لحظة صدق .. ♥

[∂αнмє]

سلامو عليكو

> انا فكرت كتيررر قبل ما اعمل صفحتى دى


بس بجد انا عملتها عشان افضفض فيها


واعزرونى لو كنت بتكلم شعبى كده


او زى ما بتقولو بالعامية .. عشان انا مابعرفش


اقول اشعار وكلام مزوء .. مليش فى الكلام دة


اعرفكو على نفسى الاول ..


اخوكم . احمد


من .. اليكس ( الاسكندرية يعنى )


سنى . 23 سنهـ الـ كام شهر كده


شغلى .. شغال حلوانى ..

[∂αнмє]

طفولتى .....

يااااه كل ما بقعد ما نفسى وافتكر

ملامح من ايام الطفولة اقعد اضحك

طبعا فى البيت بيفكرونى عبيط او مجنون

الناتج واحد فى الاخر لكن انا طبعا بكون سعيد جدا

وبقول يااااه كل السنين دى عدت وجرت بسرعة كدا

لحد ما كبرت ولو قالولى اتمنى امنية

اتمنى انى ارجع عيل صغير من تاااانى

[∂αнмє]

الــعــأبــى

بما انى اتربيت فى منطقة شعبية جداّ

فـ بالنسبة للألعاب كانت لها طابع خاص و اكيد

مختلف عن اى مكان او حتة تانية .. اللعاب كانت من اختراعنا

احنا صناعة فى الشارع وله كنا محتجين مصنع او اى حاجة وكانت

ممتعة لدرجة كبيرة جداّ . اى نعم كانت بتجيب مشاكل بس مش مهم

حـــد يفتكر معايا



كانت من افضل واحسن الالعاب اللى كنت محترف فى لعبها

واشتهرب بـ بلى .. بس احنا عندنا فى اسكندرية

مكناش بنقول كده . بنقول بلية . والجمع .. بيل

وطرق اللعب فيها مختلفة ما بين المحافظات وبعضها

وكمان مسميات اللعب ...... يااااه ياما نفسى ارجع طفل تااانى

[∂αнмє]

احم احم احم

المدرسهـ ....!!!

طبعا الجواب باين من عنوانهـ .. العبد للهـ كنت حاصل

على وسام الدولة . فى احتراف نط السور او يعنى التزويغ من المدرسة

بصراحة انا عمرى ما طولت فى المدرسة لحد اخر اليوم ابداّ مش عارف ليه

من اول ما دخلت المدرسة لحد ما خلصت دراسة خالص

يا اما اخلع كدهـ . يا مدخلش اصلا من البداية

احكلكم موقف حصل معايا . فى يوم طبعا كنت هزوغ الموهيم . فضلت مستنى لحد ما جت الفسحة

وفضلت مستنيها تخلص . اكيد حد هيسئلنى اومال كنت مستنيها ليه

بص يا فتك . انا مستنيها تخلص عشان المدرسين بيبئو مشغولين يجرو ورا الطلاب

عشان يطلعوهم الفصل . ودى كانت انسب فرصة المهم نويت النية واتوكلت على الله انا وواحد صحبى

يله . يله طلعنا نجرى على باب المدرسة . عشان ننط بسرعة ومن سؤء حظى المرادى احنا كنا فى الشتا

اصلا والدنيا كانت بتمطر وانا كمان كنت لابس كوتشى عالى . جيت اطلع من على الباب . ابداّ

ابداّ الباب مش راضى يطلعنى واجى يمين وشمال ابداّ . لحد ما جت اللحظة الحاسمة استاذ اخد بالو مننا

وجاى بيجرى علينا . طبعا انا شفتة . قومت قالع الكوتشى وحدفتة من فوق الباب لصحبى اللى بعنى

طبعا ونط وسابنى ويله هووووب فى الكلوب ونطيت طلعت فوق الباب والاستاذ جاى واول ما وصل بينادى عليا

بيقولى انا عارفك وعارف فصلك وهجيبك .. طبعا كان رد فعلى الطبيعى .. قولتلو (طز) هههههههههه

وسبتوه ونزلت وبس كدهـ

[∂αнмє]

طبعا انا كدة وصلت لمرحلة الاعدادية اللى كانت ف الكومنت اللى فات

ودخلنا بئا على الثانوية مش هتختلف كتير عنها بس طبعا دى اهم مرحلة

مرحلة المراهقة تاكبيرة والاحساس بالذات وانك صاحب كلمة قوية

طبعا الملامح بتتغير بيطلع . شنب والمشهر بيطلعلو زقن كمان

الصوت بيبتدى يتخن حبة حبة وتحس انك خلاص ياما هنا ياماهناك

بس انا اختلفت معايا ف شوية حاجات مش كتير اوى وبجد المرحلة دى اثرت

فيا جداّ عكس اى حد لانى بجد اتعلمت فيها العقل والرزانة بالعكس اللى بيحصل

مع باقى الشباب . دة مع انتى بعد ما كنت بدخن فى السر يعنى ساعتها بقت علنى

مش بقيت راجل بئا واخرج وادخل ومحدش يسألنى رايح فين . بس انا اصلا كنت

فى مدرسة صنايع . فمكنتش بروح غير يومين فى الاسبوع اللى هما فيهم العملى بس

وباقى الايام فى شغلى عاادى . وكنت بدفع فلوس للمدرسين عشان الدرجات وكده

وكنت عايش حياتى احسن من اى وقت . بجد انا نفسى الايام دى ترجع تانى

[∂αнмє]

