زي اخوكي

[Îäm-ñøt ßèst ßût Âm-dîffèrèñt]

انا حازم ..25 سنة متخرج من كلية هندسة .. وبشتغل مهندس أكيد .. هو شكلي مش مهم اوي عادي زي اي ولد .. طويل ..
بشرتي قمحاويه عيوني بني .. كانوا بيندهوني فى الكلية شاهيد كابور عشان شعري زيه .. آه أكيد هتسألوا إيه صوت الأغاني العالي دا ..
أصل انا فى فرح .. فرح مين ..؟! .. فرح حد كده مش مهم .. أقصد مبقاش مهم .. فرح حبيبتى ..
حبيبتى إللي انا ربيتها .. بقالي 20 سنة معاها .. من يوم ما أتولدت .. مفهمتوش حاجة ..؟! .. طاب استنوا احكيلكوا الحكاية كلها ..
فاضيين 20 سنة ..؟!





لما ملك أتولدت .. كان عندي 5 سنين .. فرحت جدًا إنها أتولدت .. خصوصًُا إني معنديش أخوات .. ولا هي .. لإنها كانت أول مولودة لأسرتها ..
زي حلاتي كده يعني .. بس الفرق بينا .. إن والدها اتوفي .. وهي كان بقالها 6 شهور فى بطن والدتها .. يلا ده قضاء وقدر



عشان كده انا إللي أعتبر ربيتها .. كنت دايمًـا استأذن من والدتي ووالدي وأروح أقعد معاها .. عشان إحنا جيران طبعًـا ..
والدتها صحبة مامتي جدًا جدًا .. دايمًـا يخرجوا مع بعض .. ووالدها كان صاحب والدي فى الشغل .. الله يرحمه



كنت حاسس إنها .. لا متأكد إنها أختي .. كنت بخاف عليها جدًا .. دايمًـا أشوف ف الأفلام الولاد بيخافوا ع أخواتهم البنات ..
كان بيعجبني اوي إحساس كأني أخوها .. وبخاف عليها ومش بحب حد يقربلها ..



ههههههـ و اول يوم مدرسة ليها كان تحفه جدًا .. أستنوا لازم اقولكم عليه ..




***



ملك : ياحازم مش عايزة أروح انا خايفة



حازم : ياملك انا قولتلك متخافيش بصي .. انا هكون معاكي علي طول ماشي ..؟! متعيطيش بقي



ملك : حاضر



**



كنت بقولها متعيطش وعمال أهدي فيها وأضحكها وأجبلها شوكولاته وشيبسي ومنزلتش ولا دمعة .. وانا قال أول يوم مدرسة خربت الدنيا وروحوني البيت وقعدت أعييط ..
عشان مكانش جمبي حد زيها



من ساعتها وانا عامل مشاكل فى المدرسة .. عشان اي حد بيزعق في ملك بروح انا أدافع عنها علي طول ..

كنت بساعدها دايمًـا فى دراستها ..
وبحاول جدًا أخليها متفوقة في الدراسة دايمًـا .. كانت بتعشق الرياضة زيي .. وبتحب الرسم جدًا .. كنا تقريبًـا زي بعض ف كل حاجة .. لإني عودتها تعمل كل حاجة كنت بحبها انا فى صغري



ودخلت إعدادي .. وانا أصريت تدخل مدرسة للبنات عشان المشتركة مش حلوة .. رغم إنها مش هتكون قدامي علي طول ..
إلا إني مطمن عليها كده أكتر ..




ف 3 إعدادي جت سألتني سؤال .. ساعتها كنت انا فى 3 ثانوي


***



ملك : بقولك إيه ياحازم ..؟!



حازم : قولي .. إيه عايزة فلوس ..؟!



ملك : هههـ اه عايزة أروح أشتري سجاير



حازم : وعلي إيه مانا معايا .. ههههـ .. عايزة إيه ..؟!



