنتدي لسبب اني اقرا خواطر وقصص مكنش في بالي استمرار جربت كل الاسماء المشتقة من شيماء لقتهم موجودين جة ف بالي ميشو وقد كان عمرك 25 تنتقدي في نفسك العصبية أحيانا جربت الحب وكرهت القسوة وخفت أن افارق في طفولتك أحببت أن تكون طبيبة اطفال وعندما كبرت وجدت أن دراسة اللغات متعة وتميز لا تحب أن يرآك الآخرون وأنا ابكي ونقطة ضعفي اي حد بحبه بجد رؤيتك للحيآة انها فترة وهتعدي وأصعب مافيها الفراق بانواعه ماضيك بتعلم منه و حاضرك بحاول اعيشه صح وبتفاؤل ومستقبلك حلو ان شاء الله واجمل مرحلة في حياتك هي 3 سنين اللي فاتوا لا تغلق أبداً نافذة الـحب في حياتك ، لأنك مقتنعه ان الحب بيحل حاجات كتير وبيهون كتييير الفقرة الثانية : اسئلة عامة .. - " الحياة مليئة بالمحن والابتلآءات ، بتتفآوت درجة المحن زي مابتتفاوت ردة فعلنا وصبرنا ع المحن دي " انتِ بتواجه إزاي المحن دي .. وبتحبي تعتمدي على نفسك ولا ممكن تعتمدي على حد قريب منك ؟ المحن دي كتيرة اوي ومتعديش منكرش ان ساعات بضعف بس بصراحة قليل يمكن انا حساسة جدا وبتأثر باقل حاجة لكن وقت المشاكل والمحن بلاقي نفسي اقوي بكتيير وبتحمل بحس ان ربنا معايا وهيقف جمبي بعتمد ع نفسي في الدرجة الاولي واكيد بيجي وقت تحتاجي حد قريب منك يساندك ويقف معاكي _ - دآيماً بنتكلم عن الايجابية وازاي نكون مؤثرين وفعالين في المجتمع اللي عآيشين فيه ،، أيه هو تعريف الايجابية من وجهة نظرك ؟ وتفكيرك -غالباً- بيبقى مهتم بالايجابيات ولا السلبيات ..؟؟ الايجابية اني مكونش مجرد فرد ف الحياة اني يكون ليا رأيي وكياني واكون ع قد المسئولية مهما كانت وفي تفكيري بحاول اكون منطقية اشوف معطياتي ايه وابدا من خلالها امشي حياتي وبحاول ع قد ما اقدر اهتم بالاشياء الايجابية تجنبا طبعا لأي تقكير غلط او تصرف غلط او حالة اكتئاب نتيجة التفكير في السلبيات التفكير في الحياة من منظور ايجابي بيخلينا نفهم اكتر الحياة ونحقق اكتر مما نتمني _ إيه هو دافعك في الحياة .. يعني الشيء اللي بيخليك تعملي وتذاكري وتجتهدي .. وإمتى بتحسي انك محبطة ؟ اللي يخليني اجتهد في اي جاحة بعملها اني اكون بسعد حد من اللي بعمله واني اكون حابة الحاجة دي ف هعملها باخلاص اوي بيجي الاحباط لما اعمل كتير وملقاش نتيجة او ملقاش تقدير من اللي قدامي والاقي نفسي لوحدي بس بحاول ابعد عن الاحاسيس دي _ أبرز عيوب شخصيتك ؟ وبتحاولي تعالجيها ولا مؤمنة ان كل شخصية ليها عيوب ؟ طبعا كل شخصية ليها عيوب ,, لكن صعب اننا نقول اننا نقدر نمحي العيب تماما بشكل جذري مش سحر هو لكن اقدر اقلل واحدة واحدة منه واتجنب تأثيره عليا انا ابرز عيب عندي احيانا بكون عصبية وع قد ما اقدر بحاول اهدي واسيطر ع نفسي _ بتهتمي بـ علم النفس وتطوير الذات ؟ ليـه ؟ بحب التنمية البشرية جدا واحب اعرف اكتر عن قدرات النفس واعرف ايه يقدر يعمله الانسان في الوقت اللي هو شايف نفسه ضعيف احب اعرف ازاي اطور من نفسي و من تفكيري وبيساعدني كتير في التحكم في العصبية وبيخليني اكتر ايجابية لان التنمية البشرية بتقولي انا مين ؟ قدراتي ايه ؟ اتحكم فيها ازاي ؟ اتعامل مع مجتمعي واللي حواليا ازاي ؟؟ _ " الإنسان عدو مايجهل " ,, إيه رأيك في المقولة دي ؟ وليه غالبية الناس بتبقى ضد التغيير ؟ وانتِ شخصياً موقفك ايه منه .. بتحبي تغيري ولا بتفضلي الروتين ؟ بكره الجملة دي لو خفت من كل حاجة معرفهاش هفضل مكاني لا هتقدم ولا هتاخر ؟؟