احم احم احم .. خلصنا الثانوى خلاص

وبئينا فاضين .. بصراحهـ دى كانت ازفت فترة عادت عليا

طبعا الله اعلم بالأيام اللى جاية وشكلها اساسا ازفت بكتيررررر من اللى عدى

بس الحمد لله طبعا انا خلصت من هنا وقولت بئا اخد هدنة اريح فيها بالى من المزاكرة والكلام دة

الـ يعنى كنت بذاكر اووى بس اهو هنعمل ايه بئا الموهيم اخر يوم امتحانات دة طبعا رحت اتفسحت

وخرجت واليوم بصراحه كان ايه مالهوش حل وسلمنا على البنات اللى كنا نعرفهم ف الثانوى خلاص بئا

وقتهم خلاص لازم يكون فى جديد طبعا بس تصدقو واللهى لحد دلوقتى بيتصلو بيا عندهم اصل

المهم رجعت طبعا البيت واذان الفجر بيأذن كله كان نايم دخلت نمت انا كمان وعادى صحيت الصبح

وانا كل تفأؤل وامل فى بكرة . لقيت بابا بيقولى يله عشان تنزل الشغل معايا

عملت عبيط وله اكنى سمعت حاجة وبقوله ايه .. قالى نفس الكلام تانى عملت من بنها ساعتها

وقولتلو شغل ايه ... ................ بلاش اقولوكو رد الفعل كان عامل ازاى المهم قولتلو شغل ايه يا حج

دة انا لسه مخلص امتحان امبارح لسه مخدتش نفسى حتى قوتلو استنى لحم ما النتيجة تظهر

حتى قالى وحيات امكـ وانت هتقعد لحد ما النتيجة تظهر .. قالى انت اخرج اخر الاسبوع دة

وكدة انا عملت معاك واجب كمان وياعينى ليا الاسبوع كان فاضل عليه 3 ايام فقط

وجاه اخر الاسبوع ونزلت الشغل وامرى الله ....................... استنو بئا المرة اللى جاية

احكلو عملت ايه فى الشغل .. دة انا عملت عمايل هههههههههه

وماتخذونيش على طريقتى البلدى فى الكلام

[∂αнмє]

احنا وقفنا عند فين يا حبيبى يا حلوين
اه افتكرت عند الشغل اممممم تيب
نزلت الشغل بئا ساعتها كان عندنا ورشة خراطة
وما ادراكم ما الخراطة اممم رحت بئا اول يوم طبعا الناس اللى
شغالين هناك متعودين لما بروح ابن صاحب الشغل جه وبقعد
اتنطط عليهم والكلام دة ببصراحة كدة بعشها عليهم اكنى صاحب الشغل
اول ما دخلت راح بابا منادى على الاسطى محمد دة كبير الناس اللى شغالة
وقالو شايف احمد دة رد عليه قالو اه . راح بابا قايلو انا عايزك تطلع عينو
معاك هنا بص اكنو مش ابنى وله حاجة اعتيرو زى اى واحد شغال وخلاص
فستغرب عم محمد كدة وقالو حاضر يا حج . طبعا كل الموجودين سمع الكلام دة
ولقتهم بيبصولى بصة . انتقام واكنهم عايزين يقولولى انت جيت برجليك
طبعا انا كنت عارف هما بيبصو ليه .. شكلى كان وحش اووى
وعم محمد دة راجل طيب وابن حلال بس بردة مسماش عليا
اليوم دة طلع عينى شغل ومن هنا لـ هنا لحد ما بهدلنى اخر بهدلة
وكل شوية يقولى كدة غلاط ويزعق وطبعا انا كل دة بكتم جوايا وساكت
مرة مع مرة لقيت كل واحد جاى بيعشها عليا .. الله يرحم . اتخنقت
روحت سايب الشغلة اللى كانت فى ايدى وطلعت برة الورشة خالص
لقيت بابا قاعد . وبيقولى ايه تعبتى يا سوسو هههههه
وبيضحك . نرفزنى اكتر بـ سوسو بتعتو دى امممممممم
روحت قعدت فى الجنب التانى من الورشة وولعت سوجارة
اطلع فيها همى .. لقيت عم محمد دة جاى بيقولى انت قولت لمين
عشان تسيب الشغل وتطلع . بصو انفجرت فيه طبعا
وبلاش بئا اقولكو انا قولت ايه عشان عيييييب
وخلاص اليوم على كدة ...
استنونى بكرة زى انهاردة احكلكو
حصل ايه فى تانى يوم واخر يوم كان ليا فى الشغل

