الملكية الفكرية ,,

[SiLver Spectra]

السلام عليكم و رحمة الله

نعتذر عن الإطالة
لكن أتمنى من الجميع القراءة الجيدة للموضوع لما سيتم اتخاذه من اجراءات تتعلق بالمنتدى




الشعار دا مقدس عند الدول المحترمة
و هو شعار ال copyrights أو بمعناه العربي ((حقوق الملكية الفكرية))

و عشان نفهم ليه الشعار دا مقدس لازم نعرف ايه الميزة الي بتترتب على حفظ حقوق الملكية + أضرار عدم الحفاظ عليها

الملكية الفكرية هي أي شيء يبتدعه الإنسان و يبتكره سواء أكان موضوع أو بيت شعر أو اختراع أو لعبة أو فن

تقوم مؤسسات الدولة و بالأخص القضاء بحماية هذه الملكية من السرقة , بطريقة تجعل لصاحبها الحق في طلب التعويض في حالة ثبات قيام شخص آخر بسرقة هذه الملكية

و بالإمكان أخذ هذه الملكية بشرط موافقة صاحبها
و يحق لصاحبها الإنتفاع من ذلك بالطريقة التي يراها مناسبة

دا هو تعريف حقوق الملكية حسب اجتهادي الشخصي

**********

نشوف بقى الاضرار الي بتقع في حالة عدم حماية الملكية الفكرية
و هديكم الأضرار على شكل مثال هنا عن مصر

المثال الأول و الأوضح في مصر هو الأغاني
سوق الألبومات في مصر و طوال تاريخه الممتد لقرن من الزمان كان يعتبر من أكبر و اقوى الأسواق
من خلاله تم انتاج العديد من الأغاني و ظهر لنا العديد من المطربين الي اصبحوا بعد كدا رمز من رموز الوطن العربي و ليس مصر فقط
و من خلاله كمان كان نفوذ الثقافة المصرية منتشر في أرجاء الدول العربية

و أي شخص عاصر فترة التسعينات و أول الألفينات هيكون فاهم كلامي كويس و مدرك مدى ضخامة هذا السوق في مصر
تقريبا ماكنش في شارع في مصر غير و فيه محل كاسيت
في حين دلوقتي ماعتش في محل واحد كاسيت أو بما يعادله سيديهات دلوقتي في المحافظة كلها
باستثناء ممكن تلاقي في كام مول في الأماكن الراقية السياحية أو في القاهرة و اسكندرية

طيب ,,ايه السبب في كدا و ايه الآثار الي ترتبت على الوضع دا ؟

تعالوا نشوف التطور الي حصل مع بداية الألفية الجديدة و بالتحديد في 2003 و مع انتشار الدش و رسيفر الديجيتال و مع محطات و فضائيات الأغاني

الي يفتكر الفترة دي بين 2003 و لحاد 2006 , و يتأمل كمية المحطات الفضائية الي كانت بتبث أغاني 24 ساعة هيعرف ان وقتها كان و لا يزال السوق قوي
و كان التنافس بين وجوه جديدة بتحاول تستغل الكليبات في الظهور المفاجئ و بين المطربين القدام

بصراحة كانت حمى نزلت علينا فجأة , كل محطة تفتح جديد تفتح للأغاني , و شغالين رسائل اس ام اس و طلعلنا ستار اكاديمي و محمد عطية و معرفش مين

و اذ فجأة لو مسكت الريموت كنترول دلوقتي هتلاحظ ان كل المحطات دي اختفت
و حتى الي مازال موجود زي ميلودي , باقيت قناة واحدة على عكس زمان كانوا وصلوا ل4 قنوات
صفوا على محطتين تلاته مصريين اظن اتنين مزيكا و واحده ميلودي

طبعا في محطات اي كلام خليجية كتير , اللي هو صاحبها معاه فلوس و مش فارقه معاه
على عكس هنا في مصر لو حد فاتح مشروع و بيخسر منه و لو كان غني حتى هيتقاله : انت عبيط و لا ايه

ممكن نسأل برضو ايه السبب في اختفاء المحطات دي ؟
الإجابة و بكل بساطة (اليوتيوب) !

