تعبت من السياسة

[العاشق الذى لم يتب]

بسم الله والحمد لله أحبتى السلام علكم ورحمة الله وبركاته وحشتونى وحبيت أفضفض معاكو شوية أزيكم وكيف أنكم يارب تكونوا طيبين وبألف خير والله كان نفسى أجيلكم من زمان وأقعد معاكم أطول وقت ممكن . طبعا ماأنتوا حبايبى الواحد لو ماكنش يقعد مع الحبايب ويشرب معاهم الشاى ويتونس بيهم ويفضفض معاهم على اللى حاصل واللى جارى ويشوف أخبارهم ويعرفوا أخباره يبقى على الدنيا السلام مش كده ولاإيه وطبعا الأيام بتجرى والعمر بيجرى معاها وهم العيال وأمهم ومشاكلهم المادية و النفسية بتزيد كل يوم عن يوم والأحوال اللى فيها مصر وبالبلاد العربية أحوال لا ترضى عدو لا حبيب ومن كتر المشاكل اللى أصبحت السياسة فيها كل حاجة فى حياتنا وخلت الواحد فينا نسى الحب قطيعة تاخد الحب واللى بيحبو كمان . كنت قاعد أنا والمدام لوحدينا العيال ربنا يهديهم ويصلح حالهم من كتر المهابية طول النهار من ساعة مايصحوا وهم هات يارزع واسريخ ومنهده مع أمهم ناموا وآخر سلطنة وبيأكلوا رز مع الملايكة . فاتح التلفزيون وقاعد أسمع الأخبار الكدابة على قناة الفشارين ومن كتر الفشر بتاعهم الضغط زاد وعنيه زغللت وحسيت روحى عاوز أنام . صرخت المدام فى وشى وقالت أنت هتنام ولا إيه ؟ قلتلها هو النوم صدر ليه مرسوم ملكى بيحرمه ولاقرار جمهورى طبعا ياحببتى لازم أنام الهم كتر وعاوز أريح أعصابى شوية قالت لأ بلاش تنام دلوقتى من يوم ماقامت الثورة وأنا مش عارفة اتلم عليك أصلا وحشتنى سيبك من الأخبار وادينى بأرش لب أتسلى علشان بحب . بينى وبينكم لقيت معاها حق هو الواحد أخد إيه من الثورة غير وجع القلب صحيح زودونى كام ملطوش لكن يعملوا إيه فى الأسعار الوالعة نار دى رحت رامى راسى فى أحضان المدام ويارتنى مافعلت نسيت أقلكم المدام حامل وعلى ولادة ربنا يقومها بالسلامة قولوا آمين لمّا أقتربت من الجنين سمعته بيصرخ وبيقول لأ أنا مش طالع من هنا أنا عامل عصيان مدنى وسوف أدعو كل الأجنة فى البطون يعملو زيى قلت ليه بس ياولدى ردت المدام قبليه وقالت هو أنت نمت تانى قلتلها نمت تانى إيه ياولية سيبينى باللى أنا فيه خلينى أشوف المصيبة دى حرام عليك ياولدى تعمل عصيان مدنى هى مصر يعنى ناقصة خساير قال ياأبويا أنت عاوزنى أطلع وأشوف بعينى البلطجية شغالين أحلى شغل وهات ياسرقة ونهب وقتل وتخريب وحرق ومظاهرات ومليونيات وسب وشتم والداخلية قاعدة تتفرج عليهم وبتوع حقوق ( وأنا مالى) بيقولوا الداخلية منعت التخريب الشرعى اللى بيكفله القانون وكل ده ياأبويا وعاوزنى أسيب مكانى فى بطن أمى وأنزل ياأخى دا بعدك ولا يحصل أبدا ولا أفكر فيه حتى لو جيبت لى مصانع الشبسى كله قلت ياواد إيه قلة الأدب بتعتك بتكلم أبوك بالشكل ده قال ياعم روح الكلام ده كان زمان قبل الصيعين مايشتموا الريس عينى عينك وعبر الأثير وفى كل القنوات الفضاحية والله ياحبايبى أنا لقيت روحى مكسوف من الواد وقلت فى سرى والله ياولدى معاك حق عليه العوض ومنه العوض . وزاد الضغط أكتر وبأعلى صوتى قلت ياأم حماده ألحقينى بحباية الضغط بلعتها ورحت فى سابع نومه وكنت بأحلم وقول يارب حوش عن مصر وربك كريم هيعدلها مع تحياتى أخوكم رفعت

lor][/siz

[morshooo]

منور يا ابو حمادة ^_^
سلامى للولاد وان شاء الله يكونو بخير
على فكرة لو المدام شافت التوبيك هتفرح
عشان انتا عمال تغازلها هنا ^_^
ربنا يخلهملك .
بالنسبة بقى للجنين والله عندة حق
وبركاتك يا شيخ مرسى حتى الجنين
ماسبوش فى حالة وبقى حال البلد مش عاجبة ^_^
اهلا بيك يا كبير
وعايزين نشوفك دائما بتفضفض فى اليوميات ^_^

[حنـــــون]

انا هسيب كله بئه
وعاوزه اعرف دلوقتى حالا
يعنى ايه الكلمه دى

اقتباس العيال ربنا يهديهم ويصلح حالهم من كتر المهابية طول النهار

حالا اهو تقولى ايه المهابيه دى بئه هه
يالهوى ع اللغه العظيمه ههههههههه
كويس ياسيدى انك فضفضت وارتحت الحمدلله

[Lost Pearl]