[∂αнмє]

اليوم خلص واهو عدى وخلاص مش مهم عدى ازاى بئا الموهم انو خلص
روحت البيت طبعا وانا على اخرى ماما بتقولى مالك مردتش عليها دخلت اخدت الشور
وطلعت غيرت ونزلت افك بئا عن نفسى عيت حياتى وظبت حالى ورجعت البيت ويادوبك
الفجر بيقول الله اكبر طبعا كلهم كانو نايمين دخلت نمت انا كمان . وخلاص
مصحتش غير لقيت بابا بيقولى يله يا سوسو عشان الشغل . طبعا انا مكنتش لحقت
انام غير كام ساعة كدة . فبقولو شغل ايه . استغرب كدة ورد عليا وقالى هو احنا عندنا ميت شغلانة
قوم فز من على السرير وراح شد الغطا وقومنى . اووووووووووف طبعا انا اصلا مش شايف قدامى
من قلة النوم . بس هعمل ايه . ساعتين بغسل وشى . و3ساعات عقبال ماغيرت هدومى ونزلت هههههه
رحت لقيتو هناك بيقولى حمدالله على السلامة يا بيه مش كنت تقولى اجبلك الشغل لحد عندك احسن
يله خش شوف شغلك . المهم دخلت لقيت عم محمد دة فى وشى . ولسه هيتكلم
قولتلو بئولك ايه . اصطبح كدة وقول يا صبح . احنا لسه فى اول اليوم متقفلنيش منك عشان انهاردة
ربنا اللى يعلم انا اصلا جاى ازاى . راح حط لسانه جوه بوءو هههههههه وراح ساكت دخلت انا على شغلى
واللهى يا ناس مش شايف حاجة روحت جنب مكنة كدة قومت حاطط دماغى وووووووووو نااااايم
مصحتش غير وكوباية مايه .. على وشى بفتح عينى لقيت بابا بقولى هو انت مش مكفيك نوم فى البيت
جاى تناملى هنا انا عملتها فندق . عشان حضرتك تنام فيه امممممم يادى ام الفصلان
اجبلك سرير طيب احسن عشان تريح جسمك . قوم يله شوف شغلك . طبعا انا اصلا لو قادر اقوم
كنت قومت وريحت دماغى من الاول . بس انا فااااصل اخر حاجة . قومت من مكانى . قولتلو بس يا بابا
انا مروح عشان عايز انام . انت شايفنى عامل ازاى . قالى وحد قالك ترجع متأخر بليل
قولتلو كنت سهران مع صحابى . قالى خلى بئا صحابك ينفعوك مفيش مرواح ...
طبعا اتخنقت . وبجد انا لما بتخنق بتحول محدش بيعرفنى . قومت مغير هدوم الشغل
وقولتلو السلامو عليكو . انا ماشى . قاعد ينادى ينادى . وانا اصلا سديت ودنى
طبعا مش هينفع اروح البيت . اكيد هايجى . روحت رايح عند خالتوو .. وقولتلها انى مشوفتنيش
ودخلت نمت ياااااااااااااه الحمد لله قومت الساعة 10 بليل بعد رحلة نوم استغرقت كتير
وروحت البيت . وسبحان الله لقيت بابا لسه نازل ومقابلنى على السلام
قالى شرفت يا بيه كنت فين نفسى اعرف وطبعا انا لسه سادد ودنى وله اكنى سمعة
قالى بص ريح نفسك متنزلش الشغل خالص . بس متجيش تقولى انا عايز فلوس
وراح سبنى ونزل . طبعا انا مش هيهمنى . كفايه لحد دة عشاااان انا طولت
المرة اللى جاية ابئا اكملكو الباقى

[∂αнмє]

عجزت كل نساء الزمان أن تكسر كيانى
فحاولت أحداهما أن تعلوا فوق عرش زمانى
فحينما كانت تعلوا و تعلوا اصطدمت رأسها بحذائى

[∂αнмє]

قولت ابص في المرايه يمكن اكون احلويت !!
فضلت داير ابص مخليتش ولا مرايه في البيت
في الحمام في القوضه في دولاب او متعلقه علي الحيط
شوفت ..
سكت شويه وبعدين اتخضيت
معقول !! معقول انا قضيت العمر ده كله زي ما روحت زي ما جيت
معقول !! معقول انا عمري ما غيرت ولا اتغيرت علي قد ما لفيت !!
وازاي ساكت علي روحي ده كله وليه استنيت
يارتني ما كان عندي مرايه
ويارتني ما بصيت