زمان كان الشاب يفضل فاتح عالمحطة مستني اغنية معينه عشان يوريها لصاحبه او عشان بيحب يسمعها فكان يتذل أدام المحطة طول اليوم عشان تعدي عليه الاغنية مرتين تلاته

دلوقتي الي انت عايزه بتجيبه عاليوتيوب وقت ما تحب و تعيدها 50 ألف مره لغايه ما تطفح منها

و بالتالي كان السبب الرئيسي في اختفاء فضائيات الأغاني بيرجع لظهور اليوتيوب في 2006 و اشتهاره بعد كدا في السنوات اللاحقة

و لو بندور على سر ظهور اليوتيوب فهو بيرجع لظهور الانترنت فائق السرعة المسمى ADSL
الي ظهر في 2004 ,,و اخد وقت عبال ما انتشر في البيوت
وصلنا لسنة 2008 كانت كل حاجه تقريبا على النت
أغانيك مسلسلاتك افلامك سلطاتك , كلو بقى عالنت

و النتيجة ان مافيش حد بقى بيشتري ألبومات , انت عبيط !
حمل من عالنت ببلاش
و بالتالي اندثر واحد من اعرق الاسواق في مصر
و هو سوق الألبومات

ترتب عليه تدني مستوى الألبومات المطروحة
المطربين الكبار بقوا بيطرحوا ألبوم كل سنتين تلاته لمجرد انه يبقى موجود في السوق ( بيعمل ريفريش)
و ربحهم كلوا بقى من الحفلات و الأفراح
و الموزعين بقى شغلهم أغلبه شعبي (ويكا و ابويا و البط بيموت في الوز و معرفش ايه )
طبعا عشان الشعبي كمان بيشتغل في الافراح

و دا كلو ترتب عليه انخفاض الابداع ,,بدل ما كل سنة كنت بتطلع بكام اغنية كويسين و فيهم توزيع و creative او ابتكار عالي
دلوقتي تسمع الاغاني تلاقيها كلها شبه بعضها
شوية خبط و اي كلام في الحب و باقيت أغنية

لدرجة ان الماجيك مرا عملنا مسابقة بمقاطع من موسيقى اغاني حديثة ,,ماحدش كان بيعرف يجاوب
أغاني مافيش فيها ابتكار

و الابتكار دا هيجي منين غير لو في حقوق ملكية بيتم الحفاظ عليها !؟

طولت أنا في الأغاني
نخش في الأفلام

***********

اللي يشوف دلوقتي مصر من بعد الثورة هيلاحظ تدني في عدد الافلام و في جودة الافلام
و دي ليها تلت عوامل
أولها في انشغال الكتاب و المخرجين في الامور السياسية
خلاص دماغه كلها مش مركزة غير في الظهور على الفضائيات و في المتابعة , بدل ما كان بيتفرغ للعمل الفني و في ابتكار فكرة جديده مع صحابه , هيبص هيلاقي كل المحيطين بيه مش شاغلهم غير السياسة و الاحداث
دا أول عامل

تاني عامل و هو العامل النفسي للجمهور
لما نلاقي احداث زي الي بتحصل دلوقتي و تلاقي دور عرض عارض فيلم جديد ,, هتلاقي المزاج بتاعك مش فايق انك تدخل سينما و تعيش جو الفيلم دا
العرض السينمائي بيبقى محتاج مزاج و راحة بال
في الأجواء المشحونة بتبقى عايز تتابع الاخبار في البيت و توك شو و بث مباشر و خلافه من الأمور

أما العامل الثالث فهو بيتعلق بارتفاع مستوى القرصنة أو سرقة الافلام
باقيت بتتصور بكاميرا نضيفة و بصوت مسموع عن زمان
و بتترفع على النت و اليوتيوب

و بالتالي ماعتش في غير عامل واحد بس ممكن يسند السينما من الانهيار (زي الكاسيت) و هو حب رواد السينما في الخروج مع اصحابهم او صحباتهم و الجلوس في غرفة مظلمة مع مؤثرات صوتية عالية

لكن بتظل التلت عوامل اللي ذكرتهم سبب رئيسي في تدني مستوى الافلام المصرية الي اغلبها بقى تجاري
المنتج بدل ما كان هيكسب 30 مليون جنيه او 20 مليون جنيه
هيلاقي نفسه بيكسب 10 مليون جنيه
و دا هيترتب عليه خفض التكلفة الانتاجية للفيلم
و الي يشوف فيلم حلمي الاخير هيلاحظ تكلفة الانتاج المنخفضة و القصة الي مستواها متدني

دي كلها أعراض عدم احترام الملكية الفكرية

في أمريكا بقى عملوا ايه في السنتين الي فاتوا ؟
شددوا الرقابة على مواقع رفع الملفات و غلظوا العقوبات
و دا خلاها تحذف الملفات بشكل فوري بدون انتظار تقديم شركات الانتاج لشكاوي على روابط معينة

حتى ان موقع الميجا اب لود تم توقيفه بالكامل من قبل السطات الأمريكية إلى اليوم بسبب عدم التزامه بقرار حذف الملفات التي تنتهك حقوق الملكية و بغرامات وصلت إلى ربع مليار دولار !

فبقى من الصعب تحميل افلام بروابط مباشرة زي الأول و باقيت مواقع الروابط المباشرة غريبه و بتظهر فجأة و بتختفي و اغلبها صيني !