طب ودي حياة دة ممكن اللي معرفوش دة يبقي احسن وافضل حاجة ليا بكره الروتين وبحب دايما التغيير علي الاقل مش هحس بملل ولا زهق من التكرار الناس فاكرة ان التغيير هيضرني و يقولوا منعرفش هيحصل ايه لو غيرنا حياتنا او نظامها فبيقولوا اللي نعرفه احسن من اللي منعرفوش ودة غباء ... التجربة و الفشل افضل مليون مرة من الجلوس في مكان واحد من غير حركة ما بالك بالتغيير والتجربة اللي تجيب نجاح _ بتبصي غالباً لـ نص الكوباية الفاضي ولا المليان ؟ وبتعتبري نفسك متفائلة قد ايه ؟ هتصدقي لو قلتلك للاتنين ومهمين الجزء الفاضي بيعرفك ان في اشياء ما تستاهلش التفكير ولا التعب واشخاص برضه وجودهم زي العدم يستحسن تجاهلهم عشان ترتاحي ويعلمك ان الحياة لسة فيها مكان للنجاح برضه بس حاولي تمليه والجزء المليان بيشجعك انك تكملي لان فيه حاجات تستاهل وناس تستحق انا متفائلة بنسبة كبيرة بس مش دايما ,, الحياة احيانا بتسيب بصمتها _ بتفضلي تكوني خيالية وطموحة ولا بتفضلي الواقعية ؟ وليه أحياناً الواقعية بتبقى ضد الطموح ؟ انا بحب الخيال وبعيش فيه لكن بحطه في الواقع بكتبه عشان المسه وعشان احاول احققه فبلاقي نفسي حولته لهدف ف حياتي لان الواقع صعب لو الانسان مش هيتحمل ويقدر يواجه لحد ما يحقق طموحه اول موجة هتكسره _ اول انطباع بيتآخد عن شخصيتك ايه ؟ وغالبا بيبقى صحيح ولا لأ ؟ الهدوء انا مستعدة اقعد ف مكان في ناس كتير ومنطقش ولا بكلمة واحدة الا لو حد كلمني و دة حقيقي الي حد ما لكن ميمنعش من بعض الجنان لزوم التغيير _ هل اختلف انطباع الناس عنك في النت عن أرض الواقع ؟ وايه السبب ؟ لا تقريبا خالص _ بتعبري ازاي عن فرحك .. اصقف واكل شيكولاتة واكلم محمد غضبك .. ازعق و في الاخر اعيط واكتب و اكلم محمد برضه _ ايه المواقف اللي ممكن تخليك تلجـأي للسكوت ؟ لو حد قابلني بقسوة بفضل اسكت خالص ولوصوت حد علي عليا برضه بسكت ولو قلبي حزين بسكت خالص ولو شفت من حد قريب حاجة مش متوقعاها بسكت - مجتمعنا دآيماً او غالباً بيميل للمجآملات ، وقليل اللي بيتقبل الرأي الآخر والنقد بدون حسآسية ، انت شايفة امتى هنقدر نآخد النقد والصرآحة ببسآطة ؟ وانت نفسك بتميلي للمجاملات أحياناً ولا بتقولي رأيك ومابيهمكيش ؟ لما نقبل ان يكون للأخرين رأي مخالف وصدورنا تتسع للحوار والاختلاف وبالنسبة للمجاملة محدش مش بيجامل المهم نسبة مجاملتي ايه وهل بتتحول لنفاق ولا دة الاهم _ الخجل والحياء سمات فطرية في البنت .. إمتى الخجل دا بيتحول لـ خجل اجتماعي مذموم ؟ لما يمنعها من انها تعيش حياتها ولما يقف حاجز قدام كل احلامها ولما بسببه تكون مش قادرة تقول رأيها وتعبر عنه اكون خجولة دة شئ جميل وبيزيد من قيمتي لكن الخجل يكون سمة ليا مش بتعيقني ولا بتوقفني في بنات بتخجل حتي تقول رأيها ,,مجرد رأي ؟؟ هنا يتحول لشئ بيسلبها حريتها وبيقفل عليها وبالنسبـة لـ خجل الشباب .. أيه موقفك منه ؟ ممكن تعتبريه نقص في شخصية الرجل ؟ خالص طبعا ... دة بيزيد من قوة الرجل وبيدي انطباع بالامان وانتي بتتعامل معاه لانه خجول .. هيخجل حتي من نفسه انه يأذيكي ولو بكلمة لكن الخجل يفضل السمة اللي تميزه مش اللي تعطله وتربكه - معروف ان الطفل وهو صغير الام والاب هم اللي بيتحكموا في تكوين شخصيته بشكل كبير ، انت شايفة ان التربية بتأثر قد ايه في شخصية الانسان ؟ وهل كل وآحد مهما كبر بتفضل جوآه جزء من طفولته ..؟؟ التربية اساس كل شئ والبيئة اللي حوالين الطفل بتاثر جدا عليه تربيتي لطفلي هي اللي بتكون شخصيته وهي اللي بتخليه يحدد لنفسه ايه الصح وايه الغلط واما تكون تربية صالحة بتطلع طفل سوي وعنده قيم ومبادئ او تربية فاسدة بتطلع طفل بلا قيم وكل دة بيظهر اكتر لما يكبر ويقابل الحياة - التربية (الام والاب) ، المدرسة ، الاصدقاء ، الاعلام .. رتبهم من حيث تأثيرهم على شخصية الانسآن .. الام والاب - الاصدقاء - المدرسة - الاعلام - مين قدوتك في الحيآة أو ملهمك والشخص اللي بتتمني تكوني شبهه ؟ وليه الشخص دآ بالذآت ..؟؟ مش بتمني اكون زي حد لان كل واحد ليه ظروفه وطبيعته وبيئته واحلامه مش مجرد اني اكون نسخة من حد واكون بلا شخصية الصح اني اقول ان الشخص دة عاجبني فيه صفات واحاول تكون فيا لكن مش شبهه - اكتر موقف مر في حياتك وأثر في شخصيتك ؟ واثر فيها ازاي ..؟ هو مش موقف حصل ومر ,,, هو حدث في حياتي اكيد غيرني كتير اني ارتبطت بــ محمد خلاني اكتشف حاجات في نفسي انا اول مرة اعرفها اعرف اني قوية واني اقدر اعمل اي حاجة لو انا مقتنعة بيها واني اقدر اعتمد ع نفسي وغيرني حتي في طريقة كتابتي واثر عليا جامد في حياتي الشخصية - " اهتماماتنا بتعبر بشكل ما عن افكارنا وشخصياتنا " ، ايه رايك في الجملة دي ؟ وكلمينا شوية عن اهتماماتك وهواياتك ..؟؟ انا بحب القراءة جدا فوق ما تتخيلي ,,, عندي مكتبة فيها كل الكتب في معظم المجالات ,,, اخويا من زمان اللي علمني ازاي اقرأ احب الكتب القصصية والروايات سواء عربي او مترجم عن لغات تانية احب التنمية البشرية احب جدا اكتب ,, خواطر او قصص معرفش اكتب شعر مش بحب قافية تقيدني احب اعرف ايه الجديد في الموضة اللي يناسبني منها واحب اعرف اكلات جديدة وطريقتها واعملها - ايه هو تعريف الثقة بالنفس بالنسبآلك ؟ وياترى ايه هو الخط الرُفيع اللي بيفصل عن الثقة والغرور ..؟؟ اني اكون قادر اخد قراري واتحمل مسئوليته دي ثقة في النفس اني اكون ثابت علي قيم معينة مش متذبذب دي ثقة في النفس لكن محولش دة لغرور و اني ابقي شايف ان رأيي انا الصح ما انا واثق من نفسي ؟؟؟ واني مسمعش غيري لانه ميستاهلش لا دة اسمه غرور مش ثقة الثقة اني ادي انطباع للي قدامي بالاحتواء وانا بقول رأيي اللي مقتنع بيه وبسمع منه رأيه عندي ثقة في نفسي مش مجرد تعصب لنفسي بحجة الثقة _ إيه هي الأسباب اللي ممكن تقلل من ثقة الانسان بنفسه ؟ وانت واثقة من نفسك بنسبة قد ايه ؟ مجرد ان ثقتي تقل في نفسي دة معناه اني من الاساس معنديش الصفة دي ومش معني اني اغير رأيي او اغير موقف انا عملته يبقي عدم ثقة في نفسي ,,, دة ممكن يبقي معناه رغبة في الاعتراف بالغلط وانا شخصيا واثقة في نفسي جدا في كل حاجة ويمكن بيقولوا عليا اني صعب اغير رايي لكن انا حاسة اني مش كدة ناس ظالمة - كل انسان جوآه طاقة كبيرة محتاجة يوجهها في الاتجآه الصح ويستفيد منها وكل انسان ربنا ميزه عن غيره بشيء خآص بيه ،، انت عارفة كل موآهبك وقدرآتك وبتقدري تستفيدي منها ولا حاسة انك لسه ممكن تكتشفي نفسك أكتر ؟ كل يوم انتي ممكن تكتشفي حاجة جديدة في نفسك ,, قدرات الانسان غيرمحدودة وبتعتمد علي رغبتك انها تطلع _ بتحبي تكوني صداقة مع شخصيات قريبة من شخصيتك ؟ ولا شايفة دا شيء مش مؤثر في الصداقة ؟ هو دة مش مؤثر بشكل كبير بس بحاول ميكونش اختلاف الشخصية كبير عشان اكون انا مرتاحة في التعامل مع الشخصية اللي قدامي _ ماضيك .. بيمثل ليك ايه في حاضرك ومستقبلك ؟ دروس بنتعلمها بتفيدنا اكيد _ بتعتبري نفسك قيادية وبتتحملي المسؤولية ؟ اقدر اتحمل المسئولية جدا واعتمد علي نفسي _ هل فشلت في تحقيق حلم مهم في حياتك قبل كدا ؟ والفشل دا أحبطك ولا استمريت في المحاولة ؟ مش ببص علي معني الفشل نفسه ومش بركز معاه لاني مع كل حلم بعمل كل حاجة اقدر عليها عشان يتحقق لومتحققش بكون حاسة برضا عن نفسي واني حاولت لكن ربنا اراد حاجة تانية يمكن يكون فيه نوع من الاحباط بس مش بيستمر كتير _ كليتك , داخلاها عن اقتناع ؟ ولو لأ .. ايه اللي خلاك تدخلي حاجة انت مش حاباها ؟ وكنت حابة ايه ؟ انا اللي اخترت دراستي ومحدداها من زمان انابحب اللغات جدا واحب معرفتها واحب اتكلمها ودة خلاني احدد اني أدخل ألسن واعمل اني احقق الحلم دة وقد كان _ بنسمع حكم وامثال كتير .. بس في حاجات معينة بتثبت معانا .. اما لانها لمست حاجة جوانا .. او اننا اقتعنا بيها جداً .. إيه هي أهم المقولات اللي أثرت فيك ؟ أفعل ما شئت فانك ملاقيه _ رؤيتك لـ الصداقة .. وحياتك بيوجد فيها شخص تقدري تقول عليها انها صديقة فعلاً ؟ الصداقة دايما بقول في معناها انها المراية اللي بشوف نفسي فيها واللي بتصححلي لو كنت غلط وبتشاركني الحلو قبل الوحش هي نصي التاني حتي لو صفاتنا مختلفة لكن بنكملبعض ومنقدرش نستغني عن بعض فهماني من غير ما احكي والحمدلله ربنا رزقني بيها وموجودة في حياتي ربنا يباركلي فيها ويتمم فرحتها ع خير الفقرة الثالثة والأخيرة : المنتدى .. السبب اللي خلاكِ تسجلي في المنتدى ؟ كان في الاول مجرد تسجيل وانا عارفة اني مش هكمل بس لمجرد اني اقرأ خواطر جديدة بتؤمني بالصداقة النتية ؟ ومين أقرب حد ليك هنا ؟ احيانا بتكون صداقة قوية كمان بس قليل اللي ممكن تثقي فيه الاقرب ليا في المنتدي قاسم و آيـــة مشرفة الصور السابقة و نودي مشرفة اليوميات السابقة استفدتِ ايه من المنتدى ؟ ومن الناس اللي فيه .. مين أبرز الشخصيات اللي استفدت منها ( قديماً وحديثاً ) ؟ استفدت اني عرفت قدرتي اني امسك قلم استفدت من ناس كتير بجد وبحترمهم جدا زي مثلا (ناس قديمة ومشيت او لسة موجودة) هدي الله وميرا وابو ادهم و آية وقاسم وناس كتير والله يمكن حتي معرفهمش شخصيا بس من قلمهم استفدت ومش متذكرة الاسماء كلها والله عيوب المنتدى ايه ؟ وشايفـاه اتغير عن زمـان ؟ مقدرش اقول عيوب فيه بسبب الفترة اللي انا غبتها اكيد حاجات كتير وكل حاجة مع الوقت بتتغير ما بالك بمنتدي مرتبط باعضاء بتيجي واعضاء بتمشي وكل واحد دنيا تانية وتفكير مختلف هل اتهمك حد قبل كدا في المنتدى بشيء ضايقك ؟ أو حسيت انك مفهومة غلط ؟ لا الحمدلله خالص والله بس يمكن وقت ما كنت في الادارة كان دايما موجود الاعضاء اللي تحب تهاجم الادارة للاشئ ,, فقط لمجرد انك في منصب ومسئولة فممكن قرار يتفهم غلط ومش هتقعدي تبرري لاني في ناس مش بتسمع غير نفسها كلمـة أخير توجهيهـا لـ كل الأعضـاء ؟ افتكروا اننا في منتدي يعني عالم افتراضي بنيجي نرتاح فيه من الواقع بنفيد وبنستفيد فعلا ,,, بلاش نقلبه ساحة لحرب ملهاش لزمة وبس .. بشكرك بجد على وجودك معايا انا اللي بشكرك اني معاكي والله انتي من الناس اللي بعزها يمكن متكلمناش كتير بس مجرد وجودك بيفرحني وفيه راحة تسلمي يا قمري ع استضافتك الحلوة وأنا أيضاً أوجه شكري وامتناني لكِ عزيزتي ^_^ نورتِ بجد يا شيماء كدا حلقتنا تكون خلصت ,, ان شاء الله تكون عجبتكو ^^ ردوا بقى واعملوا اللي انتو عايزينه