ملك : عندي ف المدرسة بلاقي كل بنت اخدالها ركن كده .. وحاطه سماعات الموبايل .. وبتكلم ولد .. لما بسأل يعني وكده بيقولولي حبيبها .. عادي يعني كده ؟؟ حتي لو كان مامتها عارفة ازاي تكلم ولد ع الموبايل .. مش خايفة علي سمعتها



حازم : محدش بقي بيسمع لكلام الناس إللي عايز حاجة بيعملها .. والأهم من مامتها ياملك ربنا .. هي ازاي هتقف قدام ربنا وهي عارفة إنها كانت عاملة حاجة غلط ..
وهي عارفة الكلام دا كويس .. بس هتلاقيها بتقولك .. طاب اعمل ايه دا محترم وبيحبني اوي ومش قادرة أسيبه بيصعب عليا ..
وشويه كلام فاضي كده .. لما هي خايفة عليه .. مش خايفة من ربنا .. ولما هو بيحبها ومحترم وابن ناس .. ميجيش ليه يتقدم .. عالم فاضية ياملاك



ملك : انت صح و الله



حازم : اوعي ياملاك تعملي كده ..



ملك : لو روحت بصيت فى الشهادة بتاعتي هتلاقي اسمي ملك والله ..



حازم : هههههههـ ياحبيبتى انا بحب أقولك ياملاك عشان اسم علي مسمي .. انتي ملاك ومهما عشتي مليون سنة فى الدنيا .. هتفضلي ملاك



ملك : ماشي ياسيدي .. وبعدين بتقولي ليه ياحبيبتى بقي .. ؟؟!



حازم : عشان انتي حبيبتى وروحي وقلبي وعقلي وأختي اووي .. وانا بحب أختي .. عارفة انا إللي ربيتك علي إيدي .. لما حد كان بيشيلك كنت بفضل أزعقله



ملك : ههههههـ .. انا بحسد نفسي عشان عندي أخ زيك .. اصحابي لما بحكيلهم عنك بيقعدوا يقولوا عايزين واحد منه .. عشان أخواتهم بيعاملوهم وحش وكده



حازم : شفتي إن انتي فى إيديكي نعمة .. هاهاها



ملك : هههههـ .. طاب بس يارخم ..



حازم : شكرًا يا أختي .. اخبار المذاكرة إيه ..؟!



ملك : تماام .. فى درس كدهون مش فهماه .. مكسلة أفتحه والله



حازم : لا انا عودتك مفيش حاجة اسمها كسل خاااالص



ملك : وبعدين انت لازم تذاكر عشان تدخل كلية محترمة بنت ناس كده



حازم : تعالي بس أشرحهولك ..



***




كنت بحب أشرحلها عشان أبص فى عنيها العسلية بس .. دي هوايتي المفضلة .. كانت بتبقى تحفه وهي مركزة كده .. ده انا إللي بقيت أسرح مش هي



عدت كام سنة وفعلا دخلت انا كلية محترمة بنت ناس .. ألا وهي كلية هندسة .. وهي طلعت الأولي ع المدرسة ..



ساعدتها كتير فى مناهجها .. لدرجة إني سعات بنسي نفسي معاها وبنسي إن عليا مذاااكرة قد كده .. بس مش بعرف أرفضلها طلب ابدًا .. او بمعني أصح .. مش بقدر أرفض لعنيها طلب



وزعلت منها عشان هي قررت




**




ملك : مش عايزة أدخل علمي رياضة .. عايزة علمي علوووم



حازم : ليه بس ياملك انتي عايزة علمي رياضة من وانتي صغيرة



ملك : انا بحب الرياضة اه وبموت فيها .. بس انا حاسه إني هنفع أكتر فى علمي علوم بجد .. وانا كمان صليت إستخارة .. وحاسه إن ربنا بيوجهني لطريق علمي علوم




***




بحبها لما بتقرر تعمل حاجة وتكون واثقة منها



بالرغم إني أتضايقت جدًا عشان هتدخل كلية معرفش حد فيها وبالتالي هكون خايف عليها .. بس عجبني إنها خططت وقررت ..
حسيت إنها دلوقتي قد المسئولية .. وبقي ليها شخصية مستقلة عارفة إللي عايزاه وهو الصح .. بس برضو لسه خايف عليها ..