اللي عايز يحمل دلوقتي بيحمل من تورنتات
((طبعا المواقع العربية الي بترفع افلام مترجمة سيبكم منها))

تفتكروا على اليوتيوب اللي عليه كل الأفلام العربي ,,ممكن يسمحلك انك ترفع عليه فيلم اجنبي ؟
اشمعنا العربي اللي بيطنش و بيسيبك ؟
ببساطة لأنه عارف اننا شعوب مش بتهتم بحقوق الملكية

بقى عندنا الابداع الحلو هو الابداع اللي الهواه بيعملوه و دا صعب انه يكون مستمر و منتظم لان صاحبه مجرد بيعمل مقطع او اتنين و السلام , على عكس لو كان بيجيله منفعة و ربح منه كان هيستمر و هيتشجع انه يدي اكثر بانتظام

نشد خط عشان اقولكم على القرارات اللي قررت اني اتخذها هنا في المنتدى
و الموضوع مفتوح للنقاش بخصوصها

=======================



أنا قررت كإداري في المنتدى اننا نحترم حقوق الملكية و ما نسمحش بالتعدي عليها قدر المستطاع

و كمرحلة أولى هيتم اتخاذ الآتي :

*****************

1) اخفاء الاقسام التالية
الأغاني - مسلسلات - أفلام - عروض wwe

و هيتم الابقاء على الصور و الاخبار فقط
و سيتم فتح اقسام جديدة تختص بالافلام الوثائقية
و قد نقوم بتفريع قسم اليوتيوب ليشمل عدة اقسام على ان لا يتم نشر فيديوهات الا من مصادرها الرئيسية باستثناء برامج التوك شو

((عشان في ناس عارف انها هتسأل : هنعرف منين ان مصدرها اصلي او لأ ,,المقصود انك مش تجيب فيلم مرفوع على اليوتيوب و لسه موجود في السينما مثلا أو لسه مش اتعرض اصلا على فضائيات , او انك تجيب حلقة باسم يوسف من مصدر غير المصدر الرئيسي لها ))

***************

2) عند نقل موضوع يلزم كتابة (منقول) في نهايته كاحترام للملكية الفكرية , و سيتم الزام المشرفين بهذا الاجراء قدر المستطاع مستقبلا

================

** الهدف من كل الاجراءات دي هو اننا نحفز العضو أكثر و نشجعه انه يكتب بقلمه حتى لو كان هيكتب حاجه تافهه , عمرك ما هتتعلم غير لو جربت و حاولت أكثر من مره**

** و كمان عشان نحمي حقوق الملكية لغيرنا و مش نساعد على تدمير الإبداع**

** خلافا على ان اغلب مواضيع الميديا عندنا في المنتدى , اصحابها بينزلوها لأغراض دعائية لمواقع أخرى**


و أي استفسار أو توضيح أو اضافة فأهلا و سهلا بيها

[الرحــاال المٌتَمرد]

كان شاغلني الموضوع دا كتير ,,
منتديات كتير عندهم قسم إسمٌه ,
خِتم الحقوق الفكريه والأدبيه
ودا طلب منك بما انك نفذت الفكره دي
إنك تعمل قسم ,, يكون لختم الحقوق
هتقولى طيب دا ازاى ؟
هقول كل عضو هيعمل موضوع فى القسم
ويعرض فيه موضوعاته سواً أدبيه أو كتابيه
ويتم البحث عنها ,, من شخص واحد فقط
يكون هو المسئول عن المهمه دي ,,
وفى حاله اثبات انها ملكيه فكريه او ادبيه للعضو
يتم الختم عليها من المنتدي ,, ودا هيفيد بأيه
هيفيد إنك هتبقى موثق من المنتدى لــ المنتدي وللعضو
موضوعه إنه حق له ,, .

وهبقى اجيب لك نماذج كتير للموضوع دا بينى بينك

فكره ,, شايف انها هتنجح جداً حتى لو محسناش بيها الا بعدين
وهتساعد العضو اللى بيستسهل ويجيب منقول انه يكتب ويرتقي بقلمه وبالمنتدي
وهنشوف كوادر قيمه وشخصيات واعيه وناضجه ,, مش نٌسخه .