[ساحر الأحزان]

استضافة جميل الحان

مع ميشو

لها اسلوب جميل فى التوضيح وتفهم المواقف الى بتحصل

واسئلة جميلة منك

واجوبة راقية من ميشو

تحياتى لكم بتلك الحلقة التى اسعدتونا بها

دمتم سالمين

[SiLver Spectra]

ميشو شوشو أو شوشو ميشو )
منورة يا شيماء
تسلمي يا رؤى عالحلقة ,,

[توحد ارواح]

استضافه مميزه و اجابات جميله
شكرا لمجهودك القيم يا قمر
تحيتى

[۩۩ elMagic ۩۩]

شيماء من الشخصيات اللى بعتز بمعرفتهــا
واتعاملت معاها ايام ما كانت اداريه
بجد هى شخصيه جميله جدا وبتتميز بهدوءهـا
وماشاءالله عاقله ربنا يوفقكـ اختــى
وان شاء الله تحققى كل ما تتمنيه
والحوار بجد جميل جدا
تسلمى ألحان لمجهودكـ المميز
مودتــــــى ,,

[طِيشْ !]

حلقة جميلة وضيفة أجمل

منورة يا شيماء

تسلمي يا قمر على المجهود ^^

ودي ووردي

[K A S E M]

اول انطباع بيتآخد عن شخصيتك ايه ؟
وغالبا بيبقى صحيح ولا لأ ؟
الهدوء

انا احتج خالص على فكره
شيماء..صديقتى اللدوده
من اول الناس اللى اتعرفت عليهم فى المنتدى
بجد حد ميكفهوش الكلام انسانه تحمل بداخلها قلب طفله
ربنا يسعدها فى حياتها وينولها مناها يارب
تسلمى يا الحان على الحوار الرائع والأسأله الجميله دى
شيماء كانت اجاباتها جميله بتنم عن انسانه مثقفه
وعقليه كبيره
اسعد الله قلوبكم بكل الخير
تحياتى

[ارهابية وامى عرفة]

انا معرفش شيماء بس انا لما قرائت الحوار بجد عرفت انة
انسانة جميلة واتمنى اتعرف عليها

[misho]

الحان الورد
اتبسطت كتير من وجودي معاكي والله
شخصية جميلة وتستاهل كل خير
ميرسيي علي استضافتك ليا
وشرفني التواجد معاكي

[رنين]

تصدقى انا توهت ال بعد قسم الاسلاميات تحت مش عارفه ايه ^^

احم احم

حلقه جميله خالص تحسىف يها بهدوووء كدا يمكن لان ده الانطباع الاول ال بيتاخد عن ميشوو^^

عجبنى ردودك ي شيمو وخاصة جزء الثقه بالنفس وانك قادره تستغليها فعلاً انك تحققى احلامك
وتوصلى للى بتتمنيه

ربنا يسعدك يارب ويوفقك فى حياتك ان شاء الله

تسلمى ي رؤى ع الحلقه وعلى الاستضافه الجميله دى

منتظرين جديدك بقى

تحياتى ,,