ودخلت كلية صيدلة



دايمًـا كنت بروحلها كليتها عشان اطمن عليها .. وعشان منساش مذاكرتي .. كنت بروح مخصوص أذاكر معاها ..



ولما طلعت نتيجة سنة أولي صيدلة




**




باب شقة ملك خبط وهي ر احت تفتح



ملك : طمني يا حااازم بقي



حازم : أهملتي فى دراستك اوي علي فكرة عشان كده طلعتي الأولي ع الدفعة



ملك : لالا بتهررج .. لالا بتضحك عليا صح صح ؟؟




**



كانت أول مرة تحضني .. من زمان ..!!



بالرغم إنها أتصدمت .. إلا إني لقيتها قعدت تصررررخ لقيتها جت وحضنتني .. وانا واقف متصنم .. عادي مكملتش ثانية ونص ولقتها جريت ع مامتها .. ومازلت واقف متصنم ..



وف نفس اليوم




***




حازم : روحي ألبسي يلا وهوديكي أحلي الأماااكن



ملك : الساعة لسه 3 العصر يابني



حازم : مانتي لسه متغدتيش صح ..؟!



ملك : لا مقدرتش أتغدي بصراحة كنت ع أعصابي بجد



حازم : لينا كلام تاني فى الموضوع تأخير الغدا ده .. روحي ألبسي يلا



ملك : حااضر




**




وفي سنها ده .. أستغربت ليه مثلا لما بقولها يا حبيبتي مش بتصدق انها فعلا فعلا حبيبتي .. مش اختي وبتاع والكلام الأهبل ده ..



نسيت أقولكم علي حاجة .. بحبها لما بتقول كلمة حاضر ..



يوم من أحلي الأيام إللي بقضيها معاها .. إحم بالرغم إني كعيت بتاع 570 جنية فى الخروجة دي .. عشان غدتها في أحلي مكان وأغلي مكان .. وهدايا وبتاع .. إلا إني كنت فرحان لدرجة رهيبة ..
مكنش عارف أوصف إحساسي .. كنت بردد فى خيالي كلمة بحبك طول الوقت .. مجتليش الجرأة أقولهالها

وبعدين وديتها قدام البحر والشمس بتغرب ..

كان منظر رهيب رهيب رهيب علي رأيها




***




ملك : رهيب رهيب رهيب المكان دا بجد .. وخصوصا الوقت دا



حازم : اي خدمة ياقلبي



ملك : يوم تحفه بجد ربنا يخليك ليا ياحازم يارب .. بحبك اوووي



كانت قاعدة جمبي .. حضنت دراعي وسندت راسها عليه .. خلتني معرفش أعمل حاجة فى اليوم غير إني أفكر فيها وبس حتي وانا معايا وإيديها فى إيدي ..



ملك : صح عملت إيه فى النتيجة ..؟؟!



حازم : كل خير .. مطلعتش الأول يعني جبت جيد جدا .. متعرفيش ازاي .. شكل إللي طلع الأول إبن حد ف الكلية واخد المركز الاول .. واسطة يعني



ملك بنوع من عدم الفهم : آآآآه



حازم بضحكة : مفهمتيش يعني إيه واسطة صح ..؟!



ملك : هههههـ بصراحة اه



***




بحبها لما متكونش عارفة يعني إيه الحاجة دي وتعمل عبيطة .. تبقى مكسوفة تقولي يعني ايه ..