تحياتي للقرار الجرىء ,, واللى متفق عليه جداً

[احضان الحبايب]

تمام يا طارق ’

اتمناها خطوة ع الطريق الصحيح

بالتوفيق

[morshooo]

انا مع القرار ومع الحفاظ على حقوق الملكية
صحيح دا مش هيأثر على حاجا لما نلغى الاقسام دى
من المنتدى ولكن كفاية اننا نحترمهم ونحترم الملكية الفكرية
انتا وضحت بشكل بسيط جدا يعنى اية ملكية فكرية
ووضحت بشكل بسيط الضرر الى حصل للقطاع دا
زى سوق الكاسيت وصناعه السينما فى مصروالوطن العربى
والكلام دا مش بيحصل الا عندنا بس تقريبا
يعنى لو دخلت على القنوات الاوربية
مش هتلاقيها سارقه افلام وبتعرضها
على قنواتها الفضائية زى عندنا هنا
( lcd - توك توك ....... الخ )
الى بقت بتجيب الافلام بعد نزولها بأقل من شهور
عكس الاول كان الفيلم بينزل سينما وبعد 3 سنين
يجيلك على ( روتانا سينما ^_^ )
انا كمان شايف ان انتشرت نوعا ما فى المنتديات
عدم وجود اقسام لــ الاغانى والافلام السبب معرفوش
ممكن يكون عشان حرام زى ما البعض بيقول
وممكن عشان حقوق الملكية الفكرية .

[المستبده]

فعلا طارق الالقرارات صائبه جدا

واتمن من الجميع فينا الالتزام

تسلم على مجهودك الرائع

[&& برنسيسة المنصورة &&]

جميل اووووووووووووووووووي التوبيك

لانه يشمل علي اخلاق عالية جدااااااااااااااااااا

(احترام الملكية الفكرية والحفاظ علي جهود الاخرين)

وهيساعد علي الابداع والتفوق


بجد فكرة جميلة اووووووووووووي

[حلم عمري]

اتفق معاك في القرار
وان شاء الله يكون خطوة للافضل بالتوفييييق

[مِسكُ الشَهادة]

السلام عليكم ...
أنا مع إخفاء هذة الأقسام يا دكتور طارق
وإستبدالها بأقسام أخرى كقسم
الأفلام الوثائقية بشرط أن تكون وفق المضمون السابق
من مصدرها الرئيسي ... وهذا سيفتح مجال أوسع
للإبداع وللإبتكار دون التقوقع في متاهات النقل فحسب
وإن تم النقل فلا بد من التأكيد ع ذلك لإحترام
الملكية الفكرية كما هو محتوى الموضوع
مع التنويه أنا عمري ما دخلت الأقسام دي
ولا أعرف ايه جواها من نشاط او عدمه
ولكن أعتقد أن تأييدي هو للإبتكار ولخلق صنف جديد
يؤهل للإبداع دوما ً
مشكور فكرة مميزة ...
دمت بخير

[פﭠة ﺳگـړُھَہّ]

أممممممم ,, انا معرفش بصراحه فى مواضيع الميديا والافلام والحجات دى

بس الكلام عجبنى جدا ان يكون فى حقوق ملكيه وزى منتا هنا هتحترم حقوق ملكية غيرك فى اكيد اللى هيحترم حقوق ملكيتك وما كتب بقلمك

نقطة التشجيع على ان الاعضاء هم يبحثوا بقا عن الاصل مش من اى اى موقع اخر ده هيكون افضل بكتير ممكن يقلل من حجم المعروض فى الاقسام دى بس على الاقل اما تعمل حاجه واحده بمجهود احسن بكتير من كوبى وباست 10 مرات ده رأيى

تنشيط الجميع انهم يكتبوا بأقلامهم ده هيزود من الابداع فى المنتدى اينعم المنتدى ماشاء الله فى اقلام رائعه ولكن فى ايضا اقلام مدفونه وبالتالى هيقروا اكتر وينموا فكرهم اكتر وبكده هينتفعو وهيفيدوا المنتدى اكتر

ده رأيى ,, واكيد هتكون فى اراء تانيه ومتوقعه نقاش جامد هنا فى الموضوع

[طِيشْ !]

فعلا اليوتيوب دا بلوى من بلاوي الزمن الكبرى

شيء مش طبيعي ...

و التراجع الفكري عند العرب وعدم مراعتهم لحقوق أي جهة ممكن تتضرر من الحاجات دي

هو اللي بيخلي مواقع زي جوجل و يوتيوب ترفض إنها تشيل فيديوهات وصلت بيها إنها تشوه صورتنا كمسلمين

زي ما شفنا في الفيلم المسيء للرسول أستغفرالله العظيم ... جوجل رفضت تشيله لإنه بيدر عليها مليارات

و من الذكاء العربي الفائض عن الحد كانو بيفتحوا الجوجل و اليوتيوب وهو تابع لجوجل عشان يلقوا نظرة على الفيلم

ويرجعوا يستغفروا , ودا كله بيصب في مصلحته

ودا فعلا زي ما إنت قلت اليوتيوب دمر مصادر دخل كتيرة جدا كانت بتفيدنا بأي شكل

الأفلام و الألبومات دي كانت بتتاخد عليها ضرائب ...

كويس إن موضوع إحترام الملكية الفكرية نبدأ بتطبيقه هنا .. على الأقل هنتعلم شويه شويه

تسلم الأيادي يا طارق

كالعاده طروحاتك تفوق الرائع و الممتاز

ودي ووردي