اقتباس سيبك من الأخبار وادينى بأرش لب أتسلى علشان بحب

انا كمان عايزة اعرف يعني ايه بأرش


سيبك من السياسة دلوقتي مش هتجيبلنا غير الضغط ،، يا بخت المدام ههههههههه

ربنا يوفقكو و يرزقكو بالمولود ده علي خير يا رب

منور بفضفضتك يا استاذ رفعت

و سيبك من السياسة حقا

فـ انتظار فضفضاتك دايما .،

[نجم وزهره ومسافات فراق]

ما هو دا الطبيعي يا استاذ رفعت
وعشان احنا كمصريين شعب الغرايب والنوادر
اغلب الناس بسيطة او معدومة الفكر اختاروا الفصيل ده
وبرغم تحذيرات بعض كبار السياسه
اتهمهم انفم فلوليين
ودلوقتي بيلطموا ويصرخوا بعد ما خربت
ومش عارفين رايحين بينا لفين وبكره مخبي في ايه
بجد شيئ يجيب كل الامراض
على كل حال
ربنا يحفظ البلد يارب
حضرتك خليتني افضفض انا كمان
واهو يمكن الواد يرتاح
ربنا يسعد حالك وحال الجميع يارب
تحياتي وودي

[العاشق الذى لم يتب]

اقتباس المشاركة الأصلية كتبت بواسطة morshooo منور يا ابو حمادة ^_^ سلامى للولاد وان شاء الله يكونو بخير على فكرة لو المدام شافت التوبيك هتفرح عشان انتا عمال تغازلها هنا ^_^ ربنا يخلهملك . بالنسبة بقى للجنين والله عندة حق وبركاتك يا شيخ مرسى حتى الجنين ماسبوش فى حالة وبقى حال البلد مش عاجبة ^_^ اهلا بيك يا كبير وعايزين نشوفك دائما بتفضفض فى اليوميات ^_^

الله يخليك أخويا الغالى
أنت منور القسم والمنتدى كله والله
وبعزك فوق ماتتصور
ليست مجاملة بل حقيقة لأننى أرى فيك نشاط وجهد عظيم
ومودة ومحبة للجميع
يسعدك ربى الكريم
وربنا يحوش عن مصرنا آمين
والقسم ده غالى عندى جدا بس كنت مقصر فى حقه
وبإذن الله أحاول أكون متواجد بالشكل المطلوب
أسعدنى مرورك وردك
تقبل تحياتى وودى
رفعت

[العاشق الذى لم يتب]

اقتباس المشاركة الأصلية كتبت بواسطة حنـــــون انا هسيب كله بئه وعاوزه اعرف دلوقتى حالا يعنى ايه الكلمه دى حالا اهو تقولى ايه المهابيه دى بئه هه يالهوى ع اللغه العظيمه ههههههههه كويس ياسيدى انك فضفضت وارتحت الحمدلله

أنت نورتينى وفرحتينى بمرورك أختى حنونة
وعلشان حضرتك زعيمة كبار الإداريون
أكيد هيبقى لى الشرف الكبير بتشريف سعادتك لموضوعى
وحالا هجاوب على سؤالك ياست المديرة
المهابية أصلها فى اللغة العربية (كثرة نشاط)
وتطلق على صغر السن حيث يجهدون أنفسهم بدون جدوى
أتمنى أن أكون أوفيت الشرح
لك عظيم تحياتى ومودتى
أخوك
رفعت

[العاشق الذى لم يتب]

اقتباس المشاركة الأصلية كتبت بواسطة lost pearl انا كمان عايزة اعرف يعني ايه بأرش سيبك من السياسة دلوقتي مش هتجيبلنا غير الضغط ،، يا بخت المدام ههههههههه ربنا يوفقكو و يرزقكو بالمولود ده علي خير يا رب منور بفضفضتك يا استاذ رفعت و سيبك من السياسة حقا فـ انتظار فضفضاتك دايما .،

عظيمتنا لوجى
شرفتينى بمرورك الغالى
وياأختى من كتر هم السياسة الواحد متهيئلى والله أعلم أصابنى الزهيمر والعياذ بالله
ولمّا يكون الواحد مقهور ومتغاظ أهو بيخترف والسلام
وبعدين معاك حق ماتعرفيش الإرش هو وضع الهمزة من تحت بدل السابقة من أعلى
وهو قرش جزئ من الجنيه وبلهجتنا حذفت القاف ووضع بدلامنها همزة
ودى أصلها أغنية للمرحوم شكوكو
لو حضرتك فكراها
أسعدنى مرورك وسيبك من السياسة
وتحياتى وودى لشخصك الفاضل
رفعت

[العاشق الذى لم يتب]

اقتباس المشاركة الأصلية كتبت بواسطة نجم وزهره ومسافات فراق ما هو دا الطبيعي يا استاذ رفعت وعشان احنا كمصريين شعب الغرايب والنوادر اغلب الناس بسيطة او معدومة الفكر اختاروا الفصيل ده وبرغم تحذيرات بعض كبار السياسه اتهمهم انفم فلوليين ودلوقتي بيلطموا ويصرخوا بعد ما خربت ومش عارفين رايحين بينا لفين وبكره مخبي في ايه بجد شيئ يجيب كل الامراض على كل حال ربنا يحفظ البلد يارب حضرتك خليتني افضفض انا كمان واهو يمكن الواد يرتاح ربنا يسعد حالك وحال الجميع يارب تحياتي وودي

وطبعا وقبل أى شيئ كم يفرحنى بجد وجودك فى متصفحى
بتشعرنى بالبهجة والسرور لأانى أعزك جدا وأرى فيك نجومية تستتر خلف مواضيعك المتعددةو المتنوعة
أتمنى لك كل الخير
والحمدلله أنك فضفضت معاى شوية
والله أسأل أن يحفظ مصر من كل سوء
تقبل تحياتى وودى
رفعت