***



حازم بضحكة : مش قولتلك ملاك ياروحي .. واسطة يعني لو حد جاب ضعيف جدًا في اي مادة وأبوه مثلا يبقى دكتور فى الجامعة .. ممكن يزورها عشان خاطر ابوه طبعًـا



ملك : بس دا حرام ..



حازم : طبعًـا حرام ياملك .. مع إن ربنا نهي عنها .. بس الناس مبقاش ضميرها عايش



ملك : ياااه للدرجة دي ..؟!



حازم : وأكتر يابنتي صدقيني .. بس نعمل إيه بقي



ملك : طيب ..



قاعديين ع كرسيين قدام البحر كده



ملك : عايزة نجمة من السما



حازم : حاضر .. هبقى اجبلك واحدة



***




ربعت إيديها وحاولت تدفي نفسها .. وانا عشان زي أخوها ويارب أكون جوزها .. قلعت الجاكت وخليتها تلبسه ..
ولقيتها فجأة حطت راسها ع كتفي .. وانا فردت إيدي ع كرسيها .. وقعدنا كده بتاع ساعتين .. لغاية لما القمر جه ..

إللي هي أحلي منه أصلا ..




***

مهما قلت ووصفتلكم عن إحساسي مش هعرف لإنه هيكون قليل جدًا .. كنت فرحااان اووووووووي ..



جبت ورق كرتون .. ورسمت شكل نجمة .. وقصيتها .. المهم عملت شكل نجمة كده .. وحطيت عليها جليتر أبيض بيلمع .. بقيت شبه النجمة .. وأدتهالها ..



كانت فرحانة اووي .. بحبها لما بتكون فرحانة



وبحبني لما بفرحها .. بحبني اوي





وف آخر سنة ليها .. وكان آخر يوم أعيش فيه .. " كحبيب جدًا ليها " ..




***




ملك : عايزة أكلمك فى موووضووع يا حازم .. لسه مش قولته لماما .. هقولهولها لما أعرف رأيك يعني



حازم : قولي يا حبيبتى



ملك : في معيد عندي فى الكلية عايز يتقدم



يالهوي ع إحساسي إلي حسيته .. بشع ع رأيها



حازم : بجد ..؟!



ملك هزت رأسها بآه



حازم : وانتي عايزاه ..؟!



ملك بكسوف : بص انا صليت إستخارة وقولت لربنا لو كويس يقربني منه .. ولو وحش يبعدني عنه



حازم : وحسيتي بإيه ..؟!



ملك أتكسفت ومسكت شويه شعر نزلوا علي عنيها وحطتهم ورا ودنها وحطت وشها ف الأرض .. وبعدين بصتله



ياريتها ماعملت كده .. اتأكدت إنها عايزاه .. دي عادتها لما تطلب مني حاجة وتكون مكسوفة .. وتكون عايزة الحاجة دي اوي .. عايزااها اوي ..



حازم رفع وشها و ..



حازم : طيب قولي لمامتك .. بسرعة



من فرحتها نسيت تقولي شكرًا .. كويس برضو إنها جريت لما دمعتي نزلت ..



قفلت الباب .. ومعرفتش أعمل حاجة غير إني أتهديت علي الأرض .. بحاول أقوي نفسي وأقول انا راجل عيب عليا .. مقدرتش .. دي حبيبتى ..
ازاي حد غيري ياخدها حراام .. ياريتني كنت قولتلها .. إني بحبها ..

ياااريت




***




رجعنا لأرض الواقع .. ولفرحها




جريت عليا وهي بفستان فرحها وقالتلي



ملك : ممكن تغنيلي ..؟!



حازم : بس كده ياحـب .. ياملك حاضر



خلاص مبقاش ينفع أقولك ياحبيبتى



وغنييتلها



ورقصت معاها سلو



وفرحتها ..



وباركتلها ..



وبحبها ..



ومش هنساها ..



وعشت زي أخوها



مجرد أخ .. فقط لآ غير



..





طول عمر حياتك مشغولة ..

ومليانة بالناس ..

وعشان أقرب بأي صورة ..

دا بالنسبالي إنجاز ..

قدرت أوصلك برغم كل الناس ..

إللي بيحاوطوكي ..

وخليتك تحبيني يا خسارة ..

زي اخوكي ..

وكان صعب عليا أخسرك لما أصارحك بالحقيقة ..

وكان صعب إللي بنيته فى سنين يروح فى دقيقة ..

حاضر ..

هغنيلك ..

فى فرحك الليلادي وبقولهالك ..

من إمتي قدرت أرفضلك طلب ..

حتي نجوم السما حاولت أجبهالك ..

وانا إيه يهمني فى الدنيا غير إني اشوف فرحتك او إني أشيلك دمعتك ..

وازاي هطلب منك إني تحسي بيا وانا عمري ماقولتلك بحبك ..

وكان صعب عليا أخسرك لما أصارحك بالحقيقة ..

[sweety nadosh]

اسمح لي ابدي اعجابي بقلمك وتميزك واسلوبك الراقي وتالقك

[ابتسامة الزهر]

بجد رؤعة
قصة جميلة جدا
راقت لى
تحياتى لك

[ياسمينااا]

قصه روووووعه بجد
حسيت وأنا بفراها أنا فعلا شايفه أحداثها
بس كان نفسي فعلا ملك وحازم يتجوزو
ليه دايما أكثرقصص الحب تنتهي كدا
راقت لي كثيراً
تسلم ايدك أخي
بإنتظار جديدك دائما
دمت بالف خير

[زهره الشتاء]

ايه الروعه والجمال ده كله
قصصة وسرد جمييل
بس الغلط انك تكتم شئ جواك
وانك عآرف ان ممكن يحصل حاجه زي كده ف اي وقت
لو كانت تعرف ووافقت هيا الاختلاف
بس هيا كده مش عليها لوم
بيكون شئ مؤلم بس ربنا بيعوض
..
رووعه بجد القصه
عجبتنى اووي
تسسلم ايدك للطرح الجميل
يعطيك العافيه للمجهود
دمت بخير

[gold rose]

سبحن الله .,
يمكن دا الخير .,
بس بجد قصة حزينة أوي .,
وهوا ربنا يكون في عونه .,
بس الغلط عليه هوا .,
قصة جميلة جداً .,
استمتعت بقرآءتها .,

[Words Whisper]

ساعات كدا بصدق
أو دايما يعني
انه من اعتيادنا على شخص
مش بننتبه هو فعلا ايه بالنسبة لنا !
بس كمان مش ينفع حد مش ينادي حلمه
ويستغرب لما الحلم يضيع ..


انتقاء قيم بجد
عجبتني اووووووي ..
دمت بتوفيق وسعادة ..

[العاشق الذى لم يتب]

اسمحلى ياحازم قصدى ياأحمد أنت غلطان
معقول فيه جدع زيك كده ويعيش العمر ده كله ومع حبيبته وكل يوم مع بعض وجنب بعض ومامته ومامتها حبايب وجيران وربنا مسهلهالك ع آخر ومتعرفهاش إنك بتحقها ورايدها
صراحة أنا زعلان منك جدا ياأبونسب
قصتك دى فورت دمى وبزعل أوى وباخدعلى خاطرى لماأشوف واحد مغفل زى حازم ده
روح ياشيخ بلاش عكننة
تسلم وتعيش وتعكننى
تقبل تحياتى وودى
رفعت

[Îäm-ñøt ßèst ßût Âm-dîffèrèñt]

ههههههههههههههههه اوك يا ابو نسب مغفل بقا هنعمل ايه

[مشتاقه للجنه]

قصه جميله جدا

بس أكيد هو النصيب

شكرا على الابداع

موفق